10 ದೇವ್ ಇನ ಕಾಮ್ನ ಖ್ಹತಮ್ಕರೀನ್ ಕಿಮ್ ಆರಾಮ್ ಕರ್ಯೋಕಿ ಇಮ್ಮಸ್ ಇನ ಆರಾಮ್ಮ ಆವಾಳೂಬಿ ಇವ್ಣ ಕಾಮ್ನ ಖ್ಹತಮ್ಕರೀನ್ ಅರಾಮ್ ಕರ್ಶೆ.
ಯೇಸುನೆ ಯೋ ರಖ್ಹ್ನ ಪೀನ್, “ಖತಮ್ ಹುಯಿಗಯು!” ಕರಿ ಬೋಲಿನ್, ಮುಡ್ಕ್ಯು ಝು಼ಕೈನ್, ಇನಿ ಆತ್ಮಾನ ದೀನಾಖ್ಯೊ.
ಯೋಸ್ ದೇವ್ನು ಮಹಿಮೆನು ಉಜಾ಼ಖ್ಹ್ಬಿ, ದೇವ್ನಿ ಪ್ರತಿರೂಪ್ಬಿ, ಇನಿ ವಚನ್ ಶಕಥ್ಥಿ ಅಖ್ಖಾಸ್ನ ಆಧಾರ್ ಹುಯಿನ್ ಯೋಸ್ ಅದಮ್ಜ಼ಮಾನನಿ ಪಾಪ್ನ ಶುದ್ದಿಕರಿನ್ ಸೊರ್ಗಾಮ ಮಹಾನ್ ದೇವ್ನು ಖಾವಿಬಾಜು಼ಮ ಬೇಶಿಗಯೊ.
ಕತೋಬಿ ಕ್ರಿಸ್ತ ಪಾಪ್ನಖ್ಹಾಜೆ ಅಖ್ಖಾ ಹಗಾಮ್ಮ ಎಕ್ಕಸ್ಬಲಿನ ಸಮರ್ಪಣ್ಕರೀನ್, ದೇವ್ನ ಖಾವಿಬಾಜು಼ ಬೇಶಿಗಯೊ.
ಇನಖ್ಹಾಜೆ ದೇವ್ನ ಅದ್ಮಿನ ಸಬ್ಬತ್ ಕರಿ ಅರಾಮ್ನದನ್ ಬಿಜೂ಼ಬಿ ಛೆ.
ಪರಲೋಕ್ಥು ಏಕ್ ಅವಾಜ಼್ ಮನ ಖ್ಹಮಜ್ಪಡ್ಯು. ಇನೆ ಹಂಕೇಥು ಪ್ರಭುನ ಭಕ್ತರ್ಹುಯಿನ್ ಮರಾವಳು ಧನ್ಯಕರಿ ಲೀಖ್ಕರಿ ಮನ ಬೋಲ್ಯು. ಇನ ಆತ್ಮನೆ, ಒಹೊ ಇವ್ಣೆ ಧನ್ಯರಸ್. ಇವ್ಣೆ ಇವ್ಣ ಮ್ಹಿನತ್ನ ಖತಮ್ಕರಿನ್ ಅರಾಮ್ ಕರ್ಶೆ ಅಜು಼ ಇವ್ಣು ಅಛ್ಛು಼ ಕಾಮ್ಖ್ಹಾರು ಇವ್ಣ ಜೋ಼ಡ್ಮ ಚಾ಼ಲ್ಷೆ ಕರಿ ಬೋಲ್ಯೊ.
ತದೆ ಇವ್ಣಾಮ ಅಖ್ಖಾಸ್ ಜ಼ಣಾನ ಏಕೇಕ್ ಧೋಳೊ ಝ಼ಗ್ಗೊ ದೆವಾಯು. ಅಜು಼ ಥೋಡಿ ವಖ್ಹತ್ ಟಿವೈರ್ಹೇಣುಕರಿ ಯೋ ಆತ್ಮವ್ನ ಖ್ಹಮ್ಜಾ಼ಡ್ಯು. ತುಮಾರಿನಿತರ ಖೂನಿ ಹೋಣುತೆ ಭೈಯೇಮ ಥೋಡುಜ಼ಣು ಅಜು಼ ಜೋ಼ಡ್ನ ಚಾ಼ಕ್ರಿ ಕರಾವಳನಿ ಗಣ್ತಿ ಪೂರ ಹುವಾಲಗು ಅರಾಮ್ಥಿ ರ್ಹೇವ್ಣುಕರಿ ಇವ್ಣುನ ಬೋಲಾಯು.