Hechos 20:28 - Northern Tepehuan Bible

²⁸ Kaxkïdï gïn nukadakabïrai ïïgi aapimï bhaitï gukakami daidi kïïga abïr nukada go buaboitudadami ïpï ix makïdï gïn nukaturhi Diuxi Ibhïadï. Ïgai tudu gïn darai saidi ïr nukadakamikana aapimï go buaboitudadami ix makïdï Diuxi sabïrhi ïïgi maradï ïradïkïdï. Go buaboitudadami ïpïan dukamikana kañiñiru. Diuxi sosoigadï gïn dukamikana ïgai dai gï aagaiña xorai nukadakagi ïgai.

Tepehuan Northern: Diuusi ñiooquidʌ utuducami oodamicʌdʌ

²⁸ Cascʌdʌ gʌnnuucadacavurai aapimʌ ʌʌgi dai nuucadacavurai vʌʌscatai ʌvaavoitudadami ʌʌpʌ ʌpan duucai cañiiru pastuurugadʌ cʌʌga nuucadacana gʌsosoiga. Cʌʌga maatʌ aapimʌ isDiuusi Ibʌadʌ gʌndarai mʌsai nuucadacana ʌvaavoitudadami ismaacʌdʌ ʌcovai vuvaitu Diuusi cascʌdʌ cʌʌgavʌr mamaatʌtulda. Suusi Cristo Diuusi maradʌ muu dai aasi ʌʌradʌ ʌgai vʌʌtarʌ dai poduucai cʌʌgacʌrʌ vuvaitu saidʌ ʌrʌmo siʌʌgʌmʌ ducamicana.

Hechos 20:28 ပူးပေါင်းရင်းမြစ်များ

Mataibo 16:18

Daiñi Ximuñi, aapi Piduru tïgidu ïpï, ix makïdï itïiya ïrhidi odai. Dai aanï aagai sai aapikïdï gin aaga iduñimu aanï ïmo gïdukami aaduindagai. Aapi ïpïan dukamika agai ïmo odai ix makïdï dasagi ïmo kïsadami baaki gï aga dasakai simientogadï ïmo baaka. Aapikïdï gin aaga iduñimu aanï ïmo aaduindagai soikïitai mui óídakami saidi gin buaboitudana. Dai ïgai ix makïdï gin buaboitudada agai ïr gin kiupaiga dukaika agai. Ïrana dakamu aanï ïgai kaxkïdï. Dai maitïmu ïgai buidïrï bïïtïkamigadï. Maitïmu ïgai asta go mukigami bui tudu— itïtïdai.

Markos 13:9

Gï agadamu xi kïïga gïn nukadakagi aapimï. Daiñi, mui odami gïn kïïdadamu gin aaduñikatai aapimï. Dudunukamiïrï gïn tutusadamu ïgai. Dai kikiupiïrï gïn bapasadamu ïpï dai ami gïn gïbadamu ïgai. Gï agadamu xi baan gukada aapimï gobibierno buidïrï dai reyes buidïrï xi ami aagada aapimï ix tuixidï gin buaboitudai aapimï.

Lukas 12:32

Aapimï arhi kañiñiru duu dai Diuxi sosoigadï kaxkïdï maiti abïr buamï gïn ïrhiada. Chïkidu aapimï dïï bïïxkïrï ïr ïmo bhai ïrhiaragai Diuxi bïïtarï gïn maakaitai ïgai oigaragai xi ïgai gïn tïanïdagi— itïtïdai Suxi go mamaatïrdamigadï.

Lukas 21:34

Dai apia gamamaakai aatagi go Suxi daidi potïtïdai ïgai mamaatïrdamigadï, —Gin aaduñi, todian dukai ayimu xi gamaaxitudagi aanï xi ïr Tïanïdami aanï. Odami mai maatï dai mai nïnïraka xi po duñagi aanï dai todian dukai ayimu gobai bïïxi óídakami ïmo trampa dukai ix makïdï kukupai todian dukai. Gïn nukadabïrai aapimï tudu tadu mai nïnïasïrhiakagi aapimï tïtïitoitai iidagai dai buirudagai xiïpï kabami buamï gïn ïrhiditai gïn oidakaragakïdï tami idi oidigi daama. Maiti abïr gïn dagito tudu xi pomaaxiïrï gïn tïgito ajiopadagi aapimï xïïxkadï todian dukai gin maaxitudagi aanï xi ïr Tïanïdami aanï— itïtïdai.

