Santiago 3:17 - Northern Tepehuan Bible

¹⁷ Go tïgibudagai ix makïdï gamamaakai Diuxi gia mai pomaaxi. Go Diuxiañdïrï tïgibudagai gia kïïga buañixi dai odami ix makïdï oijadagi gobai gaagaiña ix dukatai xioma urabakatai óídakagi jaa ïmadï. Mai oomarhigakana ïgai dai bhaiyoma kïï tutiakana ïgai dai kïïga abokan dukai óídakana. Soi gïn ïrhidiña ïgai jaa bïïtarï xïïxkadï soimaaxi taatamadagi ïgai dai kïïga buididiña. Ïmadugan dukai nïidiña ïgai bïïxi óídakami ïpï. Dai mai yaatagïiña ïgai dai bhaiyoma bïïxi ixtumaxi aagadagi ïgai gobai ibuadana. Po maaxi go tïgibudagai ix makïdï gamamaakai Diuxi tudu.

Tepehuan Northern: Diuusi ñiooquidʌ utuducami oodamicʌdʌ

¹⁷ Dʌmos ʌgai ismaacʌdʌ viaa maatʌdagai ismaacʌdʌ gamaacai Diuusi ʌgai cʌʌgacʌrʌ oidacana dai maioomaliacana, dai tʌtʌgitoiña aa, dai ʌʌgidiña gʌnbaitʌguucacamiga, dai soigʌnʌlidiña aacʌdʌ dai soicʌiña dai ʌmadugan duucai nʌidiña vʌʌscatai dai vʌʌsi isducatai aagai poduucai ivuaadana.

Santiago 3:17 ပူးပေါင်းရင်းမြစ်များ

Mataibo 23:28

Óídakami bïïtarï gia kïï tutiaka maaxi aapimï dïï gia gïn tïgibudagïrï soimaaxi aapimï. Gïn tïgibudagïrï mai ïïgidi aapimï Diuxi sïïrhikamigadï tudu— itïtïdai.

Mataibo 5:8

—Dai aapimï ix makïdï kïïga buañixi tïgibudadï kïïga bia bhai ïrhiaragai ïpï. Nïijadamu ïgai Diuxi kaxkïdï— itïtïdai.

Mataibo 5:9

—Dai aapimï ix makïdï kabami gaatabuayi gaagaitai ix dukatai soikïdagi óídakami saidi kïïgakïrï gïn nïijada ïgai aipakoga, aapimï kïïga bia ïmo bhai ïrhiaragai ïpï. Diuxi pokaitada agai sai aapimï ïr maamaradï kaxkïdï— itïtïdai.

Lukas 21:15

Aanï gïn maakimu tïgibudagai ixtukïdï ñokadagi aapimï aidï. Dai ix makïdï gïpiïrï gïn bupadagi ka mai tïigimu ixdukatai gïn aa noraidagi ñoki gïn soikïitai aanï— itïtïdai.

Lukas 6:36

Soi ïldatai abïr nïida óídakami tudu. Kaxkïdï tudu Diuxi Gïr Oga soi ïlda gïr nïidiña bïïxkatai aatïmï ïpï— itïtïdai.

VUAANA 1:14

Daidi go Diuxi Ñokidï tïgidukami ïmo odami busai dai biatu tukuga ïpïamaaxkami ix makïdï bia aatïmï dai bhodïrï óídakami saagida oidatu. Sïïrhikïdï kïï tuiga ïgai dai kïïga gïr maatïturhi ix tumaxi ïr buaboi. Dai aanï Juan ix makïdï ibuayi idi ojai ïmadï jaa mui kïïga nïidi ïgai ix makïdï Diuxi Ñokidï tïgidu. Dai aatïmï ïr nïijadami xïïxi ïr gïdukami ïgai dai xïï kïï tiodi ïgai Diuxi maradïkatai. Diuxi maradï ïmadugakïdï ïgai tudu.

VUAANA 1:47

Dai mai kia ayi Natanael xako dajatadai go Suxi sai go Suxi ka tïï daidi itïi, —Bhodïrï imïi ïmo kïïrhi ix makïdï buaboikïdï ïr ïmo Israelita kïï tuigakatai gobai. Gobai gia mai buirumadai odami— itïi Suxi tïïgakai go Natanael.

