Santiago 1:22 - Northern Tepehuan Bible

²² Gï agai sai ïïgiada aapimï Diuxi ñokidï tudu dai mai xu mosïkaxi kaïka aapimï. Jaa gia mosïkaxi kaïkana Diuxi ñokidï dai mai kïïga tïgitokana ix kaiti dai mai ïïgidiña. Ïïgi gïn bupuirumadaiña ïgai pobuadatai tudu. Maiti gï agai ix po buadagi aapimï gin aaduñi.

Tepehuan Northern: Diuusi ñiooquidʌ utuducami oodamicʌdʌ

²² Ivuaadavurai istumaasi aagai Diuusi ñiooquidʌ maisiu moscaʌca. Sioorʌ caʌcagi dai maitivuaadagi poduucai ʌʌgi gʌnvupuiirumadai ʌgai.

Santiago 1:22 ပူးပေါင်းရင်းမြစ်များ

Mataibo 12:50

Bïïxkatai ix makïdï ïïgiadagi gin Oga ix makïdï tïbagiana daja ïgai buaboikïdï ïr gin daada dai gin susukurhi tudu— itïtïdai.

Mataibo 28:20

Tïïgidabïrai ñoki sai ïïgiada ïgai bïïxi ixtumaxi gïn tïjai aanï. Dai gï agai sai maatïka aapimï sai aanï gïn ïmadï daka iñagai asta xïïxkadï ukami kïakagi oidigi— itïtïdai Suxi. Mosïkaxi.

Lukas 11:28

Dïï Suxi potïtïdai, —Aanï aagai bhaiyoma sai xorai ïïgida kaïkana Diuxi ñokidï ïgai dai kïïgioma bia bhai ïrhiaragai— itïtïdai.

VUAANA 13:17

Kïïga maatï aapimï ix ïr buaboi go ñoki ix makïdï gïn aagidi aanï aagaitai sai gï agai ix pipioñi dukai gaatabuadagi aapimï gïn soikïitai aipakoga. Kïïga abïr ïïgiada go ñoki tudu sai kïïga bhai gïn ïrhiditai óídakana aapimï— itïtïdai.

Romanos 2:13

Diuxi kïïgakïrï nïidi odami ix makïdï kïïgakïrï ïïgidi sïïrhikamigadï tudu. Dai mai xu kïïgakïrï nïidi ïgai ix makïdï mos kaïkana dai mai ïïgidiña.

1 Korintios 15:33

Maiti abïr gïn dagito tudu ix gïn bupuirumadagi ix makïdï pomaaxi ñokai. Kïïga maatï aapimï sai xorai urabagi pupuirugami gï sarabidamu ïgai go soimaaxi tïgibudagai tomax xïï kïïgadukatadai ïgai tïgibudadï mai kia gaurabakai.

1 Korintios 3:18

Gin aaduñi, kïïga abïr gïn tïgito nïida dai bhïiyi go tïgibudagai ix makïdï ïr Diuxi tïgibudadï kaxkïdï tudu gobai kïïga ïr buaboi. Kaxi abïr mai oijada ïïgi gïn tïgibudaga tudu kaxkïdï tudu odami tïgibudadï gia yaatagïi. Ix saitudakami ïrhiada aapimï ïïgi gïn tïgibudaga ka bhïiyi aapimï ïmo yaatagi. Daiñi, mos ïr ïï buirudagai Diuxi bïïtarï go tïgibudagai ix makïdï óídakami saitudakami ïrhidi. Kaxkïdï gï aagai ix ïmadukai gïn tïtïgitoagi odami ix makïdï kïïga mamaatïkami gïn ïrhidi ïïgi oiditai tïgibudadï óídakami. Ïgai gï aagai ix ïma dukai gïn tïtïgitoagi dai buiyagi Diuxi tïgibudadï bhaiyoma tomaxi óídakami bupuirugami dukai nïijadamu gokiïrï. Ix bhïiyagi ïgai Diuxi tïgibudadï aidï gia sastudakami dukai biimu ïgai Diuxi bïïtarï. Daiñi, Diuxi ojadïrï ikaiti sai, Diuxi daadagitodai go odami sai bhaiyoma gïn bupuirumadaiña ïïgi go ix makïdï mamaatïkami gïn ïrhidi ïïgi.