Hechos 13:2

Dai ïmo imidagai bïïxkatai ïgai gaxadutudaitadai Diuxi mai dïïkakai kuadagai taidi Diuxi Ibhïadï po tïtïdai aidï, —Aanï ka darai Bernabe ïmadï Saulo ïmo aaduindagai bïïtarï kaxkïdï xibi abïr ïkobai gin bubaitulda gobai go aaduindagai bïïtarï— ikaiti Diuxi Ibhïadï.

Hechos 14:23

Dai bïïxi aipakoga xako gïn ïmpaidiña buaboitudadami go Pabora ïmadï Bernabe darai bhaitï gukakami bai ïgai nukadakana go buaboitudadami. Dai kaxi po duñakai ïgai sai bhodïrï gadáí ïgai Diuxi go buaboitudadami bïïtarï mai dïïkai kuadagai. Daidi itïtïdai ïgai Diuxi, —Aapi Diuxi ïr nukadakami ka agai idi buaboitudadami— itïtïdai ïgai daanïitai.

Hechos 20:17

Dai abhiadïrï Miletañdïrï go Pabora otoxi ñoki sai gamo iimïna go kïkïrhiodami ix makïdï ïr buaboitudadami bhaitï gukakïdï Efesoana óídakami.

Hechos 20:29

Kïïga maatï aanï sai imïdakai aanï tabhiadïrï sai dadimu jaa ix makïdï ïïxibogan tutuiga ïpïan dukai sïsïïyi ix makïdï mai biayi kañiñiru. Ïgai yaatagidida agai go buaboitudadami dai soi buada agai.

Romanos 16:16

Kïïga abïr gïn bipiaturhiada aipako aapimï ix makïdï ïr buaboitudadami. Diuxkïdï gïn biaturhi bïïxi go gaa buaboitudadami ix makïdï gïn ïmpaidiña kikiupiana aipakoga ïpï.

1 Korintios 1:2

Idi ojai ïr gïn bïitarï aapimï buaboitudadami Korintoïrï óídakami. Aapimï gïn bïïtarï tudu ix makïdï ka ïkobai gïn darai Diuxi bïïna darakatai aapimï Suxi Kristo. Ïko darasadï aapimï Diuxi gïn bapaidakai ïgai ïmadï bïïxi go gaa buaboitudadami ïpï ix makïdï bïïxi aipakoga daanïiña Suxi Kristo. Suxi Kristo tudu ïgai daidi ïr Tïanïdamigadï bïïxkatai aatïmï buaboitudadami.

1 Korintios 10:32

Maiti gï agai tudu ix ibuadagi ixtumaxi sobhikïdagi jaa ix buaboitudagi tomaxi ïr judidiukagi ïgai ix jaa ïpï, ix ka uraba daraka ïgai Diuxi buaboitudakai ix cho ïpï.

1 Korintios 11:22

¡Sïïrhikïdï mai kïïga ibuayi aapimï! ¿Maiti mïx bia ïïgi gïn kiiki xako gaugiagi bïïxi ixtumaxi ugia ïrhiada aapimï? Dïï aapimï bhaiyoma gïïgïpi buyiña kuadagai xïïxkadï ïmapi gakuada aapimï dai podukai soi dukai nïnïidiña aapimï Diuxi ïmpaiñdaradï dai xaïratudai aapimï ix makïdï mai bua kuadagai. ¿Bhai ix ïr kïïga podukai? Kaxkïdï mai bhaiga aanï ix potïiyagi sai kïïga ibuayi aapimï tudu.

