Kolosenses 3:10 - Northern Tepehuan Bible

¹⁰ Xibi ka bhïiyi aapimï go utudui oidakaragai dai ka utudutudaimi aapimï. Xibi Diuxi ix makïdï gïn idui aatabuayi aapimïrï dai ka ïpïan tuigakami bijimi aapimï Diuxi. Gïn utudutuldaimi Diuxi sai podukai kïïga maatïkana aapimï ïgai dai kïïga ïmadaiña aapimï ïpï.

Tepehuan Northern: Diuusi ñiooquidʌ utuducami oodamicʌdʌ

¹⁰ Sivi caviaa aapimʌ ibʌdagai utudui. Diuusi ʌgai daidʌ idui oodami dai sivi Diuusi gʌnsoicʌi mʌsai vaamioma ʌpan tuutiacana aapimʌ ʌgai. Diuusi ipʌlidi isaapimʌ cʌʌga maatʌ ʌgai cascʌdʌ.

Kolosenses 3:10 ပူးပေါင်းရင်းမြစ်များ

VUAANA 17:3

Dai gï agai ix odami kïï gï maatïkagi. Kaxkïdï tudu mosïkaxi aapi ïgai dai buaboikïdï ïr Diuxi. Dai gï agai ix maatïkagi ïpï ix aanï ïr go Ga Tïanïdami ix makïdï aapi otoi tami oidigi daama. Ïma dukai xadïrï kïïgakïrï óídakana odami bïïxkïrï bïïtarï ix maiti gïr maatïkagi ïgai— itïtïdai.

Romanos 12:2

Maiti abïr ïïgiada tïgibudadï oidigi daama óídakami bhaiyoma abïr bhïiyi tïgibudagai utudui Diuxiañdïrï. Aidï gia gïn utudutuldamu Diuxi gïn ïrabiadïrï dai maatïkamu aapimï ixtuma agai Diuxi gïn bïïtarï. Ix makïdï Diuxi aagai gïn bïïtarï mos ïr ïï kïkïïgadukami dai buapai bhai ïrhiaraga Diuxi bïïtarï. Mai tipu ïma maaxi bamioma kïïgadukami xi bhai ix makïdï Diuxi agai gïn bïïtarï.

Romanos 13:12

Ïkioma mos tukamugan dukamikana gïr oidakaragai tami oidigi daama dïï xibi karhioga dibia Suxi Kristo dai gobai ïr ïmo xarhimodï gï dukami ka agai gïr bïïtarï. Kaxkïdï tudu gï agai xi maigobai dasagi aatïmï go oidakaragai ix makïdï ïr tukagi dukai, gïr ïkidadï oidakaragai tudu. Gobai gï agai xi ïmo baasaragai tukurakami dukai maigo dasagi aatïmï. Dai xibi gia gï agai xi gïr aadagi aatïmï go oidakaragai ix makïdï ïr tasïrï gï dukami, gïr utudui oidakaraga tudu. Gï agai xi bhïiyagi aatïmï gïr utudui oidakaraga ïpïan dukai go sandaru gï aadai yukuxi ix makïdï ïr kokodi bïïtarï xudu gakokoda agadagi ïgai.

Romanos 13:14

Xibi abïr ïpïan dukai óídaka Suxi Kristo Gïr Nukadakami bhaiyoma. Daidi abïr mai tïgito ajiopada xi dukatai buadagi ix tumaxi gïn tanïi gïn ïkidadï tïgibudaga.

Romanos 6:4

Dai podukai ïpï aatïmï gïr yaasatu ïpï ïgai ïmadï mos bïïnakai ïgai. Koi aatïmï ïgai ïmadï dai Diuxi Gïr Oga gïr duakaturhi ïpï ïpïan dukai ixdukai duakaturhi ïgai Suxi Kristo mos ïï gubuakatai ïgai. Podui ïgai xi podukai utudutudagi gïr oidakaragai xibi.

Romanos 8:29

Diuxi ka ïkiaxdïrï maatïkatadai xorai aatïmï daidi ïr ïko bubaidadïka agai. Dai ïgai dáí sai aatïmï ïpïamaaxkana gï maara Suxi Kristo. Podukai Suxi Kristo bïïxi adaama ïr namïakami dai muidu aatïmï ix makïdï ïr susukurhidï.

