Romanos 8:17 - Northern Tepehuan Bible

¹⁷ Maamaradï aatïmï Diuxi tudu. Kaxkïdï xibi bïïxi go bhai ïrhiaraga ix makïdï Diuxi bhai darasakami bia Suxi Kristo bïïtarï ïr aatïmï gïr bïïtarï ïpï. Dïï gia gï agai xi soimaaxi taatagi aatïmï ïpïan dukai ix dukatai taata Suxi bai podukai gïr aiyagi ïmo xadutudaragai ïgai ïmadï ïpï.

Tepehuan Northern: Diuusi ñiooquidʌ utuducami oodamicʌdʌ

¹⁷ Aatʌmʌ ʌrDiuusi maamaradʌ cascʌdʌ gʌrmaaquimu ʌgai istumaasi viaa poduucai isduucai maacai ʌgai Suusi Cristo. Aatʌmʌ vʌʌscʌrʌ oidaca ragai Suusi Cristo ʌʌmadu tʌvaagiʌrʌ cascʌdʌ viaa aatʌmʌ issoimaa taatamadagi poduucai isduucai soimaa taata ʌgai.

Romanos 8:17 ပူးပေါင်းရင်းမြစ်များ

Mataibo 16:24

Daidi bhodïrï Suxi potïtïdai mamaatïrdamigadï, —Gïn aagidamu aanï ix dukatai gï agai xi ibuadagi odami ix makïdï ipïrhiadagi saidi ïr gin mamaatïrdamigakagi. Gï agai xi dagitoagi ïgai ïïgi tïgibudadï. Ka maiti gï agai xi ibuadagi ïgai ïïgi ixtumaxi ipïrhiadagi ïgai tudu. Xorai gin oijada ïrhiada gï agai bhaiyoma xi bïïx tasai kusukan dukai imïdagi go kuruxi ixtukïdï gï muatuda aagai ïgai. Gobai itïiya ïrhidi sai gï agai xi bïïx tasai bhai gï dukagi ïgai ix soimaaxi taatagi dai asta sai gï muatudagi gin oiditai. Aidï gia bhaigakamu ïgai xi gin oijadagi daidi ïr gin mamaatïrdamigakagi. Ïma dukai gia cho— itïtïdai.

Mataibo 25:21

Daidi amudï potïtïdai, —Kïï idui aapi gin pioñiga— itïtïdai. —Kïï tuiga aapi dai kïï sïïrhi aatadui aapi— itïtïdai. —Kïï idui aapi go chïkikïdï ix makïdï gï nukaturhi aanï, kaxkïdï xibi gï maakimu aanï sïïrhikami sai gïïpi bamioma gatïanïdana aapi. Gin urabañi tudu gin bhai ïrhiaragïrï— itïtïdai.

Lukas 12:32

Aapimï arhi kañiñiru duu dai Diuxi sosoigadï kaxkïdï maiti abïr buamï gïn ïrhiada. Chïkidu aapimï dïï bïïxkïrï ïr ïmo bhai ïrhiaragai Diuxi bïïtarï gïn maakaitai ïgai oigaragai xi ïgai gïn tïanïdagi— itïtïdai Suxi go mamaatïrdamigadï.

Lukas 24:26

Utudama gin aagidi ixdukatai daibusai ïgaikïdï ix makïdï ïr Diuxi daasadï Rey. Dai ka ojixi sai gï agaitadai xi taatagi ïgai bïïxi gobai ix makïdï aagai aapimï sai bhodïrï gobai ix makïdï ïr Rey kïïga bhïna gïdukami xadutudaragai. Bïïxi ojixi gobai di. Kaxkïdï gï agaitadai ix maatïkagi aapimï bïïxi gobai— itïtïdai.

VUAANA 17:24

—Gin Oga— itïtïdai. —Ipïrhidi aanï ix gin mamaatïrdamiga ix makïdï gin maa aapi gin ïmadï darakana tïbagiana bai podukai nïidiña ïgai xïïxi ïr gïdukami aanï. Aapi gin Oga ïgai dai gin dáí saidi ïr ïmo gïdukamikana aanï gin oigïdaitadai aapi ïïki abhiadïrï aidïxi mai kia tipukatadai oidigi— itïtïdai.

