VUAANA 12:26 - Northern Tepehuan Bible

²⁶ —Daiñi xorai gin soikïdamika ïrhiadagi gï agai ix gin oijadagi bai podukai gin ïmadï dakana ïgai toma xako imïdagi aanï. Dai gin Oga kïïga namïakami dukai nïijadamu bïïxkatai ïgai ix makïdï ïr gin soikïdamikagi— itïtïdai Suxi.

Tepehuan Northern: Diuusi ñiooquidʌ utuducami oodamicʌdʌ

²⁶ Isʌmaadutai giñsoicʌda ʌliadagi gʌaagai isgiñoidátucudagi dai tomasiaaco aimʌrda aanʌ movaasi aimʌradagi ʌgai ʌʌpʌ. Dai sioorʌ giñsoicʌi, giñooga cʌʌgacʌrʌ nʌijada agai, ʌgai.

VUAANA 12:26 ပူးပေါင်းရင်းမြစ်များ

Mataibo 16:24

Daidi bhodïrï Suxi potïtïdai mamaatïrdamigadï, —Gïn aagidamu aanï ix dukatai gï agai xi ibuadagi odami ix makïdï ipïrhiadagi saidi ïr gin mamaatïrdamigakagi. Gï agai xi dagitoagi ïgai ïïgi tïgibudadï. Ka maiti gï agai xi ibuadagi ïgai ïïgi ixtumaxi ipïrhiadagi ïgai tudu. Xorai gin oijada ïrhiada gï agai bhaiyoma xi bïïx tasai kusukan dukai imïdagi go kuruxi ixtukïdï gï muatuda aagai ïgai. Gobai itïiya ïrhidi sai gï agai xi bïïx tasai bhai gï dukagi ïgai ix soimaaxi taatagi dai asta sai gï muatudagi gin oiditai. Aidï gia bhaigakamu ïgai xi gin oijadagi daidi ïr gin mamaatïrdamigakagi. Ïma dukai gia cho— itïtïdai.

Mataibo 25:21

Daidi amudï potïtïdai, —Kïï idui aapi gin pioñiga— itïtïdai. —Kïï tuiga aapi dai kïï sïïrhi aatadui aapi— itïtïdai. —Kïï idui aapi go chïkikïdï ix makïdï gï nukaturhi aanï, kaxkïdï xibi gï maakimu aanï sïïrhikami sai gïïpi bamioma gatïanïdana aapi. Gin urabañi tudu gin bhai ïrhiaragïrï— itïtïdai.

Markos 8:34

Amaxi go Suxi báí mamaatïrdamigadï ïmadï go gaa odami ix makïdï ami darajatadai sai miadïrï gukakana daidi potïtïdai, —Xi ïmadutai gin oidatukuda ïrhiada gï agai xi mai ïïgiada ïgai ïïgi tïgibudadï dai gï agai xi bhai gï dukamikagi ïgai ix gï muatudagi jaa kuruxiabha gï xixakai. Ix makïdï bhai gï dukamikagi podukai gï agai xi gin oidatukuda.

Lukas 12:37

—Daiñi— itïtïdai. —Aanï aagai sai kïïga bhai gïn ïrhiadamu pipioñi ix makïdï mai kokosïkagi xïïxkadï aiyagi amudï. Ix kïïga nïnïasïrhikagi ïgai aidï gia amudï ïïgi bhai gï duñimu aaduindagai bïïtarï dai aagidamu go pipioñi sai daraibana dai bhodïrï bhibhidamu ïgai.

Lukas 6:46

Daidi bhodïrï Suxi apia oidi aatagidï dai potïtïdai go odami, —¿Tui mïxi gïn Tïanïdamiga gin aagai aapimï? Maiti gin ïïgidiña aapimï ixtumaxi gïn tïanïdagi aanï di— itïtïdai.

Lukas 9:23

Daidi bhodïrï Suxi potïtïdai bïïxi go odami, —Gïn aagidamu aanï ix dukatai gï agai xi ibuadagi odami ix makïdï ipïrhiadagi ïr ïmo gin mamaatïrdamigakagi. Gï agai xi dagitoagi ïgai ïïgi tïgibudadï. Ka maiti gï agai xi ibuada ïgai ïïgi ixtumaxi ipïrhiadagi ïgai tudu. Gï agai bhaiyoma xi bïïx tasai kusukan dukai imïdagi ïgai go kuruxi ixtukïdï gï muatuda aagai ïgai. Gï agai tudu xi bïïx tasai bhai gï dukagi ïgai ix soimaaxi taatagi dai asta xi gï muatudagi gin oiditai. Aidï gia bhaigakamu ïgai xi gin oijadagi dai xi ïr gin mamaatïrdamigakagi. Ïma dukai gia cho—.

VUAANA 10:27

—Ix makïdï ïr gin sosoiga kañiñiru gia kïïga ïïgida kaïkana gin ñoki dai kïïga maatï aanï gin sosoiga dai ïgai gin ïmadï ajiopaiña.

