Mataibo 5:16 - Northern Tepehuan Bible

¹⁶ Ïmo kudakarui dukai aapimï tudu buitapi óídakami. Dai kaxkïdï aanï aagai sai gï agai sai kïïga maaxiko dukai óídakagi aapimï ibuadatai ixtumaxi ïr kïïga óídakami buitapi. Podukai go óídakami gïn tïgito nïijadamu ix dukatai óídaga aapimï. Dai maatï nïijadamu ïgai sai Diuxi gïr Oga ix makïdï tïbagiana daja ïgai dai gïn soikïi sai podukai óídakagi aapimï dai kïïga ñokadamu óídakami Diuxi bïïtarï nïiditai gobai— itïtïdai.

Mataibo 5:16 ပူးပေါင်းရင်းမြစ်များ

Mataibo 23:5

—Gïn aagidamu aanï ix tutuiga go tïtïïgiadami sïïrhikami ïmadï go fariseos tudu— itïtïdai. —Daiñi, ïgai ojai Diuxi ñokidï aarhi papeperhiïrï dai bhodïrï aarhi kaja ïrana darasai dai kobadïrï dai ïïkadïrï bupurai go aarhi kaja. Podukai gïn biturhi ïgai kaxkïdï. Dïï gia ojoidi ïgai xi bamioma gïrhidagi go aarhi kaja ix makïdï gïn bupurai ïgai saidi odami gïn tïgito nïidiña dai sai pokaitiña odami sai ïgai gia kïïga xadutudai Diuxi. Ojoidi ïgai ïpï sai gïn aadadagi yukuxi ix makïdï ugidïrï kïïga tïïtïbïdu naanakadï ix dukai gïn aadai odami ïmo xadutudaragai dukai Diuxi bïïtarï tudu. Dïï gia go tïtïïgiadami sïïrhikami ïmadï go fariseos pobuayi ipïrhiditai sai gïn tïgito nïidiña odami dai kïï ñokaiña ïgai bïïtarï bhaiyoma.

Mataibo 23:9

Dai maiti abïr gïï gïn oga xadutudikami dukai nïijada aapimï tomarhi ïmo maatïtuldiadami tami oidigi daama ïpï. Mosïkaxi Diuxi ix makïdï tïbagiana daja ïr go adaama xadutudikami gïn Oga kaxkïdï.

Mataibo 5:45

Podukai maaxitudamu aapimï jaa buitapi sai buaboikïdï ïr maamaradï aapimï Diuxi gïn Oga ix makïdï tïbagiana daja. Ïgai gia kïïga buididi go buidïrï bïïtïkamigadï tudu. Ïpïan ïxi otosai ïgai tonorhi kïï tutiakami bïïtarï dai ix makïdï mai kïï tutiakami bïïtarï ïpï. Dai ïmadugan ïxi dukitudai ïgai go mai kïï tutiakami dai go kïï tutiakami ïpï— itïtïdai.

Mataibo 6:16

Dai oi Suxi go aatagi daidi potïtïdai, —Daiñi— itïtïdai. —Ïïmo odami xïïxkadï maiti gakuadagi ïgai ïmo xadutudaragai dukai gadaanïitai Diuxi aidï mai gaxiubaiña kuupadï dai mai bakuanaiña buibasodï. Soi gïn ïrhiadan maaxkana ïgai tudu ipïrhiditai sai nïijadagi jaa dai podukai kïï tutiakami gïn dadasai ïgai. Dai kïïga ïr buaboi sai ïïmo óídakami kïï tutiakami aaga antaada tudu. Dïï gia mosïkaxi gobai ix makïdï aagagi odami ïgai bïïtarï ïr maitïkidïka agai. Mai buimu ïgai ixtumaxi Diuxi amadïrï tudu. Kïï tutiakami gïn dadasai ïgai dïï mos maiti ïr buaboi kaxkïdï— itïtïdai.