Hechos 14:22

Dai dïgabunukai ïgai bïïxi go kiikiïrï ïgai gamaakaiña gubukadagai abhana go buaboitudadami daidi gaabïnakidiña xi kïïgakïrï buaboidaiña ïgai. Dai aagidimi ïgai sai gï agaitadai kia xi odami naana maaxi soi ïrhiaragai taatagi xi gokiïrï ayimu ixtuigako gatïanïda agai Diuxi.

Hechos 20:32

Xibi daanïi aanï Diuxi sai ïgai gïn nukadakana dai sai kïïga ïïgiada aapimï Diuxi ñokidï ix makïdï aagai xïï kïï tuiga Diuxi. Diuxi ñokidï kïï gupurtudarhiga dai ïgaikïdï biaka antaada aapimï naana maaxi ixtumaxi kïï bhai maaxkami ix makïdï Diuxi bhai dáí maamaradï bïïtarï.

Hechos 26:18

Dai tïïgidamu aapi ixtumaxi ïr buaboi bai ïgai dagitona go soimaaxkïdï tïgibudagai tukamukïdï dai oijadana go kïïgadukïdï tïgibudagai ix makïdï ïr kudagi tudu. Sai ka maiti gïn tïanïna go diabora dai Diuxi gïn tïanïna bhaiyoma. Daidi oigïrhixikami bimu soimaaxkamigadï gin buaboitudaitai ïgai dai uraba bimu ïgai Diuxi ïko bubaidadï— gin tïtïdai Suxi— itïtïdai Pabora.

Romanos 5:17

Go Adán soimaaxi dui ïïki kaxkïdï aidï abhiadïrï go mukigami apia kïïkigiña. Dïï go aaduindagai ix makïdï idui Suxi Kristo gïïpi bamioma gubuka xi bhai go soimaaxkami ix makïdï iduitadai Adán. Suxikïdï gïr maakai Diuxi ix dukatai kïïgakïrï gïr nïijadagi ïgai. Ïmo oidaragai dukai gïr maakai gobai gïr oigïdaitai. Dai kïïgakïrï nïijadamu Diuxi odami ix makïdï buaboidakai bhïiyagi óídaradï dai ïgai kïïgakïrï óídakamu Suxi Kristo gubukadadïkïdï.

Romanos 8:3

Go sïïrhikami ojixikami maiti ixtui ix kïïgakïrï gïr bubaidagi. Mai bia gobai gubukarhigai ixtukïdï gïr soiñagi. Ïïgi sobhikïiña aatïmï adaimïitai gïr ïkidadï tïgibudagai kaxkïdï. Dïï Diuxi gia kïïgakïrï gïr bubaitu. Ïgai otoi maradï sai biakana ïmo tukugai ïpïamaaxkami ix makïdï bia aatïmï soimaaxi ibuadami. Dai gï muatu ïgai gïr soimaaxkamiga bïïtarï. Podukai Suxi tukugadïkïdï Diuxi gamaitï go soimaaxkami bui.

1 Korintios 2:9

Dïï aatïmï buaboitudadami gïr bïïtarï gia ïr buaboi ix dukatai ojixi ïïki Diuxi ñokidïrï. Ami ikaiti sai, Ka bhai darasakami bia Diuxi naana maaxi ixtumaxi bïïtarï odami ix makïdï oigïdai Diuxi. Bhai darasakami bia ïgai naana maaxi ix makïdï tomarhi ïmo odami mai nïidiña dai mai kajioma dai mai tïgitokana ïpï, po tudu kaiti Diuxi ñokidï.

2 Korintios 1:5

Daiñi, toma xïï kabami soimaaxi taata aatïmï oiditai Suxi Kristo, pokaxi gïr mamaakai Diuxi gubukarhigai dai bhai ïrhiaragai ïpï. Ka bïïna daraka aatïmï Suxi Kristo kaxkïdï. Dai kaxkïdï maiti gïr maitiña go soi ïrhiaragai xïïxkadï soimaaxi taatagi aatïmï.

2 Korintios 1:7

Dai kaxkïdï kïïga buaboitudai aatïmï sai xïïxkadï soi gïn ïrhiadagi aapimï soimaaxi taatamaitai gïr ïpïan dukai sai aidï taatamu aapimï go bhai ïrhiaragai gïr ïpïan dukai ïpï gïr soikïitai Diuxi bïïxkatai aatïmï.

