Romanos 12:3 - Northern Tepehuan Bible

³ Diuxi gin maa ïmo gubukadagai mos kïï tuigakatai ïgai gin bïïtarï. Kaxkïdï xibi aanï aagai sai mai gïgïrdukïdï gïn ïrhiadagi ïïgi aapimï. Bhaiyoma xudu gïn tïgitoagi aapimï abïr tïgito ixtumaxi ïr buaboi. Diuxi ïgai dai gïr maa gubukadagai bïïxkatai aatïmï tudu xi kaxkïdï buaboitudai aatïmï.

Tepehuan Northern: Diuusi ñiooquidʌ utuducami oodamicʌdʌ

³ Diuusi cʌʌgacʌrʌ giñnʌidi dai giñmaa sʌʌlicami ansai gamamaatʌtuldiña istumaasi ʌgai ipʌlidi cascʌdʌ gʌnaagidi aanʌ sai maitʌaagai isgʌgʌrducʌdʌ gʌnʌliadagi. Cʌʌgavʌr gʌntʌtʌgitoda. Tʌtʌgitodavurai istumaasi ʌrvaavoi istumaasi istutuidi aapimʌ isivuaadagi dai tʌtʌgitodavurai siʌʌsi vaavoitudai aapimʌ Diuusi.

Romanos 12:3 ပူးပေါင်းရင်းမြစ်များ

Lukas 18:11

Dai ami kiupiana kïïkiba go fariseo dai adukai gadaanïi Diuxi, —Aapi Diuxi— itïtïdai. —Kïïga bhai gin ïrhidi aanï aapikïdï maatïkatai sai aanï mai ïpïamaaxi aanï gobai soimaaxi ibuadami. Aanï mai ïpïamaaxi go ïïxibogami dai go ix makïdï mai sïïrhi aatabuayi dai ix makïdï gaïmadï bopoiña aipakoga tudu. Dai bhai gin ïrhidi aanï mai ïpïamaaxkatai aanï go taanïdami kuota ix makïdï bhobai kïïka— itïtïdai aagaitai go gïmai ix makïdï ami kiupiana dibiatadai.

VUAANA 3:34

Diuxi aagidi Maradï ix tuma ñoki aituldana ïgai óídakami dai mïkadïrï otoi maakakai bïïxi Diuxi Ibhïgadï gubukarhigadï. Dai Diuxi Maradï mai aagaiña ïma maaxi, mosïkaxi gobai ix makïdï Diuxi aagidi. Kaxkïdï gï maatï saidi ïr buaboi ñokidï aagaitai ïgai go baaxi ñoki ix makïdï Diuxi aagidi.

Romanos 1:5

Suxi Kristo kïï tuiga aatïmï ojotosadï gïr bïïtarï kaxkïdï gïr dáí ïgai saidi ïr ojotosadïkana aatïmï bai jaa mui odami ix makïdï maiti ïr judidiu buaboitudaiña dai ïïgidiña ïgai. Podukai gïr otoi Suxi Kristo baidi mui odami ix makïdï maiti ïr judidiu kïï xadutuadana ïgai.

Romanos 11:25

Gin aaduñi, ipïrhidi aanï xi maatïkagi aapimï ïmo maatïtuldaragai Diuxiañdïrï ï ix makïdï ïki abhiadïrï ïxtokikana. Dai aidï gia toma lïïchi mai gïgïrdukïdï gïn ïrhiadamu aapimï kaïkai idi maatïtuldaragai ix makïdï gïn aagidamu aanï. Daiñi, mai xu bïïxkïrï kaapakami ka agai iibhïadï go judidiu maiti ipïrhiditai xi buaboitudagi. Kapakamu ïgai mosïkaxi asta xïïxkadï aiyagi ix xïïkiduka agai buaboitudadami ix makïdï maiti ïr judidiu.

