VUAANA 1:14 - Northern Tepehuan Bible

¹⁴ Daidi go Diuxi Ñokidï tïgidukami ïmo odami busai dai biatu tukuga ïpïamaaxkami ix makïdï bia aatïmï dai bhodïrï óídakami saagida oidatu. Sïïrhikïdï kïï tuiga ïgai dai kïïga gïr maatïturhi ix tumaxi ïr buaboi. Dai aanï Juan ix makïdï ibuayi idi ojai ïmadï jaa mui kïïga nïidi ïgai ix makïdï Diuxi Ñokidï tïgidu. Dai aatïmï ïr nïijadami xïïxi ïr gïdukami ïgai dai xïï kïï tiodi ïgai Diuxi maradïkatai. Diuxi maradï ïmadugakïdï ïgai tudu.

Tepehuan Northern: Diuusi ñiooquidʌ utuducami oodamicʌdʌ

¹⁴ Daidʌ ʌCristo Diuusi maradʌ tʌvai tʌvaagiaiñdʌrʌ dai ʌgaicʌdʌ gʌmaí istuiga Diuusi. Diuusi maradʌ vuusai oodami duucai dai oodami saagida oidacana. Dai ʌgai sʌʌlicʌdʌ cʌʌgacʌrʌ nʌidiña oodami dai vʌʌsi istumaasi aagaiña ʌgai ʌrvaavoi. Dai aatʌmʌ maí siʌgai viaa ʌmo sʌʌlicami dai aliʌ viaa guvucadagai. Diuusi ʌgai dai maa gʌmara sʌʌlicami dai guvucadagai. Diuusi mosaliʌʌmaduga maradʌ.

VUAANA 1:14 ပူးပေါင်းရင်းမြစ်များ

Isa 7:14

Po tïtïdai ïgai sai, —Gïr Nukadakami gïn maaki agai aidï ïmo maaxidaragai ixtukïdï maatïkagi aapimï xi ïgai iduñi agai ix dukatai gïn aagidi ïgai ïïki. Gïn aagidamu aanï ix tumaxi ïgai daidi ïr maaxidaragai ka agai. Ïmo tïji ix makïdï mai kia abhana boo kïïrhi tïïgi agai ïmo arhi gïrhi abhana. Gobai ïgai dai maaxidaragai ka agai. Dai ka dibiakai ïgai Emanuel tïïtï agai— itïtïdai Isaias go Israelitas.

Mataibo 1:16

Go Jakobo marai go Josekaru ix makïdï ïr kunadïkatadai go Maria. Dai go Maria ïr dïïdï Suxi Kristo.

Lukas 2:11

—Ïkiapo mo busai gïn Kïïgakïrï Bubiadamiga ami go arhi kiikiïrï xakoga oidatu go Dabidkaru ïïki. Ïgai ïr Gabhaitïkïakami dai ïr go Kristo.

Lukas 9:32

Daidi kabami kokoximu go Piduru ïmadï Juan dai Santiago mai kia maaxtukai go Moises ïmadï Elias. Dai koi ïgai lachi dai amaxi nïnïabakai tïï ïgai go Suxi ix tonoraka maaxi dai tïï ïgai go Moises ïmadï go Elias ïpï xi ami guka.

VUAANA 1:1

Tukamïrï aidïxi mai kia tipukatadai oidigi kaxi oidakatadai Diuxi Maradï. Dai Diuxi ïmadï dakatadai Diuxikatai ïgai ïpï. Ïgai ix makïdï Diuxi ïmadï dakatadai dai ïr Diuxi ïpï ïr Diuxi Maradï dai Diuxi Ñokidï tïgidu.

VUAANA 11:40

Daidi go Suxi itïtïdai, —¿Maiti ix gï aagidi aanï sai nïidamu aapi xïïxi ïr gïdukami Diuxi buaboitudakai aapi?— itïtïdai.

