Mataibo 13:23 - Northern Tepehuan Bible

²³ —Dïï gia ix makïdï kïïgadukami dïbïriïrï surhi ïgai gia ïpïan dukami odami ix makïdï kïïgadu iibhïadï dai maatï kaïkana Diuxi ñokidï dai kïïga ïïgida kaïkana. Ïgai abhana gia kïïga aatabuayi Diuxi dai ibuayi naana maaxi kïkïïgadukami ïgaikïdï. Mos apia buaboitudai ïgai kaxkïdï. Ïpïan dukami ïgai go ïxtokai kaidï ix makïdï ïmo kaidïañdïrï gï bañidi gokobhai dan bhaibuxtama xiïpï baikobhai xiïpï asta ïmo ciento kaidï ïmo kaidïañdïrï— itïtïdai Suxi go mamaatïrdamigadï.

Tepehuan Northern: Diuusi ñiooquidʌ utuducami oodamicʌdʌ

²³ Dʌmos ʌtʌligi ismaacʌdʌ cʌʌga dʌvʌʌriʌrʌ suuli ʌgai ʌrʌpan ducami ʌoodami ismaacʌdʌ maatʌ caʌ Diuusi ñiooquidʌ dai mamaatʌtuldi aa ʌgai ismaacʌdʌ vʌtʌmʌ mamaatʌrʌi ʌgai ʌgai daidʌ ʌrʌpan ducami iibiadʌ. Ʌʌmoco ʌrʌpan ducami ʌtʌligi ismaacʌdʌ cʌʌga iibaji asta ʌmo siento litro vuvaja ʌmo litroaiñdʌrʌ dai aa ʌrʌpan ducami ʌtʌligi ismaacʌdʌ iibaji vaicobai litro dai aa ʌrʌpan ducami ʌtʌligi ismaacʌdʌ iibaji ʌmo coobai dan baivustaama litro ―gʌrtʌtʌdai ʌSuusi.

Mataibo 13:23 ပူးပေါင်းရင်းမြစ်များ

Mataibo 12:33

—Daiñi— itïtïdai. —Bïïxi uxi gï maatï ix bhai kïïgadu nïiditai ibhiadï— itïtïdai Suxi. —Ix kïïgadukagi ïmo uxi kïïgadukami ibhiatai ïpï tudu. Dïï gia ix mai kïïgadukagi gobai mai kïïgadukami ibhiatai ïpï.

Mataibo 13:8

Dai jaa ïxtokai gia kïïgadukami dïbïriïrï surhi dai ïgai gia kïïga gïï dai kïïga ibhaidaga. Go kïïgadukami dïbïriïrï gia gï bañidi gokobhai dan bhaibuxtama kaidï ïmo kaidïañdïrï xiïpï baikobhai xiïpï asta ïmo ciento kaidï ïmo kaidïañdïrï— itïtïdai Suxi go odami.

Mataibo 3:10

—Daiñi— itïtïdaiña go Juan. —Kïïga maatï aapimï sai ïmo uxi xïïxkadï mai kïïgadukagi ibhiadï gï guikutai gobai dai gï mïmïidi. Dai aapimï ïr ïpïan dukami ïmo uxi ix makïdï mai kïïgadu ibhiadï mai kïïga ibuadatai aapimï. Dai Diuxi ïr ïpïan dukami ïmo kïïrhi ix makïdï ka uxi sonoana kïi tupuradï dai nïnïidi ix bhai kïïgadu ibhiadï. Dai ix mai kïïgadukagi ka daituda agai go uxi. Ïpïan dukami aapimï go uxi tudu ix makïdï mai kïïgadu ibhiadï. Dai Diuxi ka bhai gï duu ix gïn maakiagi gïgïbidaragai taiyïrï— itïtïdaiña Juan go fariseos dai saduseos ix makïdï ami dada gïn bapakona ïrhiditai.

Mataibo 3:8

Gï agai bhaiyoma sai kïïka ibuadagi aapimï dai podukai maaxitudagi ix bhai buaboikïdï ka ïmadukai gïn tïtïgito aapimï— itïtïdaiña.

Markos 10:15

Daiñi aanï aagai sai ix makïdï mai aarhi maa tutuigakagi mai baakimu xako tïanïi Diuxi. Aarhi bïïtarï mai xijaiga buaboitudagi Diuxi di— itïtïdai Suxi.

Markos 4:20

Daidi go ïxtokai ix makïdï kïïgadukami dïbïriïrï surhi ïpïan dukami odami ix makïdï buaboida kaïkana Diuxi ñokidï dai gïïpi ibuayi soiñi. Ïïmoko ïgai ix makïdï buaboida kaï ïpïan dukami ïxtokai ix makïdï ïmo kobhai dan bhaibuxtama bubuaja ïmo kaidïañdïrï, dai jaa babaikobhai bubuaja, dai jaa ïïmo ciento— itïtïdai Suxi.