Romanos 12:16

Ïmadugan dukai abïr tïgito nïida gïn aaduñi aipakoga ix maaxi daraja. Dai maiti abïr gïgïrdukami gïn ïrhiada ïïgi aapimï pobai gïn ïrhiditai xi bamioma maatï aapimï xi bhai jaa. Kïïga abïr nïijada ix makïdï ïr soititigami ïpï.

1 Korintios 15:10

Sïïrhikïdï kïï tuiga Diuxi gin bïïtarï tudu ix kaxkïdï otosadï gin dáí ïgai. Dai kïïga ibuayi soiñi xi otosadï gin dáí Diuxi kaxkïdï tudu gin maakai ïgai gubukarhigai sai ibuadana aanï naana maaxi aaduindagai. Dai asta kabamioma gin aaga aanï ix bhai go gaa ojotosadï Suxi. Dïï mai xu ix ïïgi gin gubukarhigakïdï ibuayi aanï go aaduindagai. Diuxi ïgai dai aatabuayi aanïkïdï bhaiyoma kïï tuigakatai ïgai gin bïïtarï.

1 Korintios 3:10

Daiñi, sïïrhikïdï kïï tuiga Diuxi dai gin maa gubukarhigai ix kaxkïdï kïï maatïtai gaatadui aanï gïn tïtïgiditai aatagi. Gïn aagidamu aanï ïmo maaxidaragai aatagi ix dukatai gaatadui aanï. Daiñi, aapimï ïr Diuxi bakidï dukai ix makïdï bañidimi ïgai dai aanï dáí go simientogadï gïn tïtïgiditai go aatagi. Dai xibi jaa gïn soikimi ïpï gïn buaboidaragïrï dai podukai bañidimi ïgai Diuxi kiupaigadï ïpï. Dïï gia daiñi, ix dukai ïmo kïsadami baki bia ix kïï gï tïgito nïidagi ix tuma dasa agadagi ami simiento daama podukai ïpï xorai gatïtïïgiada agadagi ñoki gï agai ix kïïga gï tïgito nïidagi ix tuma ñoki gatïïgida agai.

1 Korintios 7:17

Gin aaduñi, ix maaxkatadai aapimï aidïxi tukamïrï gïn báí Diuxi mai kia buaboitudakai podukai gï agai ix biyagi aapimï.

2 Korintios 10:13

Daiñi, aatïmï mai podukai aagaiña sai bia aatïmï oigaragai ix gatïanïdagi maigobioma xako maiti gïr maa Diuxi sïïrhikami ix gatïanïdagi aatïmï. Mosïkaxi xako ukami gïr maa oigaragai Diuxi ix gaatabuada aatïmï mosïkaxi ami ukami gatïanïiña aatïmï. Mai gïgïrdukïdï gïr aagai aatïmï ïïgi tudu podukai. Dai maiti gïr bapasai aatïmï aaduindadïrï jaa ïpï. Aatabuayi aatïmï mosïkaxi xako gïr aagidagi Diuxi tudu. Dai Diuxi gïr aagidi sai ibuadana aatïmï ïgai aaduindadï aapimï gïn saagida.

2 Korintios 12:13

Mosïkaxi ïmo ixtumaxi maiti idui aanï aidïxi gïn ïmadï dakatai aanï. Maiti gïn dagito aanï ix soi gïn buadagi aapimï gin soikïitai gïn tuminxigakïdï tudu. Dai bhaiyoma daadagitoiña aanï jaa buaboitudadami xibhïakoga óídakami saidi soi gïn buadagi gin soikïitai. Pomaaxi gobai tudu. Maiti gïn dagito aanï xi xia buadagi aapimï gïn tuminxiga gin soikïitai. Gin oigïdabïrai ix mai kïï dui aanï mai xia dunakai gïn tuminxiga tudu.

