Romanos 12:1 - Northern Tepehuan Bible

¹ Gin aaduñi, sïïrhikïdï kïï tuiga Diuxi gïr bïitarï gïr oigïrhitai. Kaxkïdï xibi kabami gïn tanïi aanï xi ïïgi gïn tïïgidagi aapimï ïmo daxdaragai duakakami dukai Diuxi bïïtarï. Diuxi bïïtarï abïr óídaka tudu kïïga xadutudaitai ïgai gin iibhïdakïdï. Gobai ïr ïmo bhai ïrhiaraga Diuxi bïïtarï. Kïïga maatiga maaxi aidï saidi ïr sïïrhi xi podukai xadutuadagi aapimï Diuxi.

Tepehuan Northern: Diuusi ñiooquidʌ utuducami oodamicʌdʌ

¹ Giñaaduñi Diuusi casoigʌʌli aapimʌcʌdʌ dai oigʌli gʌnsoimaascamiga cascʌdʌ aanʌ gʌndaanʌi mʌsai potʌtʌdaiña Diuusi mʌsaidʌ ivuaada ʌlidi istumaasi ʌgai ipʌlidi. Dai cʌʌgacʌrʌ avʌr oidaca dai camaisoimaasi ivuaada. Cʌʌgadu ispoduucai tʌtʌgitodagi aapimʌ dai poduucai ivuaadagi. Poduucai gʌaagai issiaa duutuada aapimʌ Diuusi.

Romanos 12:1 ပူးပေါင်းရင်းမြစ်များ

Lukas 7:47

—Daiñi aapi Ximuñi— itïtïdai. —Ka oigïrhi Diuxi idi oki soimaaxkamigadï tomaxi naana maaxi soimaaxi ibuadana gobai. Kaxkïdï kïïga gin oigïdai gobai dai mamaaxidi buitapi go gaa ix gin oigïdai. Dïï gia mai xii kabami gin oigïdai go odami ix makïdï po gïn ïrhidi sai mai xii mui oigïrhi soimaaxkamigadï— itïtïdai.

Romanos 12:2

Maiti abïr ïïgiada tïgibudadï oidigi daama óídakami bhaiyoma abïr bhïiyi tïgibudagai utudui Diuxiañdïrï. Aidï gia gïn utudutuldamu Diuxi gïn ïrabiadïrï dai maatïkamu aapimï ixtuma agai Diuxi gïn bïïtarï. Ix makïdï Diuxi aagai gïn bïïtarï mos ïr ïï kïkïïgadukami dai buapai bhai ïrhiaraga Diuxi bïïtarï. Mai tipu ïma maaxi bamioma kïïgadukami xi bhai ix makïdï Diuxi agai gïn bïïtarï.

Romanos 15:16

Gin maa ïgai sïïrhikami xi ïr pioñigadïkagi aanï Suxi Kristo tudu dai sai ibuada aanï ixtumaxi ïr soiñi óídakami bïïtarï ix makïdï maiti ïr judidiu. Ïgai buitapi aitudai aanï go bhai ïrhiaragai aatagi ix makïdï Diuxi gïr maa. Ïmo bhai buadami xadutudaragai dukai aatabuayi aanï aagaitai go bhai ïrhiaraga aatagi. Dai Diuxi buitapi tïïgida in ïrhidi go óídakami ix makïdï maiti ïr judidiu ïmo daxdaragai dukai bai ïgaikïdï bhai gï ïldana Diuxi. Diuxi Ibhïadï tudu ïgai dai ïkobai darasai odami ïmo daxdaragai dukai Diuxi bïïtarï.

Romanos 15:30

Gin susukurhi Diuxiïrï, bïïxkatai aatïmï kïïga buaboitudai Suxi Kristo dai Diuxi ibhïadï gïr maa gubukarhigai xi kïïga gïr oigïdada aatïmï aipakoga. Kaxkïdï gïn daanïi aanï xibi xi gin soiñana aapimï gin aaduindagïrï daanïitai Diuxi gin bïïtarï.

Romanos 2:4

Diuxi gia kïï tuiga. Mai otoma bhamukui ïgai gïn bui tudu dai tomarhi mai otoma daitudai gïgïbidaragai gïn abhana tomaxi gïn ajïakatadai xi taatagi gïgïbidaragai. Dïï aapimï tomarhi mai buamï gïn ïrhidi. Bhaiyoma soi dukai nïidi aapimï Diuxi poïrhiditai sai ïgai mai oton gïgïbitulda agai. Buabi tudu sai kïï tuiga ïgai gïn bïïtarï. Ipïrhidi ïgai sai ïma dukai gïn tïtïgitokagi aapimï kaxkïdï mai oton gïgïbituldai ïgai.

