ಪ್ರಕಾಶಿತ್ 7:17 - ದೇವ್ನಿ ಖ್ಹಾಚಿ ವಚನ್

¹⁷ ಶನಕತೊ ಸಿಂಹಾಸನ್ನ ಇಚ಼್‌ಮ ಛಾ಼ತೆ ಬಲೀನ ಮೇಂಢಾನು ಚೆಲ್ಕು ಹುಯಿರ‍್ಹವಾಳೊ ಇವ್ಣುನ ಕುರುಬನಿತರ ರ‍್ಹೀನ್ ಜಾನ್ನು ಪಾಣಿನು ಚೆಜ಼್‌ಭಾರಕನ ಚ಼ಲೈಲಿಜಾಷೆ ಅಜು಼ ದೇವ್ ಇವ್ಣ ಡೋಳಾನು ಆಂಝು಼ಖ್ಹಾರು ನೂಛಿನಾಕ್ಷೆ ಕರಿ ಬೋಲ್ಯು.

ಪ್ರಕಾಶಿತ್ 7:17 ပူးပေါင်းရင်းမြစ်များ

ಮತ್ತಾಯ 2:6

ಯೆಹೂದ ತಬರ್‌ಖಾನು ಬೇತ್ಲೆಹೇಮ್, ಯೆಹೂದನು ಮುಖ್ಯ ಖ್ಹಯೇರೇಥಿ, ತೂ ಎತ್ರೇಬಿ ಶಾತ್ ನ್ಹಾನು ಕಾಹೆ. ಶನಕತೊ ತಾರ ಮಹಿಥು ಏಕ್‌ ಅದಿಕಾರಿ ಆವ್‌ಶೆ, ಯೋ ಮಾರು ಅದ್ಮಿ ಹುಯಿರ‍್ಹೂತೆ ಇಸ್ರಾಯೇಲ್‌ನ ಚ಼ಲಾವವಾಳೊ! ಕರಿ ಪ್ರವಾದಿನ ಹಾತೆ ಲಿಖೈರ‍್ಹುಸ್” ಕರಿ ಬೋಲ್ಯೊ.

ಮತ್ತಾಯ 5:4

ಕೋಣ್ ದುಖ್‌ಮ ಛಾ಼ಕಿ, ಇವ್ಣೆ ಧನ್ಯ ಹುಯಿರ‍್ಹುಸ್‍ ದೇವ್ ಇವ್ಣುನ ಸಮಾಧಾನ್‍ ದಿಶೆ.

ಯೋಹಾನ 10:11

ಮೇಸ್ ಅಛ್ಛೊ಼ ಕುರುಬ; ಅಛ್ಛೊ಼ ಕುರುಬ ಇನ ಮೇಂಢ ಖ್ಹಾರಾನಖ್ಹಾಜೆ ಇನು ಜಾನ್ನಾಸ್ ದೇಸ್.

ಯೋಹಾನ 10:14

ಮೇಸ್ ಅಛ್ಛೊ಼ಕುರುಬ ಹುಯಿರೊಸ್; ಬಾನೆ ಮನ ಅಜು಼ ಮೇ ಬಾನ ಮಾಲುಮ್‌ ಕರಿರಾಖ್ಯೊತೆ ಇಮ್ಮಸ್, ಮೇ ಮಾರ ಮೇಂಢಾವ್ನ ಮಾಲುಮ್ ಕರಿರಾಖ್ಯೋಸ್. ಅಜು಼ ಯೊ ಮೇಂಢಾವ್ನೆ ಮನ ಮಾಲುಮ್ ಕರಿರಾಖ್ಯುಸ್. ಅಜು಼ ಮೇ ಮಾರ ಮೇಂಢಾವ್ನಖ್ಹಾಜೆ ಜಾನ್‌ ದ್ಯವಾನ ತಯಾರ್ ಹುಯಿರಿಶ್.

