2 ಕೊರಿಂಥ 11:3 - ದೇವ್ನಿ ಖ್ಹಾಚಿ ವಚನ್

³ ಕತೋಬಿ ಹವ್ವ ಖ್ಹಾಪ್‍ನ ಲಬುಜ಼್‌ನಿ ವಾತ್ಮ ಮೈಕಮ್‍ಹುಯಿನ್ ಧೋಕಹುಯಿತೆ ತಿಮ್ ತುಮಾರು ದಿಲ್‌ ಕ್ರಿಸ್ತನಿ ಬಾರೇಮ ರ‍್ಹೇವ್ಣುಥೂತೆ ಶುದ್ಧಮನ್‌ಥೀಬಿ ಪರಿಶುದ್ ಭಕ್ತಿನಾಬಿ ಮ್ಹೇಲಿನ್ ಖರಾಬ್ ಹುಯಿಜಾ಼ಶೆಕರಿ ಡರ್‌ ಮಾರಾಮ ಛಾ಼.

2 ಕೊರಿಂಥ 11:3 ပူးပေါင်းရင်းမြစ်များ

ಮತ್ತಾಯ 24:24

ಶನಕತೊ ಝೂ಼ಟುಕ್ರೈಸ್ತರ್‌ ಖ್ಹಾರು ಅಜು಼ ಝೂ಼ಟು ಪ್ರವಾದಿಖ್ಹಾರು ದೆಖೈನ್, ಇವ್ಣೇಥಿ ಹುಯೂತೊ ದೇವ್‍ಥಿ ಚೂ಼ಣೈರ‍್ಹವಾಳನಾಬಿ ಠಗಾವಾನಖ್ಹಾಜೆ, ಅದ್ಭುತ್‌ಕಾಮ್‌ ಅಜು಼ ಅಶ್ಚರ್ಯನು ಕಾಮ್‌ಖ್ಹಾರು ಕರಿ ವತಾಳ್‌ಶೆ.

ಯೋಹಾನ 8:44

ಶೈತಾನಸ್ ತುಮಾರೊ ಬಾ, ಇನ ತುಮೆ ಛಿಯ್ಯಾ ಹುಯಿರಾಸ್, ಇನೀನಿಘೋಣಿ ಖರಾಬ್ ಆಖ್ಹ್‌ನ ಕರಾನ ದೇಖೊಸ್‍. ಯೋ ಶುರುವಾತ್‌ಥೋಸ್ ಖೂನಿಹುಯಿರ‍್ಹೊಸ್ ಅಜು಼ ಖ್ಹಾಚಾಮ ಟಿಕ್ಯೊಕೊಯ್ನಿ. ಶನಕತೊ ಇನಾಮ ರತ್ತಿಬಿ ಖ್ಹಾಚಿ ಕೊಯ್ನಿ, ಯೋ ಝೂ಼ಟಿ ಬೋಲಾನಿ ವಖ್ಹತ್‌ಮ ಆದತ್‌ನಿಘೋಣಿ ಬೋಲಾಸ್, ಶನಕತೊ ಯೋ ಝೂ಼ಟಿಸ್ ಬೋಲವಾಳೊ ಅಜು಼ ಹರ್ ಥರಾನು ಝೂ಼ಟಿನ ಬಾ ಹುಯಿರ‍್ಹೋಸ್.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 12:8

ಯೊ ಹುಮ್ಮಖ್ಹ್‌ ದೆವಾಳೊ ಉಷೇತೆ, ಹುಮ್ಮಖ್ಹ್‌ ದ್ಯವಾದೆ. ಧರಮ್ ದ್ಯವಾನು ವರ ಉಷೇತೊ ಯೋ ಛು಼ಟಾದಿಲ್‍ಥಿ ದ್ಯವಾದೆ. ಅದಿಕಾರಿ ಉಶೇತೊ, ಯೋ ನಿಯ್ಯಥ್ಥಿ ಚಾ಼ಲದೆ, ಗೋರ್‌ ವತಾಳವಾಳೊ, ಇನ ಖುಷಿಥಿಬಿ ಕರಾದೆ.