Romanos 6:13

Maiti abïr gatïïgida gïn tukuga xi ïr aaduinkarudï go soimaaxkami tudu. Bhaiyoma abïr gïn tïïgida xi ïr Diuxi aaduinkarudïkana aapimï xi ibuadagi aapimï ixtumaxi ïr kïïga. Aapimï ka gokiamako bia go mukigami aidï dai kaxi ïr duduakakami kïïgakïrï. Kaxkïdï abïr gatïïgida gïn tukuga bai podukai ïïgiadagi aapimï ixtumaxi ïr sïïrhi.

Romanos 6:16

Daiñi, kïï maatï aapimï sai xudu ïmoko biaka ïrhiadagi gï amu, ïgai biakamu ix ïïgiadagi amudï tomax dukai. Dai po maaxi xibi gïn bïïtarï ïpï. Kïï bhaiga aapimï xibi xi gïn tïïgidagi xi go soimaaxkami gïn amukagi ïïgiditai aapimï go soimaaxkami. Dïï gia go soimaaxkami go ïï mukigami buapai. Dïï gia xi gïn tïïgidagi aapimï Diuxi xi ïr gïn amukagi ïgai ïïgiditai aapimï aidï gia ïgai kïïgakïrï gïn nïijadamu.

Romanos 6:19

Xijaiga gïn bïïtarï xi maatï kajiagi gin aatagi. Kaxkïdï xibhï gïn aatagidamu aanï ixtumaxi mai xijaiga, ix makïdï bïïx tasai nïidiña aapimï. Daiñi, ïkioma ïïgidiña aapimï gïn soimaaxi tïgibudagai dai mos ïr pipioñigadï dukamikana go soimaaxkami adaimïitai gobai. Dïï xibi gï agai mïxi gatïïgidagi gïn tukuga bïï sudakami Diuxi xi ïr ïïgi ïgai bïïtarïkagi aapimï. Aidï gia Diuxi bïïtarï óídakamu aapimï kïïgakïrï.

Romanos 9:23

Dïï tomaxi gïr ajïakatadai ix taatagi gïgïbidaragai bïïxkïrï Diuxi soi gï ïrhidi gïr nïiditai. Gïr tïtïgida ïrhiditadai ix xïï kabami ïr gïdukami ïgai dai xïï kïï tiodi. Kaxkïdï maiti gï dagito ïgai xi gï maitagi go ojodaragai. Diuxi ïkiaxdïrï dáí saidi aatïmï kïïgakïrï ïpïamaaxkana ïgai, aatïmï ix makïdï ïr ïko bubaidadï tudu. Dai odami tïgibudadïrï mai ajïi xi maatiagi xïiduru Diuxi gubukarhigadï ïmadï bhai ïrhiaradï ïpï ix makïdï bia ïgai gïr bïïtarï.

1 Korintios 1:10

Xibi kïïga abïr gïn tïgito kaïka aapimï gin aaduñi. Daiñi, Suxi Kristo ïgai ix makïdï gin maa ïmo sïïrhikami ix kaxkïdï gïn maakai aanï ñoki. Dai aanï aagai sai sïïrhikïdï gï agai ix ïmo aadunumïka aapimï bïïxkatai. Maiti gï aagai ix ïjïkobai biakagi aapimï gïn tïgibudaga chïchïkiatai tudu. Gï aagai xi ïmo tïgibudagai biaka aapimï bhaiyoma dai ix kïïgakïrï gïn nïijada bïïxkatai aipakoga.

2 Korintios 10:1

Gin aaduñi, pokaitiña ïïmo odami sai xïïxkadï gïn ïmadï dakagi aanï sai kïï tuigakami dukai gïn mamaakaiña aanï ñoki maiti gïn bhagaiditai. Dai pokaitiña ïgai sai mosïkaxi xïïxkadï mïkaxi dakagi aanï dai gïn ojidagi sai aidï gia bhagaidadan kaitiña gin oja. Pokaitiña ïgai gin aagaitai aanï Pabora tudu ix makïdï ibuayi idi ojai. Dïï gia gïn aagidamu aanï ïmo ñoki dai gï agai sai maatïka aapimï sai ñokiturhimi aanï Suxi Kristo aagaitai idi ñoki. Daiñi, kïï tuiga Suxi dai kaxkïdï kïï bhai maaxkami dukai gïn maakimu aanï ñoki. Kïï bhai dukai gïn aagidimi aanï mïsai gin ïïgiada aapimï tudu ñokiturhitai aanï go Suxi Kristo.