1 Korintios 15:9

Bhaitoma podukai pogïdui gin ïmadï aidïxi todian dukai otosadï gin dáí Suxi. Aidïpïrï tomarhi ïmadutai poïrhiditadai ix aanï otosadïka iñagaitadai Suxi. Kabami soi buididitadai aanï go buaboitudadami aidï di. Dai kaxkïdï bïïxi go gaa ojotosadï Suxi bamioma bia sïïrhikami ix tïanïdagi ix aanï dai aanï mai bia sïïrhikami tomarhi ix ïmo otosadï Suxi gin aagagi odami. Kabami soi buididiña aanï go buaboitudadami ïkioma kaxkïdï.

1 Korintios 6:20

Dai bhaiyoma xibi Suxi aa namïki ixtumaxi gï agaitadai dai gïn sabïrhi ix kaxkïdï xibi ïgai tuidadï aapimï. Kaxkïdï gïn tukugakïdï abïr maaxitudagi xïïxi ïr gïdukami Diuxi xibi. Podukai abïr ibuada ïmo xadutudaragai dukai ïgai bïïtarï.

Galatas 1:13

Gïn aagidamu aanï ix dukatai gin ayi go aatagi sai maatïkana aapimï sai Diuxiañdïrï dibia gobai. Daiñi, kïï maatï aapimï ixdukatai oidakana aanï ïkioma oiditai go judidiu buaboidaradï. Kïï maatï aapimï sai kïïdaiña aanï go buaboitudadamigadï Suxi Kristo. Kïïdaiña aanï Diuxi maamaradï tudu dai sïïrhikïdï omarhigakana buidïrï ïgai. Kabami gin aajagïiña aanï gaagaitai ixdukatai naato ugitotudagi ïgai tudu.

Efesios 1:14

Xibi bia aatïmï Diuxi Ibhïadï gïr abhana kaxkïdï kïï maatï aatïmï sai Diuxi gïr maakimu bïïxi aïkatai bhai ïrhiaragai ïpï ix makïdï ïgai bhai darasakami bia aatïmï gïr bïïtarï ix makïdï ïr maamaradï. Aidï gia ka maiti ïr maamaixapikan dukamikamu aatïmï ka kïïgakïrï bubuakïkai. ¡Gia gï agai xi aagidagi aatïmï Diuxi xïï bhai gïr ïrhidi ïgaikïdï tudu mos ïï gïdukatai dai kïï tiodikatai ïgai!

Efesios 1:7

Suxi Kristo aaxi ïïgi ïradï gïr bïïtarï tudu. Kaxkïdï kïïgakïrï bubuaka aatïmï dai oigïrhikami bii aatïmï gïr soimaaxkamigakïdï bïïnakai aatïmï Suxi Kristo. ¡Xïï kïï tuiga Diuxi aidï!

Efesios 4:11

Suxi Kristo ïgai dai maa oidaragai aatïmï buaboitudadami bïïtarï tudu. Ïïmoko maa ïgai gubukarhigai saidi ïr Suxi ojotosadïkana. Dai jaa maa ïgai saidi ïr aagadamikana Diuxi ñokidï dai jaa saidi ïr aipako aituldiadamikana go bhai ïrhiaragai aatagi dai jaa saidi ïr nukadakamikana go gaa buaboitudadami dai maatïtuldiadami Diuxi ñokidï ïpï.

Filipenses 1:1

Bhaiga aapimï buaboitudadami Filipoïrï óídakami. Aanï ïr Pabora ïmadï Timoteo ix makïdï gïn otoxdi idi ojai pipioñigadïkatai aatïmï Diuxi. Idi ojai ïr bïïxkatai aapimï gïn bïïtarï ix makïdï ïr buaboitudadami dai bïïtarï go nunukadami buaboitudadami ami ïpï ïmadï soikïdadami buaboitudadami ïpï. Idi ojai ïr bïïxkatai aapimï gïn bïïtarï tudu ix makïdï bïïnaka Suxi Kristo dai ïr ïko bubaidadï Diuxi.

Kolosenses 1:14

Diuxi Maradï tudu ïgai dai daxi namïgadï go kïïgakïrï bubaidaragai gïr bïïtarï dai kaxkïdï gïr oigïrhi Diuxi gïr soimaaxkamiga.