2 ಕೊರಿಂಥ 1:12

ಹಮೆ ಆ ವಾತ್ನಿ ಬಾರೇಮ ಕಂಡಿ ಛ಼ಡೈಲಿಯೇಸ್ಕಿ, ಹಮೆ ಖಲಿ ಅದ್ಮಿವೋನಿ ಅಕ್ಕಲ್‍ನ ಲಿದಾಕೊಂತೆ ದೇವ್ನ ವಾರ್‌ಖ್ಹಾನ ಆಖ್ಹ್‌ರಾಮ ಪರಿಶುದ್ಧಬಿ ನಿಯತ್‍ವಾಳಾಬಿ ಹುಯಿನ್ ಆ ಜಗತ್ಮ ತುಮಾರಿ ಬಾರೇಮ ಚಾ಼ಲಿಲಿದಾಕರಿ ಹಮಾರು ದಿಲ್‌ ಹಮೂನ ಸಾಕ್ಷಿ ಬೋಲಸ್.

2 ಕೊರಿಂಥ 11:20

ಖ್ಹಾಚ಼ಮ ಬೋಲ್ನುಕತೊ ಕೋಣ್‌ತೋಬಿ ತುಮುನ ಕಬ್‌ಜಾ಼ಮ ಕರ‍್ಯುತೋಬಿ, ತುಮುನ ಕಡ್‌ತೆಲ್ ದೇಖಸ್ ಇವ್ಣು ಫಾಯಿದೊ ಕರಿಲೇಸ್ ತೋಬಿ ತುಮಾರ ಕಲ್ಲಪರ್ ಮಾರ‍್ಯುತೋಬಿ ತುಮೆ ಖ್ಹಮಾಳಿ ಲೆವೋಸ್‍ನಿ.

2 ಕೊರಿಂಥ 11:29

ಏಕ್‌ ಜ಼ಣೊ ಕಮ್‍ಜೋ಼ರಿ ಹುಯಿರೊತೊ, ಇನ ಜೋ಼ಡ್ಮ ಮೇಬಿ ಕಮ್‍ಜೋ಼ರಿನೋಸ್. ಏಕ್‌ ಜ಼ಣೊ ಪಾಪ್ನ ಬಲಿಹುಯೊತೊ ಮೇ ಪಶ್‍ತೈಶ್ ಕೊಯಿನ್ತೆ ರ‍್ಹಿಶ್‍ಕೊಯ್ನಿ.

2 ಕೊರಿಂಥ 2:17

ಕೈಏಕ್ ಜ಼ಣು ದೇವ್ನಿವಚನ್ನ ಮಿಲಾವಟ್ ಕರಿ ಬೇಪಾರ್ ಕರಾಸ್. ಹಮೆತೋಬಿ ಇಮ್‌ಕಾಹೆ ದೇವ್‌ಮ ರ‍್ಹೀನ್, ದೇವ್ನಖ್ಹಾಮ್ಣೆ ಕ್ರಿಸ್ತಯೇಸುನಿ ಗಳ್‌ಜೋ಼ಡ್ಮ ಬರೋಬರ್ ಖೀವೂಕಿ ತೀನಸ್ ಹಮೆ ಬೋಧನೆ ಕರೇಸ್.

2 ಕೊರಿಂಥ 4:2

ಗಪ್ಲತ್‍ನು ಬಿಜು಼ ಖ್ಹರಮ್‌ ಕಡೈಲ್ಯಾವಾನ ಖ್ಹಾರ ಮಾರಗ್‍ಥಿ ಹಮೆ ದೂರ್ ಹುಯಿರಾಸ್‍. ಬಿಜು಼ ಹಮೆ ಮಶ್ಲತ್ ಭಂದೈಯೇ಼ ಕೊಯ್ನಿ. ದೇವ್ನಿ ವಚನ್‍ಮ ಮಿಲಾವಟ್ ಕರಿಯೆಕೊಯ್ನಿ. ಹಮೆ ಖ್ಹಾಚ಼ನ ಛೋ಼ಡಿನ್ ಬೋಲ್ಯೆಸ್‍. ಹಮೆ ನೀತಿವಾಳಕರಿ ಹರೇಕ್ ಅದ್ಮಿನಿ ದಿಲ್ನಿಸಾಕ್ಷಿ ದೇವ್ನ ಖ್ಹಾಮ್ಣೆ ಮಾನಿಲ್ಯವಾನಿ ಪರಕ್ಮ ಚಾ಼ಲೆಯೇಸ್.

ಗಲಾತ್ಯ 1:6

ಕ್ರಿಸ್ತನಿ ವಾರ್‌ಖ್ಹೇಥಿ ತುಮುನ ಬುಲಾಯ ಹುಯಾನ ಮ್ಹೇಲಿನ್ ಅತ್ರೆ ವಗ್ಗಿಸ್‌ಮ ಬಿಜೇಕ್ ಸುವಾರ್ತೆನ ತುಮೆ ಸ್ವಿಕಾರ್‌ಕರಾನು ದೇಖಿನ್ ಮನ ಆಶ್ಚರ್ಯ ಹುವಾಸ್.

