ಮತ್ತಾಯ 5:12 - ದೇವ್ನಿ ಖ್ಹಾಚಿ ವಚನ್

¹² ಖ್ಹುಶಿ ಕರೊ ಅಜು಼ ಖೇಲ್‌ಕೂದ್ ಕರೊ, ಶನಕತೊ ಸೊರ್ಗಾಮ ತುಮೂನ ಘಣು ಇನಾಮ್ ಮಳ್‌ಶೆ. ತುಮಾರೇಥೀಬಿ ಅಗಾಡಿ ಥೂತೆ ಪ್ರವಾದಿಯೆನಾಬಿ ಅಮ್ಮಸ್ ಖ್ಹತಾಯುನಿ.

ಮತ್ತಾಯ 5:12 ပူးပေါင်းရင်းမြစ်များ

ಮತ್ತಾಯ 16:27

ಅದ್ಮಿನೊ ಛಿಯ್ಯೊ ಇನ ಬಾನಿ ಮಹಿಮೆಥಿ ಅಜು಼ ಇನ ದೂತರ್‌ನ ಜೋ಼ಡೆ ಆವ್‌ಶೆ; ಯೋ ವಖ್ಹತ್‌ಮ ಏಕೇಕ್‌ನ ಇವ್ಣಿ ಚಾ಼ಲ್‌ನಿಘೋಣಿ ಇನಾಮ್ ದಿಶೆ.

ಮತ್ತಾಯ 6:16

“ತುಮೆ ಉಪವಾಸ್ ಕರಾನಿ ವಖ್ಹತ್‌ಮ, ಖೋಟ್ ದಿಲ್‌ವಾಳನಿಘೋಣಿ ಮ್ಹೋಡು ನಾ ಮುರ್‌ಝೈ಼ಲೇಣು. ಇವ್ಣೆ ಉಪವಾಸ್ ಛಾ಼ ಕರಿ ಅದ್ಮಿಯೇನ ವತಾಳಿಲೆವಾನಖ್ಹಾಜೆ ಇವ್ಣು ಮ್ಹೋಡಾನ ಇಮ್‌ ಕರಿಲೇಸ್, ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಇವ್ಣುನ ಮಳ್‌ಣುತೆ ಇನಾಮ್ ತದೇಸ್‌ ಮಳಿಗಯು.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 13:34

ಯೆರೂಸಲೇಮ್‌, ಯೆರೂಸಲೇಮ್‌ ತೂ, ಪ್ರವಾದಿ ಖ್ಹಾರಾನೊ ಜಾನ್‌ ಕಾಡಾವಾಳಿ. ದೇವ್ನೆ ತಾರಕನ ಮೋಕ್‌ಲ್ಯೊತೆ ಖ್ಹಾರಸ್ನ, ಬಂಡೊ ಫೇಕಿನ್ ಮಾರವಾಳಿ, ಮುರ್‌ಗಿ ಇನ ಚೇಲ್ಕಾನ ಇನಿ ಪಾಖ್ಡಿಯೆಮ ಪೆಖ್ಹಾಡಿಲೇಯಿತೆ ಇಮ್‌, ತಾರ ಲಡ್ಕಾವ್ನ ಮೇ ಪೆಖ್ಹಾಡಿಲೇವ್ಣು ಕರಿ ಮನ ಕೆತ್ರಿಕ್ಕಿಹಲ್ಲ ಮನ್‍ಹುಯು, ಕತೋಬಿ ತುನೆ ಅಮ್ ಕರಾನ ಮ್ಹೇಲಿಕೊಯ್ನಿ!

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 6:23

ಅಮ್ ಖ್ಹಾರು ಹುಯೂತೊ ಖ್ಹುಶಿಥಿ ಖೇಲ್‌ಕೂದ್ ಕರೊ, ಶನಕತೊ ಸೊರ್ಗಾಮ ತುಮೂನ ಘಣು ಇನಾಮ್ ಮಳ್‌ಶೆ. ಆ ಅದ್ಮಿನು ಗುರುಗುರಬ್‍ಲ್ಯಬಿ ಪ್ರವಾದಿನ ಖ್ಹಾರು ಅಮ್ಮಸ್ ಕರ‍್ಯುನಿ.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 6:35