2 Korintios 3:18

Ïpïan dukami gobai xïïxkadï maigobai gï dasagi ïmo ikuxi gïr bupuji buidïrï. Xibi ka kïïga maatï nïidi aatïmï xïïxi bhaibitukami xigiamaaxi Suxi Kristo dai xïï xigian tuiga ïgai. Diuxi Ibhïadï ïgai daidi gïr tïtïïgidi ix maaxi dai ix tuiga Suxi Kristo tudu. Dai Diuxi Ibhïadï aatabuayi aatïmïrï dai gïr soikïi saidi kïï dukai ïma dukai óídakagi aatïmï. Xibi gïr tïanïi Diuxi Ibhïadï dai aatabuayi ïgai gïr ïmadï sai bamioma ïpïan tutiakagi aatïmï Suxi Kristo dai bamioma ïpïan maaxkagi aatïmï.

2 Korintios 4:16

Sïïrhikïdï kïï tuiga Diuxi gïn bïïtarï tudu daidi ibuayi naana maaxi gïn bïïtarï ipïrhiditai ix oijadagi aapimï ixtumaxi ïr buaboi. Kaxkïdï apia gatïtïïgidimi aatïmï go bhai ïrhiaragai aatagi tomaxi soimaaxi taatamai aatïmï dai maiti gïr daadagitoi xi gïr maitiagi go soi ïrhiaragai toma xïïxi kabami soimaaxi taatamai aatïmï. Apia gatïtïïgidi aatïmï go bhai ïrhiaragai aatagi aipakoga tomaxi bïïx tasai bamioma ugitimi gïr tukuga tudu dïï gia bïïxkïrï bïïx tasai bamioma utudutuimi gïr iibhïdaga.

2 Korintios 4:6

Daiñi, Diuxi ño ïïki aidïxi kia tukamukatadai oidigi daidi itïi ïgai, Ipïrhidi aanï sai oidakana kudagi, itïi ïgai. Dai ka oidatu kudagi dai ka kudidikami bii oidigi. Dai xibi ka kudidakan dukai bia ïgai gïr iibhïdaga ïpï gïr tïtïïgiditai ïgai ixtumaxi ïr buaboi. Po dui ïgai sai ka maatïkana aatïmï xïïxi ïr gïdukami ïgai dai xïï xigian tuiga. Gïr tïgito nïiditai aatïmï Suxi Kristo podukai kïïga mamaatïrïi aatïmï xïïxi ïr gïdukami Diuxi dai xïï xigian tuiga ïgai tudu.

2 Korintios 5:17

Daiñi, odami ka ïmapïbuayi xïïxkadï urabagi ïgai Suxi Kristo ïpï. Diuxi utuduturhi ïgai kaxkïdï. Dai amaxi ka buaboitudakai ïgai ka ugiatïkïi go ïïkidadï oidakaradï dai aidï abhiadïrï ka biakana ïgai ïmo utudui oidakaragai.

Galatas 3:27

Aidïxi buaboitu aatïmï Suxi Kristo uraba bii aatïmï ïgai tudu dai ka ïmo odami dukai bii aatïmï ïgai ïmadï.

Galatas 6:15

Ami tudu kuruxiana gïr utuduturhi Suxi Kristo. Kaxkïdï maiti ïr ixtumaxi ix circuncidadukagi ïmoko ix cho ïpï. Maiti ïr ixtumaxi namïakami gobai. Dïï gia Diuxi gïr utuduturhi dai gobai gia ïr ixtumaxi namïakami.

Efesios 2:10

Bhaiyoma Diuxi ïgai dai gïr utuduturhi bïïnakai aatïmï Suxi Kristo. Ïgai ipïrhidi xi aatïmï ibuadagi ixtumaxi ïr kïïga, kaxkïdï pomaaxi bïïtarï gïr utuduturhi ïgai. Dai ipïrhidi ïgai xi óídakagi aatïmï xibi ibuadatai go kïïgadukami aaduindagai ix makïdï ïgai ïkiaxdïrï bhai dui xi buadagi aatïmï.