Hechos 11:24

Kïï tuigakami aidï go Bernabe dai kïïga buaboitudai Diuxi dai kïïga ïïgidiña Diuxi Ibhïadï. Dai mui odami buaboitu Diuxi ñokidï ami Antiokiïrï.

Hechos 9:36

Aidï Jopeïrï oidakatadai ïmo oki. Buaboitudadami ïgai dai Tabita tïgidu. Griego ñokikïdï Dorkas ikaidakatadai tïtiaradï. Go Tabita kïï tuigakana dai soikïiña ïgai soititigami.

Romanos 12:18

Abïr gaaga ix dukatai xioma óídakagi bïïxkatai ïmadï. Xïïxi ukami ixtutiadagi aapimï tudu.

Romanos 12:9

Gï agai xi kïïgakïrï gïn oigïada aapimï. Gajiadïrï abïr bia gobai ix makïdï ïr soimaaxkami daidi abïr kabami bhïiyi ix makïdï gia ïr kïïga.

Romanos 15:14

Gin susukurhi Diuxiïrï, kïï maatï aanï sai kïï tutuiga aapimï dai kïï maatï aapimï ixtumaxi ïr buaboi. Kïï bhaiga aapimï xi ïïgi gïn maakiagi ñoki aipakoga.

1 Korintios 12:8

Daiñi, Diuxi Ibhïadï mamaakai gubukarhigai ïïmoko sai gatïtïïgiada ñoki aagaitai tïgibudagai ix makïdï kïïga ïr soiñi. Dai jaa mamaakai ïgai gubukarhigai ix kïïga maatïkana dai aagaiña ixtumaxi Diuxi gïn tïtïgiadagi.

2 Korintios 10:1

Gin aaduñi, pokaitiña ïïmo odami sai xïïxkadï gïn ïmadï dakagi aanï sai kïï tuigakami dukai gïn mamaakaiña aanï ñoki maiti gïn bhagaiditai. Dai pokaitiña ïgai sai mosïkaxi xïïxkadï mïkaxi dakagi aanï dai gïn ojidagi sai aidï gia bhagaidadan kaitiña gin oja. Pokaitiña ïgai gin aagaitai aanï Pabora tudu ix makïdï ibuayi idi ojai. Dïï gia gïn aagidamu aanï ïmo ñoki dai gï agai sai maatïka aapimï sai ñokiturhimi aanï Suxi Kristo aagaitai idi ñoki. Daiñi, kïï tuiga Suxi dai kaxkïdï kïï bhai maaxkami dukai gïn maakimu aanï ñoki. Kïï bhai dukai gïn aagidimi aanï mïsai gin ïïgiada aapimï tudu ñokiturhitai aanï go Suxi Kristo.

2 Korintios 6:6

Aatïmï naana dukai mamaaxidi go óídakami buitapi sai sïïrhi aatabuayi aatïmï tudu. Daiñi, go óídakami kïïga nïidiña sai bïïxi ixtuma ibuadagi aatïmï kïïga buañixi Diuxi bïïtarï. Dai kïïga nïnïidiña ïgai ïpï sai aatïmï kïïga maatï dai kïïga oidiña ixtumaxi ïr buaboi. Mai bhakoikana aatïmï buidïrï jaa dai bhaiyoma kïï tutiakana aatïmï jaa bïïtarï. Diuxi Ibhïadï gubukarhigadïkïdï óídaga aatïmï tudu dai kïïga oigïdaiña aatïmï bïïxi óídakami.