ಗಲಾತ್ಯ 2:4

ಕತೋಬಿ ಭಾಣೇಥಿ ಪೇಠುಥೂತೆ ವಿಶ್ವಾಸಿಖ್ಹಾರು ಗಪ್ಲಥ್ಥಿ ಹಮುನ ಧರ್ಮಶಾಸ್ತ್ರನಿ ಕಬ್‌ಜಾ಼ಮ ಖ್ಹಪ್‌ಡಾವ್ಣುಕರಿ, ಕ್ರಿಸ್ತ ಯೇಸುಮ ಛಾ಼ತೆ ಅಪ್ಣಿ ಛುಟ್ಕಾರ್‌ನ ಮಾಲುಮ್‌ಕೊಂತೆ ತಿಮ್ ಪುಛಾ಼ವನ ಐರ‍್ಹುಥು.

ಗಲಾತ್ಯ 3:1

ಅಲ ಅಕ್ಕಲ್‌ಕೊಂತೆ ಗಲಾತ್ಯವಾಳ, ತುಮುನ ಮಂಕ್ ‌ಕೋಣ್‌ಕರ‍್ಯು? ಯೇಸು ಕ್ರಿಸ್ತ ಶಿಲ್‌ಬೇಪರ್ ಜಾನ್‌ಮ್ಹೆಲ್ಯೊತೆ ಯೊ ತುಮಾರ ಡೋಳಾನ ಖ್ಹಾಮ್ಣೆ ಛೋ಼ಡಿವತಾಳ್ಯುನಿ!

ಗಲಾತ್ಯ 4:11

ಮೇ ತುಮಾರಖ್ಹಾಜೆ ಮ್ಹಿನತ್ ಕರ‍್ಯೊತೆ ಫಲ್‌ಕೊಂತೆ ಹುಯ್ಗುಕಿಶುಕಿ ಕರಿ ತುಮಾರಿ ಬಾರೇಮ ಡರ್‌ ಹುವಾಸ್.

ಎಫೆಸ 4:14

ಇನಾಖ್ಹಾಜೆ ಬೋಲಿಲಾವನು ಶಾತ್‌ಕತೊ ಅಪ್ಣೆ ಹಂಕೇಥು ಅಡ್ಡಾಣಿ ನಾ ಹುಯಿರ‍್ಹೇವ್ಣುತೆ, ಖರಾಬ್ ಅದ್ಮಿನ ಠಗಾವ್ಣಿಮಾಬಿ, ಗಲ್ತಿಸೋಚ್‌ಮ ಪಡೀನ್, ಅಲಕ್ ಅಲಕ್ ಭೋದನ್‌ಥಿ ಧೋಕಹುಯಿನ್ ವಹಿರೊ ಕೀಕಡ್‌ಕಿ ತೀಕಡ್‌ ನಾಜಾ಼ವಾಳ ಹುಯಿರ‍್ಹೇಣು.

ಎಫೆಸ 4:22

ಇನಖ್ಹಾಜೆ ತುಮುನ ಶಿಕಾಡ್ಯುತೆ ಭೋದನ್ ಶಾತ್‌ಕತೊ ತುಮೆ ತುಮಾರಿ ಅಗ್ಲಿ ಚಾ಼ಲ್‌ನಿತರಾನು ಜೂ಼ನಿ ಆದತ್‌ನ ಕಾಡಿನಾಖೊ; ಯೊ ಧೋಕ ಖೈರಾಖ್ಯಾಸ್ತೆ ಖರಾಬ್ ಆಖ್ಹ್‌ಥಿ ಭರೈರ‍್ಹುಸ್‌. ಯೊ ನಾಶ್‌ ಹುಯಿಜಾ಼ವನು ಹುಯಿರುಸ್.

ಎಫೆಸ 6:24

ಅಪ್ಣೊ ಪ್ರಭು ಯೇಸು ಕ್ರಿಸ್ತನ ಹಮೇಶಾಬಿ ಪ್ಯಾರ್ ಕರಾವಾಳ ಅಖ್ಖಾಸ್‌ಪರ್ ದೇವ್ನಿ ವಾರ್‌ಖ್ಹೊ ರ‍್ಹವಾದೆ.