2 Korintios 12:7

Kaxi gïn aagidi aanï saidi ipïrhidi aanï ix maatïkagi aapimï xïïxi mai gubuka aanï tudu. Kaxkïdï gïn aagidamu aanï ïpï ïmo ixtumaxi ix makïdï taatamaiña aanï. Daiñi, kïïga ïr buaboi sai Diuxi gin tïïgi naana maaxi xigiamaaxkami tïbagiïrï dïï gia gin nukadai ïgai dai maiti ipïrhidi ix ïmo gïdukami dukai gin ïrhiadagi aanï ïïgi. Kaxkïdï dagito Diuxi saidi gin ajiagi ïmo ixtumaxi diabora amadïrï ix makïdï bïïx tasai gin tomituskïi ïmo sïïxigai dukai gin tukugïrï. Diuxi dagito saidi gin ajiagi gobai sai podukai mai ïmo gïdukïdï dukai gin ïrhiadagi aanï ïïgi tudu.

Galatas 6:3

Daiñi, aanï aagai sai ïïgi gï buirumadai ïmoko ix pokaitadagi sai mai bia xi soikïdagi jaa xïïxkadï mai kïï ibuadagi ïgai. Ix mai soiña ïrhiada ïmoko jaa gobai itïiya ïrhidi sai ïmo gïdukïdï gï ïrhidi ïïgi dai gobai maiti ïr buaboi xi ïr gïdukïdï. Xorai mai soiña ïrhiada jaa maiti ïr ïmo gïdukïdï toma lïïchi tudu mos ïïgi po gï ïrhidi ïgai.

Efesios 3:2

Kïïga maatï aapimï sai Diuxi gin maa ïmo sïïrhikami ansai gïn aagidagi aanï xïï kïï tuiga Diuxi gïn bïïtarï aapimï ix makïdï maiti ïr judidiu.

Efesios 3:4

Dïï gia xibi ix gïn tïgito nïijadagi aapimï go ojai ix makïdï idui aanï aidï gia aapimï ïpï maatïkamu gobai ix makïdï aanï máí. Máí aanï tudu sai gï tïgito Diuxi ïïki ix dukatai iduñagi Suxi Kristo. Gobai tudu ïxtokikana ïïki abhiadïrï.

Efesios 4:16

Suxi Kristo gïr tïanïi gïr moo dukai dai aatïmï ïr tutuidadï tukugadï dukaikatai ïgai. Gïr ïgai maakai ixtumaxi tïgito aatïmï bai kïï gïrhiagi aatïmï ïmo tukugai dukai kïïga gïr arasakatai dai gïr soikïitai aipakoga. Bïïxkatai aatïmï ïr tutuidadï dukai Suxi Kristo tukugadï tudu. Dai ibuayi aatïmï gïr aaduindaga ix makïdï ïjïkobai gïr ajïga. Podukai kïïga gïrai aatïmï ïmo tukugai dukai gïr oigïdaitai aipakoga.

Filipenses 2:13

dai kïïga bhaigakamu aapimï xi pobuadagi. Kaxkïdï tudu Diuxi ïgai dai gïn maakai tïgibudagai saidi ipïldana aapimï xi ibuadagi ixtumaxi ïgai ipïrhidi dai gïn maakai ïgai gubukarhigai saidi ibuada aapimï ïpï.

Kolosenses 1:29

Dai kaxkïdï ïpï tomaxi xijiakan taadakagi bïïxkïrï kabami gin aajagïi aanï dai aatabuayi gin maakaitai Suxi Kristo gubukarhigai.

Kolosenses 2:13

Gin aaduñi, ïkioma ïko darakatadai aapimï Diuxiañdïrï. Koidadï dukaikana aapimï Diuxi bïïtarï tudu soimaaxi ibuadamikatai aapimï. Aidï kia biakatadai gïn ïïkidadï tïgibudagai soimaaxkïdï. Mai kia maigobai dasakatadai gobai gïn ibhïdagaiñdïrï aidï. Dïï gia tomaxi pomaaxkatadai aapimï bïïxkïrï Diuxi gïn oigïrhi bïïxi gïn soimaaxkamiga dai gïn duakaturhi bïïnakai aapimï Suxi Kristo.