Kolosenses 4:17

Aagidabïrai go Arkipo sai kïïga ibuada go aaduindagai ix makïdï maa Gïr Nukadakami ïpï.

1 Tomoteo 3:1

Aapi Timoteo, idi ñoki ix makïdï gï aagidamu aanï kïïga ïr buaboi. Daiñi, kïï buañixi go aaduindagai ix makïdï bia go buaboitudadami nunukadamigadï. Kaxkïdï xorai ipïrhiadagi xi bhïiyagi go sïïrhikami ix ïr nukadakamikagi buaboitudadami bhïiya ïrhidi ïmo sïïrhikami kïï buañixikami.

1 Tomoteo 3:2

Kaxkïdï ïmo nukadakami buaboitudadami gï agai xi kïï buañixikami dukai oidakagi sai mai tipukagi ixtukïdï gïpiïrï bupadagi jaa. Maiti gï agai tudu xi mui oki biakagi. Gï agai bhaiyoma xi ïmadugakagi oñigadï. Dai gï agai xi kïï gï tïgito nïijada ïgai bïïxi aïkatïrï ixtuma buadagi sai kïï bhai maaxkagi. Dukami, gï agai xi kïïga miadaidarakagi ïgai xïïxkadï daibidagi jaa. Dai gï agai xi maatïtai tïtïgiadagi ïgai ñoki ïpï.

1 Tomoteo 3:5

Kaxkïdï tudu xi ïmo kïïrhi maiti ixtuidikïdagi xi kïïga tïanïdagi dai nukadakagi ïïgi maamaradï xadïrï ixtuidïna xi kïïga nukadakagi Diuxi maamaradï ïpï. Xadïrï ixtutuidïna xi kïïga nukadakagi go buaboitudadami tudu.

1 Tomoteo 4:14

Daiñi, baasïkioma go bhaitï gukakami darai ïkadï aapi gï daama dai aidï gï aagidi ïgai ïmo ñoki Diuxiañdïrï gï aagaitai aapi. Podukai gï maa Diuxi ïmo gubukarhigai. Kaxkïdï maiti gï agai xi dodorhi dakagi aapi xibi gï maakakai Diuxi go gubukarhigai.

1 Tomoteo 4:16

Kïï gï tïgito nïida ix dukatai oidaga aapi tudu dai ix tumaxi tïtïïgiadagi aapi go gaa. Gï agai xi apia oijada aapi ibuadatai ixtumaxi gï aagidi aanï. Xi pobuadagi aapi aidï gia aataduñimu Diuxi aapikïdï saidi kïïgakïrï busaiña aapi ïmadï go gaa ïpï kaïkatai ïgai gï aatagi.

1 Tomoteo 5:17

Gï agai xi kïïga xadutuadagi dai aa namïidadagi go buaboitudadami bhaitï gukamigadï ix makïdï kïïga ibuayi aaduindadï dai kïïgioma ix makïdï gamaakai ñoki dai gatïtïïgidi aatagi.

Tito 1:7

Daiñi, go buaboitudadami bhaitï gukakamigadï bia ïmo sïïrhikami. Diuxi nukaturhi ïgai Diuxi maamaradï kaxkïdï gï agai xi kïïgakïrï óídakagi go bhaitï gukakami sai podukai mai tipukagi ixtukïdï gïpiïrï bupadagi go jaa óídakami. Maiti gï agai xi ïmo gïdukami gï ïrhiadagi ïïgi ïgai tudu dai maiti gï agai xi omarhigakagi tomarhi xi nabaamutïrïkagi tomarhi xi kokoatïrïkagi. Dai maiti gï agai xi mukiñdadï tuigakagi ïpï.