VUAANA 14:6

Daidi Suxi itïtïdai, —Aanï tudu ïr go boi ixtukïdï ajïi odami xako daja Diuxi. Mosïkaxi aanïkïdï mamaatïrïi odami ixtumaxi ïr buaboi. Dai mosïkaxi aanïkïdï kïïgakïrï óídaga odami ïpï. Mai tipu xorai aiyagi mïïka xako daja Diuxi ix maiti gin buaboitudadagi ïgai.

VUAANA 14:9

Daidi Suxi potïtïdai, —Aapi Pirhi, ¿Tui pïxi pokaiti sai gïn tïïgidana aanï gin Oga? ¿Mai ix ka tïbïpi gïn ïmadï dakana aanï? ¡Dai modukai mai kïïga gin máí aapi! Daiñi, xorai gin nïidi kaxi ïr nïijadami gin Oga ïpï mos gin nïiditai— itïtïdai.

VUAANA 17:22

—Gin Oga— itïtïdai. —Ix dukai aapi ïmo namïakami gin dáí, podukai aanï namïakami darai gin mamaatïrdamiga ïpï sai kabami namïakana ïgai gin ïmadï. Podukai darai aanï ïgai saidi mos ïmo odami gïn dukamikana gïr ïmadï.

VUAANA 17:24

—Gin Oga— itïtïdai. —Ipïrhidi aanï ix gin mamaatïrdamiga ix makïdï gin maa aapi gin ïmadï darakana tïbagiana bai podukai nïidiña ïgai xïïxi ïr gïdukami aanï. Aapi gin Oga ïgai dai gin dáí saidi ïr ïmo gïdukamikana aanï gin oigïdaitadai aapi ïïki abhiadïrï aidïxi mai kia tipukatadai oidigi— itïtïdai.

VUAANA 18:37

Daidi go kaigi itïtïdai, —¿Aidï gia ïr buaboi saidi ïr ïmo Rey aapi?— itïtïdai. Dai go Suxi itïtïdai, —Ïjï, kïïga aagai aapi saidi ïr Rey aanï. Go maa bïïtarï tudu dibia aanï tami idi oidigi daama Rey iñagaitai— itïtïdai. —Ga maatïtulda iñagai aanï ix tumaxi ïr buaboi dai dibia. Dai odami ix makïdï ïïgida ïrhidiña ixtumaxi ïr buaboi kïïga ïïgida kaïkana gin ñoki— itïtïdai Suxi.

VUAANA 2:11

Idi tudu ïr tukamidïrï maaxidaragai ix makïdï idui go Suxi Kristo dai gokïdï mamaaxitudai ïgai xïïxi ïr gïdukami dai xïïxi ïr gubuakami. Daidi mamaatïrdamigadï buaboitu aidï nïiditai go maaxidaragai ix makïdï idui Suxi. Dai go arhi kiiki xako pogïdui gobai Kana tïgidu. Go Kana Galileïrï bipiïyi.

VUAANA 3:16

—Diuxi sïïrhikïdï kïïga oigïdai bïïxi oidigi daama óídakami dai kaxkïdï gin otoi ïgai aanï ix makïdï ïr Maradï ïmadugakïdï. Gin otoi ïgai an sai mukuna bai mai kona ix makïdï gin buaboitudagi dai bhaiyoma bïïxkïrï bïïtarï óídakana.

VUAANA 3:18

—Aanï tudu ïr Diuxi Maradï ïmadugakïdï dai tipu gïgïbidaragai odami bïïtarï ix makïdï gin buaboitudai. Dïï gia Diuxi ka aagai ix tuma gïgïbidaragai ajiagai odami ix makïdï maiti gin buaboitudai. Maiti ipïrhidi ïgai ix buaboitudagi tomaxi aanï ïr Diuxi Maradï ïmadugakïdï kaxkïdï— itïtïdai.

VUAANA 6:51

Aanï tudu ïr ix makïdï tïbagiañdïrï dibia dai ïr pan duakakami gin dukami dai odami ix makïdï ugiagi gobai óídaka agai bïïxkïrï bïïtarï. Gin tukuga tudu ïgai daidi ïr go pan gï dukami dai aanï gatïïgida iñagai gin tukuga ix oidigi daama óídakami ugana dai kïïgakïrï óídakana— itïtïdai Suxi.