ಕೊಲೊಸ್ಸೆ 2:18

ಥೋಡುಜ಼ಣು ದೇವ್ನದೂತರ‍್ನ ಆರಾಧನೆಮಾಬಿ ದಿಲ್‍ಲಗಾಡಿರ‍್ಹವಾಳ ಹುಯಿನ್, ಹಮುನ ದರ್ಶನಹುಯುಕರಿ ಬಡೈಮಾರಿಲೀನ್, ಜಗತ್‌ನು ಅಕ್ಕಲ್‌ಥಿ ಕಾಯಿಸ್‌ಕೊಂತೆ ಫುಲಿರ‍್ಹವಾಳನ ತುಮಾರು ಮಳಿರ‍್ಹೂತೆ ಇನಾಮ್ನ ಛಿನೈಲಾವನಿತರ ನಕೊ ಕರ್ಶು.

ಕೊಲೊಸ್ಸೆ 2:4

ಕೋಣ್‌ಬಿ ತುಮುನ ಇವ್ಣ ಪೊಖ್ಹ್‌ಲಾವನಿ ವಾತೆಥೀಬಿ ಝೂ಼ಟಿ ವಾತೆಥಿ ಠಗಾವ್ಣುನಾ ಕರಿ ಆ ವಾತೆಖ್ಹಾರಿ ತುಮುನ ಬೋಲಿರಾಖ್ಯೊಸ್.

ಕೊಲೊಸ್ಸೆ 2:8

ಗಲ್ತಿನು ಅಜು಼ ಫಾಯಿದೊಕೊಂತೆ ಬೋಧನೆತು ಕೋಣ್‌ಬಿ ತುಮೂನ ಕಬ್‌ಜಾ಼ಮ ನಾಕರಿಲೇವ್ಣುತೆ ಹೊಷಾರ್‌ಥಿ ರ‍್ಹವೊ. ಆ ಅಖ್ಖು ಅದ್ಮಿವೋನ ಪದತ್ತಿನ ಅಜು಼ ಲೋಕ್‌ನಹೋಣುತೆ ಬೋಧನೆಮಾಸ್ ಛಾ಼ ಪಣ್ಕಿ ಕ್ರಿಸ್ತಾನಕಾಹೆ.

1 ಥೆಸ 3:5

ತಿಮೊಥೆನ ತುಮಾರಿ ವಿಶ್ವಾಸ್‌ನಿ ಬಾರೇಮ ಮಾಲುಮ್ ಕರಿಲ್ಯವಾನಖ್ಹಾಜೆ ಮೇ ತುಮಾರಕನ ಮೋಕ್‌ಲ್ಯೊತೆ. ಬಿಜು಼ ಜಾ಼ಖ್ಹತ್ ಥಾಮಾನ ಕೋ ಉಶೇನಿ ಕರಿ ಸೋಚಿನ್, ಮೇ ಇನ ಮೋಕ್‌ಲ್ಯೊತೆ. ಶನಕತೊ ಶೈತಾನ್ನೆ ತುಮೂನ ಶೋದನೆ ಕರ‍್ಯೊತೆ ಇನೇಥಿ ಹಮಾರಿ ಮ್ಹಿನತ್ ಬಿಣ್‌ಫಾಯಿದಾನು ಹುಯಿಜಾ಼ಶೆ ಕರಿ ಮನ ಧಡೂಕೊ ಥೊ.

1 ತಿಮೊ 1:3

ಮೇ ಮೆಕೆದೋನ್ಯನ ಜಾ಼ವಾನಿ ವಖ್ಹತ್‌ಮ, ತೂ ಎಫೆಸಮಸ್ ರ‍್ಹೆಕರಿ ಗಿಂಗೈಲಿದೊ, ಹಿಜ಼್ಜಾ ಥೋಡು ಜ಼ಣು ಝೂ಼ಟಿ ಭೋತಿ ಬೋಲಿದೆವ್‌ಕರ್ತುಥೂತೆ ಇವ್ಣುನ ಹುಕುಮ್‌ ದೀನ್ ಭೀರಾಕ್‌ಣು ಕರೀಬಿ,

1 ತಿಮೊ 2:14

ಅಜು಼ ಧೋಕ ಹುಯುತೆ ಆದಾಮ್ ಕಾಹೆ; ತಯೇಡ ಧೋಕ ಹುಯಿ, ಅಜು಼ ಯೋ ದೇವ್ನಿ ನಿಯಮ್ನ ತೋಡಿನ್ ಪಾಪಿ ಹುಯಿ.