2 Korintios 4:1

Xigian kaiti go utudui sïïrhikami tudu dai Diuxi kïï tuiga dai gïr maa oigaragai ix gatïtïïgiadagi aatïmï gobai aipakoga. Kaxkïdï mai ojodatai gatïtïïgidi aatïmï ñoki

2 Korintios 4:16

Sïïrhikïdï kïï tuiga Diuxi gïn bïïtarï tudu daidi ibuayi naana maaxi gïn bïïtarï ipïrhiditai ix oijadagi aapimï ixtumaxi ïr buaboi. Kaxkïdï apia gatïtïïgidimi aatïmï go bhai ïrhiaragai aatagi tomaxi soimaaxi taatamai aatïmï dai maiti gïr daadagitoi xi gïr maitiagi go soi ïrhiaragai toma xïïxi kabami soimaaxi taatamai aatïmï. Apia gatïtïïgidi aatïmï go bhai ïrhiaragai aatagi aipakoga tomaxi bïïx tasai bamioma ugitimi gïr tukuga tudu dïï gia bïïxkïrï bïïx tasai bamioma utudutuimi gïr iibhïdaga.

2 Korintios 5:20

Gobai itïiya ïrhidi saidi aatïmï ïr ñokituldiadamigadï Suxi Kristo ojotosadïkatai aatïmï. Dai ñokiturhimi aatïmï Diuxi ïpï. Dai Diuxi kabami buamï ïrhidi aapimï gïn bïïtarï. Kaxkïdï xibi kabami gïr aajagïi amïï dai gïn aagidimi aatïmï sai buaboitudaitai bhïna aapimï go oidaragai ix makïdï gïn maakai Diuxi sai biakana aapimï urabaragai ïgai ïmadï.

2 Korintios 6:1

Gin aaduñi, aanï aatabuayi Diuxi ïmadï ibuadatai aaduindadï dai gin soikïi jaa buaboitudadami ïpï. Dai xibi bïïxi gïr ibhïdagakïdï gïn maakai aatïmï ñoki idi ojiïrï. Gïn tïgitobïrai xïï kïï tuiga Diuxi aapimï gïn bïïtarï gïn maakakai ïgai ix dukatai kïïgakïrï bubuakiagi aapimï tudu. Diuxi gïn maa ïmo kïïgadukami oidaragai tudu. Dai xibi kabami gïn abïnakidimi aatïmï sai kïïga óídakagi aapimï ixdukatai gï agai maamaradïkatai aapimï Diuxi. Ïma dukai maiti ibuadamu soiñi gïn bïïtarï bïïxi gobai ix makïdï gïn maa Diuxi.

Efesios 4:1

Aanï gin maixatu mos ïïgiditai aanï Suxi Kristo. Dai aanï xibi bïïxi gin ibhïdagakïdï gïn abïnakida in ïrhidi xi kïï bhai maaxkami dukai óídakana aapimï. Gï agai xi kïï bhai maaxkami dukai óídakagi aapimï aidï dai podukai maaxitudagi sai gia ïr buaboi sai Diuxi ka ïkobai gïn bubaitu.

Efesios 5:10

Mamaatïrdabïrai aidï ix tumaxi bhai ïrhiatudai Diuxi.

Filipenses 1:20

Kïïga buaboitudai aanï tudu sai maiti ibuada iñagai tomarhi ïmo ixtumaxi ix makïdï ïr ïmo xaïraragai gin bïïtarï. Buaboitudai aanï bhaiyoma sai mai duadikuitai maaxitudamu aanï xïïxi ïr gïdukami Suxi Kristo kia tami oidigi daama dakatai aanï. Buaboitudai aanï sai maaxitudamu aanï xïïxi ïr gïdukami Suxi tomaxi muu gin tukuga xiïpï xi kia tïbïpi kabakagi gobai. Gobai buaboitudai aanï tudu dai kïïga ibhïxtakan taadaga aanï buaboitudaitai podukai.

