ಯೊಹಾನ 7:28 - ಕ್ಹುದಾನಿ ಕ್ಹರಿನಿ ವಾಕ್ಯಾ

²⁸ ಯೆಸು ದೆವಾಲಯಮಾ ಹಜು಼ನ ಉಪದೆಶ ಕರ‍್ತಾಮಾ ತೆಳಾಮಾ ತೆ ಜೊ಼ರ ವದ್ರಿನ "ಹೊ, ತುಮೊನೆ ಮಾರಾ ಹುತಿ ಗ್ವತ್ತ ಛೆ. ಮಿ ಕಿಜಾತೊ ಆಯೊಸ ಕವಾನು ತುಮೊನೆ ಗ್ವತ್ತ ಛೆ. ತೆನೈಸೊ ಮಿ ಆಯಲ ಮಾರಾ ಸ್ವಂತ ಅಧಿಕಾರಕ್ಹು ನ್ಹವ್ಹೈ. ಮನೆ ಮೊಕ್ಲ್ಯೊಸ ತೆ ಕ್ಹರಿನೊ ವ್ಹೈ. ತುಮೊನೆ ತಿನಾಹುತಿ ಗ್ವತ್ತ ನತ್ತಿ.

ಯೊಹಾನ 7:28 ပူးပေါင်းရင်းမြစ်များ

ಮತ್ತಾಯ 11:27

ಮಾರೊ ಬಾ ಮನೆ ಕ್ಹಾರು ದಿದ್ಯೊಸ. ಕುನಜ ದಿಕ್ರಾನೆ ವಳಕ್ಯು ನತ್ತಿ. ಬಾ ಯಕ್ಕಜ ದಿಕ್ರಾನೆ ವಳಕ್ಯೊಸ. ದಿಕ್ರೊ ಯಕ್ಕಜ ಬಾನೆ ವಳಕ್ಯೊಸ. ದಿಕ್ರೊ ಬಾನೆ ಕಿನೆ ದೆಕಾಡು ಕೈನ ಆಸ ಕರಸ ತ್ಯುನೆ ಬಾನೆ ತಿಳ್ದಿಲಿವಸ.

ಮತ್ತಾಯ 2:23

ನಜರೆತ ಕವಾನಾ ಗಾಮ್ಮಾ ರ‍್ಹಯಲೊ. ಕ್ರಿಸ್ತನನೆ ‘ನಜ಼ರೆತನೊ’ ವ್ಹೈ ಕೈನ ಬಲಾವಸ” ಕೈನ ಕ್ಹುದಾ ಪ್ರವಾದಿಯೊನಾ ಮುಲಕ ಕದಲ ಅಮ್ಮ ಪುರಾ ಥಯು.

ಮತ್ತಾಯ 26:55

ತೆಜ಼ ಟೈಮಮಾ ಯೆಸು ಗುಂಪ ಥೈನ ಆಯಲ ಮನಕ್ಹೊನೆ, ಚ್ವಟ್ಟಾನೆ ಧರಾನೆ ಆಯೆ ಲಿಂಗತ ಚಾಕಾ ಗುಂಡಕಾ ಲಿನ ಮನೆ ಧರಾನಾಹುತಿ ಆಯಾಸ ಸು? ಮಿ ಹರ ದಿನ್ನ ದೆವಾಲಯಮಾ ಬೈಟಿನ ಬೊದನೆ ಕರ‍್ತಾಮಾ ತುಮೆ ಮನೆ ಧರ‍್ಯಾ ನೈತೊ.

ಲುಕ ಬರ್ದಲ ಸುವಾರ್ತಾ 10:22

ಮಾರೊ ಬಾ ಮನೆ ಕ್ಹಾರುಜ಼ ದಿದ್ಯೊಸ. ದಿಕ್ರೊ ಕುನ್ನ ವ್ಹೈ ಕಿನೆಜ಼಼ ಗೊತ್ತ ನತ್ತಿ. ಬಾ ನೆ ಯಕಜ಼ ಗೊತ್ತ ಛೆ. ವರಿ ಬಾ ಕುನ್ನ ವ್ಹೈ ಕವಾನು ದಿಕ್ರಾನೆ ಯಕಜ಼ ಗೊತ ಛೆ. ದಿಕ್ರೊ ಬಾನಾ ಹುತಿ ಕಿನೆ ತಿಳ್ಸಸ ತೆ ಯಕ್ಕಲೊಜ಼ ಬಾನಾ ಹುತಿ ತಿಳದಿಲಿವಸ.

