VUAANA 4:14 - Northern Tepehuan Bible

¹⁴ Dïï mos go sudagi ix makïdï gaoidi aanï gokïdï gia ka mai tonokoñikana odami bïïxkïrï bïïtarï. Go sudagi ix makïdï gaoidi aanï ïr ïpïan dukami ïmo babiki ix makïdï odami ïrana mïraiña dai ïgaikïdï kïïgakïrï óídakana odami bïïxkïrï bïïtarï— itïtïdai Suxi.

Tepehuan Northern: Diuusi ñiooquidʌ utuducami oodamicʌdʌ

¹⁴ Dʌmos sioorʌ iiyagi ʌsuudagi ismaacʌdʌ aanʌ gaoidi, camaitonoocorʌi ʌgai tomali ʌmo imidagai. Ʌsuudagi ismaacʌdʌ aanʌ gaoidi gaibʌdagʌrʌ daacana dai vʌʌscʌrʌ vusanʌiña gosuudagi poduucai isduucai vusanʌi suudagi ʌmo vagʌacañiaiñdʌrʌ dai gosuudagicʌdʌ tomastuigaco oidacana oodami tʌvaagiʌrʌ Diuusi ʌʌmadu ―astʌtʌdai ʌSuusi.

VUAANA 4:14 ပူးပေါင်းရင်းမြစ်များ

Mataibo 25:46

Dai ix makïdï potïdagi aanï ka maigobai iimïda agai xako bïïxkïrï bïïtarï taata agai gïgïbidaragai. Dïï gia ix makïdï kïïga buañixi iibhïadï gia iimimu xako kïïgakïrï óídaka agai bïïxkïrï bïïtarï— itïtïdai Suxi go mamaatïrdamigadï.

Mataibo 5:6

—Dai aapimï ix makïdï kabami ipïrhidi sai kïïga buañixikagi gïn ibhïdaga, aapimï kïïga bia aapimï ïmo bhai ïrhiaragai ïpï. Kïïga gïn maakimu Diuxi ixtumaxi aagai aapimï. Buañixikami gïn biamu ïgai tudu— itïtïdai.

VUAANA 10:10

Daiñi, go bhaitï gukakami ïïxibogami mos soi buadana odami. Ïpïan buadana ïgai ïïxibogami ix makïdï gaïïxiada ïrhidi dai kodada ïrhidi kañiñiru. Dïï aanï mai podukai aatabuayi. Aanï gia dibia sai kïïgakïrï óídakana aapimï kïïga biakatai bïïxi ix tumaxi gï agadagi gïn iibhïdaga bïïtarï— itïtïdai.

VUAANA 11:26

Dai odami ix makïdï óídaga gin buaboidakai tomarhi ïmo imidagai mai koi agai ibhïgadï— itïtïdai. —¿Buaboitudai pïxi ixtumaxi gï aagidi aanï?— itïtïdai.

VUAANA 4:10

Dai Suxi itïtïdai, —Aapi maiti gin maatï dai tomarhi mai maatï aapi ixtuma oidaragai bia Diuxi óídakami bïïtarï. Ix maatïkamudai aapi aidï gia gin tañimudai sudagi ix aanï gï oidamudai go sudagi ix makïdï kïïgakïrï duakaturhidi odami— itïtïdai.

VUAANA 4:11

Dai go oki itïtïdai, —¿Dukatai bhïna aapi sudagi daidi gin oidana?— itïtïdai. —Mai bia aapi ixtukïdï busaidagi dai kïï tukabaga go poso bïïxi. Xadïrï ixtutuidïna aapi ix bhïiyagi sudagi daidi gin oidagi— itïtïdai. —¿Dai baadïrï gin oidana aapi sudagi ix makïdï kïïga duduakaturhi odami?— itïtïdai.

VUAANA 4:13

Daidi go Suxi itïtïdai, —Odami ix makïdï yïïdana go sudagi idi posoañdïrï otoma ïpamu tonokoñikana.

VUAANA 4:36

—Gin aaduñi, kaxi oidaga mui odami ix makïdï kaïkana gin ñoki dai ka bhai gïn duu ix gin buaboitudagi. Ïgai tudu ïr yoobaradï Diuxi gï dukami. Dai Diuxi kïïga mamaakai bhai ïrhiaragai odami ix makïdï soiña yoobai yoobaradï, soikïitai odami saidi gin buaboitudaiña tudu. Dai xïïxkadï soikïdagi aapimï odami saidi gin buaboitudaiña aidï gia bhai gïn ïjïldamu go gaa ix makïdï ka ïïkioñdïrï aagiditadai gin ñoki dai aapimï ix makïdï gokiïrï dada dai soi odami saidi gin buaboitudaiña kïïga bhai gïn ïjïldamu ïpï. Ïpïan ïxi bhai gïn ïjïldamu aapimï odami ix makïdï kïï gïïpi bañidagi yoobaragai— itïtïdai.

VUAANA 6:27

—Kïïga abïr gïn tïgito dai abïr mai gaagada mosïkaxi go kuadagai ix makïdï xia gï buayi. Bhaiyoma abïr gaagada go kuadagai ix makïdï bïïxkïrï bïïtarï óídakana odami ugakai. Daiñi, aanï ïr ix makïdï kïïgakïrï odami busai dai ka aagai Diuxi sai gin maa sïïrhikami kïïgakïrï gin nïiditai. Gin maa ïgai sïïrhikami ansai gïn maakana go pan ix makïdï bïïxkïrï bïïtarï óídakana odami ugakai— itïtïdai.