1 Korintios 6:9

Gï aagai ix kïï sïïrhi gïn tïgitokagi aapimï maatïkatai sai soimaaxi buadami mai biaka agai oigaragai ix Diuxi tïanïdagi. Daiñi, odami ix makïdï aipakoga boopoiña jaa ïmadï mai biaka agai oigaragai ix Diuxi tïanïdagi. Dai podukai ïpï ix makïdï buaboitudai uubixi, dai ix makïdï abhana boyiña oñigadï ïmai, dai ix makïdï ïïgi gïn ïmadï boopoiña kïkïïrhi dai oki ïpï,

Galatas 6:3

Daiñi, aanï aagai sai ïïgi gï buirumadai ïmoko ix pokaitadagi sai mai bia xi soikïdagi jaa xïïxkadï mai kïï ibuadagi ïgai. Ix mai soiña ïrhiada ïmoko jaa gobai itïiya ïrhidi sai ïmo gïdukïdï gï ïrhidi ïïgi dai gobai maiti ïr buaboi xi ïr gïdukïdï. Xorai mai soiña ïrhiada jaa maiti ïr ïmo gïdukïdï toma lïïchi tudu mos ïïgi po gï ïrhidi ïgai.

Galatas 6:7

Dai xi pobuadagi aapimï aidï gia gokiïrï kïïga buimu aapimï gïn maitïki. Gin aagidamu aanï ïmo maaxidaragai gokïdï. Daiñi, xi ïmo odami gaïïxiagi ixtumaxi kïïgadukami aidï gia gokiïrï yoobamu ïgai ix tumaxi kïïgadukami ïi ïgai. Dïï gia xi soimaaxkami gaïxiagi ïgai aidï gia soimaaxkami yoobamu ïgai ïpï gokiïrï. Mai bhaiga ïmoko xi buirumadagi Diuxi tudu. Ïgai bïïxkïrï anoraidi odami ixtumaxi ajïakagi nïiditai ixtumaxi idui ïgai tudu.

Filipenses 4:8

Ïpï ïmo ixtumaxi gïn aagida in ïrhidi aanï aapimï gïn aaduñi Diuxi amadïrï. Daiñi, gïn aagidamu aanï ixtumaxi gï agai xi tïgito ajiopadagi aapimï. Tïgitodabïrai ixtumaxi ïr buaboi tudu dai ixtumaxi ïr kïï sïïrhi dai ixtumaxi ïr buañixi dai ixtumaxi xigiamaaxi. Gïn tïtïgitodabïrai ixtumaxi ïr kïï bhai maaxkami tudu.

Kolosenses 3:17

Dai bïïxkïrï xïxkadï ñokadagi aapimï xiïpï xïxkadï ibuadagi aapimï ixtumaxi abïr Suxi Kristo bïïtarï ibuada ka urabakatai aapimï ïgai. Dai gïn tïgitobïrai ïpï sai Suxi Kristo ka bhai dui gïn bïïtarï sai biakana aapimï oigaragai xi Diuxiatanamïidana tïdagi Diuxi gïr Oga kaxkïdï dudatai abïr potïda ïgai.

2 Timoteo 3:13

Dai xibi bhaitiakoga apia bamioma xigarhi bujidamu go galtutuigakami ix makïdï bupuirumada agai óídakami. Ïgai apia tïtïïgiadamu ñoki go jaa yaatagikïdï dai podukai bupuirumadamu ïgai mui. Dai go ix makïdï ïr bupuirumadami jaa ïïgi kuga iimimu kaïkatai aatagi ix makïdï maiti ïr buaboi ïpï. Dai podukai apia bamioma kuga iimimu ïgai.

Tito 3:3

Daiñi, maiti gï agai xi soi dukai nïijada aatïmï go jaa ix makïdï mai buaboitudai. Aatïmï ïpï maiti ïr buaboitudadamikana ïkioma tudu dai ïpïan tutiakana aatïmï ïgai dai ïpïamaaxi ibuadana. Aidï mai ïïgidiña aatïmï Diuxi dai buaboitudaiña aatïmï ixtumaxi ïr yaatagi. Mai bhaigakana aatïmï xi dagitoagi go soimaaxkami ix makïdï ibuada ïrhidiña aatïmï gaagaitai ïmo bhai ïrhiaragai. Aidï ïjïgakoitïrïkana aatïmï dai gïr kïïdaiña aatïmï aipakoga. Pomaaxi tutiakana aatïmï mai kia buaboitudakai tudu.

Santiago 1:26

Gï agai ix ïïgiada aatïmï gïr buaboidaraga tudu. ¿Ïma dukai dukatai gïr soiñana gïr buaboidaraga ix mai ïïgiadagi aatïmï? Dukami, ix pokaitadagi ïmo odami sai kïïga oidi buaboidaradï dïï gia ix mai buamï ïrhiditai aagaiña ïgai soimaaxi ñoki, podukai ïïgi gï buirumadai ïgai. Gï maaxitudai ïgai sai maiti ïr soiñi buaboidaradï tudu.

