Romanos 8:26 - Northern Tepehuan Bible

²⁶ Daidi Diuxi Ibhïadï gïr soikïi ïpï xïïxkdï mai gubuakagi aatïmï. Ïïmo imidagai mai tïtïgai aatïmï ix tïiyagi aatagaitai Diuxi ïmadï. Dïï gia Diuxi Ibhïadï aijiïgïi daanïitai Diuxi gïr bïïtarï. Aagai ïgai naana maaxi ix makïdï mai tipu ñoki ixtukïdï aagagi ïmoko.

Tepehuan Northern: Diuusi ñiooquidʌ utuducami oodamicʌdʌ

²⁶ Dai Diuusi Ibʌadʌ gʌrsoicʌi ʌʌpʌ ismamadadagi aatʌmʌ maimaatʌ isducatai dai maimaatʌ istumaasi aagidagi Diuusi. Diuusi Ibʌadʌ daanʌi Diuusi aatʌmʌ gʌrvʌʌtarʌ maiñiooquicʌdʌ mosaijigʌi ʌgai.

Romanos 8:26 ပူးပေါင်းရင်းမြစ်များ

Mataibo 20:22

Dai Suxi potïtïdai go maamaradï go oki, —Aapimï mai maatï ixtumaxi gin taanïi aapimï— itïtïdai. —Arhiï kabami soimaaxi taata iñagai aanï tudu. ¿Dai bhai ix ixtutuidïna aapimï xi gin ïpïan ïxi soimaaxi taatagi gin urabakatai aapimï?— itïtïdai. —Ïjï kïïga ixtutuidikïi aatïmï— ikaiti go maamaradï go oki.

Lukas 22:44

Dai Suxi apia kabamioma daanïi Diuxi aidï. Dai kabami soimaaxi taata ïgai dai kabami bajurai. Bajuradï otaitadai dïbïrapi ïpïan dukai ïrai.

VUAANA 14:16

Dai aanï daañimu gin Oga ix ïgai gïn otosdamu ïmai soikïdami ix makïdï gïn ïmadï dakamu bïïxkïrï bïïtarï— itïtïdai.

Romanos 15:1

Aatïmï ix makïdï kapaka gïr buaboidaraga gï agai xi soikïdagi go gaa ix makïdï mai kapaka buaboidaradï. Maiti gï agai xi ibuadagi aatïmï ïïgi ixtumaxi bhai ïrhiada aatïmï tudu.

Romanos 7:24

¡Kabami soi gin ïrhidiña aanï tudu! ¿Xorai kïïgakïrï gin busaidana idi gin tukugañdïrï ix makïdï mukigami amakoga gin baidatimi?

Romanos 8:15

Daiñi, Diuxi Ibhïadï ka ayi gïr ïrana. Dai ïgai maiti gïr maakai duadimudagai ix dukai biakana aatïmï ïkioma aidïxi mos ïr pipioñi dukamikana aatïmï. Xibi Diuxi Ibhïadï gïr maa sïïrhikami xi ïr Diuxi maamaradïkana aapimï. Kaxkïdï gïr oga aagai aatïmï Diuxi.

2 Korintios 5:2

Aijiïgïiña aatïmï gïr tukugïrï ix makïdï bia aatïmï tami idi oidigi daama tudu dai tïtïitoi aatïmï ix xïïxkadï ka bhïiya ragai gïr tukugai utudui tïbagiañdïrï.

2 Korintios 5:4

Maiti ipïrhidi aatïmï ix mai tukugakatai óídakagi aatïmï dïï gia aijiïgïitai óídaga aatïmï xibi mos ïï bïïtïkatai gïr oidakaraga tami oidigi daama. Ka otoma biaka rïrhidi gïr utudui tukugai tudu saidi ka mai tipukagi go mukigami ka kïïgakïrï óídakatai aatïmï bïïxkïrï bïïtarï.

Galatas 4:6

Dai kïï maatiga maaxi saidi ïr Diuxi maamaradï aapimï xibi. Daiñi, Diuxi gïn maa ïïgi Ibhïadï dai xadïrï gïn maakimudai Ibhïadï ix maiti ïr maamaradïkagi aapimï. Ïgai ïr ï galbaaxi Diuxi Ibhïadï ix makïdï Diuxi Maradï biakana ïpï. Dai xibi gïr maakai ïgai ïmo kïïgadukami ïmadaragai Diuxi ïmadï gïr ïrana dakatai. Gïr maakai ïmadaragai sai gïgïr ñokaiña aatïmï aatagaitai Diuxi dai sai —gïr Maama— dai —gïr Oga— aagaiña aatïmï Diuxi.

Efesios 2:18

Tomax dukai, xi ïr judiukagi aatïmï xi maiti ïr judiukagi ïpï, tomax dukai Suxi Kristo gïr maa baakigai xi urabana aatïmï gïr Oga. Xibi Diuxi Ibhïadïkïdï bhaiga aatïmï xi aatagiadagi ïgai tudu.

Efesios 6:18

Bïïxi aïkatai ix makïdï ibuadagi aapimï abïr aatagada Diuxi ïmadï, Diuxi Ibhïadï gubukarhigadïkïdï. Bïïxkïrï abïr bhai gïn duka dai daanïda Diuxi bïïxi buaboitudadami bïïtarï ix makïdï aipako óídaga.

Hebreos 4:15

Daiñi, aatïmï óídakami sïïrhikïdï mai gupuka go soimaaxkami buidïrï. Dai kaxkïdï tïgito aatïmï xorai gïr soikïdagi. Dai Suxi Kristo ïgai dai gïr soikïi gabhaitïkïakami dadaxdamikatai ïgai. Dai ïgai kïïga maatï xïï mai gupuka aatïmï. Kïïga maatï ïgai ix taadaga xïïxkadï gïr tïgibudaga gïr abïnakiadagi ix mai kïïga ïïgiada aatïmï Diuxi tudu. Bïïxi taata ïgai gobai ix xïïxi taatamaiña aatïmï tudu. Dai tomaxi pomaaxi taata ïgai bïïxkïrï mai soimaaxi idui ïgai tomarhi ïmo imidagai. Dai bïïxkïrï ïgai tomaxi mai soimaaxi idui bïïxkïrï soi gïlda gïr nïidiña ïgai mai gupukatai aatïmï. Ïmo oidigi daama oidakami odami ïgai ïpï kaxkïdï.

Hebreos 5:2

Dai go bhaitï gukakamigadï go dadaxdadami soi gïn ïrhidiña nïiditai odami xïïxkadï ïmadutai mai maatïkagi ixtumaxi ïr kïïga dai kaxkïdï mai kïïga ibuadagi. Go bhaitï gukakami dadaxdadami ïr odamikana ïpïan dukai tomax tuma odami tudu. Dai kïïga maatïkana ïgai ix taadaga ïmoko xïxkadï mai gubuakagi go soimaaxkami buidïrï. Ïgai soimaaxi ibuadana ïpï tudu.

Santiago 4:3

Dai tomax dukai xadïrï gïn maakana Diuxi ixtumaxi tanïdagi aapimï. Soimaaxi gïn tïgibudaga gataanïitai aapimï tudu. Ïïgi gïn bïïtarï xia duada ïrhidiña aapimï ixtumaxi gïn maakadagi ïgai kaxkïdï.