VUAANA 7:39 - Northern Tepehuan Bible

³⁹ Dai Suxi agaitadai go Diuxi Ibhïgadï gubukarhigadï ix ïr go sudagi gï dukami dai sai busi agai gobai odami iibhïadïañdïrï ïpïan dukai ix go sudagi busanïi ïmo babikiañdïrï. Dai go Diuxi Ibhïgadï ïr ix makïdï dibiagai odami iibhïadïana buaboitudakai ïgai. Dïï aidïpïrï ix pokaiti Suxi mai kia otoitadai ïgai Diuxi Ibhïgadï. Gï agaitadai kia ix imiagi Suxi tïbagiamu xako oidaka agai ïmo gïdukami xadutudaragai ïgai bïïtarï. Dai ka imïkai aidï gia otosa agaitadai ïgai Diuxi Ibhïgadï.

Tepehuan Northern: Diuusi ñiooquidʌ utuducami oodamicʌdʌ

³⁹ Pocaiti ʌSuusi vai maatʌca ʌoodami isDiuusi Ibʌadʌ ʌʌmadu daacana sioorʌ vaavoitudagi ʌgai. Aidʌ maiquiaa tʌvai Diuusi Ibʌadʌ tʌvaagiaiñdʌrʌ. ɅSuusi maiquiaa ii tʌvaagiamu cascʌdʌ.

VUAANA 7:39 ပူးပေါင်းရင်းမြစ်များ

Mataibo 16:14

Dai mamaatïrdamigadï potïtïdai, —Ïïmoko pokaitiña pïsaidi ïr go Juankaru ix makïdï bapakonaiña odami dai jaa pokaiti pïsaidi ïr go Eliaskaru, dai jaa pokaiti pïsaidi ïr go Jeremiaskaru xiïpï ïmai ñokituldiadamigadï Diuxi— itïtïdai.

Mataibo 21:11

Dai jaa ikaititadai, —Gobai ïr go Suxi. Ïmo ñokituldiadamigadï Diuxi gobai. Nasaretañdïrï oidakami gobai ix makïdï Galilea munisipiïrï bipiïyi— ikaititadai ïgai.

Lukas 24:49

—Daiñi— itïtïdai. —Ka podukai aagai gin Oga sai gïn maaki agai Ibhïadï gïn abhana dai aanï gïn otosdamu ïgai. Dïï gia gï agai xi tanaxi Jerusalenïrï biiyagi aapimï dai nïnïrakagi asta xïxkadï Diuxi Ibhïadï gïn maakiagi gubukarhigai tïbagiañdïrï— itïtïdai.

Lukas 3:16

Dïï gia go Juan potïtïdai go odami, —Aanï gia maiti ïr Diuxi otosadï ix makïdï nïnïraka aapimï. Gokiïrioma dibiamu ïgai— itïtïdai. —Gïïpi bamioma gubuka ïgai xi aanï tudu. Aanï tomarhi mai ajïi xi ibuadagi go bamioma arhidukïdï aaduindagai ïgai bïïtarï. Mai ajïi aanï tomarhi xi upasdagi sususakadï ïpïan dukai ïmo arhi pioñigadï tudu. Daiñi, aanï mosïkaxi sudagikïdï gïn bapakonaiña dïï gia Diuxi otosadï gia Diuxi Ibhïadïkïdï gïn bapakonadamu ïmadï táíkïdï. Agia ïr gïdukami ïgai daidi ïr gubuakami— itïtïdai.

Lukas 7:16

Daidi tïïgakai go odami ix go Suxi duakaturhi go mukiadï duduadimu dai aagaimi xïïxi ïr gïdukami Diuxi. Go odami ikaititadai aidï sai, —Kaxi ti gïr saagida ayi ïmo ñokituldiadamigadï Diuxi kïïga gubuakami. Dai xibi kaxi gïr urhiñdi Diuxi soiñi soi gïlda gïr nïiditai maamaradïkatai aatïmï— ikaititadai go odami.

VUAANA 1:21

Daidi ix makïdï Jerusalenañdïrï dada dai gatïkakaimi itïtïdai aidï, —¿Borai aapi aidï?— itïtïdai. ¿Aapi pïxi ïr go Eliaskaru?— itïtïdai. —Cho— itïtïdai Juan. —¿Aapi pïxi ïr go aagadami Diuxi ñokidï ix makïdï nïnïraka aatïmï judidiu?— itïtïdai go gaa. —Cho— itïtïdai Juan. —Aanï maiti ïr ïgai— itïtïdai.

VUAANA 1:25

Daidi gatïkaka ïgai go Juan daidi itïtïdai aidï, —¿Ix aapi maiti ïr go Ga Tïanïdami ix makïdï Diuxi otosa agai tuixi gabapakonai aidï odami?— itïtïdai. —Dai pokaiti aapi sai maiti ïr go Eliaskaru dai tomarhi maiti ïr go aagadami Diuxi ñokidï ïpï ix makïdï nïnïraka aatïmï judidiu. ¿Ix tuixidï gabapakonai aapi odami?— itïtïdai.