2 Korintios 7:11

Dïï aapimï gia kïïga gïn tïgito nïidiña ix kaiti go ojai ix makïdï gïn otoxdi aanï baasïkioma. Soi gïn ïldatu aapimï ix dukatai Diuxi ipïrhidi ix soi gïr ïrhiadagi aatïmï xïïxkadï oidakagi soimaaxi ibuadami gïr saagida tudu. Dai xibi ipïrhidi aanï ix tïtïgitoagi aapimï go naana maaxi kïkïïgadukami soiñi ix makïdï idui Diuxi gïn iibhïdagïrï go soi ïrhiaragaikïdï gobai. Kabami soi gïn ïrhiditadai aapimï oidakatai ïmo soimaaxi ibuadami gïn saagida tudu dai kabami gïn aaga ibuadatai ixtumaxi Diuxi ipïrhidi. Kïïga ipïrhiditadai aapimï xi ibuadagi ixtumaxi ïr kïïga tudu. Asta bhakoikan taadatu aapimï go soimaaxkami buidïrï dai kabami buamï gïn ïrhiditadai aapimï xi duñada apia imïdagi go soi soimaaxkami gïn saagida. Kaxi gïgïbiturhi aapimï go soimaaxi ibuadami ix dukai gïn aagidi aanï tudu. Podukai gïn maaxiturhi aapimï saidi ka mai tipu ixtukïdï gïpiïrï gïn bupadagi jaa. Kïïga gïn soi go soi ïrhiaragai ix ïmadukai gïn tïtïgitoagi aapimï tudu.

2 Korintios 9:10

Daiñi, Diuxi ïgai dai muiduturhi ixtumaxi saidi podukai biakagi odami ixtumaxi tïgitokagi. Dukami, xïxkadï gaïsadagi odami Diuxi ïgai dai muidutudai go ïxtokai saidi biakana go odami ixtuma ugiagi dai ixtuma ïsadagi ïpamu. Kïï bhaiga Diuxi ix gïn maakadagi asta bhaibitukami ixtumaxi tudu saidi kïïga ibuada aapimï oiditai soiñi jaa.

Efesios 5:9

Abhai kudagiañdïrï daibïi mosïkaxi ix makïdï ïr kïïgadukïdï dai ix makïdï ïr sïïrhi dai ix makïdï ïr buaboi.

Filipenses 1:11

Daiñi, Suxi Kristo ka kïïga buañixikami gïn bia. Dai aanï kabami daanïi Diuxi saidi gï ibuadagi naana maaxi ixtumaxi kïïgadukami aapimïkïdï ka buañixikatai aapimï. Aidï gia gïn tïgito nïijadamu jaa dai aagadamu xïïxi ïr gïdukami Diuxi dai xadutuadamu ïgai nïiditai ix makïdï ibuayi Diuxi aapimïkïdï.

Filipenses 4:8

Ïpï ïmo ixtumaxi gïn aagida in ïrhidi aanï aapimï gïn aaduñi Diuxi amadïrï. Daiñi, gïn aagidamu aanï ixtumaxi gï agai xi tïgito ajiopadagi aapimï. Tïgitodabïrai ixtumaxi ïr buaboi tudu dai ixtumaxi ïr kïï sïïrhi dai ixtumaxi ïr buañixi dai ixtumaxi xigiamaaxi. Gïn tïtïgitodabïrai ixtumaxi ïr kïï bhai maaxkami tudu.

Kolosenses 1:10

Gïr aaduñi, gï agai xi óídakagi aapimï Diuxi bïïtarï ixdukatai gï agai. Ix dukatai bhai ïrhidi ïgai tudu. Kaxkïdï gïn daanturhiña aatïmï sai kïï bhai dukai óídakana aapimï kïïga xadutudaitai Diuxi. Sai podukai kïïga bhai ïrhiatudana aapimï Gïr Nukadakami bïïxi aïkatïrï. Gïn daanturhiña aatïmï sai apia bamioma kïïga maatïkana aapimï Diuxi. Saidi ibuada aapimï naana maaxi aaduindagai kïkïïgadukami dai sai kïïga bubuakïna naana maaxi kïï bhai maaxkami gïn aaduindagaiñdïrï ïpï.

1Tesalonicenses 2:7

Dïï mai pobuadana aatïmï dai bhaiyoma kïï tuigakana aatïmï gïn bïïtarï. Kïïga gïn nukagi aatïmï tudu ïpïandukai ïmo oki ixdukai xiituldada maamaradï.

1 Tomoteo 5:21

Daiñi aapi Timoteo, Diuxi gïr Oga ïmadï Suxi Kristo dai bïïxi tïtïañikarudï ïr nïijadami xi gï tïañimi aanï sai ïïgiada aapi idi ñoki. Nïijadami ïgai sai gï aagidimi aanï ïpï sai ïmadugan dukai nïijada aapi bïïxi óídakami. Maiti gï agai tudu xi bamioma namïakami duakai nïijada aapi ïïmoko.