VUAANA 8:32

dai kïïga maatïkamu aapimï ixtumaxi ïr buaboi. Dai buaboitudaitai aapimï ixtumaxi ïr buaboi aidï gia kïïgakïrï bubuakimu aapimï ix ka mai pipioñi dukai gïn aaduintuldamu gïn amu— itïtïdai.

Hechos 13:33

dai xibi aatïmï ïr piipixaradï ïgai dai gïr bïïtarï Diuxi idui ixdukatai agaitadai aidï. Duakaturhi ïgai go Suxi mukukai ïgai. Podukai buaboi busai ixdukatai ojixi Salmo gokïrï. Ami ojixi sai Diuxi ikaiti, Gin maara aapi, dai xibi baan gï kïi aanï bïïxi odami buitapi bai maatïkana ïgai ix aapi ïr gin maara, ikaiti Diuxi.

Romanos 8:3

Go sïïrhikami ojixikami maiti ixtui ix kïïgakïrï gïr bubaidagi. Mai bia gobai gubukarhigai ixtukïdï gïr soiñagi. Ïïgi sobhikïiña aatïmï adaimïitai gïr ïkidadï tïgibudagai kaxkïdï. Dïï Diuxi gia kïïgakïrï gïr bubaitu. Ïgai otoi maradï sai biakana ïmo tukugai ïpïamaaxkami ix makïdï bia aatïmï soimaaxi ibuadami. Dai gï muatu ïgai gïr soimaaxkamiga bïïtarï. Podukai Suxi tukugadïkïdï Diuxi gamaitï go soimaaxkami bui.

Romanos 9:5

Go gin aaduñi judidiu ïr piipixaradï go Abraamkaru dai Isaakaru dai Israelkaru. Dai Suxi Kristo Diuxi Otosadï ïr judiukatadai ïpï. Suxi Kristo ïr Diuxi dai bïïxi adaama ïr Tïanïdami ïgai. Kaxkïdï gï agai xi gï xadutuadagi ïgai bïïxkïrï bïïtarï.

1 Korintios 15:47

Dïbïraiñdïrï idui Diuxi go Adán tukugadï dai bïïxkatai aatïmï bia gïr tukuga ix maaxi biakatadai go Adán. Dïï gia Suxi Kristo ayi gokiïrï xi go Adán tïbagiañdïrï dibiakai ïgai dai gïïpi ïma maaxi aaduindagai idui. Xibi bïïxkatai aatïmï ix makïdï buaboitudai biakamu gïr tukuga ix maaxi bia ïgai.

2 Korintios 12:9

Dai bhaiyoma pobai in tïtïdai Diuxi sai, —Maiti an maigo imituda iñagai gobai— in tïtïdai ïgai. —Dïï gia kïï tuiga aanï gï bïïtarï dai gï maakimu aanï gubukarhigai saidi gï kabakadagi aapi go soimaaxi taataragai bïïtarï. Mosïkaxi gobai tïgito aapi tudu. Xïïxkadï mai gubuakagi aapi amaxi kïïga maaxkana gin gubukarhiga gï soikïitai aanï tudu— in tïtïdai ïgai. Kaxkïdï kïïga bhai ïrhiarakïdï aagaiña aanï xïïxi mai gubuka aanï. Bhai gin ïrhidiña aanï maatïkatai sai podukai kïïgioma maaxkana gubukarhigadï Suxi Kristo gin abhana gaatabuadatai ïgai tudu.