Galatas 3:29

Dai bïïna darakatai aapimï Suxi Kristo gobai itïiya ïrhidi saidi ïr piipixaradï aapimï go Abraamkaru dai gïn ajïga xi gïn aiyagi go bhai ïrhiaragai ix makïdï aagidi Diuxi go Abraam. Gobai ix makïdï aagidi ïgai saidi iduña agai piipixaradï bïïtarï tudu.

Galatas 4:7

Kïï maatiga maaxi sai bïïxkatai aapimï ïr maamaradï Diuxi tudu. Dai kaxkïdï kïïga gï maatï ïpï sai Diuxi ka bhai dui gïn bïïtarï sai gïn ajïakagi buxtuidadï ïpï. Maamaradï aapimï ïgai di.

Efesios 3:6

Podukai máí ïgai sai Diuxi ïki abhiadïrï kaxi gï tïgitokatadai sai go odami ix makïdï maiti ïr judidiu ïpïan ïxi biakana sïïrhikami ïmadï go judidiu. Diuxi ipïrhidi sai gïn bïïtarïkagi ïpï bïïxi ixtumaxi kïïgadukami ix makïdï Diuxi bia maamaradï bïïtarï. Xibi ka bïpïnakai Suxi Kristo kaxi ïr ïmo aadunumïkana go judidiu ïmadï ix makïdï maiti ïr judidiu. Gobai tudu ïr Diuxi tïgibudadï ix makïdï ïxtokikana ïkioma. Dai xibi gia go odami ix makïdï maiti ïr judidiu mos buaboitudakai go bhai ïrhiaragai aatagi ka ïpïan ïxi gïn ajïga xi biakagi ix makïdï Diuxi aagai sai maakiagai. Mos buaboidakai ïgai Suxi Kristo tudu.

Filipenses 1:29

Kïï tuiga Diuxi gïn bïïtarï dai gïn maa oigaragai xi maaxituldana aapimï jaa buitapi xïïxi ïr gïdukami Suxi Kristo. Dai gobai itïiya ïrhidi sai mai xu xi mosïkaxi gïn maa ïgai oigaragai ix buaboitudada aapimï. Ïma dukai gïn maa ïgai oigaragai ïpï sai soimaaxi taatana aapimï ïpï gamaaxiturhitai aapimï xïïxi ïr gïdukami ïgai.

Filipenses 3:10

Gin aaduñi, kïïga biaka in ïrhidi bamioma urabaragai Suxi Kristo ïmadï. Taata in ïrhidi sai kïïga gubuakami dukai gaatabuadagi ïgai gin ïmadï ïpïan dukai ix dukatai gubuakami aatadui Diuxi go Suxi ïmadï aidïxi duakaturhi ïgai. Biaka in ïrhidi urabaragai Suxi ïmadï soimaaxi taatakai aanï ïpïan dukai xi taata ïgai. Ïpïan tuigaka in ïrhidi aanï Suxi Kristo asta xako ukami bhai gin dukagi ix mukiagi ïpïan dukai ïgai.

Kolosenses 1:24

Gin aaduñi Diuxi amadïrï, aanï soimaaxi taatamai xibi ibuadatai ïmo aaduindagai ix makïdï ïr soiñi gïn bïïtarï. Dïï gia tomaxi soimaaxi taatakagi aanï bïïxkïrï bhai gin ïrhidiña aanï maatïkatai sai aapimï gïn bïïtarï soimaaxi taataimi aanï. Daiñi, Suxi Kristo soimaaxi taata go buaboitudadami bïïtarï baasïkioma dai xibi aanï in ajïga xi soimaaxi taatagi go buaboitudadami bïïtarï ïpï ïpïan dukai ïgai.

Tito 3:7

Aidï ïr soimaaxi ibuadamikana aatïmï dai maiti ïr gïr ajïakamikatadai xi kïï tuigakagi Diuxi gïr bïïtarï dïï bïïxkïrï buañixikami gïr aa ïgai. Podui ïgai saidi ïr maamaradïkana aatïmï dai sai bhïna aatïmï ixtumaxi bia ïgai gïr bïïtarï. Dai xibi nïnïraka aatïmï ixtumaxi bia ïgai gïr bïïtarï maatïkatai sai bïïxkïrï bïïtarï óídaka ragai.