ಯೋಹಾನ 4:10

ಯೇಸುನೆ ಯೊ ತಯೇಡನ ಬೋಲ್ಯೊಕಿ, “ತುನ ದೇವ್ನಿ ಬಾರೇಮ ಅತ್ರುಖ್ಹು ಮಾಲುಮ್ ರ‍್ಹಿಯುಹೊತ್ತೊ ಯೊ ಕೋಣ್ ಹುಯಿರೊಸ್, ದೇವ್ ಶಾತ್‌ ದೀರಾಖ್ಯೊಸ್ ಕರಿ, ತುನ ಮಾಲುಮ್ ರ‍್ಹಿಯುಹೊತ್.ತಾರಕನ ಪಿಯ್ಯಾನ ಪಾಣಿ ಮಾಂಗ್ಯೋತೆ ಯೋ ಕೋಣ್ ಕರಿ ಮಾಲುಮ್‌ ರ‍್ಹಯುಹೋತ್ತೊ, ತೂ ಇನಾಕನ ಮಾಂಗಿಲಿದಿಹೊತ್, ಅಜು಼ ಯೋ ತುನ ಜಾನ್ನಪಾಣಿನ ದಿದೋಹೊತ್‌” ಕರಿ ಬೋಲ್ಯೊ.

ಯೋಹಾನ 4:11

ಯೋ ತಯೇಡ ಇನ, “ಪ್ರಭು, ಪಾಣಿ ಶೇಂದಾನ ತಾರಕನ ಶಾತ್ಬಿ ಕೊಯ್ನಿ, ಬಾವ್ಡಿ ಘಣಿ ಗಧಾರ್ ಛಾ಼, ಅಮ್ ರ‍್ಹವಾಪರ್ ಯೋ ಜಾನ್ನು ಪಾಣಿ ತು ಕಿಮ್ ದಿಶ್?

ಯೋಹಾನ 4:14

ಕತೋಬಿ ಮೇ ದೆವ್‍ಸ್ತೆ ಪಾಣಿನ ಕೋಣ್ ಪಿಯ್ಯಾಸ್‍ಕಿ ಇವ್ಣುನ ಕದೇಬಿ ಠೋಖ್ಹ್‌ ಲಾಗ್‌ಶೆ ಕೊಯ್ನಿ. ಮೇ ಇನ ದೀಶ್‌ತೆ ಪಾಣಿ ಇವ್ಣಾಮ ಭರೈನ್ ಝ಼ರುಕರ್‌ಶೆ. ಯೋ ಇನ ಹಮೇಶಾನಿ ಜಿ಼ಂದ್‌ಗೀನ ದಿಶೆ” ಕರಿ ಬೋಲ್ಯೊ.

ಅಪೊಸ್ತಲರ್‌ನು ಕಾಮ್‌ಖ್ಹಾರು 20:28

ಇನಖ್ಹಾಜೆ ತುಮಾರಿ ಬಾರೇಮಾಬಿ ಪವಿತ್ರಾತ್ಮನೆ, ತುಮೂನ ದೆಖಾವಾನ ದೀರಾಖ್ಯೋತೆ ಮೇಂಢಾನಿ ಮಂಧಾನಿ ಬಾರೇಮಾಬಿ ಹೊಷಾರ್‌ಥಿ ರ‍್ಹವೊ. ಅಜು಼ ಸಬೆನ ತುಮೆ ಕುರುಬಹುಯಿರ‍್ಹಾಸ್. ಶನಕತೊ ದೇವ್ ಇನ ಛಿಯ್ಯಾನ ಲ್ಹೋಯಿಥಿ ಮೋಲ್ ಲೀರಾಖ್ಯೊಸ್.