Filipenses 2:17

Daiñi, aanï aatabuayi gïn soiña iñïrhiditai sai kïïga buaboitudana aapimï. Dai xïduñada gin muatudagi aanï dai gï aaxtagi gin ïra gïn soikïitai aanï podukai gobai mos ïr ïmo daxdaragai dukaikamu Diuxi bïïtarï. Ïmo bhai ïrhiaragaikamudai gobai gin bïïtarï tudu. Dai ipïrhidi aanï xi bhai gïn ïrhiadagi aapimï gin ïmadï.

Filipenses 4:18

Xibi ka bia aanï go oidaragai ix makïdï gin otoxdi aapimï go Epafrodito ïmadï. Kïïga ayi gobai bïïtarï ixtumaxi tïgitokatadai aanï dai asta bhaibitu. Gobai ix makïdï gin otoxdi aapimï ïr ïmo daxdaragai kïï xigian ubadami duu gin Diuxiga bïïtarï dai kïïga bhai gï ïrhidi ïgai gokïdï.

1Tesalonicenses 4:1

Gïr susukurhi, gïn aagida ïragai ïpï ïmo ñoki ix dukatai gï agai ix oidakagi buaboitudadami. Kaxi gïn aagidi aatïmï tudu ixdukatai ipïrhidi Diuxi ix óídakagi aapimï. Dai kïï maatï aapimï sai Suxi Kristo gïr maa ïmo sïïrhikami ix kaxkïdï sïïrhikïdï gïn abïnakida rïrhidi sai kïïga óídakagi aapimï ixdukatai Diuxi ipïrhidi. Dai ka podukai óídaga aapimï dïï bïïxkïrï gïn abïnakidimi aatïmï sai apia kïïgioma óídakagi aapimï ix dukatai ipïrhidi Diuxi.

1Tesalonicenses 4:10

Ka kïïga oigïdai aapimï go gaa buaboitudadami ami Masedoniana óídakami tudu. Dïï bïïxkïrï gïn abïnakida rïrhidi aatïmï sai apia bamioma kïïga gïn oigïdadagi aapimï aipakoga.

1Tesalonicenses 5:12

Gïr susukurhi, sïïrhikïdï gï agai ix namïakami dukai nïijada aapimï gïn bhaitï gukakamiga ix makïdï kabami aatabuayi gïn soikïitai. Gïn mamaatïtuldiadami ïgai tudu dai gïn maakai ïgai ñoki sai mai soimaaxi ibuadagi aapimï.

1 Tomoteo 2:3

Daiñi, Diuxi ïr gïr kïïgakïrï bubiadamiga dai ipïrhidi ïgai xi daantulda aatïmï bïïxi odami.

1 Tomoteo 5:4

Dïï gia ix biakagi soikïdami dukami maamaradï xiïpï ujurhidï xiïpï bopoxikadï aidï gia sai ïgai soiñana. Gï agai tudu xi go utu iimïdami xadutuadagi dïïdïdï dai ujurhidï gamaakaitai soiñi xïïxkadï tïgitokagi. Podukai aa noraidamu ïgai soiñi ix makïdï gïrhidi. Bia ïgai sïïrhikami xi ïpïgioma soikïdagi aaduñdï tudu dai gokiïrï bhaiga xi soikïdagi jaa ix makïdï tïgitokagi. Ïmo bhai ïrhiaragai Diuxi bïïtarï xi podukai xadutuada ïgai ix makïdï gïïrhidi tudu.

Filemon 1:10

Gï tanïi aanï sai kïïga bhai dukai nïijada aapi go Onesimo tudu. Gin maara dukai nïidi aanï Diuxi amadïrï tudu. Ïgai gin ïmadï buaboitu maixapikatai aanï tami.

Hebreos 13:22

Gin oigïdakai abïr kïïga ïïgiada idi ojai ix makïdï ïr ïmo maakaragai ñoki dukai gïn bïïtarï. Maiti xii tïbïdu gobai tudu.

1 Pedro 2:20

¿Dïï gia dukatai bhai gï ïrhidiña Diuxi aapimïkïdï ix soimaaxi iduñagi aapimï dai kaxkïdï gïn gïgïbiagi gïn amu? Kïïga ïr sïïrhi xi taatagi aapimï gïgïbidaragai mai kïï ibuadatai tudu. Dïï gia ïïmo imidagai soimaaxi gïn taataturhiada antaada gïn amu tomaxi kïï ibuadagi aapimï. Xïxkadï po gï duñagi gobai ix mai dagitoagi aapimï ix gïn maitiagi go soi ïrhiaragai dai apia kïïga ibuadagi aapimï gobai gia bhai ïrhidi Diuxi.