Hebreos 1:14

Go tïtïañikarudï Diuxi mos ïr pipioñigadï kaxkïdï. Dai Diuxi otosaiña ïgai sai soikïiña ïgai odami ix makïdï kïïgakïrï bubuaki agai. Sai soikïiña ïgai go buaboitudadami tudu.

Hebreos 1:2

Dïï gia xibiapioma Diuxi otoi ïmai kïïrhi bamioma namïakami xi go ñiñokituldiadamigadï Diuxi. Otoi ïgai Maradï tudu sai gïr aiturhiña ñoki xibi karhioga ugiti agaitai oidigi. Diuxi Maradï ïgai tudu ix makïdï idui go oidigi. Dai Diuxi ka aagai sai Maradï ïr tuidadïka agai bïïxi ixtumaxi ix makïdï idui ïgai.

Hebreos 6:17

Dai podukai ïpï Diuxi aidïxi aagidi ïgai go Abraam ïïki sai buaboikïdï maaki agai ïmo bhai ïrhiaragai abhana aidï aagidi ïgai ïmo xadutudikami ñoki. Podukai aagidi ïgai ipïrhiditadai sai go Abraam ïmadï piipixaradï kïïga maatïkana sai Diuxi mai ïma dukai gï tïgito agaitadai. Ipïrhiditadai sai maatïkana ïgai sai buaboikïdï iduña agai ixtumaxi aagidi tudu. Kaxkïdï ïïgi gï báí Diuxi aagiditai ïmo xadutudikami ñoki. Podukai aagidi ïgai saidi maaki agai go bhai ïrhiaragai tudu.

Santiago 2:5

Gin aaduñi, kïïga gïn oigïdai aanï. Kïïga abïr gïn tïgito kaïka ixtumaxi gïn aagidamu aanï. Gïn maakimu aanï ñoki tudu. Daiñi, Diuxi ka podukai dáí sai mui soititigami ïr buaboitudadamika agai dai podukai gïn bipidakami dukai bii agai iibhïadïrï buaboitudaitai ïgai tomaxi tami oidigi daama bhaitoma mai bia ïgai ixtumaxi. Biakamu ïgai oigaragai xi Diuxi tïanïdagi tudu. Gobai tudu ïr go bhai ïrhiaragai ix makïdï maaki agai Diuxi go odami ix makïdï oigïdai Diuxi. Ka podukai aagai ïgai tudu.

1 Pedro 1:4

Xibi nïnïraka aatïmï go naana maaxi bhai ïrhiaragai ix makïdï bia Diuxi gïr bïïtarï tudu. Diuxi ka bhai tua naana maaxi bhai ïrhiaragai gïn bïïtarï tïbagiana kaxkïdï. Dai ix makïdï bhai tuajidi ïgai gïn bïïtarï kïïga buañixi dai mai ugiti agai tomarhi ïmo imidagai.

1 Pedro 4:13

Bhai gïn ïrhiadabïrai bhaiyoma. Gobai ix makïdï taatamaimi aapimï ïr ïmo urabaragai Suxi Kristo ïmadï kaxkïdï. Ïgai podukai soimaaxi taata ïpï tudu. Dai gobai itïiya ïrhidi sai gia kabami bhai gïn ïrhiadamu aapimï xïxkadï dibiagi ïgai ïpamu xïïxkadï gï maaxitudagi xïï xigiamaaxi ïgai dai xïï kabami ïr gubuakami ïpï.

Apokalipsis 21:7

—Daiñi, maakimu aanï ixtumaxi kïï namïakami xorai maitiagi go soimaaxkami. Maakimu aanï oigaragai xi aanï kïïgakïrï ïr Diuxigadïkana dai xi ïgai ïr gin maamarakana tudu.

Apokalipsis 3:21

Dai Diuxi gin Oga gin maa oigaragai xi abhana daibana aanï ïgai daikarudïana xakoga dakatai gatïanïi ïgai sai gatïanïna aanï ïgai ïmadï. Maitï aanï go soimaaxi buidïrï tudu kaxkïdï gin maa oigaragai xi daibana aanï ami. Dai aanï podukai maakimu oigaragai ïpï xorai maitiagi soimaaxi buidïrï sai daibana ïgai gin ïmadï gin daikarugana xakoga gatïanïi aanï reykatai aanï.