Lukas 13:9

dïï gia xi mai ibhiatïdagi gobai aidï gia daituda aapi— itïtïdai.

Lukas 8:15

Dïï gia ix makïdï kïïgadukami dïbïriïrï surhi ïgai gia ïpïan dukami odami ix makïdï kïïgadu iibhïadï dai kïïga ïïgida kaïkana Diuxi ñokidï. Ïgai abhana gia aatabuayi Diuxi dai ibuayi naana maaxi kïkïïgadukami ïgaikïdï mos apia buaboitudaitai ïgai— itïtïdai Suxi mamaatïrdamigadï.

Lukas 8:8

Dai jaa ïxtokai gia kïïgadukami dïbïriïrï surhi dai ïgai gia kïïga gïï dai kïïga ibhaidaga. Ïmo cien litro bubuaka ïïmo litroañdïrï kïï ibhaidakatai— itïtïdaiña Suxi go odami. Dai gïgïr ñokaiña ïgai ïpï daidi ikaitiña, —Kïïga abïr gïn tïgito kaïka ixtumaxi gïn aagidi aanï— ikaitiña.

VUAANA 15:16

—Gin aaduñi, mai xu ipïldakai aapimï ïr gin mamaatïrdamiga aapimï. Aanï ïgai dai ïkobai gïn bubaitu bhaiyoma dai gïn darai sai aapimïkïdï ibuadagi Diuxi naana maaxi ix tumaxi ix makïdï bhai ïrhidi ïgai dai ix makïdï bïïxkïrï bïïtarï kabaka agai. Kaxkïdï gïn maakimu Diuxi bïïxi ix tumaxi tanïdagi aapimï gin mamaatïrdamikatai aapimï.

VUAANA 8:47

Ix Diuxi maamaradïkamudai aapimï aidï gia kïïga bhai ïrhiarakïdï kaïkamudai gin ñoki. Dïï aapimï mai kaïka ïrhidi, kaxkïdï kïïga maatiga maaxi sai maiti ïr Diuxi maamaradï aapimï— itïtïdai.

Hechos 16:14

Ïmoko Lidia tïgidukatadai. Ïgai ïr Tiatirïrï oidakami daidi ïr gaagaradami ikuxi moraduakami. Idi oki kïïga xadutudai Diuxi. Dai kaïkatadai ïgai aatagidï Pabora dai Diuxi maa tïgibudagai xi ïïgida kaïkana.

Hechos 17:11

Go óídakami ami bamioma kïïga tutuiga xi bhai go Tesalonikïrï óídakïdï. Ïgai gia bhai gïn ïrhiarakïdï kaïkana aatagidï Pabora ïmadï Silas. Dai bïïx tasai gaagaiña Diuxi ñokidïrï xi bhai ïr buaboi ix dukatai aagaiña go Pabora.

2 Korintios 9:10

Daiñi, Diuxi ïgai dai muiduturhi ixtumaxi saidi podukai biakagi odami ixtumaxi tïgitokagi. Dukami, xïxkadï gaïsadagi odami Diuxi ïgai dai muidutudai go ïxtokai saidi biakana go odami ixtuma ugiagi dai ixtuma ïsadagi ïpamu. Kïï bhaiga Diuxi ix gïn maakadagi asta bhaibitukami ixtumaxi tudu saidi kïïga ibuada aapimï oiditai soiñi jaa.

Filipenses 1:11

Daiñi, Suxi Kristo ka kïïga buañixikami gïn bia. Dai aanï kabami daanïi Diuxi saidi gï ibuadagi naana maaxi ixtumaxi kïïgadukami aapimïkïdï ka buañixikatai aapimï. Aidï gia gïn tïgito nïijadamu jaa dai aagadamu xïïxi ïr gïdukami Diuxi dai xadutuadamu ïgai nïiditai ix makïdï ibuayi Diuxi aapimïkïdï.

Filipenses 4:17

Gin aaduñi, mai xu xi ipïrhidi aanï xi gin maakiagi aapimï ïmo oidaragai dai gïn ojidi. Bhaiyoma ipïrhidi aanï sai gïn maakana Diuxi gïïpi bamioma maitïki mos ïï kïï tutiakatai aapimï gin bïïtarï.

Kolosenses 1:10

Gïr aaduñi, gï agai xi óídakagi aapimï Diuxi bïïtarï ixdukatai gï agai. Ix dukatai bhai ïrhidi ïgai tudu. Kaxkïdï gïn daanturhiña aatïmï sai kïï bhai dukai óídakana aapimï kïïga xadutudaitai Diuxi. Sai podukai kïïga bhai ïrhiatudana aapimï Gïr Nukadakami bïïxi aïkatïrï. Gïn daanturhiña aatïmï sai apia bamioma kïïga maatïkana aapimï Diuxi. Saidi ibuada aapimï naana maaxi aaduindagai kïkïïgadukami dai sai kïïga bubuakïna naana maaxi kïï bhai maaxkami gïn aaduindagaiñdïrï ïpï.

