VUAANA 1:4 - Northern Tepehuan Bible

⁴ Dai ïgai gamaakai ibhïkidï bïïxi aïkatai ix tumaxi ïr duakakami. Ïgai mai mosïkaxi Diuxi ñokidï tïgidu. Kudagi tïgidu ïgai ïpï ïmo kudagi gï dukamikatai ïgai odami bïïtarï. Ga kukudadai ïgai odami iibhïadïrï sai maatï kaïkana odami ix tumaxi ïr buaboi.

Tepehuan Northern: Diuusi ñiooquidʌ utuducami oodamicʌdʌ

⁴ Diuusi maradʌ gʌrmaacai ibʌdagai utuducami dai soicʌi oodami ismaatʌ caʌcagi Diuusi ñiooquidʌ.

VUAANA 1:4 ပူးပေါင်းရင်းမြစ်များ

Mataibo 4:16

Ami óídakami ïr koidadï dukai ibhïadïrï. Tukapi dukai óídaga ïkobai darakatai ïgai Diuxiañdïrï tudu. Dïï gia ami ayi ïmoko ix makïdï ïr ïmo gïï kudagi gï dukami go óídakami bïïtarï dai tïtïïgidi ïgai ix dukatai kïïgakïrï bubuakiagi, pokaiti ojadï go Isaiaskaru tudu.

Lukas 2:32

Idi maatïtuldamu ixtumaxi ïr buaboi go odami ix makïdï maiti ïr judidiu. Dai idikïdï gïr ayimu ïmo gïdukami xadutudaragai aatïmï Israelitas. Aatïmï gïr bïïtarï ix makïdï ïr gï aaduñi aapi Diuxi— itïtïdai go Ximuñi Diuxi.

VUAANA 11:25

Dai Suxi itïtïdai aidï, —Aanï ïgai ix makïdï duduakatudai koidadï di. Dai aanïkïdï kïïgakïrï óídaga óídakami ïpï. Odami ix makïdï gin buaboitudai, tomaxi koi ïgai bïïxkïrï kïïgakïrï duduaka agai.

VUAANA 12:35

Dai Suxi itïtïdai, —Gïn aagidamu aanï xorai gin aagai ïïgi aanï. Aanï ïr go kudagi óídakami bïïtarï. Dai xibi mosïkaxi chïki tasai biakamu aapimï go kudagi gïn ïmadï kia ixtukïdï kïïga ajiopada aapimï kïï maaxikatai boi. Gï agai ix otoma bhïiya aapimï boi tudu, tadu gïn ayi tukagi. Kaxkïdï tudu odami ix makïdï tukapi ajiopai mai maatï tomarhi xajako imi agai.

VUAANA 12:46

Ïmo kudagi dukai dibia aanï tami oidigi daama bai podukai bïïxi ix makïdï gin buaboitudagi ka mai tukapi ajiopadagi— itïtïdai.

VUAANA 14:6

Daidi Suxi itïtïdai, —Aanï tudu ïr go boi ixtukïdï ajïi odami xako daja Diuxi. Mosïkaxi aanïkïdï mamaatïrïi odami ixtumaxi ïr buaboi. Dai mosïkaxi aanïkïdï kïïgakïrï óídaga odami ïpï. Mai tipu xorai aiyagi mïïka xako daja Diuxi ix maiti gin buaboitudadagi ïgai.

VUAANA 3:19

—Aanï ïr kudagi gï dukami tïtïgiditai odami ix tumaxi ïr buaboi. Dai ayi aanï tami oidigi daama dïï odami ibuadana soimaaxkami dai xioma ojoidiña ix ïxto biagi gïn soimaaxkamiga tukapiïrï dukai oidakatai. Mai ojoidi ïgai ix gï kudaidagi go soimaaxi ix makïdï ibuadana ïgai sai maaxikana. Bhaiyoma ïxto biaka ïrhidi ïgai gïn soimaaxkamiga. Kaxkïdï Diuxi gïgïbitulda agai ïgai.

VUAANA 5:21

—Daiñi, Diuxi gin Oga kïïga duakatudai koidadï dai aanï ïr Diuxi Maradï dai aanï ïpï duakatudai xorai ipïrhiada aanï.

VUAANA 5:26

Daiñi, Diuxi gin Oga bia gubukarhigai ix duakaltudagi odami dai gin maa ïgai gubukarhigai ix aanï duakatuldana odami ïpï Maradïkatai aanï.

VUAANA 8:12

Dai bhodïrï Suxi aatagidi go gaa odami ami darakïdï dai potïtïdai, —Daiñi, ix dukai kudagikïdï maaxkana oidigi podukai ïpï aanï maaxitudai odami bïïtarï tumaxi ïr buaboi. Kaxkïdï ïr kudagi gï dukami aanï. Dai xorai gin oijadagi kïïgakïrï óídaka agai bïïxkïrï bïïtarï dai ka mai tukapi ajiopada agai maatïkatai ix tumaxi ïr buaboi— itïtïdai.