ಇನಖ್ಹಾಜೆ, ತುಮಾರ ದುಶ್‌ಮನ್ನ ಲಾಡ್‍ಪ್ರೀತ್ ಕರೊ ಅಜು಼ ಇವ್ಣುನ ಅಛ್ಛು಼ಕರೊ. ತುಮೆ ಇವ್ಣುನ ಉಧಾರ್ ದ್ಯವಾನಿ ವಖ್ಹತ್‌ಮ, ಫಾಛು಼ ಇವ್ಣೇಥಿ ಮಳ್‌ಶೆ ಕರಿ ಬೋಲಾನಿ ಆಖ್ಹ್‌ನ ಮ್ಹೆಂದಿನ್, ಉಧಾರ್ ದೆವೊ. ತದೆ ತುಮುನ ಘಣು ಇನಾಮ್ ಮಳ್‍ಶೆ ಅಜು಼ ತುಮೆ ಪರಮಂಡಲ್‌ನೊ ದೇವ್ನ ಲಡ್ಕಾಉಶು. ಯೋತೊ ಕರ್ಮಿಷ್ಟಿನಾಬಿ, ಖರಾಬ್‌ನಾಬಿ ಅಛ್ಛೊ಼ ಹುಯಿರ‍್ಹೋಸ್.

ಅಪೊಸ್ತಲರ್‌ನು ಕಾಮ್‌ಖ್ಹಾರು 16:25

ಅಧಿರಾತ್ಮ ಪೌಲಬಿ ಸೀಲನೆ ಪ್ರಾರ್ಥನೆ ಕರ್ತಹುಯಿನ್ ದೇವ್ನ ಸ್ತುತಿನು ಗೀದ್‌ ಬೋಲುಕರ್ತಾಥ. ಹಿಜ಼್ಜಾಥೂತೆ ಖೈದಿಖ್ಹಾರು ಖ್ಹಮ್‍ಜು಼ಕರ್ತುಥು.

ಅಪೊಸ್ತಲರ್‌ನು ಕಾಮ್‌ಖ್ಹಾರು 5:41

ಅಪೊಸ್ತಲರ್ ನ್ಯಾವ್‍ನಿ ಘಲ್ಡಾನಿ ಸಭೆಮಾಥು ನಿಕ್ಳಿನ್ ಚ಼ಲೇಗಯ. ಯೇಸುನ ನಾಮ್ನಖ್ಹಾಜೆ ಖ್ಹರಮ್‌ ಕಡೈಲ್ಯಾವಾನ ಹಮೆಯೋಗ್ಯರ್ ಹುಯಾಕರಿ ಖುಷಿಕರ‍್ಯು.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 5:3

ಎತ್ರೇಸ್ ಖಲಿಕಾಹೆ, ಅಪ್ಣುನ ಆವಸ್ತೆ ಖ್ಹತಾಪ್ಣಿಮಾಬಿ ಖುಷಿಥಿ ಛಿಯೆ. ಕತೋಬಿ ಖ್ಹತಾಪ್ಣಿ ಖ್ಹಮಾಳಿ ರ‍್ಹವಾನ ಶಿಕಾಡಸ್‌ಕರಿ ಅಪ್ಣುನ ಮಾಲುಮ್‌ ಛಾ಼.

1 ಕೊರಿಂಥ 3:8

ಪಂಡಾನ ಗಾಡವಾಳು ಅಜು಼ ಪಾಣಿ ನಾಖಾವಾಳನಿ ಖ್ಹೂಜ಼್ ಎಕ್ಕಸ್ ಹುಯಿರ‍್ಹೀಸ್. ಕತೋಬಿ ಹರೇಕ್ನ ಇವ್ಣಿ ಮ್ಹಿನತ್‌ನಿ ಘೋಣಿ ಇವ್ಣುನ ಪ್ರತಿಫಲ್ ಮಳಸ್.