Kolosenses 1:6

Dai go bhai ïrhiaragai aatagi ix makïdï kaï aapimï ka bïïxi aipakoga oidigi daama aijimi. Dai bïïxi aipakoga xako ajïi go bhai ïrhiaragai aatagi ïpï jaa óídakami buaboitudaiña ïpïan dukai aapimï. Dai go aatagi soikïi óídakami aipakoga sai ïma dukai óídakana ixdukai bhai ïrhidi Diuxi ïpï. Ïpïan dukai gïn soi aapimï ïpï aidïxi kaï aapimï dai buaboitu. Aidï tudu máí aapimï xïï kïï tuiga Diuxi gïn bïïtarï.

1Tesalonicenses 4:1

Gïr susukurhi, gïn aagida ïragai ïpï ïmo ñoki ix dukatai gï agai ix oidakagi buaboitudadami. Kaxi gïn aagidi aatïmï tudu ixdukatai ipïrhidi Diuxi ix óídakagi aapimï. Dai kïï maatï aapimï sai Suxi Kristo gïr maa ïmo sïïrhikami ix kaxkïdï sïïrhikïdï gïn abïnakida rïrhidi sai kïïga óídakagi aapimï ixdukatai Diuxi ipïrhidi. Dai ka podukai óídaga aapimï dïï bïïxkïrï gïn abïnakidimi aatïmï sai apia kïïgioma óídakagi aapimï ix dukatai ipïrhidi Diuxi.

2 Tesalonicenses 2:10

Naana maaxi soimaaxkami iduñimu ïgai tudu dai ïgaikïdï bupuirumadamu go odami ix makïdï taata agai gïgïbidaragai bïïxkïrï bïïtarï. Bupuirumadamu ïgai ix makïdï mai kïïgakïrï bubuaki agai tudu mai buaboituda ïrhiditai ixtumaxi ïr buaboi.

Hebreos 6:7

Daiñi, gïn aagidamu ïmo maaxidaragai sai maatïkana aapimï ix maaxi odami ix makïdï buaboitudai dai ix maaxi ix makïdï mai buaboitudai ïpï. Bhaitoma ïpïan buayi ïgai dïdïbïrai xako gaïïsïi óídakami. Ïïmo dïdïbïrai kïkïïgadu dai kïïga bui go naana maaxi bhai ïrhiaragai ix makïdï gamamaakai Diuxi. Dudatai dukuiña tami oidigi daama tudu. Dai go kïïgadukami dïbïraïrï kïïga bapakïi go sudagi xïxkadï dudukiagi dai otoma badïrïi gobai. Pomaaxkami dïbïriana gia kïïga bhai gï buayi ïxikami odami bïïtarï.

Hebreos 8:10

Dïï gia kia gokiïrioma ayimu ix tuigako bhai duñimu aanï ïmo utudui sïïrhikami ïgai bïïtarï, ikaiti. Dai aidï gia tïgibudadïrï dasamu aanï gin sïïrhikamiga dai ibhïgadïrï ïpï sai kïïga maatï kaïkana ïgai dai kïïga ïïgidiña. Aidï gia mosïkaxi aanï gin buaboitudadamu ïgai Diuxigadïkatai aanï. Dai amaxi gia gin aaduñi aagadamu aanï ïgai dai kïïga nukadamu aanï, ikaiti Diuxi.

2 Pedro 3:18

Kïïga abïr óídaka bhaiyoma saidi podukai bïïx tasai bamioma maatï taatana aapimï xïï kïï tuiga Suxi Kristo Gïr Nukadakami gïn bïïtarï. Gïr kïïgakïrï bubiadamiga ïgai tudu dai gï agai sai bïïx tasai bamioma kïïga maatïkagi aapimï ïgai. Podukai bamioma kabakatudamu gïn buaboidaraga gin aaduñi. Ipïrhidi aanï sai bïïxi óídakami xadutuadana Suxi Kristo dai kïïga ñokadana ïgai bui bïïxkïrï bïïtarï. Sai pogïduna gobai tudu. Mosïkaxi.

1 Juan 5:20

Daiñi, kïïga maatï aatïmï sai dibia Diuxi Maradï tami oidigi daama dai gïr tïtïïgidi xorai buaboikïdï ïr Diuxi. Suxi Kristo ïgai dai gïr tïtïïgidi tudu. Dai xibi ka urabakatai aatïmï Suxi Kristo ka uraba bii aatïmï Diuxi ïpï. Suxi Kristo ïr Diuxi kaxkïdï. Buaboikïdï ïr Diuxi ïgai dai mai tipu ïmai. Mai tipu ïmai xorai gamaakadagi go utudui oidakaragai bïïxkïrï bïïtarï tudu. Mosïkaxi Suxi gïr maakai gobai.