2 ತಿಮೊ 3:13

ಕತೋಬಿ ಖರಾಬ್ ಅಜು಼ ಠಗಾರ‍್ಯು ಅದ್ಮಿ ಬಿಜಾ಼ವ್‌ನಾಬಿ ಠಗೈನ್ ಅಜು಼ ಇವ್ಣೇಬಿ ಗಲತ್‌ಪರ್ ಚಾ಼ಲ್ತುಹುಯಿನ್, ದನ್‌ಪರ್-ದನ್ ತೀರ್‌ಚಾಸ್ ಖರಾಬ್ ಹುಯಿಜಾ಼ಸ್.

ಪೌಲನೆ ತೀತನ ಲೀಖ್ಯೋತೆ ಚಿಟ್ಟಿ 1:10

ಕೈಯೆಕ್ಕಿ ಜ಼ಣು ಖಾಲಿವಾತೆವಾಳು, ಠಗಾವವಾಳು ಅಜು಼ ಗಲಾಟ್ ನಾಖವಾಳು ಹುಯಿರ‍್ಹೂಸ್. ಅಮ್ ವಿಶ್ವಾಸ್‌ ಕರಾವಾಳಾಮ ಘಣು ಅದ್ಮಿ ಯೆಹೂದ್ಯರ್‌ವಾಳುಸ್ ಹುಯಿರ‍್ಹೂಸ್.

ಇಬ್ರಿ 13:9

ಹರೇಕ್ ಥರಾನು ಅಲಕ್ ಅಲಕ್ ಜ಼ಣಾನಿ ವಾತ್ಮ ಖ್ಹಪ್‌ಡಿನಾಜಾ಼ವ್ಣುತೆ ಬರಬರ‍್ನಿ ವಾಟ್ಮಚಾ಼ಲೊ. ಶನಕತೊ ದೇವ್ನಿ ವಾರ್‌ಖ್ಹೇಥಿ ದಿಲ್ನ ಘಟ್ ಕರಿಲ್ಯಾವನು ಅಛ್ಛು಼. ಖಾಣಾನಿ ಜಿನಖ್ಹ್‌ನಿ ಬಾರೇನು ನಿಯಮ್‌ಖ್ಹಾರು ಪಾಡಿ ಚಾ಼ಲವಾಳಥಿ ಶನು ಫಾಯಿದೊಬಿ ಕೊಹುವಾನಿ.

2 ಪೇತ್ರ 3:17

ಇನಖ್ಹಾಜೇಸ್ ಪ್ಯಾರ್‌ನ ದೋಸ್ತಿವೊ, ಆ ಖ್ಹಾರಿ ವಾತೆನ ಪಹಿಲೆಸ್ ಮಾಲುಮ್‌ಕರ್‌ಲಿದತೆ ಇನಾಖ್ಹಾಜೆ ತುಮೆ ಜ಼ತನ್‌ಥಿ ರ‍್ಹವೊ. ಖರಾಬ್ ಅದ್ಮಿನಿ ಖರಾಬ್ ಬೋದನೆಮ ಮಂಕ್‍ನಕೊ ಹುಯಿಜಾ಼ವೊ. ತುಮಾರಿ ಘಟ್ ವಿಶ್ವಾಸ್‌ಮಾಥು ಪಡ್ಣುನಾತೆ ಹೊಷಾರ್‌ರ‍್ಹವೊ.

2 ಪೇತ್ರ 3:3

ಅಖ್ಖೇಥಿ ಪಹಿಲೆಸ್ ತುಮೆ ಅನ ಯಾದ್ಮರಾಖಿರಾಕ್ಣು; ಥೋಡುಜ಼ಣು ಇವ್ಣಿ ಖರಾಬ್ ಆಖ್ಹ್‌ನಿ ಅಧೀನ್‍ಮ ಜಿವ್ಣುಕರಾತೆ ದೇಖವಸ್. ಇವ್ಣೆ ಚಿಂಘಾವ್ಣಿ ಕರ್ತುಹುಯಿನ್,

1 ಯೋಹಾನ 2:18

ಪ್ಯಾರ್‌ನ ಲಡ್ಕಾವೊ, ಹೈರುತೆ ಖ್ಹರ್ತಿನು ಹಗಾಮ್ ಹುಯಿರ‍್ಹುಸ್. ಕ್ರಿಸ್ತ ವಿರೋದಿ ಆವ್‍ಶೆಕರಿ ತುಮೆ ಖ್ಹಮ್‌ಜಿರಾಖ್ಯಾಸ್‌. ಹಮ್ಕೇಸ್ ಕೆತ್ರೂಕಿ ಕ್ರಿಸ್ತವಿರೋದಿ ಛಾ಼. ಇನಖ್ಹಾಜೆ ಹಮ್ಕೆ ಖ್ಹರ್ತಿನ ಹಗಾಮ್ ಹುಯಿರ‍್ಹುಸ್‌ಕರಿ ಅಪ್ಣುನ ಮಾಲುಮ್ ಛಾ಼.