VUAANA 13:16

Daiñi, kïïga maatï aapimï sai ïmo gapioñi mai bamioma namïga ix bhai tïanïdamigadï dai ïmo otoxikami mai bamioma namïga ix bhai ix makïdï gaotoi ïpï. Aanï ïr gïn tïanïdamiga tudu dai gïn otosdamiga dai bïïxkïrï gïn pioñi dukai gaatadui aanï gïn soikïitai xibiki kaxkïdï gï aagai ix mai gïgïrdukïdï gïn ïrhiadagi ïïgi aapimï dai bhaiyoma ix gapipioñi dukai gïn ïrhiada dai kïïga gïn soikïda aipakoga.

VUAANA 14:15

Dai Suxi apia oi go aatagi go mamaatïrdamigadï ïmadï dai potïtïdai, —Gin aaduñi, gin oigïdabïrai dai aidï gia gin ïïgiadamu aapimï bïïxi aïkatïrï kïïga gin oigïdaitai.

VUAANA 14:3

Daiñi kaxi an gïn aagidi sai bhai duñimu aanï xako óídakana aapimï amïka kaxkïdï gï maatï sai dibiamu aanï ïpamu gokiïrï dai gïn baidakamu ix amïka óídakana aapimï gin ïmadï.

VUAANA 15:20

Dai gïn tïgitobïrai ïpï go ñoki ix makïdï gïn aagidi aanï ïkioma. Gïn aagidi aanï sai —Ïmo gapioñi xadïrï bamioma namïakana ix bhai tïanïdamigadï— gïn tïtïdai aanï. Daiñi, aanï ïr gïn tïanïdamiga tudu dai odami kabami soi gin buididiña ¿Kaxkïdï dukatai mai soi buididiña ïgai aapimï ïpï gin mamaatïrdamikatai aapimï? Go bamioma muidukïdï soi gïn buidadamu tudu dïï gia go odami ix makïdï ïïgidi gin ñoki kïïga ïïgiada agai aapimï gïn ñoki ïpï.

VUAANA 17:24

—Gin Oga— itïtïdai. —Ipïrhidi aanï ix gin mamaatïrdamiga ix makïdï gin maa aapi gin ïmadï darakana tïbagiana bai podukai nïidiña ïgai xïïxi ïr gïdukami aanï. Aapi gin Oga ïgai dai gin dáí saidi ïr ïmo gïdukamikana aanï gin oigïdaitadai aapi ïïki abhiadïrï aidïxi mai kia tipukatadai oidigi— itïtïdai.

VUAANA 21:22

Daidi go Suxi itïtïdai, —Ix ipïrhiadagi aanï ix kia oidakagi gobai asta xïïxkadï ïpamu dibia aanï, gokïdï maiti gï agai ix buamï ïrhiada aapi. Aapi mos sai gin urabaka— itïtïdai.

Romanos 1:1

Aanï ïr Pabora dai gïn otoxi idi ojai. Aanï ïr tïañikarudï Suxi Kristo. Dai Diuxi gin dáí an saidi ïr otosadïkana dai ïkobai gin busaitu ïgai ïpï an sai óídakami buitapi aagaiña go bhai ïrhiaragai aatagi ix makïdï Diuxi gïr maa.

Romanos 14:18

Xorai podukai oidakagi Suxi Kristo bïïtarï maakimu bhai ïrhiaraga Diuxi dai odami kïï tuigakami dukai nïijadamu ïpï.

2 Korintios 4:5

Daiñi, aatïmï mai gïgïr tïtïanïdami dukai gïr aagaiña xïïxkadï gatïtïïgiadagi aatïmï ñoki. Gïn pipioñi dukai aatabuadana aatïmï bhaiyoma ibuadatai aaduindagai ix makïdï ïr soiñi aapimï gïn bïïtarï. Pobuayi aatïmï kïïga xadutuada rïrhiditai Suxi. Podukai mamaaxitudai aatïmï óídakami buitapi sai Suxi Kristo bïïxi adaama ïr Tïanïdami tudu.

2 Korintios 5:8

Daiñi, tïtïitoi aatïmï Gïr Nukadakami, ïmadï óídaka rïrhiditai tïbagiana dai kaxkïdï mai buamï rïrhiditai óídaga aatïmï tami oidigi daama. Asta ka bhai duka aatïmï ix dagitoagi gïr tukuga ipïrhiditai ix ïmadï darakagi Suxi Kristo tïbagiana tudu.