Tito 2:14

Suxi Kristo tudu ïgai dai gï dagito ix gï muatudagi kïïgakïrï gïr bubaiditai gïr soimaaxkamiañdïrï. Podukai bhai dui ïgai saidi ïr aaduñdïkana aatïmï Diuxi kïïga buañixikami gïr biakai ïgai. Dai xibi ka kïïgakïrï buabuakïkai aatïmï ipïrhidi ïgai sai bïïxi gïr bhai ïrhiarakïdï ibuadagi aatïmï ixtumaxi ïr kïïga.

Hebreos 12:15

Gin aaduñi, kïï tuiga Diuxi gïr bïïtarï dai gïr maaki ïrhidi ïgai naana maaxi sai maatïkana aatïmï xïï kïï tuiga ïgai. Dïï gia gï agai xi gïn nukada ajiopada aapimï tadu ïmadutai aapimï mai bhïiyi. Gïn nukadakabïrai sai mai bhamukatai oidakagi ïmadutai aapimï tudu. Maiti abïr gïn dagito ix podukai mos apia imïda bhamudagai gïn saagida. Tadu gïn bupuidïrï gïn tutusadan buadagi go bhamudagai kaxkïdï tudu podukai muidutai aapimï gïn sarabida antaada go bhamudagai.

Hebreos 13:17

Gin aaduñi, ïïgiadabïrai gïn bhaitï gukakamiga Diuxi amadïrï. Kaxkïdï tudu gïn nukadai ïgai sai kïïga imïna gïn buaboidaraga. Dai biakamu ïgai ix Diuxi buitapi gukibagi dai aagadagi ixtuma dui ïgai gïn nukadatai. Kïïga abïr ibuada tudu sai ïgai bhai gïn ïrhidiña gïn nukadatai dai maiti abïr ibuada ixtumaxi ixtukïdï soi gïn ïrhiadagi ïgai.

1 Pedro 2:25

Kïïga ïr buaboi tudu sai ïpïan buadatadai aapimï kañiñiru ix makïdï kuga ajiopaiña. Dïï gia xibi ka ïpamu uraba aapimï gïn Paxturuga. Ka uraba aapimï Suxi Kristo tudu dai ïgai nukadai gïn ibhïdaga xibi.

1 Pedro 2:9

Dïï aapimï gia mai taata agai gïgïbidaragai podukai. Aapimï ïr ïko bubaidadï Diuxi tudu dai ïr ix makïdï maa ïgai sïïrhikami saidi ïr dadaxdadamigadïkana aapimï. Ïmo aadunumï aapimï xibi ïkobai darasadïkatai aapimï Diuxi dai ïgai tuidadï aapimï. Kaxkïdï xibi bhaiga aapimï xi maaxitudagi jaa bïïtarï xïï kïï tuiga Diuxi. Kaxi gïn busaitu ïgai abhiadïrï xako tukapi dukai óídakatadai aapimï mai maatïkatai ixtumaxi ïr buaboi tudu. Dai xibi gia kaxi gïn daibuñtu ïgai xako xigiamaaxi gïn oidakaraga kïïga tonoraka maaxkatai gobai.

1 Juan 1:7

Dïï gia ix buañixikagi aatïmï dai aagagi aatïmï ixtumaxi ïr buaboi ïpïan dukai Diuxi, aidï gia kïïga biakana aatïmï ïmo urabaragai aipakoga bïïxi go buaboitudadami ïmadï. Dai aidï gia bïïx tasai apia buanai Diuxi bïïxi gïr soimaaxkamiga ïradïkïdï Suxi Kristo ix makïdï aaxi ïgai mukukai gïr bïïtarï.

Apokalipsis 5:9

Dai ami ganïyi ïgai ïmo utudui nïidagai ix makïdï ikaiti, —Aapi Kañiru kïïga bia sïïrhikami xi bhïiyagi go libro dai upandagi seseyogadï ixtukïdï kuupidi gobai. Aapi tudu gï ïrakïdï dáí namïgadï bïïxi óídakami dai podukai sabïlturhi aapi Diuxi. Bïïxi go naana maaxi óídakami saagidañdïrï sabïrhi aapi ïïmoko, bïïxi go naana maaxi ñokadami saagidañdïrï tudu dai go naana maaxi gïgïr kiikiañdïrï óídakami.