1 ಯೋಹಾನ 4:1

ಪ್ಯಾರ್‌ನ ಅದ್ಮಿವೊ “ಅಪ್ಣಾಮ ಪವಿತ್ರಾತ್ಮ ಛಾ಼” ಕರಿ ಬೋಲಿಲ್ಯಾವಾಳ ಅಖ್ಖಾಸ್ನ ವಿಶ್ವಾಸ್ ನಾಕರ‍್ನು. ಯೊ ಹುಮ್ಮಖ್ಹ್‌ ದೇವ್‍ಥಿ ಆಯು ಕಿಶು ಕರಿ ತರೀಪ್‌ಶ ಕರಿನ್ ದೇಖೊ. ಶನಕತೊ ಜಗತ್‌ಮ ಕೆತ್ರುಕ್ಕಿ ಝೂ಼ಟು ದೇವ್ನಿ ಸಮಾಚಾರ್ ಬೋಲವಾಳು ಕಿಜ಼್ಜ ಕಿಜ್ಜಾ಼ಬಿ ಫೈಲೈಗು.

ಯೂದನೆ ಲೀಖ್ಯೋತೆ ಚಿಟ್ಟಿ 1:4

ಶನಕತೊ ಭಕ್ತಿಕೊಂತೆ, ಅಪ್ಣ ದೇವ್ನ ವಾರ್‌ಖ್ಹಾನ ಭಾಣುಕರಿಲೀನ್‍ ಖ್ಹರಮ್‌ಕೊಂತೆ ಕಾಮ್ನ ಕರವಾಳುಬಿ, ಅಪ್ಣೊ ಎಕ್ಕಸ್ ಯಜಮಾನ್‌ಬಿ ಪ್ರಭು ಯೇಸುಕ್ರಿಸ್ತನ ಝಿಟ್ಕಾರವಾಳು ಥೋಡುಜ಼ಣು ಗಪ್ಲಥ್ಥಿ ಸಬೆಮ ಮಹಿ ಪೇಶಿರ‍್ಹುಸ್. ಅವ್ಣೆ ಅಗಾಡಿಥೂಸ್ ನಿಶತ್‌ನ ನೇಮಕ್‍ಹುಯಿರ‍್ಹುಸ್‍ ಕರಿ ಪವಿತ್ರ ವಚನ್‌ಮ ಲೀಖೈರುಸ್.

ಪ್ರಕಾಶಿತ್ 12:15

ಅರ್ಝ಼ ಯೊ ತಯೇಡಾನ ವ್ಹವಾಡಿಲಿನ್ ಜಾ಼ವ್ಣುಕರಿ ಇನ ಪೀಠೆ ನದ್ದಿನಿತರ ಬಾಕಾಮಾಥು ಪಾಣಿನ ಉಡಾಯು.

ಪ್ರಕಾಶಿತ್ 12:9

ಯೋ ಅರ್ಝ಼ ಕತೊ ಪಿಶಾಚಿಕರಿಬಿ ಶೈತಾನ್ ಕರೀಬಿ ನಾಮ್‌ರ‍್ಹವಾಳ ಯೊ ಜೂ಼ನೊ ಖ್ಹಾಪ್ ಧರ್ತಿಪರ್ ಧಕೆಲಾಯೊ ಇನೊ ದೂತಬಿ ಇನ ಜೋ಼ಡ್ಮ ಜ಼ಮೀನ್‌ಪರ್ ಫೇಕೈಗಯು.

ಪ್ರಕಾಶಿತ್ 20:2

ಯೋ ದೇವ್ನ ದೂತಾನೆ ಕುಟ್‌ಣ್ಯೊಬಿ ಶೈತಾನ್‍ಬಿ, ಹುಯಿರೋತೆ ಜೂ಼ನೊ ಖ್ಹಾಪ್ ಕತೊ ಅರ್ಝ಼ನ ಧರೀನ್ ಹಜಾ಼ರ್ ವರಖ್ಹ್‌ಲಗು ಕೋಂಡಿರಾಖ್ಯೋಥೊ.