Romanos 15:16 - Northern Tepehuan Bible

¹⁶ Gin maa ïgai sïïrhikami xi ïr pioñigadïkagi aanï Suxi Kristo tudu dai sai ibuada aanï ixtumaxi ïr soiñi óídakami bïïtarï ix makïdï maiti ïr judidiu. Ïgai buitapi aitudai aanï go bhai ïrhiaragai aatagi ix makïdï Diuxi gïr maa. Ïmo bhai buadami xadutudaragai dukai aatabuayi aanï aagaitai go bhai ïrhiaraga aatagi. Dai Diuxi buitapi tïïgida in ïrhidi go óídakami ix makïdï maiti ïr judidiu ïmo daxdaragai dukai bai ïgaikïdï bhai gï ïldana Diuxi. Diuxi Ibhïadï tudu ïgai dai ïkobai darasai odami ïmo daxdaragai dukai Diuxi bïïtarï.

Romanos 15:16 ပူးပေါင်းရင်းမြစ်များ

Hechos 13:2

Dai ïmo imidagai bïïxkatai ïgai gaxadutudaitadai Diuxi mai dïïkakai kuadagai taidi Diuxi Ibhïadï po tïtïdai aidï, —Aanï ka darai Bernabe ïmadï Saulo ïmo aaduindagai bïïtarï kaxkïdï xibi abïr ïkobai gin bubaitulda gobai go aaduindagai bïïtarï— ikaiti Diuxi Ibhïadï.

Hechos 20:24

Dïï aanï mai buamï in ïrhidi gokïdï. Aanï gin bïïtarï maiti ïr ixtumaxi ix gin aiyagi mukigami ix cho ïpï. Dïï gia nato in ïrhidi aanï go aaduindagai ix makïdï gin maa Suxi Gïr Nukadakami. Ïgai gin tïjai ansai aagaiña aanï go Bhai Ïrhiaragai Ñoki ix makïdï aagai xïï kïï tuiga Diuxi gïr bïïtarï.

Hechos 20:32

Xibi daanïi aanï Diuxi sai ïgai gïn nukadakana dai sai kïïga ïïgiada aapimï Diuxi ñokidï ix makïdï aagai xïï kïï tuiga Diuxi. Diuxi ñokidï kïï gupurtudarhiga dai ïgaikïdï biaka antaada aapimï naana maaxi ixtumaxi kïï bhai maaxkami ix makïdï Diuxi bhai dáí maamaradï bïïtarï.

Hechos 22:21

Daidi Gïr Nukadakami pobai gin tïtïdai, —Imiñi aapi tabhiadïrï. Gï otosa iñagai mïkaxi xako óídaga go ix makïdï maiti ïr judidiu, pobai in tïtïdai Gïr Nukadakami tudu— itïtïdai Pabora.

Hechos 9:15

Daidi Gïr Nukadakami itïtïdai, —Imiñi. Kaxi an ïko busaitu aanï go Saulo bai ñokaiña ïgai gin bïïtarï. Aituldamu ïgai gin ñoki bïïtarï ix makïdï maiti ïr judidiu dai judidiu ïpï dai bïïtarï gïgïr dudunukami.

Romanos 1:1

Aanï ïr Pabora dai gïn otoxi idi ojai. Aanï ïr tïañikarudï Suxi Kristo. Dai Diuxi gin dáí an saidi ïr otosadïkana dai ïkobai gin busaitu ïgai ïpï an sai óídakami buitapi aagaiña go bhai ïrhiaragai aatagi ix makïdï Diuxi gïr maa.

Romanos 11:13

Xibi idi ñoki ix makïdï aagamu aanï ïr bïïtarï aapimï ix makïdï maiti ïr judidiu. Diuxi gin otoi ansaidi gïn aituldana Diuxi ñokidï. Dai sïïrhikïdï ïr namïakami idi aaduindagai ix makïdï ibuayi aanï.

Romanos 15:18

Xibi mai duadimukai aagai aanï ix tumaxi dui Suxi Kristo aanïkïdï. Suxi Kristo ipïrhidi xi odami ix makïdï maiti ïr judidiu ïïgiadagi Diuxi kaxkïdï aatadui ïgai aanïkïdï. Go odami ix makïdï maiti ïr judidiu kaïkana ixtumaxi aagaiña aanï dai nïidiña ixtuma ibuadana kaxkïdï ïïgidi ïgai Diuxi.