1 ಪೇತ್ರ 5:2

ತುಮುನ ದೆವೈರ‍್ಹೂಸ್ತೆ ದೇವ್ನ ಮಂಧಾನ ಕಾವ್ಲಿಕರೊ. ಜು಼ಲಮ್‌ಥಿ ಕಾಹೆ ದೇವ್ನಿ ಮರ್ಜಿನಿತರ ಪಸಂದ್‍ನಿ ಘೋಣಿ, ರಪ್ಯಾನಿ ಖರಾಬ್ ಆಖ್ಹ್‌ಥಿ ಕಾಹೆ ಖ್ಹಾಚ ದಿಲ್‌ಥಿ ಕಾವ್ಲಿಕರೊ.

ಪ್ರಕಾಶಿತ್ 14:4

ಇಮ್ಮಸ್ ತಯೇಡಾನಿ ಶವಾಶಿಥಿ ಮೈಲು ಹುಯುಕೊಂತೆ ಕವಾರಿನಿತರ ಥೂತೆ ಅವ್ಣೇಸ್. ಬಲೀನ ಮೇಂಢಾನು ಚೆಲ್ಕು ಹುಯಿರ‍್ಹಾವಳೊ ಕಿಜ್ಜಾ಼ ಗಯೊತೋಬಿ ಇವ್ಣೆ ಅನ ಪೀಠೆ ಜಾ಼ಸ್. ಅವ್ಣೆ ಅದ್ಮಿವ್‌ಮಾಥು ಶೊಂತ್ ಅದ್ಮಿಹುಯಿನ್ ಮೋಲ್ ಲೆವೈಜೈ಼ನ್ ದೇವ್‍ನಾಬಿ ಮೇಂಢೊ ಹುಯಿರ‍್ಹಾವಳನಬಿ ಪಹಿಲ ಫಲ್ನಿತರಹುಯ.

ಪ್ರಕಾಶಿತ್ 21:22

ಮೆ ಖ್ಹಯೇರ್‌ಮ ಮಂದಿರ್‌ಬಿ ದೇಖ್ಯೊ ಕೊಯ್ನಿ. ಶನಕತೊ ಸರ್ವಶಕತ್‌ನೊ ದೇವ್‌ಹುಯಿರ‍್ಹೋತೆ ಪ್ರಭು ಅಜು಼ ಮೇಂಢಾನು ಚೆಲ್ಕುಹುಯಿರ‍್ಹವಾಳೊ ಯೊ ಇನು ಮಂದಿರ್‌ ಹುಯಿರ‍್ಹೂಸ್.

ಪ್ರಕಾಶಿತ್ 21:23

ಖ್ಹಯೇರ‍್ನ ಉಜಾ಼ಳು ದ್ಯವಾನ ಚಾ಼ಂದ್‌ರ‍್ಹವೊ ಚ಼ಂದರ್‌ಮೊರ‍್ಹವೊ ಹೋಣುಥುಕೊಯ್ನಿ ಶನಕತೊ ದೇವ್ನಿ ಮಹಿಮೆಸ್ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಮೇಂಢಾನು ಚೆಲ್ಕುಸ್ ನಂಗರ‍್ನ ದೀವೊ ಹುಯಿರ‍್ಹೋಥೊ.

ಪ್ರಕಾಶಿತ್ 21:4

ಯೊ ಇವ್ಣ ಆಂಝಾ಼ನ ನೂಛಿನಾಕ್ಷೆ. ಹಿಜ್ಜಾ಼ ಪಾಛು಼ ಮರಣ್ ರ‍್ಹಿಶೆಕೊಯ್ನಿ, ಪಾಛು಼ ದುಖ್ ರ‍್ಹಿಶೆಕೊಯ್ನಿ, ಖ್ಹರಪ್‌ಗೋಳ್‌ ಕೊರ‍್ಹಿಶೇನಿ, ಅಜು಼ ವದೇಖ್ಹೊ ಕೊರ‍್ಹಿಶೇನಿ ಜೂ಼ನೊ ಮಾರಗ್‌ಖ್ಹಾರು ಚ಼ಲಿಗಯು” ಕರಿ ಬೋಲ್ಯು.