ಲುಕ ಬರ್ದಲ ಸುವಾರ್ತಾ 2:11

ತೆ ಸುವೈ ಕದ್ಯಾಮ ಆಜ಼ನಾ ಟೈಮಮಾ ತುಮಾರಾ ಹುತಿ ದಾವಿದನಾ ಗಾಮ್ಮಾ ಯಕ್ಲೊ ರಕ್ಷಕ ಹುಟ್ಯೊಸ. ತೆ ಕರತಾ ಥಯಲ ಕ್ರಿಸ್ತ ವ್ಹೈ.

ಲುಕ ಬರ್ದಲ ಸುವಾರ್ತಾ 2:39

ಕ್ಹುದಾನಾ ಧರಮಶಾಸ್ತ್ರಮಾ ರ‍್ಹಯಲ ನಿಯಮೊ ಪುರಾ ಕರಲ್ಪರ ಯೊಸೆಫ ವರಿ ಮರಿಯಳ ಗಲಿಲಾಯ ಪ್ರಾಂತ್ಯಮಾ ರ‍್ಹಯಲ ತಿವ್ನಾ ಸ್ವಂತ ಗಾಮ ಥಯಲ ನಜ಼ರೆತೆ ಫರಿನ ಗಯಾ.

ಲುಕ ಬರ್ದಲ ಸುವಾರ್ತಾ 2:4

ತಿನಾ ಹುತಿ ಯೊಸೆಫ ಗಲಿಲಾಯ ಪ್ರಾಂತ್ಯಮಾ ರ‍್ಹಯಲ ನಜ಼ರೆತೆ ಕವಾನಾ ಗಾಮತಾ ಗೈನ ಯುದೆಯಮಾ ರ‍್ಹಯಲ ಬೆತ್ಲೆಹೆಮ ಕವಾನಾ ಗಾಮೆ ಗಯೊ. ಯೊಸೆಫ ದಾವಿದನೊ ಖಾಂದಾನಾವಾಲೊ ರ‍್ಹಯಲಹುತಿ ದಾವಿದನು ಗಾಮ ಥಯಲ ಬೆತ್ಲೆಹೆಮೆ ಗಯೊ.

ಲುಕ ಬರ್ದಲ ಸುವಾರ್ತಾ 2:51

ಯೆಸು ತ್ಯುನಾ ಕ್ಹಾತೆ ನಜ಼ರೆತೆ ಐನ ತಿನಾ ಮಾ ಬಾಪನೆ ವಿಧೆಯ ಥಯೊ. ತಿನಿ ಯಾ ಎ ಕ್ಹಾರಿಯೊ ವಾತೊನಾ ಹುತಿ ವಿಚಾರ ಕರಾಡಿತಿ.

ಯೊಹಾನ 1:46

ತೆನೈಸೊ ನತಾನಿಯೆಲ ಫಿಲಿಪ್ಪನೆ"ನಜರೆತತೊ ಚೊ಼ಕು ರ‍್ಹಯಲ ಸುಬಿ ಆವಸ ಸು? ಕೈನ ಪುಚ್ಚೊ. ಫಿಲಿಪ್ಪ"ಐನ ದೆಕ" ಕೈನ ಜವಾಬ ದಿದ್ಯೊ.

ಯೊಹಾನ 10:36

ಇಮ್ಮ ರ‍್ಹವಾನು ರ‍್ಹಯುಮ ಬಾ ತಿನಾ ಸ್ವಂತವಾಲಾ ವ್ಹೈ ಕೈನ ಇನಿಲಿನ ದುನಿಯಾಮಾ ಮೊಕ್ಲಲವಾಲಾನ ಹುತಿ ಕಿ ರ‍್ಹಸ? ಮಿ "ಕ್ಹುದಾನೊ ದಿಕ್ರೊ ವ್ಹೈ" ಕೈನ ಕದಲ ಹುತಿ ತುಮೆ ಮಿ ದುಷಣೆ ಕರಾಡ್ಯೊಸ ಕೈನ ಕವಾನು ಕಾ?