Efesios 2:15

Suxi Kristo bhai dui mukukai kuruxiana saidi ïr ïmo aadunumïkana go judidiu ïmadï ix makïdï maiti ïr judidiu mos buaboidakai ïgai. Mukukai ïgai ugiturhi go sïïrhikami ix makïdï go judidiu biakatadai xi ïïgiadagi. Go sïïrhikami ïgai dai ïjïkobaiturhi go judidiu ïmadï ix makïdï maiti ïr judidiu tudu. Kaxkïdï mukukai bhai dui Suxi sai go judidiu ïmadï ix makïdï maiti ïr judidiu gïn oigïadagi aipakoga.

Kolosenses 3:12

Daiñi, xibi aapimï buaboitudadami kaxi ïr ïko bubaidadï Diuxi. Ïkobai darasaka aapimï Diuxi bïïtarï tudu dai gïn oigïdai ïgai. Kaxkïdï abïr soi gïn ïrhiada nïiditai jaa ix makïdï soimaaxi taatamadagi daidi abïr kïï tutiaka buidïrï jaa odami ïpï. Maiti abïr gïgïrdukïdï gïn ïrhiada daidi abïr kïï bhai maaxkami buidadagi jaa mai omarhigakatai buidïrï. Maiti abïr otoma ojodada go jaa xïïxkadï mai kïï ibuadagi ïgai.

Kolosenses 3:14

Bïïxi ixtumaxi ibuadagi aapimï abïr ibuada kïïga oigïdaitai jaa tudu. Gobai ïgai dai bïïxi adaama gï agai xi ibuadagi aapimï. Ix gïn oigïdada aapimï aidï gia kïïga gïn uraba óídakamu aapimï tudu.

Filemon 1:6

Gin aduñi Filemon, kïï maatï aapi sai bia aapi naana maaxi bhai ïrhiaragai buaboidaitai aapi Suxi Kristo dai bïïna dakatai aapi ïgai. Dai gï daanturhiña aanï sai kïïga maatïkana xïï kabami bia aapi bhai ïrhiaragai Suxi amadïrï dai sai go naana maaxi bhai ïrhiaragai gï gubukatudana sai bhaigakana aapi xi soikïdagi jaa aipakoga sai bamioma gupukana buaboidaradï ïgai ïpï.

Hebreos 6:6

Daiñi, xi ïmo odami bïïxi ka taatagi gobai dai bïïxkïrï ïpamu aa gïxiagi, ix ka ïmo mukiadï dukai biiyagi ibhïadï ka dagitokai buaboidaradï, ïgai xadïrï ixtutuidiña ïmai xi ïma dukai gï tïgituldagi ïpamu. Xadïrï gï bhaigakana gobai. Daiñi, xïïxkadï dagitoagi ïgai Suxi Kristo ka ïpïan buayi ïgai go odami ix makïdï Suxi kuruxigadï buidïrï gukatadai dai gaparunaitadai aidïxi muu ïgai. Ïpïan dukami gobai xi kuruxiana xixamudai ïgai ïpamu Suxi Kristo. Ïmo gïdukami parunaragai gobai Suxi buidïrï tudu dai jaa odami gïn tïgito nïijadamu dai parunadamu ïpï. Agia maiti gï agai gobai.

1 Juan 2:3

Daiñi, bïïxi odami ix makïdï kïïga maatï Diuxi dai kïïga bia urabaragai ïgai ïmadï kïïga ïïgidiña ïpï. Dai ix mai ïïgiadagi ïgai, aidï gia gobai itïiya ïrhidi sai mai kïïga maatï dai mai kïïga urabaka ïpï. Podukai gï maatï ix bhai kïïga maatï ïmoko Diuxi dai ix bhai kïïga bia urabaragai ïgai ïmadï tudu.

1 Juan 2:5

Dïï gia ix kïïga ïïgiadagi ïmoko podukai mamaaxidi ïmoko sai kïïga oigïdai Diuxi. Podukai gï maatï ix bhai kïïga urabaka ïmoko Diuxi tudu.

Apokalipsis 21:5

Dai bhodïrï ño Diuxi ami go gïï daikaruana dakatai daidi ikaiti, —Xibi gia utudutuldamu aanï bïïxi aïkatai ixtumaxi— ikaiti. Dai bhodïrï pobai in tïtïdai ïgai, —Ojañi aapi idi ñoki ix makïdï gï aagidamu aanï. Kïïga ïr buaboi gobai— in tïtïdai.