2 ಕೊರಿಂಥ 4:17

ಥೋಡ ದನ್‌ಲಗು ಹಮೂನ ನ್ಹಾನಿಮೋಟಿ ಖ್ಹತಾಪ್ಣಿ ರ‍್ಹಿಶೆ. ಕತೋಬಿ ಹರ್‌ಹಮೇಶಾನಿ ಮಹಿಮೆನ ಲೀಲ್ಯಾವಾನ ಯೋ, ಅಪ್ಣುನ ಮದತ್ಉಶೇ. ಯೊ ಮಹಿಮೆ ಹಮ್ಕೇನಿ ಖ್ಹತಾಪ್ಣಿಥೀಬಿ ಮಹಾನ್ ಹುಯಿರ‍್ಹಿಶೆ.

ಫಿಲಿಪ್ಪಿ 1:29

ಕ್ರಿಸ್ತನವಾಳಾನ ಹಾತ್‌ ಫೈಲೈನ್ ದ್ಯವಾಳ ಹುಯಿರೇವೊ. ಕ್ರಿಸ್ತಪರ್ ವಿಶ್ವಾಸ್‌ರಾಖಾನು ಖಲಿ ಕಾಹೆ ಇನಖ್ಹಾಜೆ ವದೇಖ್ಹ್‌ಪಡಾನುಬಿ ಅಛ್ಛು಼ ವರ ಮಳಿರ‍್ಹೂಸ್‌.

ಫಿಲಿಪ್ಪಿ 2:17

ತುಮಾರಿ ವಿಶ್ವಾಸ್ ಕರಿ ಬಲೀನ ಕಾಣ್ಕೆಮ ದೇವ್ನ ಮೇ ಅರ್ಪಣ್‌ಕರಾಮ ಮಾರ ಲೋಹಿನ ವವ್ಹಾಡನಿತರ ಹುಯುತೋಬಿ ಮನ ಖುಷಿ, ತುಮಾರ ಜೋ಼ಡೇಬಿ ಶಂತೋಖ್ಹ್‌ ಪಡುಸ್.

ಕೊಲೊಸ್ಸೆ 1:24

ಹಮ್ಕೆ ಮೇ ತುಮಾರಖ್ಹಾಜೆ ಪಡುಕರೂತೆ ಖ್ಹತಾಪ್ಣಿಮ ಮನ ಖುಷಿ ಛಾ಼. ಕ್ರಿಸ್ತನು ವದೇಖ್ಹ್‌ಮ ಜ಼ರೂರತ್ ಛಾತೆ ಇನ ಸಬೆಕರಿ ಬೋಲಾನ ಶರೀರ್‌ನಖ್ಹಾಜೆ ಮೆ ಮಾರ ಶರೀರ್‌ಮ ಖ್ಹರ್ತಿಕರೂಸ್.

ಕೊಲೊಸ್ಸೆ 3:24

ಪ್ರಭುಥಿ ಸೇವೆನು ಪ್ರತಿಫಲ್ ಮಳ್‍ಶೇಕರಿ ಖ್ಹಯಾಲ್ಮ ರಾಖಿರಾಖೊ. ಪ್ರಭು ಕ್ರಿಸ್ತ ಅದ್ಮೆವ್‍ನ ಕರ‍್ಯೊತೆ ವಾಗ್ದಾನ್ ತುಮಾರ ಯಾದ್ಮ ರ‍್ಹವಾದೆ.

1 ಥೆಸ 2:15

ಇವ್ಣೆ ಪ್ರಭು ಹುಯಿರ‍್ಹೋತೆ ಯೇಸುನಾಬಿ, ಖ್ಹಾರ ಪ್ರವಾದಿನಾಬಿ ಮರೈನಾಖ್ಯು ಅಜು಼ ಹಮುನಾಬಿ ನಖ್ಹಾಡಿದಿದು. ಇವ್ಣೆ ದೇವ್ನ ಖ್ಹಾಜಾ಼ತೆ ಇಮ್‌ ಕರಾವಾಳು ಕಾಹೆ! ಅಜು಼ ಇವ್ಣೆ ತಮಾಮ್‌ ಅದ್ಮಿನ ಖೂಮ್ನ ದುಶ್‌ಮನ್‌ ಹುಯಿರ‍್ಹಾಸ್!