ಯೊಹಾನ 12:49

ಎ ಕ್ಹರಿ ವ್ಹೈ ಮಿ ಕದಲ ಕಾಕದ್ಯಾಮ, ಮಾರಾ ಅದಿಕಾರಕ್ಹು ಸುಜ಼ ಕದ್ಯೊ ನತ್ತಿ ಮನೆ ಕುನ್ನ ಮೊಕಲ್ಯುಸ.

ಯೊಹಾನ 14:10

ಮಿ ಬಾ ಮಾ ಛೆ ವರಿ ಬಾ ಮಾರಾಮಾ ಛೆ ಕೈನ ತುಮೆ ಕ್ಹರಿಬಿ ಬರೊಕ್ಹೊ ನೈ ಕರ‍್ತಾ ಸು? ಮಿ ತುಮೊನೆ ಕವಾನಿ ಸಂಗತಿಯೊ ಮಾರಾಕ್ಹು ಆಯಲ ನ್ಹವೈ. ತೆನೈಸೊ ತೆ ಮಾರಾಮಾ ರ‍್ಹವಾನಾ ಬಾನಾ ವ್ಹೈ ವರಿ ತೆ ತಿನು ಕಾಮ ಕರಾಡ್ಯೊಸ.

ಯೊಹಾನ 14:31

ತೆನೈಸೊ ಮಿ ಬಾನೆ ಮಯಾ ಕರುಸ ವರಿ ಮಿ ಮಾರೊ ಬಾ ಆಗನ್ಯಾ ಕರಲ ತಿಮ್ಮಜ ಕರಾಡ್ಯೊಸ ಕೈನ ದುನಿಯಾ ತಿಳ್ದಿಲ್ಯುಜ "ಆವೊ ಅಪೆ ನ್ಹ್ಯಾಂತಾ ಗಯ್ಯೆ"

ಯೊಹಾನ 16:3

ಮನಕ್ಹೊ ಬಾನೆ ವರಿ ಮನೆ ನೈ ತಿಳ್ದಿಲಿದಲ ಹುತಿ ಎ ಕ್ಹಾರು ಕರಸ.

ಯೊಹಾನ 17:25

ನಿತಿ ಕ್ಹು ರ‍್ಹಯಲ ಬಾ, ಎ ದುನಿಯಾ ತುನೆ ವಳಕಿ ನತ್ತಿ ವರಿಬಿ ಮಿ ತುನೆ ವಳಕ್ಕಯೊಸ. ವರಿ ತುಜ಼಼ ಮನೆ ಮೊಕ್ಕಲ್ಯೊಸ ಕವಾನು ಎ ಮನಕ್ಹೊನೆ ಗ್ವತ್ತ ಛೆ.

ಯೊಹಾನ 17:3

ಯಕ್ಲೊಜ ಕ್ಹರಿನೊ ಕ್ಹುದಾ ರ‍್ಹಯಲ ತುನೆ ವರಿ ತು ವಳಾಯಲ ಯೆಸು ಕ್ರಿಸ್ತನೆ ತಿಳ್ದಿಲಿವಾನುಜ ಹಮೆಶಾನೊ ಜ಼ಲಮ ವ್ಹೈ.

ಯೊಹಾನ 3:2

ಯಕ್ಕ ರಾತೆ ನಿಕೊದೆಮ ಯೆಸುಕನ ಆಯೊ. ನಿಕೊದೆಮ"ಗುರು, ತು ಕ್ಹುದಾ ವಳಾಯಲ ಮಾಸ್ತರ ವ್ಹೈ ಕೈನ ಮನೆ ಗ್ವತ್ತ ಛೆ. ತು ಕರಾನಾ ಆ ತರಾನಾ ಅದ್ಭುತೊ ಕ್ಹುದಾನೊ ಆಸ್ರೊವಾಚಿ ಕುನ್ನಜ ನೈ ಕರತು "ಕೈನ ಕದ್ಯೊ.

ಯೊಹಾನ 3:33

ತೆನೈಸೊ ತಿನಿ ಸಾಕ್ಷಿನೆ ಕುನ್ನ ಸ್ವಿಕಾರ ಕರಿಲಿವಸ ತೆ ಅಮ್ಮ ಕರಾಕ್ಹು ಕ್ಹುದಾಜ ಕ್ಹರಿ ವ್ಹೈ ಕೈನ ದೆಕಾಡಿನ ದಿವಸ.