Romanos 15:19

Suxi Kristo ïgai dai podukai aatadui saidi Diuxi Ibhïadï gubukarhigakïdï ibuadana aanï naana maaxi maaxidaragai ix makïdï ïïgi Diuxi ixtutuidikïi xi buadagi. Podukai Diuxi Ibhïadï gubukarhigakïdï kïïga aagidi aanï Diuxi ñokidï bïïxi óídakami aipakoga. Jerusalenïrï gin aaga aanï dai bïïxi aipako aiturhi aanï go bhai ïrhiaragai aatagi aagaitai go Kristo asta mïï Ilirikana ukami.

Romanos 15:20

Bïïxkïrï gaagaiña aanï ix dukatai aituldagi go bhai ïrhiaragai aatagi xako go óídakami mai kia kajiomakana xorai ïr Suxi Kristo. Ïpïan dukai aatabuayi aanï ïmo kïïsadami baaki ix makïdï mai ojoidi xi daama aatabuadagi cimientogadï ïmai.

Romanos 15:29

Dai kïï maatï aanï sai mïï gïn dibiakai aanï sai Suxi Kristo kïï tuigakamu gin bïïtarï dai gin maakimu gubukarhigai saidi gï bhidakagi aanï ïmo kïïgadukami bhai ïrhiaragai aapimï gïn bïïtarï ïpï.

Romanos 5:5

Dai xi buaboidaitai nïnïrakagi aatïmï xi Diuxi kïïgakïrï gïr bubiadagi aidï gia mai soi gïr ïrhiadamu aatïmï. Dai ïkobïrakoga Diuxi gïr maa Diuxi Ibhïadï dai ïgai gïr maatïturhimi gïr iibïdagïrï ix xïï kïïga gïr oigïdai Diuxi.

1 Korintios 3:5

¿Tumaxiïrï ïr gïdukami go Apolos tudu ix urabakagi aapimï ïgai? ¿Dai tumaxiïrï ïr gïdukami aanï ix gin urabakagi aapimï ïpï? Daiñi, aatïmï mos ïr pipioñigadï Diuxi. Dai mos ibuadatadai aatïmï go aaduindagai ix makïdï gïr maa Diuxi dai gïn aagidi Diuxi ñokidï bai aapimï buaboitu.

1 Korintios 4:1

Gin susukurhi, aanï ïmadï go Apolos ïr ojotosadï Suxi Kristo. Dai gï aagai ix pipioñigadï Suxi Kristo dukai gïr nïijada aapimï. Kaxkïdï tudu ïgai gïr maa ïmo sïïrhikami xi kïïga aagadagi aatïmï go maatïtuldaragai ix makïdï ïïgi Diuxi maatïkana ïkioma.

1 Korintios 6:19

Kïï sïïrhi abïr gïn tïgitoka tudu sai gïn tukuga ïr Diuxi Ibhïadï bakidï dukai gïn ïrana dakatai ïgai. Dai Diuxi ïgai dai gïn maa ïïgi Ibhïgadï sai gïn ïmadï dakana. Kaxkïdï ka mai bia aapimï sïïrhikami ix ïïgi gïn tïanïdagi aapimï.

2 Korintios 11:23

Go ix makïdï gin bui ñokaiña gïn aagidiña sai kïïga aatabuadana ïgai Suxi Kristo bïïtarï ïpï. Dïï gia, daiñi, kïïga maatï aanï sai ïmo buirudagai dukai ikaidaga ixtumaxi gin aagida iñagai xibi dïï bïïxkïrï ïr buaboi sai aanï bamioma kïïga aatadui Suxi bïïtarï ix bhai ïgai. Kabamioma gaatabuadana aanï ix bhai ïgai tudu. Muiyoma imidagai gin maixatu aanï ibuadatai aanï Suxi aaduindadï dai muiyoma imidagai gin gïïgïtu aanï ïpï. Mai bhaiga aanï xi gin tïgitoagi xïïki imidagai gin gïïgïtu aanï tudu. Dai mui imidagai bhaitoma muu aanï ibuadatai aaduindadï Suxi ïpï.

2 Korintios 5:20

Gobai itïiya ïrhidi saidi aatïmï ïr ñokituldiadamigadï Suxi Kristo ojotosadïkatai aatïmï. Dai ñokiturhimi aatïmï Diuxi ïpï. Dai Diuxi kabami buamï ïrhidi aapimï gïn bïïtarï. Kaxkïdï xibi kabami gïr aajagïi amïï dai gïn aagidimi aatïmï sai buaboitudaitai bhïna aapimï go oidaragai ix makïdï gïn maakai Diuxi sai biakana aapimï urabaragai ïgai ïmadï.