Santiago 4:11

Gin aaduñi, Diuxi gïr maa sïïrhikamigadï ix makïdï ikaiti sai gïr oigïdada aatïmï aipakoga. Kaxkïdï maiti abïr naana kaï nïijada gïn aaduñi. Maiti gï agai ix dudunukami dukai gïn bapasadagi aapimï dai pokaitadagi sai ïmoko gïn aaduñi buaboitudadami ajïga gïgïbidaragai soimaaxi ibuadamikatai ïgai tudu. Xorai podukai ñokadagi ka mai ïïgidi Diuxi sïïrhikamigadï. Bamioma gatïanïdami gï ïrhidi ïgai xi bhai go sïïrhikami tudu podukai ñokaitai ïgai.

Santiago 4:17

Daiñi, kaxi ïr soimaaxkami gobai tudu ix ïmo odami maatïkagi ixtumaxi ïr sïïrhi ix ibuadagi dai bïïxkïrï maiti iduñagi ïgai.

2 Pedro 2:13

Soi buididiña ïgai jaa yaatagiditai tudu dai kaxkïdï soimaaxi taatamada agai ïgai. Bhaitoma bïïxi soimaaxi ibuadami mosïkaxi tukarï ibuadana soimaaxigadï xïïxkadï jaa mai nïijadagi. Xaïraiña ïgai ix jaa nïijadagi kaxkïdï. Dïï gia go tïtïïgiadami yaatagi ojoidi xi asta tasïrï ibuadagi bïïxi go soimaaxi ix makïdï tañiagi tukugadï. Ïmo xaïraragai aapimï gïn bïïtarï ix gïn ïmadï darakagi ïgai tudu. Mai xaïraitai gïn urapïkïi ïgai dukami xi ïr kïïga ibuadamikamudai ïgai xïxkadï ïmapi gakuadagi aapimï dïï gia apia oidiña ïgai soimaaxkamigadï. Ïmo buirumadaragai dukai gobai dai kïïga ojoidi ïgai xi gïn bupuirumadadagi podukai.

1 Juan 1:8

Daiñi, ïïgi gïr bupuirumadai aatïmï xi pokaitadagi aatïmï sai mai soimaaxi ibuayi aatïmï tomarhi ïmo imidagai. Yaatagi gobai tudu.

1 Juan 2:3

Daiñi, bïïxi odami ix makïdï kïïga maatï Diuxi dai kïïga bia urabaragai ïgai ïmadï kïïga ïïgidiña ïpï. Dai ix mai ïïgiadagi ïgai, aidï gia gobai itïiya ïrhidi sai mai kïïga maatï dai mai kïïga urabaka ïpï. Podukai gï maatï ix bhai kïïga maatï ïmoko Diuxi dai ix bhai kïïga bia urabaragai ïgai ïmadï tudu.

1 Juan 3:7

Gin aaduñi, oidaga odami ix makïdï gïn aagida antaada naana maaxi ix makïdï mai ïpïan kaiti idi ñoki ix makïdï gïn aagidimi aanï xibi. Kaxkïdï gï agai sai kïïga gïn tïtïgitokagi aapimï sai podukai maiti gïn bupuirumadagi ïgai. Daiñi, odami ix makïdï kïïga oijadagi ixtumaxi ïr sïïrhi kïïga buañixikana ïpïan dukai Suxi Kristo mai biakatai soimaaxkami abhana.

3 Juan 1:11

Aapi Gaiyo, gï oigïdai aanï dai maiti ipïrhidi aanï xi ïpïan buadagi aapi go Diotrefe. Maiti oijada aapi go soimaaxkami tudu dai bhaiyoma oijada ixtumaxi ïr kïïga. Gï tïgitoñi sai odami ix makïdï kïïga ibuayi kïïga mamaaxidi saidi ïr maamaradï Diuxi kïïga ibuadatai ïgai tudu. Dai go soimaaxi ibuadami gobai gia mamaaxidi sai mai urabaka ïgai Diuxi soimaaxi ibuadatai ïgai.

Apokalipsis 12:9

Daidi Diuxi maigo surhi go gïï kïixi tïbagiañdïrï modukai tïtïañikarudï. Podukai bhaigobai oidigi daama surhi go kïixi ix makïdï diabora tïgidu dai satanás tïgidu ïpï. Ïgai tudu ïr go gïï kooyi agaikïdï ix makïdï ïki abhiadïrï ajiopaiña tami oidigi daama dai bupuirumadaiña óídakami. Tami oidigi daama gï surhitu ïgai tudu ïmadï modukai tïtïañikarudï maitïkai Diuxi tïtïañikarudï ïgai bui.

Apokalipsis 22:7

Daidi Suxi Kristo ikaiti, —Gin kaïkabïrai, xibi otoma dibiamu aanï— ikaiti. —Dai xorai ïïgiadagi ojadï idi libro kïïga biaka agai bhai ïrhiaragai— ikaiti Suxi.