Kolosenses 1:10 - Northern Tepehuan Bible

¹⁰ Gïr aaduñi, gï agai xi óídakagi aapimï Diuxi bïïtarï ixdukatai gï agai. Ix dukatai bhai ïrhidi ïgai tudu. Kaxkïdï gïn daanturhiña aatïmï sai kïï bhai dukai óídakana aapimï kïïga xadutudaitai Diuxi. Sai podukai kïïga bhai ïrhiatudana aapimï Gïr Nukadakami bïïxi aïkatïrï. Gïn daanturhiña aatïmï sai apia bamioma kïïga maatïkana aapimï Diuxi. Saidi ibuada aapimï naana maaxi aaduindagai kïkïïgadukami dai sai kïïga bubuakïna naana maaxi kïï bhai maaxkami gïn aaduindagaiñdïrï ïpï.

Tepehuan Northern: Diuusi ñiooquidʌ utuducami oodamicʌdʌ

¹⁰ Mai poduucai sʌʌlicʌdʌ cʌʌgacʌrʌ oidacagi ivuaadatai istumaasi Diuusi ipʌlidi poduucai isduucai gʌaagai isivuaadagi vʌʌsi vaavoitudadami. Poduucai iduñia agai aapimʌ naana maasi cʌcʌʌgaducami dai vaamioma cʌʌga maatʌmu Diuusi.

Kolosenses 1:10 ပူးပေါင်းရင်းမြစ်များ

Isa 53:11

Gïr Nukadakami otosadï kïï tuigakïdï nïidamu gïïgïbidaragai ix makïdï taata ïgai ix xïï gïïpi ïr soiñi ka agai dai kïï bai gï ïldamu nïiditai. Ïgai bhïï aimïrada agai soi maaxkamigadï mui odami dai podukai kïïgakïrï bubaida agai.

VUAANA 15:16

—Gin aaduñi, mai xu ipïldakai aapimï ïr gin mamaatïrdamiga aapimï. Aanï ïgai dai ïkobai gïn bubaitu bhaiyoma dai gïn darai sai aapimïkïdï ibuadagi Diuxi naana maaxi ix tumaxi ix makïdï bhai ïrhidi ïgai dai ix makïdï bïïxkïrï bïïtarï kabaka agai. Kaxkïdï gïn maakimu Diuxi bïïxi ix tumaxi tanïdagi aapimï gin mamaatïrdamikatai aapimï.

VUAANA 15:8

Dai odami potïimu saidi ïr gïdukami Diuxi nïiditai ixtumaxi iduñimu Diuxi aapimïkïdï. Gobai ix makïdï iduñimu Diuxi aapimïkïdï ïr gïn ibhiadï gï dukami ka agai. Dai gokïdï odami maatï nïijadamu sai aapimï buaboikïdï ïr aanï gin mamaatïrdamiga nïiditai ix tuma duñimu Diuxi aapimïkïdï— itïtïdai.

VUAANA 17:3

Dai gï agai ix odami kïï gï maatïkagi. Kaxkïdï tudu mosïkaxi aapi ïgai dai buaboikïdï ïr Diuxi. Dai gï agai ix maatïkagi ïpï ix aanï ïr go Ga Tïanïdami ix makïdï aapi otoi tami oidigi daama. Ïma dukai xadïrï kïïgakïrï óídakana odami bïïxkïrï bïïtarï ix maiti gïr maatïkagi ïgai— itïtïdai.

Romanos 1:13

Gin aaduñi, ipïrhidi aanï xi maatïkagi aapimï sai mui imidagai gïn dibida in ïrhidiña aanï dïï mos mai kia ixtui. Gïn soiña in ïrhidi aanï xi kïïgioma buaboitudada aapimï gïn dibidakai. Pomaaxi ibuadana aanï tudu go gaa ïmadï ïpï ix makïdï maiti ïr judidiu.

Romanos 4:12

Dai ogadï dukai bii Abraam odami bïïtarï ix makïdï gïn circuncido ïpï dïï mosïkaxi ix makïdï bia go baaxi buaboidaragai ix makïdï biakatadai go Abraamkaru aidï abhiadïrï xi mai kia circuncidadugatadai ïgai.