ಯೊಹಾನ 5:32

ತೆನೈಸೊ ಮಾರಿ ಹುತಿ ಸಾಕ್ಷಿ ದಿವಾಲೊ ಯಕ್ಕ ಮನಕ್ಹ ಛೆ. ತೆ ದಿವಾನಿ ಸಾಕ್ಷಿ ಕ್ಹರಿಜ ವ್ಹೈ ಕೈನ ಮನೆ ಗ್ವತ್ತ ಛೆ.

ಯೊಹಾನ 5:43

ಮಿ ಮಾರಾ ಬಾನಾ ಅದಿಕಾರನಾ ಕ್ಹಾತೆ ಆಯೊಸ. ತೆನೈಸೊ ತುಮೆ ಮನೆ ಸ್ವಿಕಾರ ನೈ ಕರಿಲೆತಾ. ತೆನೈಸೊ ಕುನ್ನಬಿ ಯಕ್ಲೊ ತಿನಾ ಸ್ವಂತ ಅದಿಕಾರಕ್ಹು ಆಯಾಮ ತುಮೆ ತಿನೆ ಸ್ವಿಕಾರ ಕರೊಶಿ.

ಯೊಹಾನ 6:42

ಯಹುದ್ಯೊ, ಎ ಯೊಸೆಫನೊ ದಿಕ್ರೊ ಯೆಸು ನ್ಹವೈ ಸು? ಇನಾ ಮಾ ಬಾಪ ಅಪೊನೆ ಗ್ವತ್ತ ಛೆ" ಮಿ ಸ್ವರ್ಗತೊ ಉತ್ರಿನ ಆಯೊಸ ಕೈನ ಎ ಕಿಮ್ಮ ಕವಾಡ್ಯೊಸ? ಕದ್ಯಾ.

ಯೊಹಾನ 7:14

ಕಮ್ಮಶಿ ಕಮ್ಮ ಸನ್ನನು ಅರ್ದು ಭಾಗ ಕ್ಹರಿ ಗೈತು. ತೆಳಾಮಾ ಯೆಸು ದೆವಾಲಯನೆ ಗೈನ ಉಪದೆಶ ಕರಾನು ಶುರು ಕರ‍್ಯೊ.

ಯೊಹಾನ 8:14

ಯೆಸು, ಹೊ"ಮಿಜ಼ ಮಾರಾ ಹುತಿ ಕವಾನಿ ಎ ಸಾಕ್ಷಿ ಕ್ಹರಿ ಛೆ. ಕಾಕದ್ಯಾಮ ಮಿ ಕಿಜಾತೊ ಆಯೊಸ ಕವಾನು ಮಿ ಕಿಜಾ಼ ಜೌ಼ಸ ಕವಾನು ಮನೆಜ ಗ್ವತ್ತ ಛೆ. ತೆನೈಸೊ ಮಿ ಕಿಜಾತೊ ಆಯೊಸ ಮಿ ಕಿಜಾ಼ ಜೌ಼ಸ ಕವಾನು ತುಮೊನೆ ಗ್ವತ್ತ ನತ್ತಿ"

ಯೊಹಾನ 8:16

ತೆನೈಸೊ ಯಕ್ಕೆಳೆ ಮಿ ಫೈಸಲೊ ಕರ‍್ಯೊಮ ತೆ ಕ್ಹರಿನೊ ರ‍್ಹವಸ. ಕಾಕದ್ಯಾಮ ಮಿ ಯಕ್ಲೊಜ ನತ್ತಿ ಮನೆ ವಳಾಯಲವಾಲೊ ಮಾರೊ ಬಾ ಮಾರಾ ಕ್ಹಾತೆ ರ‍್ಹವಸ.

ಯೊಹಾನ 8:19

ತೆಳಾಮಾ ತ್ಯುನೆ"ತಾರೊ ಬಾ ಕಿಜಾ಼ ಛೆ? ಕೈನ ಪುಚ಼್ಚಾ. ಯೆಸು ತ್ಯುನೊನೆ "ತುಮೊನೆ ಮಿ ರ‍್ಹೈನೆಕಾ ಮಾರೊ ಬಾ ರ‍್ಹೈನೆಕಾ ಗ್ವತ್ತ ನತ್ತಿ. ಯಕ್ಕೆಳೆ ತುಮೆ ಮನೆ ತಿಳ್ದಿಲಿದಲ ರ‍್ಹವತ್ತೊ, ಮಾರಾ ಬಾನೆಬಿ ತಿಳ್ದಿಲಿದಲ ರ‍್ಹತಾತಾ" ಕೈನ ಕದ್ಯೊ.