VUAANA 12:16

Dai podukai baa go Suxi Jerusalenïrï ix dukai ojixikatadai ïïki. Dïï go mamaatïrdamigadï mai máí ix ka poduitadai ïgai ix dukatai ojixikatadai. Mai máí ïgai asta gokiïrï aidïxi gï maaxitu Suxi xïïxi ïr gïdukami gï duakatudakai ïgai. Aidï gia gïn tïgito ïgai go ojai dai gïn tïgito ix rey dukai miadïgi ïgai go Suxi. Dai aidï gia máí ïgai ix Suxi iduitadai ixdukatai ojixikatadai.

VUAANA 12:23

Dai Suxi itïtïdai ix makïdï ami darakatadai aidï, —Kïï maatï aapimï sai ïmo ïxtokai tïrhigi gï agai ix gï yaasapikagi dai ïbogiami podukai yaasapikatai iporïi gobai dai mumuidarïi. Dai pomaaxi aanï ïpï. Daiñi, Aanï bia ix mukiagi sai podukai Diuxi maaxitudagi xïïxi ïr gïdukami aanï ix makïdï kïïgakïrï odami busai— itïtïdai.

VUAANA 14:13

Aidïpïrï iduñimu aanï bïïxi aïkatai ix tumaxi gin tañiagi aapimï gin mamaatïrdamikatai aapimï. Dai podukai nïijadamu odami xïïxi ïr gïdukami gin Oga ibuadatai aanï ix tumaxi gin tañiagi aapimï.

VUAANA 14:26

Dïï gokiïrioma ka maiti gïn maakimu aanï ñoki podukai. Bhaiyoma Diuxi gin Oga otosamu Ibhïgadï sai gïn soiñana gin bïïtarï ka imïkai aanï. Dai ïgai gïn maatïtuldamu bïïxi aïkatai ix tumaxi gï aagai ix maatïkagi aapimï dai gïn tïgitotuldamu bïïxi ixtumaxi gïn aagidiña aanï— itïtïdai Suxi.

VUAANA 16:14

Gïn tïtïgida agai ïgai xïïxi ïr gïdukami aanï gïn mamaatïturhitai bïïxi ix tumaxi aagidagi aanï.

VUAANA 16:7

Dïï mai tipu soi ïrhiaragai dai bhaiyoma aanï aagai sai xioma ïr kïïga aapimï gïn bïïtarï ix imïdagi aanï. Gï agai tudu ix imïdagi aanï sai bhodïrï mïkadïrï otosda aanï Diuxi Ibhïadï ix makïdï Soikïdami tïgidu sai gïn ïmadï dakana. Gï agai tudu ix imïdagi aanï. Ïma dukai mai dibiamu Diuxi Ibhïadï gïn abhana— itïtïdai.

VUAANA 17:1

Dai taiyakoga nïnïaba Suxi tïbagiamakoga ka kugaidakai aatagidï daidi itïtïdai ïgai Diuxi, —Gin Oga, ka ayi ix tuigako soimaaxi taatagi aanï dai mukiagi— itïtïdai. —Gï maara aanï dai xibi ipïrhidi aanï ix gamaaxitudagi aapi odami buitapi xïïxi ïr gïdukami aanï mukukai aanï, nai aanï maaxituldagi xïïxi ïr gïdukami aapi ïpï.

VUAANA 17:5

Xibi gin Oga, gin maaka ï galbaaxi sïïrhikami namïakami ix makïdï biakatadai aanï ïïki aidïxi gï ïmadï dakatadai aanï mai kia kïkibakai oidigi— itïtïdai Suxi.

VUAANA 20:22

Daidi bhodïrï Suxi buijako buxta mamaatïrdamigadï daidi itïtïdai, —Bhïibïrai Diuxi Ibhïgadï— itïtïdai.

VUAANA 6:14

Daidi go odami ikaiti nïiditai go maaxidaragai ix makïdï iduitadai Suxi, —Idi gia ïr go aagadami Diuxi ñokidï ïrhi aanï ix makïdï dibiagaitadai, ix makïdï Diuxi ojadï aagai tudu— ikaiti odami.

VUAANA 7:12

Daidi go odami ka mos dudusurhi aatagaitadai aipakoga aagaitai go Suxi. Ïïmoko pokaitiña sai kïï tuiga go Suxi dai jaa pokaitiña sai mos buirumadai ïgai óídakami.

