VUAANA 19:4 - Northern Tepehuan Bible

⁴ Daidi go Pilato ïpamu busai kidigamu xako darajatadai go judidiu daidi itïtïdai, —Busaidamu aanï go Suxi bhaigobai bai maatïkana aapimï sai aanï mai tïï ix tumaxi ixtukïdï ïr soimaaxi ibuadami gobai— itïtïdai.

Tepehuan Northern: Diuusi ñiooquidʌ utuducami oodamicʌdʌ

⁴ Amaasi ʌPilaato ʌpamu vuusai quiidigamu daidi itʌtʌdai ʌjudidíu: ―Vuaapamu aanʌ gomaisapicʌdʌ baigovai vai nʌida aapimʌ ismaitʌʌ aanʌ isducatai ʌrsoimaasi ivuaadami goovai ―tʌtʌdai ʌPilaato.

VUAANA 19:4 ပူးပေါင်းရင်းမြစ်များ

Mataibo 27:19

Dai go gïï daikaruana dakatadai go Pilato aidï xako dakatai gatïanïiña ïgai. Daidi oñigadï otoxdi ñoki ami. Daidi potïtïdai, —Maiti gï agai xi gïpiïrï daitudagi aapi go kïïrhi gobai. Maiti gï agai ix maakada gïgïbidaragai tudu. Maiti ïr soimaaxi ibuadami gobai toma lïïchi kaxkïdï. Tukarï tïïtïkimi gobaikïdï dai kabami soimaaxi taata aanï gokïdï— as duu otoxdi ñoki go oki.

Mataibo 27:24

Dai gokïdï ka máí go Pilato sai ka maiti ixtutuidi agai buidïrï go odami mos ïï xigarhi kaititai go odami ijiñakaitai. Dai gatáí ïgai sudagi dai gï iko ami go óídakami buitapi. Podukai maaxituda ïrhiditadai ïgai saidi maiti ïr duñidїka agai xïïxkadï gï muatuda agai go Suxi. Daidi potïtïdai ïgai go óídakami, —Ka maiti ïr gin duñika agai gï aaxtakai ïradï go Suxi gï muatudakai ïgai. Ïïgi aapimï ïr gïn duñika agai gobai— itïtïdai.

Mataibo 27:4

Dai potïtïdai ïgai go dudunukami, —Agia soimaaxi idui aanï gatïïgidakai aanï go Suxi maiti ïr soimaaxi idukamikatai ïgai— itïtïdai. Daidi go dudunukami potïtïdai, —Aatïmï gïr bïïtarï maiti ïr ixtumaxi gobai. Ïïgi aapi ïr gï duñi gobai— itïtïdai.

Mataibo 27:54

Daidi kabami duduadimu go kapitañi ïmadï sandadarugadï ix makïdï nukadakatadai go Suxi. Nïiditadai ïgai aidïxi gigiburhi oidigi dai bïïxi ixtumaxi daibusai ami ïpï kaxkïdï. Daidi ikaitiña ïgai, —Idi gia ïr buaboi saidi ïr Diuxi maradï— ikaitiña.

Lukas 23:4

Dai bhodïrï go Pilato aagidi go bhaitï gukakamigadï go dadaxdadami ïmadï bïïxi go gaa odami ami dai potïtïdai ïgai, —Aanï mai tïtïgai ix Suxi ïr ïmo gïpiïrï kaatïkami— ikaiti.

Lukas 23:41

Dai aanï ïmadï aapi gia gïr ajïakatadai idi gïgïbidaragai. Soimaaxi ibuadami aatïmï kaxkïdï. Dïï gia idi kïïrhi gia maiti ïr soimaaxi ibuadami. Gï agaitadai xi ïbhiadagi aapi Diuxi dai mai podukai ñokadagi— itïtïdai.