VUAANA 6:35

Dai Suxi potïtïdai, —Gin aaduñi— itïtïdai. —Ïïgi aanï ïr go pan ix makïdï aagai aanï. Daiñi, go pan ix makïdï oidaga tami oidigi dama maigobai dadasai mosïkaxi gïr tukuga bhiugigaigadï dïï aanï ïr pan gï dukami ix makïdï maigobai dadasai bhiugigaigadï odami ibhïgadï sai kïïgakïrï óídakana. Dai odami ix makïdï gin buaboitudagi ka mai biïgaka agai tomarhi ïmo ixtumaxi ibhïadï bïïtarï dai ka bïïxkïrï bïïtarï óídaka agai.

VUAANA 6:58

Aanï kïïgakïrï ïr go pan ix makïdï tïbagiañdïrï dibia. Dai mai ïpïamaaxi aanï go pan ix makïdï kuadana gïn piipixarakaru ïïki ix makïdï maná tïgidu. Ïgai uu go maná dai bïïxkïrï koi. Dïï gia xorai ugiagi go pan ix makïdï aagai aanï bïïxkïrï bïïtarï óídaka agai— itïtïdai.

VUAANA 7:37

Dai go kugatïrï tasïrï go bagimiïrï bamioma ïr namïakïdï. Dai aidï kugatïrï tasïrï go Suxi kïkiba dai gïïgïrï ño dai potïtïdai go odami, —Xorai tonokoñikagi sai gin urabana sai yïïdana go sudagi ix makïdï aanï maakimu.

Romanos 5:21

Ïkioma go soimaaxkami tïanïiña bïïxi óídakami gïr buapidakai gobai mukigami. Dïï gia xibi Diuxi gïr tïtïïgidi xïï kïï tuiga ïgai. Xibi Suxi Kristo Gïr Nukadakami bhai dui gïr bïïtarï sai Diuxi kïïgakïrï gïr nïijadana dai sai aatïmï kïïgakïrï óídakana bïïxkïrï bïïtarï ïpï.

Romanos 6:23

Go soimaaxkami maitïkidï ïr go ïï mukigami tudu. Dïï gia Diuxi gïr maakai ïmo oidaragai. Ïgai gïr maakai ïmo kïïgakïrï oidakaragai bïïxkïrï bïïtarï tudu bïïnakatai aatïmï Gïr Nukadakami Suxi Kristo.

2 Korintios 1:22

dai gïr maa Ibhïadï ïpï dai ïgaikïdï gïr tïpaltu ïgai. Dai Diuxi ibhïadï ix makïdï gïr ïmadï daja ïr ïmo maaxidaragai dukai sai aatïmï ïr ïko bubaidadï Diuxi. Diuxi gïr maa Ibhïadï tudu dai kaxkïdï xadïrï maiti gïr maakana ïgai bïïxi go gaa ixtumaxi ix makïdï ka bhai duñixikami bia ïgai gïr bïïtarï ïpï.

Efesios 4:30

Maiti abïr soi ïrhiatuldada Diuxi Ibhïadï gïn oidakaragakïdï tudu. Diuxi Ibhïadï ïr Diuxi tïpakarudï dukai ix makïdï gïn daxi Diuxi bai gï maatïkana kïïga xi ayimu ixtuigako buiya ragai bïïxi ixtumaxi gïr aagidi Diuxi sai gïr maaki agai kïïgakïrï bubuakïkai aatïmï. Kaxkïdï abïr mai soi ïrhiatulda ïgai.

1 Pedro 1:22

Daiñi gin aaduñi, aapimï ka ïïgidi go buaboi aatagi dai ka buañixikami bii gïn ibhïdaga. Kaxkïdï gï agai sai kïïgakïrï gïn oigïdada aapimï aipakoga bïïxi gïn ibhïdagakïdï.

1 Juan 5:20

Daiñi, kïïga maatï aatïmï sai dibia Diuxi Maradï tami oidigi daama dai gïr tïtïïgidi xorai buaboikïdï ïr Diuxi. Suxi Kristo ïgai dai gïr tïtïïgidi tudu. Dai xibi ka urabakatai aatïmï Suxi Kristo ka uraba bii aatïmï Diuxi ïpï. Suxi Kristo ïr Diuxi kaxkïdï. Buaboikïdï ïr Diuxi ïgai dai mai tipu ïmai. Mai tipu ïmai xorai gamaakadagi go utudui oidakaragai bïïxkïrï bïïtarï tudu. Mosïkaxi Suxi gïr maakai gobai.

Apokalipsis 7:16

Kaxkïdï xibi ka mai bhiugikoñikamu ïgai tomarhi ïmo imidagai dai mai tonokoñikamu. Dai ka mai soimaaxi taatamu gobai tonorhigaikïdï.

Apokalipsis 7:17

Go Arhi Kañiru ix makïdï go gïï daikarui sonoana kïïka ïgai dai nukadakamu ïpïan dukai xi ïmo odami nukadai sosoigadï kañiñiru. Bhaitï imimu ïgai dai tïïgidamu xajadïrï busanïi go sudagi ixtukïdï kïïgakïrï óídakana odami bïïxkïrï bïïtarï. Dai Diuxi buañimu suañibharudï xi ka mai soi gïn ïrhiada ïgai tomarhi ïmo imidagai— ikaiti go bhaitï kïakami.