Mataibo 6:9

Daidi Suxi potïtïdai go mamaatïrdamigadï, —Xïxkadï gadaanïdagi aapimï adukai abïr aagada— itïtïdai. —Diuxi gïr Oga ix makïdï tïbagiana daja. Gï daanïi aatïmï sai aapi ibuada saidi óídakami kïïga gï xadutudaiña.

Mataibo 9:8

Dai bïïxkatai go odami nïidi dai ka mai tïtïgaitadai ix dukatai gïn tïtïïgitoagi daidi ikaitimi, —Xïïxi ïr gïïdukami Diuxi dai gïr otoxi ïmo kïïrhi kïïga biakami gubukarhigai— ikaitimi go odami.

Lukas 11:2

Daidi Suxi potïtïdai, —Xïïxkadï daanïdagi aapimï Diuxi bïrai adukai itïda, —Gïr Oga, gï daanïi aatïmï sai kïïgakïrï gï xadutuadagi odami dai sai aapi kïïgakïrï gatïanïdagi reykatai aapi.

VUAANA 15:8

Dai odami potïimu saidi ïr gïdukami Diuxi nïiditai ixtumaxi iduñimu Diuxi aapimïkïdï. Gobai ix makïdï iduñimu Diuxi aapimïkïdï ïr gïn ibhiadï gï dukami ka agai. Dai gokïdï odami maatï nïijadamu sai aapimï buaboikïdï ïr aanï gin mamaatïrdamiga nïiditai ix tuma duñimu Diuxi aapimïkïdï— itïtïdai.

Hechos 9:36

Aidï Jopeïrï oidakatadai ïmo oki. Buaboitudadami ïgai dai Tabita tïgidu. Griego ñokikïdï Dorkas ikaidakatadai tïtiaradï. Go Tabita kïï tuigakana dai soikïiña ïgai soititigami.

1 Korintios 14:25

Kïïga maaxi buajamu aapimï ïgai tïgibudadï ix makïdï ïxtoki biakana ïgai dai maatï nïidamu ïgai sai gïn ïmadï daja Diuxi aagaitai aapimï ïmo ñoki Diuxiañdïrï. Aidï gia totonakïdï gugukadamu ïgai xadutudaitai Diuxi.

2 Korintios 9:13

Daiñi, xïïxkadï aapimï kïïga mai tudadan dukai gamaakadagi soiñi jaa, gïn tïgito nïijadamu go jaa sai buaboikïdï ïïgidi aapimï go bhai ïrhiaragai aatagi. Maatï nïijadamu ïgai sai aapimï kïïga ïïgidi go bhai ïrhiaragai aatagi ix makïdï aagaiña aapimï aipakoga aagaitai Suxi Kristo tudu. Gïn tïgito nïijadamu ïgai xïï kïïga mai tudayitai gamamaakai aapimï soiñi dai kïïga ñokadamu ïgai Diuxi bïïtarï nïiditai gobai tudu.

Galatas 1:24

Daidi go odami aagaiña xïïxi ïr gïdukami Diuxi kajiomakai ïgai ix tuma dui Diuxi aanïkïdï.

Efesios 2:10

Bhaiyoma Diuxi ïgai dai gïr utuduturhi bïïnakai aatïmï Suxi Kristo. Ïgai ipïrhidi xi aatïmï ibuadagi ixtumaxi ïr kïïga, kaxkïdï pomaaxi bïïtarï gïr utuduturhi ïgai. Dai ipïrhidi ïgai xi óídakagi aatïmï xibi ibuadatai go kïïgadukami aaduindagai ix makïdï ïgai ïkiaxdïrï bhai dui xi buadagi aatïmï.

Efesios 5:8

Ïkioma aapimï mos ïr ïï tukamudagaikana dïï xibi gia ïr kudagi aapimï buaboidakai Gïr Nukadakami. Kaxkïdï abïr bhai maaxkami dukai óídaka dai kïïga maaxituda xi gia ïr kudagiïrï óídakami aapimï xibi.