1 Tomoteo 1:14

¡Xïï kïï tuiga Gïr Nukadakami aanïkïdï tudu! Daiñi, xibi bïïna dakatai aanï Suxi Kristo gin maa ïgai gubukarhigai ix kïïga buaboitudada aanï dai ix kïïga oigïdada aanï jaa.

1 Tomoteo 2:15

Gï agai bhaiyoma xi kïïga nukadakagi ïgai maamaradï dai kïïga gïrhidagi. Gï agai xi pobuadagi ïgai kïïga buaboidaitai Diuxi dai oigïdaitai jaa dai kïïga buañixikan dukai óídakatai. Ix kïïga xadutudaitai óídakagi ïgai podukai aidï gia Diuxi maakimu ïmo kïïgakïrï oidakaragai. Pomaaxi tudu oki bïïtarï.

1 Tomoteo 2:9

Dai ipïrhidi aanï xi oki bhai maaxkami yukuxi gïn aadagi. Maiti gï agai tudu xi ïmo oki ipïrhiadagi xi jaa gïn tïgito nïijadagi ix maaxi tiodi nïiditai yukuxidï. Dai kaxkïdï ïpï maiti gï agai xi kabami bhaibitukami bhai buadagi ïgai kuupadï. Dai maiti gï agai ïgai xi gïn aadagi yukuxi kabami namïakami xiïpï bhaibukai dai naanakagi kabami namïakami ïpï ipïrhiditai xi jaa gïn tïgito nïijadagi.

Tito 2:12

Dai xibi maatï nïiditai aatïmï xïï kïï tuiga Diuxi gobai gïr soikïi naana maaxi ixtumaxiïrï. Gïr soikïi gobai xi dagitoagi aatïmï ixtumaxi mai bhai ïrhidi Diuxi. Dai gïr soikïi ïpï xi gajiadïrï biagi aatïmï go soimaaxi ix makïdï ibuada ïrhidiña odami ix makïdï mai buaboitudai. Dai maatï nïiditai aatïmï xïï kïï tuiga Diuxi gobai gïr soikïi xi sïïrhi gïr tïtïgitoagi ïpï dai xi buañixikan dukai óídakagi idi oidigi daama kïïga ïïgiditai aatïmï Diuxi. Bïïxi gobai gïr soikïi maatï nïiditai aatïmï xïï kïï tuiga Diuxi otosakai ïgai Suxi Kristo.

Tito 2:2

Aagidañi ix makïdï ïr kïkïïrhiodami sai kïï gïn tïgito nïijadagi ïgai sai bïïxi ixtuma buadagi kïï bhai maaxkagi. Sai bhïna kïïga tïgibudagai dai kïïga óídakana sai jaa odami xadutuadana. Aagidañi ïpï sai tomax tumaxi daibuñagi sai apia buaboitudada ïgai dai sai apia oigïdaiña ïgai jaa dai sai gïn kabakadana ïgai soi ïrhiaragai buidïrï.

Tito 2:4

Gï agai ïgai bhaiyoma xi maakada kïïga ñoki go utu iimïdami oki sai kïï bhai maaxi óídakana. Ix mai kïïga óídakagi ïgai aidï gia jaa pokaitada antaada sai maiti ïr soiñi Diuxi ñokidï tudu. Gï agai go rhirhiokodami xi maakadagi ñoki go utu iimïdami sai oigïdana ïgai kukunadï dai maamaradï. Gï agai sai kïïga gïn tïtïgitoagi go utu iimïdami dai kïïga buañixikami dukai óídakagi. Gï agai ïgai xi kïïga nukadakagi kiidï dai ix kïï tutiakagi ïïgiditai kunadï. Ix pobuadagi ïgai aidï gia mai tipukamu ixtukïdï soi dukai nïijadagi jaa Diuxi ñokidï.

Tito 2:6

Dai gï agai xi maakada aapi ñoki go kïkïïrhi ïpï ix makïdï mai xii ïr kabami imïdami sai kïïga gïn tïgitokagi dai ibuadagi ixtumaxi ïr kïïga.