Romanos 6:4

Dai podukai ïpï aatïmï gïr yaasatu ïpï ïgai ïmadï mos bïïnakai ïgai. Koi aatïmï ïgai ïmadï dai Diuxi Gïr Oga gïr duakaturhi ïpï ïpïan dukai ixdukai duakaturhi ïgai Suxi Kristo mos ïï gubuakatai ïgai. Podui ïgai xi podukai utudutudagi gïr oidakaragai xibi.

2 Korintios 2:14

Kïïga ïr buaboi tudu sai mai ibhïxtakan taadakana aanï mos ïï buamï in ïrhiditai gïn bïïtarï. Dïï gia gï agai sai maatïkagi aapimï sai mai soi gin ïrhidi aanï dai bhaiyoma bhai gin ïrhidi Diuxikïdï maatïkatai sai ka urabaka aatïmï Suxi Kristo dai maatïkatai ïpï sai xibi Diuxi gïr bhaitï imïi toma xako ajiopadagi aatïmï ka maitïkai ïgai go buidïrï bïïtïkamigadï. Dai xibi aatïmïkïdï aatabuayi Diuxi saidi óídakami aipakoga maatïna xorai go Suxi Kristo. Dai gobai kïïga bhai ïrhiaraga, xïïxkadï óídakami ka kïïga maatïkagi Suxi Kristo tudu. Ïpïan bhai ïrhiaraga gobai xïïxkadï po gï buadagi ïmo daxdaragai kïï xigian ubadami Diuxi bïïtarï. Kïïga bhai ïrhiaraga gobai.

2 Korintios 4:6

Daiñi, Diuxi ño ïïki aidïxi kia tukamukatadai oidigi daidi itïi ïgai, Ipïrhidi aanï sai oidakana kudagi, itïi ïgai. Dai ka oidatu kudagi dai ka kudidikami bii oidigi. Dai xibi ka kudidakan dukai bia ïgai gïr iibhïdaga ïpï gïr tïtïïgiditai ïgai ixtumaxi ïr buaboi. Po dui ïgai sai ka maatïkana aatïmï xïïxi ïr gïdukami ïgai dai xïï xigian tuiga. Gïr tïgito nïiditai aatïmï Suxi Kristo podukai kïïga mamaatïrïi aatïmï xïïxi ïr gïdukami Diuxi dai xïï xigian tuiga ïgai tudu.

2 Korintios 5:9

Dai kaxkïdï tomax xako darakagi aatïmï xi tïbagiana xi tami oidigi daama ïpï tomax dukai ipïrhidi aatïmï xi ibuadagi ixtumaxi bhai ïrhidi Suxi, maatïkatai sai ïmadï daraka ragai.

2 Korintios 9:8

Dai kïï bhaiga ïgai xi bïïxi aïkatai gïn maakadagi ixtumaxi tïgito aapimï kïï tuigakatai ïgai gin bïïtarï. Dai kïï bhaiga ïgai xi gïn maakadagi asta bhaibitukami ixtumaxi ïpï saidi podukai kïïga biakagi aapimï ixtukïdï soikïdagi jaa.

Efesios 1:17

Diuxi gïr Oga ïgai dai Gïr Nukadakami Suxi Kristo xadutudaiña dai kïïga ïr gïdukami ïgai dai kïï tiodi. Ïgai tudu daanïi aanï gïn bïïtarï xi gïn maakana tïgibudagai xi kïïgioma maatïkana aapimï ïgai.

Efesios 2:10

Bhaiyoma Diuxi ïgai dai gïr utuduturhi bïïnakai aatïmï Suxi Kristo. Ïgai ipïrhidi xi aatïmï ibuadagi ixtumaxi ïr kïïga, kaxkïdï pomaaxi bïïtarï gïr utuduturhi ïgai. Dai ipïrhidi ïgai xi óídakagi aatïmï xibi ibuadatai go kïïgadukami aaduindagai ix makïdï ïgai ïkiaxdïrï bhai dui xi buadagi aatïmï.