1 Tomoteo 2:10

Bhaiyoma gï agai xi ibuadagi ïgai ix makïdï kïïgadukagi dai ix makïdï bhai maaxkagi jaa bïïtarï. Gobai tudu bhai maaxi ïmo oki bïïtarï ix makïdï xadutudai Diuxi dai mai xu xi ipïrhiada xi jaa tïgito nïijadagi yukuxidï.

1 Tomoteo 5:10

Gï agai xi jaa kïïgakïrï nïijadagi ïpï nïiditai ixtumaxi ibuayi ixtumaxi ïr kïïga. Gï agai xi tïgito nïida aapi ix bhai kïïga gïïrhidi maamaradï dai ix bhai kïïga miadïgidiña ïgai go buaboitudadami xibhïadïrï óídakami. Gï agai ïpï ix mai tiodiantuigakagi soikïitai go buaboitudadami tomax tuma aaduindagïrï. Gï tïgito nïida ïpï sa bhai gamaakaiña ïgai soiñi xorai soimaaxi taatamaiña. Ix makïdï gïn ojagi ami gï agai xi ïr bipiudukagi ix makïdï kaxi ibuadana naana maaxi aaduindagai kïïgadukami tudu. Ix pomaaxkagi ïgai aidï gia bhaiga ïgai xi gïn ojagi ami paperhiïrï xako ojixi budami soiñi.

1 Tomoteo 6:18

Aagidañi go buaboitudadami ix makïdï kïïga gïn bidaka sai kïïga ibuada ixtumaxi ïr soiñi. Sai bïïxi bhai ïrhiaradïkïdï maakana soiñi xorai tïgitokagi tudu.

Tito 2:14

Suxi Kristo tudu ïgai dai gï dagito ix gï muatudagi kïïgakïrï gïr bubaiditai gïr soimaaxkamiañdïrï. Podukai bhai dui ïgai saidi ïr aaduñdïkana aatïmï Diuxi kïïga buañixikami gïr biakai ïgai. Dai xibi ka kïïgakïrï buabuakïkai aatïmï ipïrhidi ïgai sai bïïxi gïr bhai ïrhiarakïdï ibuadagi aatïmï ixtumaxi ïr kïïga.

Tito 2:7

Gï agai tudu xi kïïga ibuadagi aapi Tito dai podukai kïïga maaxitudagi ix dukatai ibuadagi go gaa. Gï agai xi sïïrhi ibuadagi dai ñokadagi aapi dai kïïga xadutudaitai dukai gamaakadagi ñoki.

Tito 3:14

Pobuadatai tïïgidamu aapi go gaa ix dukatai gï agai xi buidadagi buaboitudadami. Gï agai tudu xi gïr aaduñi ix makïdï gïr uurapïkïi ami Kretana ïïmadadagi xi soikïdadagi jaa xïïxkadï kabami tïgitokagi. Podukai ïïmadadamu ïgai xi kïïga ibuadagi. Ix pobuadagi ïgai aidï gia kïïga ïr soiñikamu ïgai.

Tito 3:4

Dïï gia Diuxi kïïgakïrï gïr bubaitu dai podukai maaxitu bïïxi óídakami buitapi xïï kïï tuiga ïgai dai xïï kïïga gïr oigïdai. Ïgai tudu kïïgakïrï ïr gïr bubiadamiga. Dai mai xu xi kïïga idui aatïmï xi kïïgakïrï gïr bubaitu ïgai. Mai buañixikatadai gïr iibhïdaga toma lïïchi tudu. Dïï bïïxkïrï soi gïlda gïr tïï Diuxi dai gïr buañidi dai kïïgakïrï gïr bubaitu. Dai aidï gïr buañidakai ïgai gïr utuduturhi Diuxi Ibhïadï.

Hebreos 10:24

Gï agai ïpï xi kïïga gïr tïgito nïijada aatïmï aipakoga dai gaagadagi ix dukatai gïr soikïdagi. Podukai kïïgioma gïr oigïdadamu aatïmï bïïxkatai daidi ibuadamu aatïmï ixtumaxi ïr kïïga.