Galatas 4:4

Dïï gia Diuxi maiti ipïrhidi xi pipioñi dukai óídakagi aatïmï tomarhi xi ïr arhi dukaikagi ïpï. Kaxi ïr maamaradï aatïmï kaxkïdï. Ipïrhidi ïgai xi gïgïr odamikagi aatïmï tudu bai gïr maakana ïgai bïïxi ixtumaxi gïr ajïga maamaradïkatai aatïmï. Kaxkïdï ka aïkai ixtuigako Diuxi ipïrhi aidï bhai dui ïgai gïr bïïtarï xi ka bhaigakana aatïmï xi ka biakagi ixtumaxi gïr ajïga. Otoi ïgai Maradï tami oidigi daama tudu dai ïgai ïmo kïïrhi busai. Dai biakatadai ïgai xi ïïgiadagi go sïïrhikami

Efesios 3:8

Daiñi, tomaxi aanï ïr ïmo buaboitudadami bamioma mai namïakïdï, bïïxkïrï Diuxi gin maakai idi gïdukami bhai ïrhiaragai. Gin maa ïgai xi aagidagi aanï go ix makïdï maiti ïr judidiu xïï kïï tuiga Suxi Kristo gïr bïïtarï bïïnakai aatïmï ïgai. Odami tïgibudadï mai ajïi ix maatiagi xïïxi ïr namïakami Suxi Kristo gïr bïïtarï tudu.

Kolosenses 1:19

Daiñi, Suxi Kristo ïr Diuxi Maradï. Dai Diuxi bhai ïrhi sai Suxi Kristo maaxitudana go óídakami buitapi xorai Diuxi dai kaxkïdï otoi ïgai tami oidigi daama. Suxi Kristo kïïgakïrï ïr Diuxi tudu dai kaxkïdï kïïga maaxiturhi ïgai ix tuiga Diuxi.

Kolosenses 2:3

Suxi Kristo tudu ïgai dai gïr tïtïgidi Diuxi tïgibudadï. Daiñi, Diuxi bïïxi maatï dai tïgibudadï kïï saitudaga. Dai ïxtokikana Diuxi tïgibudadï gïr bïïtarï ïpïan dukai mui tuminxi yaasapikami. Dïï gia Suxi Kristo ïgai dai gïr tïtïgidi gobai.

1 Tomoteo 3:16

Kïïga maatï aatïmï sai namïga gïr buaboidaraga buaboidaitai aatïmï Suxi Kristo. Daiñi, ïkioma óídakami mai maatïkana ixtumaxi ïr buaboi dïï gia Diuxi gïr tïïgi ixtumaxi ïr buaboi dibiakai Suxi Kristo. Dai xibi naana maaxikïdï maatï aatïmï saidi ïr buaboi ixtumaxi aagai aatïmï aagaitai Suxi Kristo dai sai namïga gïr buaboidaraga. Daiñi, Suxi Kristo gïr aagidi dai gïr maaxiturhi xorai ïgai dibiakai tami oidigi daama. Dai Diuxi Ibhïadï ïpï kïïga aagaiña saidi ïr buaboi xorai gï aagaiña Suxi Kristo. Dai go Diuxi tïtïañikarudï bïïxi nïidiña go Suxi ïpï dai aipakoga óídakami ayi aatagi xorai ïgai. Dai gokiïrioma mui oidigi daama óídakami bhai aa saidi ïr buaboi ïpï dai buaboitu. Bhodïrï gï baidakatu go Suxi tïbagiamu xako oidakamu gïïpi xadutudaragai ïgai bïïtarï. Xadïrï po gï duñimudai bïïxi gobai ix maiti ïr buaboikamudai gïr buaboidaraga di.

Hebreos 1:3

Diuxi Maradï kïïga ïmadugan tuiga Diuxi ïmadï dai maatïkatai aatïmï Diuxi Maradï podukai máí aatïmï xïï gïïdu dai xïï xigiamaaxi Diuxi. Dai ñokidï Diuxi Maradï sïïrhikïdï gubuka. Go ïïgi ñokidïkïdï gatïanïi ïgai bïïxi ixtumaxi dai nukadai ïpï sai mai xia gï buadagi. Ïgai tudu bhai dui ix dukatai gï buanadagi gïr soimaaxkamiga gïr ibhïdagïrï. Dai bhodïrï kaxi gïr buanakai jii ïgai tïbagiamu dai ami daiba sïïrhixapadïrï Diuxi ix makïdï bïïxi adaama gubuka.