Efesios 4:1

Aanï gin maixatu mos ïïgiditai aanï Suxi Kristo. Dai aanï xibi bïïxi gin ibhïdagakïdï gïn abïnakida in ïrhidi xi kïï bhai maaxkami dukai óídakana aapimï. Gï agai xi kïï bhai maaxkami dukai óídakagi aapimï aidï dai podukai maaxitudagi sai gia ïr buaboi sai Diuxi ka ïkobai gïn bubaitu.

Efesios 4:13

Suxi Kristo darai odami podukai gïr saagida saidi gïr soiñana xi aatïmï gïr abïnakiadagi aipakoga. Dai apia gïr abïnakiadamu aatïmï aipakoga aidï asta xïïxkadï kïïga ïmo tïgibudagai bipiatu aatïmï. Biakamu aatïmï ïmo tïgibudagai aidï oiditai gïr buaboidaraga ix makïdï ïmaduga dai kïïga ïïmadatai aatïmï Diuxi Maradï ïpï. Podukai gïïrhimu aatïmï asta xïïxkadï kïïga odan tutiakagi aatïmï ïpïan dukai Suxi Kristo.

Efesios 5:10

Mamaatïrdabïrai aidï ix tumaxi bhai ïrhiatudai Diuxi.

Efesios 5:15

Kaxkïdï abïr kïïga gïn tïgito nïida mïx dukatai óídaga. Maiti abïr ïpïan dukai óídaka pupuirugami ix makïdï mai maatï tomarhi ïmo ixtumaxi tudu. Bhaiyoma abïr óídaka kïïga sïïrhiñikami biakatai gïn tïgibudaga.

Efesios 5:2

Kïïga abïr oigïada jaa aidï. Daiñi, Suxi Kristo gïr oigïdai kaxkïdï ïïgi gï dagito ïgai sai gï muatudana ïmo daxdaragai dukai. Podukai bhai dui ïgai gïr bïïtarï soimaaxi idunakai aatïmï. Dai Diuxi kïï bhai ïlda tïï Suxi Kristo daxdaradï. Kïï xigian dukai ubagi ïgai.

Filipenses 1:11

Daiñi, Suxi Kristo ka kïïga buañixikami gïn bia. Dai aanï kabami daanïi Diuxi saidi gï ibuadagi naana maaxi ixtumaxi kïïgadukami aapimïkïdï ka buañixikatai aapimï. Aidï gia gïn tïgito nïijadamu jaa dai aagadamu xïïxi ïr gïdukami Diuxi dai xadutuadamu ïgai nïiditai ix makïdï ibuayi Diuxi aapimïkïdï.

Filipenses 1:27

Dïï gia gïn aagidamu aanï ixtumaxi bamioma gï agai. Bamioma gï agai xi kïïga bhai dukai óídakagi aapimï ixdukatai aagai go bhai ïrhiaragai aatagi. Go aatagi aagaitai Suxi Kristo tudu. Ix apia ïïgiada aapimï go bhai ïrhiaragai aatagi aidï gia kïïgakïrï óídakamu aapimï. Dai aidï gia tomax dukai ix gïn dibidagi aanï xiïpï ix mos kajiomakagi aanï ix maaxi daraka aapimï mïkaxi dakatai aanï tomax dukai maatïkamu aanï sai mo ïxi kïïgakïrï óídaga aapimï mos ïmo tïgibudagai biakatai aapimï bïïxkatai. Dai maatïkamu aanï sai mai duadikoi aapimï ix makïdï gïn buidïrï bïïtï ïpï. Dai maatïkamu aanï ïpï sai maiti gïn daadagitoi aapimï xi gïn maitiagi go naana maaxi aatagi ix makïdï maiti ïr go bhai ïrhiaragai aatagi kïïgakïrï. Podukai mai duduadikuitai maaxituldamu aapimï ïgai ix makïdï gïn buidïrï bïïtï sai ïgai mai kïïgakïrï bubuaki agai dai aapimï gia. Diuxi tudu ïgai dai ibuayi bïïxi ixtumaxi gïn aagidimi aanï.