Galatas 1:10

Daiñi, aanï kïïga buamï in ïrhidi ix tïiyagi Diuxi nïiditai ïgai ix dukatai gatïtïïgidi aanï aatagi. Dïï gia mai buamï ïrhidi aanï ix tïiyagi odami. Mosïkaxi Diuxi buamï ïrhidi aanï ix tïiyagi tudu. Daiñi, oidaga odami ix makïdï pokaitiña sai aanï naana dukai aagaiña aatagi aagaitai ïïgi ixtumaxi kaïka ïrhiada odami. Pokaitiña ïgai sai aanï mos gaagaiña ix dukatai kïïgakïrï gin nïijadagi óídakami. Dïï maiti ïr buaboi gobai. Aanï ipïrhidi bhaiyoma sai kïïgakïrï gin nïijadagi Diuxi pioñigadïkatai aanï Suxi Kristo dai mai xu xi ipïrhidi aanï xi odami kïïgakïrï gin nïijadagi. Ka aagai aanï tudu sai xorai mai sïïrhi aagagi go bhai ïrhiaragai aatagi gï agai xi taatagi gïgïbidaragai bïïxkïrï bïïtarï. ¿Kaxkïdï dukatai naana dukai aagaiña aanï go aatagi? Mai bhaiga. Maatiga maaxi gobai di. Pioñigadï aanï Suxi Kristo tudu xi kaxkïdï bia aanï xi sïïrhi aagagi go aatagi dai mai xu xi mos aagagi aanï ixtumaxi odami kaïka ïrhiadagi.

Filipenses 1:23

Goka tïgibudagai in aïjïi tudu dai bhaitoma mai tïtïgai ix dukatai gin tïgitoagi ix makïdï bamioma bhai dukai nïijadagi in bïïtarï. Ipïrhidi aanï xi imiagi tami oidigi daamaiñdïrï dai Suxi Kristo ïmadï dakagi tudu. Kaxkïdï tudu gobai bamioma ïr kïïgadukïdï aanï in bïïtarï.

Kolosenses 3:24

Kïï maatï aapimï tudu sai Gïr Nukadakami ïgai dai gïn maaki agai go maitïki ix makïdï ka aagai ïgai sai gïr maaki agai. Suxi Kristo Gïr Nukadakami tudu ïgai daidi kïïgakïrï ïr gïn amu.

Kolosenses 4:12

Diuxikïdï gïn biaturhi go Epafro ïpï. Ïgai ïr ïmo pioñigadï Suxi ïpï dai gïn urapïkïiña ïgai amïka ïpï. Ïgai bïïxi ibhïgadïkïdï gïn daanturhiña sai kïïga kaban gukakana aapimï gïn buaboidaraga. Dai gïn daanturhi ïgai ïpï sai kïïga biakana aapimï ibhïxtaragai kïïga maatïkatai aapimï bïïxi ixtumaxi ipïrhidi Diuxi saidi ibuada aapimï.

2 Pedro 1:1

Bhaiga gin aaduñi Diuxi amadïrï. Aanï ïr Ximuñi Piduru dai ïmo pioñigadï aanï Suxi Kristo otosadïkatai aanï ïgai. Gïn ojidi aanï aapimï ix makïdï buaboitudai ïpïandukai aatïmï ix makïdï ïr ojotosadï Suxi Kristo. Suxi Kristo ïr gïr Diuxiga dai gïr kïïgakïrï bubiadamiga. Kïïga buañixikami dukai dai kïïga sïïrhi aatadui ïgai dai podukai aatadunakai ïgai gïn ayi aapimï oigaragai ix kïïgakïrï bubuakiagi aapimï.

1 Juan 5:3

Dai xïxkadï ïïgiadgi Diuxi gokïdï gamamaaxidi aatïmï ix oigïdai aatïmï ïgai ïpï. Dai mai xijaiga ïïgiadagi ïgai.

Udaxi 1:1

Bhaiga gin aaduñi Diuxi amadïrï. Aanï ïr Udaxi dai gïn ojidi idi ojai. Sukurhidï aanï Santiago dai ïmo pioñigadï aanï Suxi Kristo. Gïn ojidi aanï aapimï ix makïdï ïr ïko bubaidadï Diuxi gïr Oga. Aapimï ïr ix makïdï kïïga gïn oigïdai dai gïn nukadai Diuxi. Gïn nukadai ïgai urabakatai aapimï Suxi Kristo tudu.

Apokalipsis 14:4

Go nïdami ïgai ïr kïkïïrhi ix makïdï mai ïmadï dïgabusai oki dai kïï buañixikatadai ibhïadï. Kïïga ïïgidiña ïgai go Arhi Kañiru dai aipakoga oidiña. Ïgai ïr Diuxi ïkobai bubaidadï tudu ix makïdï Diuxi sabïrhi go gaa óídakami saagidañdïrï go Arhi Kañiru ïradïkïdï. Go nïdami ïgai ïr daxdaragai dukai ïpï ïpïan dukai go daxdaragai ix makïdï ibuadana aatïmï judidiu. Aatïmï xïïxkadï gayoba agadagi gïr ïxi ibuadana aatïmï daxdaragai Diuxi bïïtarï tudu. Dadaxdiña aatïmï Diuxi go gïr ïxi ibhiadï ix makïdï ïpïgioma yoobagi aatïmï dai ix makïdï bamioma kïkïïgadu. Pomaaxi go kïkïïrhi ïgai. Ïmo daxdaragai dukai ïgai Diuxi bïïtarï kïï buañixikatai ïgai dai ïko darakatai ïgai Diuxi bïïtarï.