ಇಬ್ರಿ 10:34

ತುಮೆ ಜೇಲ್‌ಮ ರ‍್ಹವಾಳನ ಆರ್‌ಗೋರ್‌ ಒತಾಳ್ಯ. ಅನೇಥಿ ಊಚು಼ ಹುಯಿರ‍್ಹುತೆ ಹಮೇಶಾನಿ ಆಸ್ತಿ ಛಾ಼ಕರಿ ಮಾಲುಮ್ ಕರಿಲಿದ ತುಮಾರಿ ಶೊತ್ನ ಛಿನೈಲ್ಯವಾಳಾನ ಶಂತೋಖ್ಹ್‌ಥಿ ಮ್ಹೇಲಿರಾಖ್ಯಸ್.

ಇಬ್ರಿ 11:26

ಈಜಿಪ್ಟ್‌ನು ಅಖ್ಖಿ ಧನ್‌ದೌಲತ್‌ಥೀಬಿ ಕ್ರಿಸ್ತನಖ್ಹಾಜೆ ಹುವಾಸ್ತೆ ಚಿಂಘಾವ್ಣೀಸ್ ಮೋಟಿ ಭಾಗ್ಯಕರಿ ಮಾನಿಲಿದೊ. ಶನಕತೊ ಖ್ಹಾಮ್ಣೆಆವಾನಿ ಪ್ರತಿಫಲ್‌ಪರ್ ಡೋಳೊ ರಾಖಿಮ್ಹೆಲ್ಯೊಥೊ.

ಇಬ್ರಿ 11:33

ವಿಶ್ವಾಸ್‌ಥೀಸ್ ಇವ್ಣೆ ರಾಜ್ಯಖ್ಹಾರೂಬಿ ಜುತ್ಯು, ನ್ಯಾಯನೀತಿಥಿ ಚ಼ಲಾಯು, ವಾಗ್ದಾನ್ ಖ್ಹಾರೂಬಿ ಲೀಲಿದು, ಶುಂಭಾವ್‌ನ ಮ್ಹೋಡಾನ ಭಾಂಧ್ಯು,

ಇಬ್ರಿ 11:6

ಕತೋಬಿ ವಿಶ್ವಾಸ್‍ಕೊಂತೆ ದೇವ್ನ ಲ್ಹಾಯಕ್ ಕರಾವನ ಕೊಹುವಾನಿ. ಶನಕತೊ ದೇವ್‌ಕನ ಆವಾಳೊ ದೇವ್ ಛಾ಼ ಅಜು಼ ಇನ ಢೂಂಡವಾಳನ ಪ್ರತಿಫಲ್ ದೇಸ್‌ಕರಿ ವಿಶ್ವಾಸ್‌ಕರ‍್ನು.

ಯಾಕೋಬ 1:2

ಮಾರ ಭೈಯೇ ಭೇನೆವೊ, ತುಮೆ ಥರಥರಾನು ವದೇಖ್ಹ್‌ ಝೇಲಾನಿ ವಖ್ಹ್‌ತೆ ಇನ ತುಮೆ ಹೈರುತೆ ಖಲಿ ಖ್ಹುಶಿಕರಿ ಬೋಲಿನ್ ಖ್ಹಮಾಳಿಲೇವೊ.

ಯಾಕೋಬ 5:10

ಭೈಯೇ ಭೇನೆವೊ, ವದೇಖ್ಹಾನ ಖ್ಹಮಾಳಿಲ್ಯಾವಾನಿ ಬಾರೇಮ ಪ್ರಭುನ ನಾಮ್‍ಥಿ ವಾತ್ ಬೋಲ್ಯಾತೆ ಪ್ರವಾದಿ ಖ್ಹಾರನಾಸ್ ಯಾದ್ ಕರಿಲೆವೊ.

1 ಪೇತ್ರ 4:13

ಕತೋಬಿ ತುಮೆ ಕೆತ್ರೆಪರಕ್ಮ ಕ್ರಿಸ್ತನಿ ಖ್ಹತಾಪ್ಣಿವ್‌ಮ ಭಾಗ್‌ವಾಳ ಹುಯಿರಾಸ್ಕಿ ಎತ್ರಸ್‍ಪರಕ್ಮ ಖುಷಿ ಪಡೊ. ಇನಖ್ಹಾಜೆ ಯೋ ಮಹಿಮೆಥಿ ಆವಾದಿನ್ ತುಮೆ ದೇಖಿನ್ ಘಣಿ ಖುಷಿಥಿ ಭರೈಜಾಶು.