Filipenses 4:18

Xibi ka bia aanï go oidaragai ix makïdï gin otoxdi aapimï go Epafrodito ïmadï. Kïïga ayi gobai bïïtarï ixtumaxi tïgitokatadai aanï dai asta bhaibitu. Gobai ix makïdï gin otoxdi aapimï ïr ïmo daxdaragai kïï xigian ubadami duu gin Diuxiga bïïtarï dai kïïga bhai gï ïrhidi ïgai gokïdï.

Kolosenses 2:19

Ix makïdï podukai gatïtïïgiadagi ñoki mai urabaka Suxi Kristo. Dai Suxi Kristo ïgai daidi ïr gïr moo gï dukami gïr bïïtarï. Ïgai tudu gïr tïanïi dai gïr mamaakai ixtumaxi gï agadagi sai kïïga gïr urabana aatïmï aipakoga dai kïïga arasakami dukana aatïmï ïpïandukai ïmo odami tukugadï ix makïdï bïïxi arasaka taatadï dai xixixodï. Podukai gïr gïrhidi Diuxi tudu kïïga gïr arasakan dukai óídakatai aatïmï aipakoga dai arasakami darakatai aatïmï Suxi Kristo ïpï ix makïdï ïr gïr moo dukai.

Kolosenses 2:6

Gin aaduñi, aidï abhiadïrï xi buaboitu aapimï Suxi Kristo Gïr Nukadakami ka uraba bii aapimï ïgai. Kaxkïdï xibi abïr óídaka ixdukatai gï aagai sai kïïga maaxitudana aapimï saidi ïr buaboi sai uraba daraka aapimï ïgai.

Kolosenses 3:20

Dai aapimï arhi kïïga abïr ïïgiada gïn dïïdï bïïxi ixtumaxiïrï gïn tïanïdagi ïgai. Kaxkïdï tudu xïïxkadï ïïgiadagi aapimï gobai ïr ïmo bhai ïrhiaragai Gïr Nukadakami bïïtarï.

Kolosenses 4:5

Kïïga abïr gïn tïgito nïijada ix dukatai ibuayi aapimï buidïrï go óídakami ix makïdï mai kia buaboitudai. Xibi kia bia aapimï oigaragai xi ibuadagi ixtumaxi ïr soiñi ïgai bïïtarï tudu dai kaxkïdï abïr kabami gïn aaga dai mai dagito ix mos dïgabuskïdagi tasai.

1Tesalonicenses 4:1

Gïr susukurhi, gïn aagida ïragai ïpï ïmo ñoki ix dukatai gï agai ix oidakagi buaboitudadami. Kaxi gïn aagidi aatïmï tudu ixdukatai ipïrhidi Diuxi ix óídakagi aapimï. Dai kïï maatï aapimï sai Suxi Kristo gïr maa ïmo sïïrhikami ix kaxkïdï sïïrhikïdï gïn abïnakida rïrhidi sai kïïga óídakagi aapimï ixdukatai Diuxi ipïrhidi. Dai ka podukai óídaga aapimï dïï bïïxkïrï gïn abïnakidimi aatïmï sai apia kïïgioma óídakagi aapimï ix dukatai ipïrhidi Diuxi.

2 Timoteo 2:4

Kïï maatï aapi sai ïmo sandaru mai bhïbhïjïi ïma maaxi aaduindagai dai bhaiyoma mosïkaxi sandaru aaduindadïrï aatabuayi sai kïïgakïrï nïijadana tïanïdamigadï. ¿Maiti xi ïr buaboi gobai? Podukai gï agai xi gaatabuadagi aapi tudu sandarugadïkatai aapi Suxi Kristo.

Tito 3:1

Aapi Tito, maakañi ñoki go buaboitudadami ami Kretana ixdukatai gï agai xi óídakagi ïgai. Tadu mai tïgito ïgai sai gï agai xi xadutuadagi gubukadagai bipiakami kïïga ïïgiditai ïgai. Gï agai xi kïïga abokan dukai ibuadagi aaduindagai ixtumaxi ïr soiñi tudu.

Tito 3:14

Pobuadatai tïïgidamu aapi go gaa ix dukatai gï agai xi buidadagi buaboitudadami. Gï agai tudu xi gïr aaduñi ix makïdï gïr uurapïkïi ami Kretana ïïmadadagi xi soikïdadagi jaa xïïxkadï kabami tïgitokagi. Podukai ïïmadadamu ïgai xi kïïga ibuadagi. Ix pobuadagi ïgai aidï gia kïïga ïr soiñikamu ïgai.