Lukas 23:47

Dai kapitañigadï go sandadaru ami darakïdï kïïga ño Diuxi bïïtarï daidi itïi, —Agia ïr buaboi sai idi kïïrhi maiti ïr soimaaxi idukami— itïi ïgai nïiditai ixdukatai pogïduitadai.

VUAANA 18:33

Daidi bhodïrï ïpamu baa go kaigi Pilato tukabi dai gatïjai mïsai ami buapana go Suxi. Daidi itïtïdai ïgai go Suxi, —¿Aapi pïx tudu ïr Reygadï go judidiu?— itïtïdai.

VUAANA 18:38

Daidi go kaigi poïrhiditadai ix odami mai bhaigakatadai ix kïïga maatïkagi ix tumaxi ïr buaboi ix kaxkïdï itïtïdai ïgai go Suxi, —Pokaiti aapi sai oidaga ix tumaxi ïr buaboi. Xorai maatï ix tumaxi gobai— itïtïdai. Mos potïi go kaigi dai bhodïrï busai maigobai kidigana daidi ïmadï aataga go judidiu daidi itïtïdai, —Aanï mai tïï ix ixtukïdï ïr soimaaxi ibuadami idi kïïrhi.

VUAANA 19:6

Daidi go bhaitï gukakami gadaxdadami ïmadï go sandarugadï ijiñakimi tïïgakai go Suxi daidi ikaitimi, —¡Kuruxiana abïr xixa! ¡Kuruxiana abïr xixa!— ikaitimi. Daidi go Pilato itïtïdai go odami, —Baidakabïrai aapimï dai ïïgi kuruxiana abïr xixa. Aanï mai tïï ixtukïdï ïr soimaaxi buadami gobai— itïtïdai.

2 Korintios 5:21

Gïn aagidamu aanï ïmo ixtumaxi aagaitai aanï go oidaragai ix makïdï gïr maakai Diuxi tudu. Daiñi, Diuxi dáí go Suxi ïmo daxdaragai dukai sai buanana gïr soimaaxkamiga mai soimaaxi ibuadamikatai ïgai toma lïïchi. Po dui ïgai saidi ka bïïna biiyagi aatïmï Suxi Kristo sai podukai buañixikami biiyagi aatïmï ïpïan dukai Diuxi. Gobai tudu ïr go gïï oidaragai ix makïdï gïr maakai Diuxi.

Hebreos 7:26

Suxi Kristo tudu ïr go adaama kïïgadukïdï dadaxdadami ix makïdï bamioma kïï bhaiga ix gïr soikïdagi. Kïïga ïko daja ïgai go soimaaxkamiañdïrï tudu mai biakatai ixtukïdï gïpiïrï kaatïkagi. Kïï buañixi ïgai dai ka ïkobai daja ïgai soimaaxi ibuadamiañdïrï amïï tïbagiana dakatai ïgai. Dai bïïxi adaama bia ïgai xadutudaragai amïka tïbagiana dakatai ïpï.

1 Pedro 2:22

Suxi Kristo mai soimaaxi idui tomarhi ïmo imidagai. Dai mai buirumagi ïgai óídakami ïpï.

1 Pedro 3:18

Asta Suxi Kristo soimaaxi taata kïïga ibuadatai ïgai tudu. Muu ïgai bhai buadatai gïr soimaaxkamiga bïïtarï. Dai podukai bhai dui ïgai gïr bïïtarï bïïxkïrï bïïtarï dai ka mai biïga bamioma daxdaragai xibi. Kïïga buañixikami ïgai tudu dai muu ïgai aatïmï soimaaxi ibuadami gïr bïïtarï sai kïï biïna aatïmï Diuxi ïmadï. Gï muatu tukugadï tudu dïï gia gï duakaturhi ïpamu Ibhïadï.

1 Juan 3:5

Dai kïïga maatï aapimï sai Suxi Kristo mai soimaaxi ibuayi tomarhi ïmo imidagai. Dai bhaiyoma dibia ïgai tami oidigi daama buanada agaitai gïr soimaaxkamiga.