ಯೊಹಾನ 8:26

ತುಮಾರಾ ಹುತಿ ಫೈಸಲಾನಾ ಹುತಿ ಕವಾನೆ ಘನ್ನು ಛೆ. ತೆನೈಸೊ ವಳಾಯಲವಾಲೊ ಕ್ಹರಿನೊ ವ್ಹೈ ವರಿ ಮಿ ತಿಕಂತೊ ಸು ಐಕ್ಯೊಸ ತೆಜ಼ ದುನಿಯಾನೆ ಕೌಸ.

ಯೊಹಾನ 8:42

ಯೆಸು ತೆ ಯಹುದಿಯೊನೆ"ಕ್ಹುದಾ ಕ್ಹರಿಮಾಜ಼ ತುಮಾರೊ ಬಾ ರ‍್ಹಯೊಮ, ತುಮೆ ಮನೆ ಮಯಾ ಕರ್ತಾತಾ. ಕಾಕದ್ಯಾಮ, ಮಿ ಕ್ಹುದಾ ಕಂತೊ ಆಯೊಸ ವರಿ ಮಿ ನ್ಹ್ಯಾ ಛೆ. ಮಿ ಆಯಲ ಮಾರು ಸ್ವಂತ ಅದಿಕಾರಕ್ಹು ನ್ಹವೈ. ಕ್ಹುದಾಜ ಮನೆ ಮೊಕ್ಲ್ಯೊಸ.

ಯೊಹಾನ 9:29

ಕ್ಹುದಾ ಮೊಶೆನಾ ಕ್ಹಾತೆ ಬೊಲ್ಯೊಸ ಕವಾನು ಹಮೊನೆ ಗ್ವತ್ತ ಛೆ. ತೆನೈಸೊ ಎ ಮನಕ್ಹ ಕಿಜಾತೊ ಆಯೊಸ ಕವಾನುಬಿ ಹಮೊನೆ ಗ್ವತ್ತ ನತ್ತಿ "ಕೈನ ಕದ್ಯಾ.

ಅಪೊಸ್ತಲೊ 17:23

ಮಿ ತಮಾರಾ ಗಾಮ್ಮಾ ಮಿ ಫರತಾಮಾ ಮನೆ ತಮೆ ಪೊಜಾ ಕರಾನಾ ದೆವಸ್ಥಾನೊ ಮೊರ್ತಿಯೊ ದೆಕ್ತಾಮಾ ತಿಮಾ ಮನೆ ಎಕ ಬಲಿಪಿಟ ಡೊಳಾನೆ ಪಡ್ಯು ತಿನಾ ಉಪ್ಪರ ‘ಅಜ್ಞಾತ ರ‍್ಹಯಲ ದೆವಸ್ಥಾನ ಕೈನ ಲಿಕ್ಯಾತಾ. ತಿನಾ ಹುತಿ ತಮೆ ಸುಜ಼ ತಿಳದ್ಯಾವಾಚಿ ಪುಜಾಕರಾನು ತಮನೊನೆ ತಿಳಸಿನ ಕವಾನೆ ಆಯೊಸ ಕದ್ಯೊ.

ರೊಮಾಪೂರ 1:28

ಕ್ಹುದಾನು ಕ್ಹರಿನು ಗ್ಯಾನ ಹೊಂದಿಲಿವಾನೆ ವಪ್ಪಿಲಿದ್ಯಾ ನೈ ತ್ಯುನೊನೆ ಕ್ಹುದಾ ತ್ಯುನೊನೆ ತ್ಯುನಾ ಅಯೊಗ್ಯ ಮನಸನೆ ವಪ್ಸಿನ ದಿದ್ಯೊ. ತಿನಾಹುತಿ ತ್ಯುನೆ ನೈಸೊ ಕರಾನಾ ಕಾಮೊ ಕರಸ.