Hebreos 11:5

Go Enokaru kïïga buaboitudaiña Diuxi ïpï dai kaxkïdï Diuxi apia dukai duakakami baidaja tïbagiamu. Mai taata ïgai mukigami tudu. Diuxi baidaja dai ka mai tiputa ïgai tami oidigi daamaiñdïrï. Diuxi ñokidïrï ikaiti sai Diuxi kïïga bhai ïrhidi go Enok ïmadï kaxkïdï baidaja ïgai.

Hebreos 13:21

Daanïi aanï Diuxi tudu sai gïn maakana ïgai bïïxi aïkatai ixtumaxi aapimï tïgito ixtukïdï ibuadana aapimï ixtumaxi ïgai ipïrhidi. Daanïi aanï saidi gïn soikïiña ïgai saidi Suxi Kristo gubukarhigadïkïdï ibuadana aapimï bïïxi ixtumaxi bhai ïrhidi ïgai. Gï agai sai bïïxi óídakami kïïga ñokadagi Suxi Kristo bïïtarï dai bïïxkïrï bïïtarï aagada xïïxi ïr gïdukami dai namïakami ïgai. Sai pogïduna gobai tudu.

2 Pedro 1:8

Daiñi, ix bïïx tasai bamioma po tutiakagi aapimï ix dukatai ojixi tami, gobai gïn soiñamu sai bamioma kïïga ïmadagi aapimï Suxi Kristo Gïr Nukadakami. Dai kïïga ibuadamu aapimï naana maaxi ixtumaxi kïkïïgadukami ïpï ka kïïgioma ïmadatai aapimï Suxi.

2 Pedro 3:18

Kïïga abïr óídaka bhaiyoma saidi podukai bïïx tasai bamioma maatï taatana aapimï xïï kïï tuiga Suxi Kristo Gïr Nukadakami gïn bïïtarï. Gïr kïïgakïrï bubiadamiga ïgai tudu dai gï agai sai bïïx tasai bamioma kïïga maatïkagi aapimï ïgai. Podukai bamioma kabakatudamu gïn buaboidaraga gin aaduñi. Ipïrhidi aanï sai bïïxi óídakami xadutuadana Suxi Kristo dai kïïga ñokadana ïgai bui bïïxkïrï bïïtarï. Sai pogïduna gobai tudu. Mosïkaxi.

1 Juan 3:22

Dai kaxkïdï xïïxkadï daanïdagi aatïmï kïïga maatïkana aatïmï sai gïr maaki agai ixtumaxi tañiagi aatïmï. Kïïga ïïgidi aatïmï dai kïïga ibuayi aatïmï ixtumaxi bhai ïrhidi ïgai kaxkïdï.

1 Juan 5:20

Daiñi, kïïga maatï aatïmï sai dibia Diuxi Maradï tami oidigi daama dai gïr tïtïïgidi xorai buaboikïdï ïr Diuxi. Suxi Kristo ïgai dai gïr tïtïïgidi tudu. Dai xibi ka urabakatai aatïmï Suxi Kristo ka uraba bii aatïmï Diuxi ïpï. Suxi Kristo ïr Diuxi kaxkïdï. Buaboikïdï ïr Diuxi ïgai dai mai tipu ïmai. Mai tipu ïmai xorai gamaakadagi go utudui oidakaragai bïïxkïrï bïïtarï tudu. Mosïkaxi Suxi gïr maakai gobai.

3 Juan 1:6

Tami gïr ïmpaiñdaragiana dada ïïmo kïkïïrhi ix makïdï soi aapi tudu dai gïr aagidi xïï kïïga oigïdatai soikïiña aapi. Dai gï agai sai apia soikïda aapi gïr aaduñi ixtumaxikïdï tïgitokagi ïgai boiyïrï bïïtarï xïïxkadï amïka gïn dadidagi ïgai ïpamu. Gobai bhai ïrhidi Diuxi tudu.