ಪ್ರಕಾಶಿತ್ 21:6

ತದೆ ಸಿಂಹಾಸನ್‌ಪರ್ ಬೆಠೊಥೋತೆ ಇನೆ, “ಅಖ್ಖೂಸ್ ಕರಿಹುಯ್ಗು; ಮೇಸ್ ಪಹಿಲೋಬಿ, ಖ್ಹರ್ತಿಬಿ, ಶುರುವಾತ್‍ಬಿ, ಖತಮ್‌ಬಿ ಹುಯಿರ‍್ಹೋಸ್. ತರ್ಖ್ಹವಾಳನ ಜಾನ್ನು ಪಾಣಿನೊ ಚೇಜ಼್‌ಭಾರನ ಮೋಲ್‌ಕೊಂತೆ ಫುಗಟ್‍ಥಿ ಪಿಯಾನ ದಿಶ್.

ಪ್ರಕಾಶಿತ್ 22:1

ಅನಕೇಡೆಥು ದೇವ್ನದೂತನೆ ಫಟಕ್‌ಡಿನಿಘೋಣಿ ಉಜಾ಼ಖ್ಹ್‌ ದ್ಯವಾನು ಜಾನ್ನು ಪಾಣಿನ ನದ್ದೀನ ಮನ ವತಾಳ್ಯೊ. ಯೊ ನದ್ದಿ ದೇವ್ ಬಿಜು಼ ಮೇಂಢಾನ ಚೆಲ್ಕಾನು ಸಿಂಹಾಸನ್‌ಕಂಥು ಉಬ್ಜಿನ್,

ಪ್ರಕಾಶಿತ್ 4:11

ಹಮಾರೊ ಪ್ರಭು ಹುಯಿರ‍್ಹೋತೆ ದೇವ್, ತೂ ಮಹಿಮೆನಾಬಿ ಮಾನ್ ಮರ‍್ಯಾದಿನಾಬಿ ಶಕತ್ನ ಲೀಲಾವನ ಯೋಗ್ಯಹುಯಿರೋಸ್, ಶನಕತೊ ಹರೇಕ್ನ ಉಬ್‌ಜಾ಼ಯೋತೆ ತೂಸ್, ಅಖ್ಖೂಬಿ ತಾರೀಸ್ ಖ್ಹೂಜ಼್‌ಥಿಥು.ಅಜು಼ ತಾರೀಸ್ ಖ್ಹಯಾಲ್‌ಥಿ ಬಣಾವಟ್ ಹುಯು ಕರಿ ಬೋಲ್ತುಹುಯಿನ್ ಆರಾದನೆ ಕರುಕರ್ತುಥು.

ಪ್ರಕಾಶಿತ್ 5:6

ಸಿಂಹಾಸನ್‌ಬಿ ಚಾರ್ ಜೀವಿಬಿ ಥೂತೆ ಝಗೋಕನಾಬಿ ಅಜು಼ ಶಾಣುಖ್ಹಾರು ಥೂತೆ ಝ಼ಗೋನ ಇಚ಼್‌ಮ ಏಕ್‌ ಮೇಂಢಾನ ಭಿಯುರ‍್ಹವಾನು ದೇಖ್ಯೊ. ಯೋ ಹಮ್ಕೆ ತದೇಸ್‌ ಬಲೀನಖ್ಹಾಜೆ ರ‍್ಹೇಖ್ಹಯ್‌ ರ‍್ಹಾವನಿತರ ದೆಖವ್‌ಕರ್ತುಥು. ಯೋ ಮೆಂಢಾನ ಚೆಲ್ಕಾನ ಖ್ಹಾತ್ ಶಿಂಗ್ಡು ಖ್ಹಾತ್ ಡೋಳಾವ್‌ಥು. ಆಖ್ಹಾರು ಧರ್ತಿಪರ್ ಮೋಕ್‌ಲೈರ‍್ಹುಥೂತೆ ದೇವ್ನು ಖ್ಹಾತ್ ಆತ್ಮ ಹುಯಿರುಥು.