Hebreos 1:5

Gobai maatiga maaxi sai bamioma gatïanïi ïgai xi bhai tïtïañikarudï Diuxi. Kaxkïdï tudu Diuxi potïtïdai sai, Aapi ïr gin Maara dai xibi aanï aagai sai gï Oga aanï, itïtïdai. Dai xadïrï potïdana ïgai ïmo tïañikarudï. Daidi ikaiti Diuxi ïpï ïïki aagaitai Maradï, Aanï ïr Ogadïkamu dai gobai ïr gin Maaraka agai, ikaiti Diuxi. Kaxkïdï gï maatï sai bamioma gatïanïi Diuxi Maradï xi bhai go tïtïañikarudï Diuxi.

Hebreos 10:5

Dai kaxkïdï aidïxi dibia Suxi Kristo tami oidigi daama potïtïdai ïgai Diuxi, Aapi Diuxi mai aagai go daxdaragai buxtakikïdï ix makïdï ibuayi óídakami dai tomarhi ïma maaxi daxdaragai ïpï. Dïï gia gin maa aapi gin tukuga ixtumaxi gï daxdagi aanï. Gobai gia bhai ïrhidi aapi, itïtïdai.

Hebreos 2:11

Daiñi, Suxi ïgai dai ïkobai gïr bubaidi Diuxi bïïtarï. Dai xibi Suxi Ogadï ïr aatïmï gïr Oga ïpï. Kaxkïdï mai xaïrai Suxi gïr aagaitai sai aatïmï ïr susukurhidï.

Hebreos 5:5

Dai pomaaxi Suxi Kristo ïpï. Ïgai mai ïïgi bhïiyi go sïïrhikami xi ïr bhaitï kïakamigadï go dadaxdadami. Mai ïïgi bhïiyi ïgai go sïïrhikami ipïrhiditai sai jaa ïmo gïdukami tïanïdami dukai nïijadagi tudu. Dai bhaiyoma Diuxi ïgai dai aagidi go Suxi Kristo saidi ïr ïmo gïdukami tïanïdami ïgai. Potïtïdai ïgai sai, Aapi ïr gin maara. Dai xibi aanï aagai sai gï Oga aanï, itïtïdai.

1 Juan 4:14

Dai aatïmï ïr nïijadami ix Diuxi gïr Oga otoi Maradï tami oidigi daama sai ïgai ïr kïïgakïrï bubaidadamikana bïïxi óídakami bïïtarï. Gobai aagidiña aatïmï óídakami tudu.

1 Juan 4:9

Daiñi, mos arhi ïmaduga go Maradï Diuxi dai bïïxkïrï otoi Diuxi tami oidigi daama sai bhai buadana ïgai ixdukatai kïïgakïrï óídakagi aatïmï bïïxkïrï bïïtarï. Podukai gïr tïtïïgidi Diuxi xïïxi kïïga gïr oigïdai ïgai tudu.

2 Juan 1:7

Daiñi, xi gïn oigïdadagi aapimï aipakoga gobai gïn soiñamu sai mai oijadana aapimï go bupuirumadami ix makïdï aipakoga ajiopai oidigi daama. Muidu ïgai tudu. Pokaitiña ïgai sai mai ïmo odami dukai dibia Suxi Kristo tami oidigi daama. Yaatabogami ïgai tudu daidi ïr buidïrï bïïtïkami ïgai Suxi Kristo.

Apokalipsis 19:13

Gï aadaka ïgai yukuxi ix makïdï ïraïrï gï baitadai. Diuxi Ñokidï tïgidu ïgai

Apokalipsis 21:3

Dai gïgïrï ño ixtumaxi mïï go gïï daikaruañdïrï daidi ikaiti, —Xibi gia odami saagida daja Diuxi kiidï. Xibi odami saagida oidaka agai ïgai dai kïïgakïrï ïr Diuxigadïka agai ïmadï dakatai.