VUAANA 9:5

—Dai ix dukai kudagikïdï nïidi odami ixtumaxi oidaga tami oidigi daama podukai ïpï aanïkïdï mamaatïrïi odami ix tumaxi ïr buaboi Diuxikïdï. Kukudaidan duu aanï odami iibhïadï tudu dai ix xïï tïbïpi oidakagi aanï kia tami idi oidigi daama po ïï tïbïpi kukudaidakamu aanï kia— itïtïdai Suxi.

1 Korintios 15:45

Daiñi, Diuxi ñokidï pokaiti sai, Ibhïiba kïkiba go Adán, dai duakakami bii tukugadï sai oidakaiña ïgai tami oidigi daama. Dïï gia oidaga ïmai ix makïdï mai ïpïamaaxi go Adán. Ïgai ïr Suxi Kristo ix makïdï go kugatïrï Adán aagaiña odami. Ïgai mai mosïkaxi biatu gubukarhigai ix tami oidigi daama oidakagi. Ïgai bhaiyoma gamaakai gubukarhigai sai kïïgakïrï oidakana óídakami bïïxkïrï bïïtarï.

Efesios 5:14

Kaxkïdï odami ikaitiña, —Nïñiñi aapi kosokami Daidi bañigi koidadï saagidañdïrï ka duakakai Baidi Suxi Kristo gï kudaidana— ikaitiña odami.

Kolosenses 3:4

Dïï gia kïïga maatï aatïmï sai mosïkaxi bïïnakatai aatïmï Suxi Kristo bhaiga aatïmï xi kïïgakïrï óídakagi. Mai tipu ïma dukai. Kïïga maatï aatïmï gobai tomaxi mai maatï aatïmï kia ix maaxika agai gïr utudui oidakaraga. Dïï gia xïïxkadï ka kïïga gï maaxitudagi Suxi Kristo xïïxi ïr gïdukami ïgai dai ka biakagi gïdukami xadutudaragai amaxi biakamu aatïmï xadutudaragai ïgai ïmadï ïpï.

1 Juan 1:1

Bhaiga gin aaduñi Diuxi amadïrï, aanï ïr Juan dai gïn aagida in ïrhidi ïmo ñoki aagaitai Suxi Kristo dai gïn otoxdi aanï idi ojai. Dai gin ïmadï daraja jaa ïpï gaojaitai aanï. Ipïrhidi aanï sai maatïka aapimï sai Suxi Kristo kaxi oidakatadai ïïki abhiadïrï mai kia kïkibakai oidigi. Dai Suxi Kristo bia ïmai tïtiaradï ïpï. Go Diuxiamadïrï Ñoki ix makïdï kïïgakïrï gïr duduakaturhi tïgidu ïgai ïpï. Bïïxkïrï bïïtarï gïr duduakaturhi ïgai tudu. Daiñi, aanï ïmadï go gaa ojotosadï Suxi kïïga ïr nïijadami ix tumaxi ibuadana ïgai aidïxi tami oidigi daama aimïraitadai ïgai. Kaï aatïmï aatagidï tudu dai asta taatamaiña aatïmï tukugadï. Kaxkïdï gï maatï saidi ïr buaboi ixtumaxi gïn aagidagi aatïmï aagaitai ïgai.

1 Juan 1:2

Ïgai tudu gïr maakai go utudui oidakaragai bïïxkïrï bïïtarï. Biatu ïgai tukugai dai gï maaxitu gïr buitapi tami oidigi daama. Kïïga nïidi aatïmï tudu dai kaxkïdï gïn aagidimi aatïmï xibi sai ïgai duduakatudai odami iibhïadï sai mai kona ïgai tomarhi ïmo imidagai. Ïmadï dakatadai ïgai Diuxi gïr oga ïïki abhiadïrï dai xibiapioma dibia ïgai tami idi oidigi daama gïr bïïtarï.

1 Juan 5:11

Diuxi gïr aagidi sai gïr maakai ibhïdagai utudui sai kïïgakïrï óídakana aatïmï bïïxkïrï bïïtarï mos buaboitudakai aatïmï Maradï tudu.

Apokalipsis 22:1

Dai bhodïrï go tïañikarudï Diuxi gin tïïgi go aki ami go gïï kiikiïrï xako mïrai go sudagi ixtukïdï kïïgakïrï óídaga odami. Kïï buañixi go sudagi. Ïpïamaaxi bidrio kïï buañixikatai. Go gïï daikaruañdïrï mïrai gobai xako daja Diuxi ïmadï go Arhi Kañiru tïgidukïdï.

Apokalipsis 22:16

Daidi Suxi Kristo in tïtïdai, —Aanï Suxi Kristo ïgai dai otoi ïmo tïañikarudï Diuxi sai aituldana idi ñoki bïïxi buaboitudadami aipakoga gïn ïmpaidadami. Aanï ïr pipiixaradï go rey Dabidkaru dai aanï bhïiyi sïïrhikamigadï. Aanï ïr ïpïandukami go gïï xabugai ix makïdï tïbïpioma kudakana kiamoko. Gïdioma aanï xi toma xorai tudu— in tïtïdai Suxi.