2 Timoteo 2:24

Daiñi, aapi ïr aatabuadami Diuxi bïïtarï. Dai odami ix makïdï ibuayi Diuxi aaduindadï maiti gï agai ix kokoadagi dai bhaiyoma gï agai ix kïï tutiakagi buidïrï jaa. Gï agai xi maatïkagi ïgai ix dukatai tïtïïgiadagi ñoki jaa dai gï aagai ix mai oton bhamuakagi xïïxkadï soi buidadagi jaa ïpï.

Tito 1:15

Daiñi, bïïxi buaboitudadami ibhïgadï ka kïï buañixi dai tomarhi ïmo ixtumaxi mai bhaiga xi tukurhimagi ïpamu. Dïï gia odami ix makïdï kia tukuraga ibhïgadï mai buaboidaitai Suxi Kristo ïgai gia bïïxi aïkatai ixtumaxi ibuadagi bamioma tukurhidi iibhïadï. Kaxkïdï tudu bïïxi tïgibudadï tukuraga asta xako ka mai maatï taata ïgai ixtumaxi ïr soimaaxkami.

Tito 3:2

Maiti gï agai ïmo buaboitudadami xi galnaaxi ñoki aagiadagi tomarhi ïmadutai tomarhi xi gabupui ñokidaragakagi. Gï agai bhaiyoma xi kïï tuigakagi ïgai bïïxi óídakami bïïtarï dai mai xu xi ïmo gïdukami gï ïrhiadagi ïïgi.

Hebreos 12:11

Daiñi, bïïxkïrï xïxkadï soimaaxi gïr taatamiturhiadagi Diuxi gïr maakaitai ñoki, gobai mai bhai taadaga. Soi ïrhiaraga gobai bhaiyoma. Dïï gia xi ïïgiadagi aatïmï dai bhïiyagi aatïmï kïïgadukami tïgibudagai soimaaxi gïr taatamituldakai ïgai aidï gia xioma óídakana aatïmï ka buañixikami dukai óídakatai.

Hebreos 12:14

Kabami abïr gïn aaga gaagaitai ix dukatai xioma oidakagi jaa óídakami ïmadï kïïgakïrï gïn nïiditai aipakoga. Dai kabami abïr gïn aaga ïpï oidakatai ix dukatai gï agai xi oidakagi odami ix makïdï ïkobai daraka go soimaaxkamiañdïrï. Kaxkïdï tudu xorai mai ïkobai dakagi soimaaxkamiañdïrï mai biakamu oigaragai ix aiyagi Diuxi Gïr Nukadakami buitapi.

Santiago 1:17

Mosïkaxi Diuxi gïr Oga ix makïdï idui go xixabugai dai go tasai dai go masadai ïgai dai tïbagiañdïrï gïr oidi bïïxi ixtumaxi ix makïdï buaboikïdï ïr kïkïïgadukami tudu. Dai kïïga gï maatï sai Diuxi tomarhi ïmo imidagai gïr maakimu soimaaxkami ixtumaxi. Daiñi, tomaxi go xixabugai ïmadï go tasai dai masadai gia ïmapïbuadana dai tutukuiña ïïmo imidagai dïï gia Diuxi apia mo maaxkana dai mai ïmapïbuayi toma lïïchi. Kaxkïdï bhaiga aatïmï xi kïïga buaboitudada ïgai.

Santiago 1:5

Daiñi, xïïxkadï ka mai tïtïïgiagi aapimï ix dukatai iduñagi gïn oidakaraga bïïtarï aidï gia daañibïrai Diuxi dai ïgai bhai ïrhiarakïdï gïn maakimu maatïdagai. Kïïga gï maatï tudu sai maiti gïn bhagaidamu Diuxi daanïitai aapimï tudu.

Santiago 2:13

Diuxi aagada agai ix bhai kïïga idui aatïmï tudu. Dai gïn maakimu ïgai gïgïbidaragai ix mai soi ïlda nïijadagi aapimï jaa dai mai oigïldagi aapimï. Dïï gia ix soi ïlda nïijadagi aapimï jaa dai oigïldagi aapimï aidï gia mai biakamu aapimï ixtukïdï duduadikudagi xïïxkadï aagagi Diuxi ix bhai kïïga dui aapimï. Soi ïlda gïn nïijadamu ïgai aapimï ïpï tudu dai gïn oigïldamu.