2 Korintios 8:5

Kïïga abokan dukai ibuadana ïgai ïïgiada ïrhiditai Gïr Nukadakami dai gïr ïïgida ïrhiditai aatïmï ïpï. Kaxkïdï kïïga gïïpi ïmpagi ïgai soiñi tomaxi aatïmï bhaiton mai buaboidaitadai ix pokaki ïmpaidagi ïgai.

Galatas 3:5

Daiñi, kïï maatï aapimï sai Diuxi ïgai dai gïn maa Diuxi Ibhïadï. Dai Diuxi Ibhïadï gubuakami aatabuayi gïn saagida saidi ibuada aapimï naana maaxi maaxidaragai ix makïdï odami ïïgi mai bhaiga xi ibuadagi. Gobai ïr ïmo gïdukami bhai ïrhiaragai gïn bïïtarï. Dïï gia gin aagidabïrai ix tuixi podukai gïn maa gubukarhigai Diuxi sai pomaaxi ibuada aapimï. ¿Kïïga mïx ïïgidi go sïïrhikami xi kaxkïdï podukai aatabuayi Diuxi? Cho. Daiñi, gïn aagidamu aanï ix tuixi pomaaxi ibuayi maaxidaragai Diuxi gïn saagida. Kïïga buaboitu aapimï go bhai ïrhiaragai aatagi mos kaïkai aapimï dai kaxkïdï aatabuayi Diuxi podukai gïn saagida ibuadatai naana maaxi maaxidaragai. Podukai nïidi aatïmï sai Diuxi gïr urhiñdi naana maaxi bhai ïrhiaragai mos buaboitudakai aatïmï dai mai xu xi ibuadatai aatïmï ixtumaxi.

Efesios 2:18

Tomax dukai, xi ïr judiukagi aatïmï xi maiti ïr judiukagi ïpï, tomax dukai Suxi Kristo gïr maa baakigai xi urabana aatïmï gïr Oga. Xibi Diuxi Ibhïadïkïdï bhaiga aatïmï xi aatagiadagi ïgai tudu.

Efesios 2:22

Dai xibi aapimï ix makïdï maiti ïr judidiu bïïna daraka Suxi Kristo ïpï. Xibi aapimï ojodai dukai gïn darasaka Diuxi kiidïrï ïpï. Podukai aatïmï bïïxkatai ïr tutuidadï Diuxi kiidï dukai xako oidaga ïgai gïr ïrana dakatai Diuxi Ibhïadï.

Efesios 5:2

Kïïga abïr oigïada jaa aidï. Daiñi, Suxi Kristo gïr oigïdai kaxkïdï ïïgi gï dagito ïgai sai gï muatudana ïmo daxdaragai dukai. Podukai bhai dui ïgai gïr bïïtarï soimaaxi idunakai aatïmï. Dai Diuxi kïï bhai ïlda tïï Suxi Kristo daxdaradï. Kïï xigian dukai ubagi ïgai.

Filipenses 2:17

Daiñi, aanï aatabuayi gïn soiña iñïrhiditai sai kïïga buaboitudana aapimï. Dai xïduñada gin muatudagi aanï dai gï aaxtagi gin ïra gïn soikïitai aanï podukai gobai mos ïr ïmo daxdaragai dukaikamu Diuxi bïïtarï. Ïmo bhai ïrhiaragaikamudai gobai gin bïïtarï tudu. Dai ipïrhidi aanï xi bhai gïn ïrhiadagi aapimï gin ïmadï.

Filipenses 4:18

Xibi ka bia aanï go oidaragai ix makïdï gin otoxdi aapimï go Epafrodito ïmadï. Kïïga ayi gobai bïïtarï ixtumaxi tïgitokatadai aanï dai asta bhaibitu. Gobai ix makïdï gin otoxdi aapimï ïr ïmo daxdaragai kïï xigian ubadami duu gin Diuxiga bïïtarï dai kïïga bhai gï ïrhidi ïgai gokïdï.