VUAANA 8:54

Dai Suxi potïtïdai aidï, —Daiñi, ix ïïgi aanï potïiyagi saidi ïr ïmo gïï namïakami aanï, ¿Tumaxi ïr soiñikana gobai? Dïï gia Diuxi gin Oga ïgai ix makïdï ïmo namïakami gin aagai. Daiñi, pokaiti aapimï sai buaboitudai aapimï Diuxi

Hechos 19:2

Daidi Pabora itïtïdai go buaboitudadami aidï, —¿Dibia xi Diuxi Ibhïadï gïn abhana buaboidakai aapimï?— itïtïdai. —Cho— ikaiti go buaboitudadami, —Tomarhi mai kajiomakatadai aatïmï ix oidaga ïmoko dai Diuxi Ibhïadï tïgidu— itïtïdai.

Hechos 2:17

Karhioga ugitïkai oidigi dibiamu gin Ibhïdaga dai ïmadï daakamu bïïxi odami oidigi daama óídakami. Dai amaxi gïn maamara maaxi aagadamu gin ñoki. Dai gin Ibhïdaga soikïdamu utu iimïdami kïkïïrhi xi ïgai tïïgimu mui naana maaxi tïïtïki dukai. Dai podukai ïpï kïkïrhiodami ïpï biakamu naana maaxi tïïtïki.

Hechos 2:33

Diuxi baidaja go Suxi tïbagiamu sai sonoana daakana dai maa ïmo gïïdukami sïïrhikami. Dai Diuxi maa ïïgi ibhïadï go Suxi ix dukatai aagiditadai ïgai. Dai xibi Suxi gïr maa Diuxi Ibhïadï ïpï dai ix makïdï nïidi aapimï dai kaï xibi abïr ïgai duñidï.

Hechos 2:38

Dai go Piduru potïtïdai aidï, —Gï agai sai ïma dukai gïn tïtïgitoda aapimï bïïxkatai dai gï agai xi gïn bapakonada sïïrhikamigadïkïdï Suxi Kristo sai oigïlda gïn nïijadana Diuxi— itïtïdai. —Aidï gia Diuxi otosamu Ibhïadï sai gïn ïmadï daakana— itïtïdai.

Hechos 2:4

Tai ïmo tïgibudagai bipiatu go buaboitudadami ïmadï Diuxi Ibhïadï. Dai Diuxi Ibhïadï ñokiturhimi bai bïïxkatai ñiño ïïmo ñoki ix makïdï mai maatïkatadai ïgai.

Hechos 3:13

Cho, bhaiyoma Suxi gubukadadïkïdï duayi gobai— ikaiti. —Daiñi, gïr aaduñi ïïki buaboitudaiña Diuxi, go Abraam dai Isaak dai Jakobo tudu. Dai xibi Diuxi gïr tïïgi ix xïïxi ïr gubuakami Suxi gï maara. Dai aapimï tïïgi go Suxi go gïï dunukami Pilato. Dai tomaxi Pilato ka dagito agaitadai go Suxi xi imiagi aapimï mos apia gïpiïrï buapaimitadai.

Hechos 4:31

Daidi mos nato daanïkai ïgai Diuxi sai gigiburhi baaki xako darakatadai ïgai dai Diuxi Ibhïadï tïanïitadai bïïxkatai ïgai dai podukai mai duadimudagaikïdï aagaiña ïgai Diuxi ñokidï.

Romanos 8:9

Dïï gia ix gïn ïmadï daja Diuxi Ibhïadï aidï gia ka maiti gïn tïanïi gïn tïgibudaga ïkidadï. Bhaiyoma xibi Diuxi Ibhïadï ïgai dai gïn tïanïi. Xorai mai biakagi Diuxi Ibhïadï ix makïdï Suxi Kristo gïr otoxi, ïgai gia maiti ïr aaduñdï Suxi Kristo.

2 Korintios 3:8

Dïï gia go utudui sïïrhikami gïïpi bamioma gubuakami dukai dai xigiamaaxkami dukai ibuayi gubukadadïkïdï Diuxi. Xibi go utudui sïïrhikamikïdï gïr maa Diuxi ibhïadï tudu dai ïgai gïr maakai gubukarhigai sai kïïgakïrï óídakana aatïmï bïïxkïrï bïïtarï. Kïïga maatiga maaxi sai gïïpi bamioma xigian buayi go utudui sïïrhikami xi bhai go ïïkidadï tudu.

Efesios 4:30

Maiti abïr soi ïrhiatuldada Diuxi Ibhïadï gïn oidakaragakïdï tudu. Diuxi Ibhïadï ïr Diuxi tïpakarudï dukai ix makïdï gïn daxi Diuxi bai gï maatïkana kïïga xi ayimu ixtuigako buiya ragai bïïxi ixtumaxi gïr aagidi Diuxi sai gïr maaki agai kïïgakïrï bubuakïkai aatïmï. Kaxkïdï abïr mai soi ïrhiatulda ïgai.