Santiago 4:6

Dai tomaxi oijada antaadakagi aatïmï ïïgi gïr tïgibudaga soimaaxkïdï Diuxi bïïxkïrï kïï tuiga dai gïr soikïi saidi ïgai oijadiña aatïmï bhaiyoma. Agia kïï tuiga Diuxi gïr bïïtarï. Kaxkïdï pokaiti Diuxi ñokidïrï saidi, Odami ix makïdï gïgïrdukïdï gïn ïrhidi ïr buidïrï bïïtïkamigadï Diuxi. Dai kïï tuiga Diuxi odami bïïtarï ix makïdï mai gïgïrdukïdï gïn ïrhiadagi. Kïïga soikïi ïgai tudu, ikaiti go ojai.

1 Pedro 1:13

Aapimï gïn bïïtarï tudu go kïïgakïrï bubaidaragai ix makïdï aagaiña go ñiñokituldiadamigadï Diuxi ïïki. Dai kaxkïdï abïr bhai gïn duka dai kïï sïïrhi tïtïgitoda. Kïïga buaboitudaitai abïr nïnïraka go bhai ïrhiaragai ix makïdï gïn maakimu Diuxi xïïxkadï dibiagi Suxi Kristo ïpamu tudu. Aidï bïïxi óídakami nïijadamu go Suxi dibiakai ïgai dai bïïxi óídakami maatïkamu xorai ïgai.

1 Pedro 4:11

Dukami, ix makïdï gatïtïïgiadagi ñoki gï agai sai kïïga ñokadagi ñokiturhikatai ïgai Diuxi. Dai ix makïdï soikïdagi jaa gï agai sai kabami gï aajagïdagi soikïitai bïïxi go gubukarhigaikïdï ix makïdï gamamaakai Diuxi. Bïïxi ixtumaxi ibuadagi aapimï abïr Diuxi gubukarhigadïkïdï ibuada saidi jaa xadutuadana Diuxi nïiditai ixtumaxi ibuayi aapimï gïn soikïitai Suxi Kristo. Suxi Kristo ïgai dai bïïxi adaama gï xadutuada agai bïïxkïrï bïïtarï tudu dai bïïxi adaama gatïanïda agai ïgai ïpï. Gobai gia ïr buaboi.

1 Pedro 4:7

Gin aaduñi, ka miadaimi ix ugitiagi oidigi. Kaxkïdï abïr kïïga gïn tïtïgitoda dai kïïga nïnïasïrhigan dukai abïr daanïda Diuxi.

1 Pedro 5:5

Dai aapimï uutu iimïdami, gï agai sai ïïgiada dai xadutuada aapimï go bhaitï gukakamigadï go buaboitudadami ïpï. Gï agai sai mai tïtïanïdami dukai gïn ïrhiadagi aapimï toma lïïchi dai bhaiyoma gï agai sai gïn soikïdagi aapimï aipakoga. Diuxi ojadï ikaiti sai, Buidïrï kaatï Diuxi go odami ix makïdï gïgïrdukïdï gïn ïrhiadagi. Dïï gia soikïi ïgai odami ix makïdï mai gïgïrdukïdï gïn ïrhidi, ikaiti Diuxi ojadï.

1 Pedro 5:8

Gin aaduñi, kïïga abïr gïn tïtïgitoda daidi abïr gïn nukadaka. Bia aapimï gïn buidïrï kaatïkamiga tudu ix makïdï ïr go diabora dai aipakoga aimïrai ïgai xia duada ïrhiditai xorai tïïgiagi ïgai.

3 Juan 1:9

Kaxi ojidi aanï go buaboitudadami ami xako oidaga aapi dai aagidi aanï sai soikïiña ïgai go ix makïdï Diuxi bïïtarï aatabuayi. Dïï gia go kïïrhi Diotrefe tïgidukami maiti ipïrhidi xi gïr ïïgiadagi. Arhiïxi ojidi ix gatïanïdagi ïgai go gaa buaboitudadami kaxkïdï.