1Tesalonicenses 2:2

Daiñi, kïï maatï aapimï sai mai kia aïkai aatïmï ami xako daraka aapimï sai kabami soi gïr buididi jaa Filipoana aagaitai aatïmï go bhai ïrhiaragai aatagi. Podukai daibusai Filipoana tudu. Dai ami xako daraka aapimï muidukana gïr buidïrï bïïtïkami ïpï. Dïï bïïxkïrï mai duadimudakïdï aagaiña aatïmï go bhai ïrhiaragai aatagi ami gïr soikïitai Diuxi. Kaxkïdï kïï jii gïr aaduindaga.

1Tesalonicenses 2:9

Kïïga gïn tïgito aapimï ïrhi aanï xïï kabami aatadui aatïmï gïn ïmadï darakatai. Ga aatabuadana aatïmï tasïrï dai modukai tukarï sai biakana aatïmï ixtukïdï óídakagi dai mai xu ix aapimïañdïrï bui ixtumaxi gïn aagiditai go aatagi. Maiti ipïrhiditadai aatïmï ix soi gïn buadagi aapimï gïr maakaitai soiñi kaxkïdï.

1Tesalonicenses 5:23

Gïr susukurhi, daanïi aatïmï Diuxi sai gïn soiñana sai go ïïgi Diuxi bïïtarï óídakaiña aapimï. Diuxi tudu ïgai dai gïr maakai ibhïxtaragai. Daanïi aatïmï ïgai sai gïn nukadakana sai maiti gïn sarabidana soimaaxkami tomarhi gïn ibhïdagïrï tomarhi gïn tïgibudagïrï tomarhi gïn tukugïrï. Daanïi aatïmï sai kïï buañixikami gïn biakana ïgai tudu asta xïïxkadï ïpamu dibiagi Suxi Kristo Gïr Nukadakami. Podukai mai tipukamu ixtukïdï gïpiïrï gïn bupadagi ixtumaxi dibiakai ïgai.

1 Tomoteo 1:11

Podukai aagidiña aanï odami xïïxkadï aagidagi aanï go bhai ïrhiaragai aatagi aagaitai Suxi Kristo. Gobai ïr ïmo aatagi kïïga namïakami. Dai Diuxi ix makïdï kïïga bhai gï ïrhidiña ïgai dai gin tïïgi go bhai ïrhiaragai aatagi. Ïgai tudu gï agai xi xadutuadagi odami aagaitai xïïxi ïr gïdukami.

1 Tomoteo 2:7

Kaxkïdï gin maa sïïrhikami Diuxi ansaidi ïr otosadïkana sai bhodïrï maatïtulda aanï go óídakami ix tumaxi ïr buaboi ix makïdï maiti ïr judidiu. Sai aituldana aanï go bhai ïrhiaragai aatagi tudu. Diuxi ïr gïr kïïgakïrï bubiadamiga di dai ipïrhidi xi bïïxkatai óídakami kïïgakïrï bubuakiagi. Kaxkïdï gin maa ïgai go sïïrhikami ansaidi ïr otosadïkana. Buaboi aagai aanï tudu pokaititai sai Diuxi gin maa go sïïrhikami ansaidi ïr otosadïkana. Mai yaatagïi aanï tudu.

2 Timoteo 1:11

Dai Diuxi gin maa sïïrhikami ansaidi ïr otosadïkana aanï Suxi Kristo sai aagaiña aanï go bhai ïrhiaragai aatagi dai sai maatïtuldana mui odami aipakoga óídakami.

1 Pedro 1:12

Go ñiñokituldiadamigadï Diuxi kïïga máí sai mai kia bhai duña agaitadai Diuxi go kïïgakïrï bubaidaragai aidïxi kia oidakatadai ïgai. Diuxi podukai maatïturhi ïgai kaxkïdï. Dai kaxkïdï maatïkatadai ïgai saidi go ñoki ix makïdï gatïtïïgitadai ïgai ïïki ïr aapimï gïn bïïtarï ix makïdï gokiïrioma dada. Dai xibi Diuxi ka otoi Ibhïadï tïbagiañdïrï. Dai gïn otoxdi Diuxi tïtïïgiadami ñoki xorai gïn aiturhiadagi go bhai ïrhiaragai aatagi ïpï. Diuxi Ibhïadï gubukarhigadïkïdï gïn aiturhi ïgai go aatagi aagaitai go kïïgakïrï bubaidaragai tudu. Agia xigiamaaxi aatabuayi Diuxi. Asta go tïtïañikarudï Diuxi kïïga gïn tïgito nïnïidi ka daibuskïitai bïïxi ixtumaxi aagaiña go ñiñokituldiadamigadï Diuxi ïïki abhiadïrï tudu.