ರೊಮಾಪೂರ 3:4

ನೈ! ಕ್ಹಾರಾ ಮನಕ್ಹೊ ಸುಳ್ಳ ರ‍್ಹಯಾತಬಿ ಕ್ಹುದಾ ಕ್ಹರಿಕ್ಹು ರ‍್ಹವಾಲೊ ವ್ಹೈ. ಪವಿತ್ರ ಗ್ರಂಥ ಇಮ್ಮ ಕವಸ. ತಾರಿಯೊ ವಾತೊಮಾ ತು ಕ್ಹರಿನೊ ಫೈಸಲೊ ಕರಾಲೊ ವ್ಹೈ ಕೈನ ದೆಕಾಡಿನ ದ್ಯು. ತುನೆ ಫೈಸಲೊ ಥಾತಾಮಾ ತು ಝಿತ್ತು. ಕಿರ್ತನೆ 51:4

2 ಕೊರಿಂಥ 1:18

ತುಮೆ ಕ್ಹುದಾಪರ ಬರೊಕ್ಹೊ ಕರಾಲಾ ರ‍್ಹವತ್ತೊ. ಹಮೆ ತುಮೊನೆ ಯಕ್ಕಜ಼ ಟೈಮ್ಮಾ ಹೊ ನೈತೊ ನೈ ಕವಾನು ತುಮೆ ನತ್ತಿ ಕದ್ಯಾ ಕವಾನು ಬರೊಕ್ಹೊ ಕರಸಕ್ತಾತಾ.

2 ಕೊರಿಂಥ 4:6

ತಿನಾಹುತಿ ಅಂದಾರಾಮಾತು ಉಜಾಲು ಆವಸ ಕೈನ ಕ್ಹುದಾ ಯಕ್ಕ ದಿನ ಕದ್ಯೊ ಎಜ಼ ಕ್ಹುದಾ ಅಪ್ನಾ ತಿನು ಉಜಾಲು ಥಯೊಸ. ಕ್ರಿಸ್ತನಾ ಮ್ಹೊಡಾಪರ ರ‍್ಹಯಲ ಅಪೊನೆ ದೆಕಾಡಿನೆ ದಿವಾನಾ ಮುಲಕ ತೆ ಅಪೊನೆ ಉಜಾಲು ದಿದ್ಯೊಸ.

ತಿತನೆ 1:2

ಹಮೆಶಾನೊ ಜ಼ಲಮಪರ ಅಪೊನೆ ರ‍್ಹಯಲ ಬರೊಕ್ಹಾಕ್ಹುಜ಼ ತೆ ಬರೊಕ್ಹೊ ವರಿ ಗ್ಯಾನ ಹುಟ್ಯುಸ. ಹಮೆಶಾನೊ ಜ಼ಲಮ ದ್ಯುಸ ಕೈನ ಪೈಲಾತೊಜ಼ ಕ್ಹುದಾ ಅಪೊನೆ ವಾತ ದಿದಲ. ಕ್ಹುದಾ ಸುಳ್ಳ ನೈ ಬೊಲ್ತೊ.

ಇಬ್ರಿಯ 6:18

ಕ್ಹುದಾನಿ ವಾಗ್ದಾನ ವರಿ ಕ್ಹಮ ಘಟ್ಟ್ಟ ರ‍್ಹಯಲ ಬೆ ಆದಾರ ಛೆ. ಇನಾಹುತಿ ಅಪೊನೆ ಕೆಳಾಮಾಜ಼ ಮೊಸ ಥಾತು ನೈ. ಇನಾಹುತಿ ಕ್ಹುದಾನಾ ರಕ್ಷಣೆನಾ ಹುತಿ ನ್ಹಾಟಿನ ಆಯಲ ಅಪೆ ಅಪ್ನಾ ಆಸಮಾ ಘಟ್ಟ್ಟ ಥೈನ ರ‍್ಹವಾನೆ ಪ್ರೊತ್ಸಹ ಮಳ್ಯೊ.

1 ಯೊಹಾನ 5:10

ಕ್ಹುದಾನಾ ದಿಕ್ರಾನೆ ಬರೊಕ್ಹೊ ಕರಲಾವೊನೆ ಕ್ಹುದಾಕ್ಹು ಸಾಕ್ಷಿದಿದಲ ಕ್ಹರಿ ವ್ಹಂದಲ ರ‍್ಹವಸ. ಕ್ಹುದಾನೆ ನೈನಂಬಲವಾಲೊ. ಕ್ಹುದಾನೆ ಸುಳ್ಳವಾಲೊ ಕರಸ. ಕಾಕದ್ಯಾಮ ಕ್ಹುದಾ ತಿನಾ ದಿಕ್ರಾನೆ ಹುತಿ ಕದಲ ತೆ ಬರೊಕ್ಹೊ ನೈ ಕರ್ತೊ.