Santiago 2:4

Ix pobuidadagi aapimï aidï gia gobai itïiya ïrhidi sai mai ïmadugan dukai nïidi aapimï óídakami. Itïiya ïrhidi gobai sai soimaaxi gïn tïgibudaga tudu mai ampanïxi xadutudaitai aapimï bïïxi odami.

Santiago 3:15

Pomaaxkami tïgibudagai maiti ïr Diuxiañdïrï imïdami dai bhaiyoma gobai ïr tïgibudagai ix makïdï tomaxakoga oidaga tami oidigi daama. Diuxi Ibhïadï mai podukai mamaakai tïgibudagai odami tudu. Diabora tïgibudadï gobai bhaiyoma.

Santiago 4:8

Kïïga abïr uraba Diuxi tudu dai kïïga ïïmada baidi ïgai aadïrï gïn ïïmadamu ïpï ïmo gïn aadunumï dukai. Aapimï ix makïdï soimaaxi ibuayi, dagitobïrai gïn soimaaxkamiga tudu. Mai kïï maatï aapimï ix bhai kïïgakïrï oijadagi Diuxi tïgibudadï xiïpï xi oijadagi go tami oidigi daama óídakami tïgibudadï. Gobai maiti ïr tïgibudadï Diuxi tudu. Mosïkaxi Diuxi tïgibudadï abïr oijada bhaiyoma.

1 Pedro 1:22

Daiñi gin aaduñi, aapimï ka ïïgidi go buaboi aatagi dai ka buañixikami bii gïn ibhïdaga. Kaxkïdï gï agai sai kïïgakïrï gïn oigïdada aapimï aipakoga bïïxi gïn ibhïdagakïdï.

1 Pedro 2:1

Bia aapimï ïmo utudui oidakaragai xibi tudu. Dai kaxkïdï ka maiti abïr soimaaxi ibuada. Ka maiti abïr yaatagïda tudu. Daidi maiti abïr bupuirumadada jaa ixtumaxikïdï ibuadagi aapimï ïpï ipïrhiditai sai kïï tutiakami gïn aagagi ïgai tomaxi mai kïï tutuiga aapimï. Kaxi maiti abïr ïgakoñiaka ïpï dai maiti abïr buidïrï ñokiadagi go jaa. Dagitobïrai bïïxi gobai tudu.

1 Pedro 2:18

Gin aaduñi, idi ñoki ïr aapimï gïn bïïtarï ix makïdï ïr pipioñi dai bia gïn amu. Daiñi, Diuxi bhai ïrhidi aapimïkïdï xïxkadï apia kïïga ïïgiadagi aapimï gïn amu tomaxi soi gïn buidadagi ïgai. Kaxkïdï gï agai sai kïïga xadutudaitai ïïgiadagi aapimï gïn amu. Mai xudu ix kïï tutiakagi ïgai ix mai kïi tutiakagi ïpï tomax dukai gï agai sai ïïgiadagi aapimï. Dai ïïgiadabïrai ïgai tomaxi oomarhigakagi ïgai gïn bïïtarï ïpï. Gobai ïr ïmo bhai ïrhiaragai Diuxi bïïtarï tudu ix apia kïïga ibuadagi aapimï tomaxi mai kïï tutiakagi ïgai gïn bïïtarï.

1 Juan 3:18

Gin aaduñi, maiti gï agai sai mosïkaxi pokaitadagi aatïmï sai oigïdai aatïmï jaa. Gï agai bhaiyoma sai ibuada aatïmï ixtumaxi ïr soiñikagi jaa bïïtarï dai podukai mamaaxdagi sai buaboikïdï oigïdai aatïmï.

1 Juan 3:3

Dai kaxkïdï xibi bïïxkatai aatïmï ix makïdï kabakan dukai buaboitudai sai ïpïan mamaaxka ïragai Suxi Kristo xïïxkadï dibiagi ïgai, aatïmï ka maigobai dadasaimi bïïxi go soimaaxkami ix makïdï ibuadana aatïmï. Buañixikan dukai óídaka rïrhidi aatïmï ïpïan dukai Suxi Kristo kaxkïdï.