1 Pedro 2:12

Gïn tïgitobïrai sai go óídakami ix makïdï mai buaboitudai gïn tïgito nïidiña ix dukatai óídaga aapimï. Kaxkïdï abïr kïïga ibuada bïïxi aïkatïrï. Podukai tomaxi gïpiïrï gïn bupada ïrhiadagi jaa mai tïïgimu ïgai ixtukïdï. Dai xïïxkadï aagagi Diuxi ix bhai kïï idui óídakami aidï gia go ix makïdï gïpiïrï gïn bupaitadai biakamu xi aagadagi sai kïï idui aapimï. Dai aidï gia kïïga ñokadamu ïgai Diuxi bïïtarï ïpï nïiditai xïï kïïga ibuadana aapimï gïn soikïitai Diuxi.

1 Pedro 2:9

Dïï aapimï gia mai taata agai gïgïbidaragai podukai. Aapimï ïr ïko bubaidadï Diuxi tudu dai ïr ix makïdï maa ïgai sïïrhikami saidi ïr dadaxdadamigadïkana aapimï. Ïmo aadunumï aapimï xibi ïkobai darasadïkatai aapimï Diuxi dai ïgai tuidadï aapimï. Kaxkïdï xibi bhaiga aapimï xi maaxitudagi jaa bïïtarï xïï kïï tuiga Diuxi. Kaxi gïn busaitu ïgai abhiadïrï xako tukapi dukai óídakatadai aapimï mai maatïkatai ixtumaxi ïr buaboi tudu. Dai xibi gia kaxi gïn daibuñtu ïgai xako xigiamaaxi gïn oidakaraga kïïga tonoraka maaxkatai gobai.

1 Pedro 3:1

Kaxi gïn aagidi aanï sai ix makïdï ïr gapipioñi gï agai ix ïïgiadagi amudï. Dai podukai ïpï aapimï oki kukunakami gï agai xi ïïgiada aapimï gïn kukuna. Daiñi, ix mai buaboitudagi gïn kukuna go bhai ïrhiaragai aatagi, bïïxkïrï ïma dukai tïgito antaada ïgai nïiditai xïï kïïga xadutudaitai óídaga aapimï. Podukai ka ïma dukai gïn tïgito antaada gïn kukuna dai ka buaboituda antaada. Dai maiti gï agadamu podukai xi aagidagi aapimï tomarhi ïmo ixtumaxi.

1 Pedro 3:16

Gïn nukadabïrai dai maiti ibuada tomarhi ïmo ixtumaxi ix makïdï soimaaxkami ïrhidi aapimï sai podukai mai gïpiïrï gïn bupadan buadagi ïïgi gïn tïgibudaga gokiïrï. Dai podukai ïpï xi gïpiïrï gïn bupada ïrhiadagi jaa xaïradamu ïgai nïiditai xïï sïïrhi ibuayi aapimï oiditai Suxi Kristo.

1 Pedro 4:11

Dukami, ix makïdï gatïtïïgiadagi ñoki gï agai sai kïïga ñokadagi ñokiturhikatai ïgai Diuxi. Dai ix makïdï soikïdagi jaa gï agai sai kabami gï aajagïdagi soikïitai bïïxi go gubukarhigaikïdï ix makïdï gamamaakai Diuxi. Bïïxi ixtumaxi ibuadagi aapimï abïr Diuxi gubukarhigadïkïdï ibuada saidi jaa xadutuadana Diuxi nïiditai ixtumaxi ibuayi aapimï gïn soikïitai Suxi Kristo. Suxi Kristo ïgai dai bïïxi adaama gï xadutuada agai bïïxkïrï bïïtarï tudu dai bïïxi adaama gatïanïda agai ïgai ïpï. Gobai gia ïr buaboi.

1 Pedro 4:14

Gin aaduñi, Diuxi Ibhïadï kïïga xigiamaaxi dai kïï gubuka. Dai xïïxkadï soimaaxi ñoki gïn aagiadagi jaa óídakami oiditai aapimï Suxi Kristo gobai ïr ïmo maaxidaragai sai gïn ïmadï daja Diuxi Ibhïadï. Bhaigabïnïrhiada gokïdï tudu.