Hechos 16:15 - Northern Tepehuan Bible

¹⁵ Dai bhodïrï go Lidia gï bakoi ïmadï bïïxkatai ix makïdï kiidïrï óídakatadai. Daidi gïr daañimitadai ïgai dai pobïrtïtïdai, —Mïxi buaboitudadami gin ïrhiadagi aapimï kïïgakïrï aidï abïr gin kiiyïrï gïn urhiña asta xïïxkadï iimi agadagi aapimï tabhiadïrï— itïtïdai ïgai. Muiyoko pobai gïr tïtïdai ïgai dai aatïmï bhai aa dai gamo iji.

Tepehuan Northern: Diuusi ñiooquidʌ utuducami oodamicʌdʌ

¹⁵ Dai gʌvacoi ʌgai ʌʌmadu vʌʌscatai ismaacʌdʌ quiidiʌrʌ oidacatadai dai gooquiʌrʌ gʌrdaañimi ʌgai dai povʌrtʌtʌdai: ―Mʌsi aapimʌ sʌʌlicʌdʌ vaavoitudadagi isvaavoitudai aanʌ Diuusi, vʌrai iimi dai giñquiiyana daraaja asta mʌsiʌʌscadʌ iji tabiaadʌrʌ ―astʌtʌdai ʌgai. Dai maitʌrdagito tʌscho tʌiyagi.

Hechos 16:15 ပူးပေါင်းရင်းမြစ်များ

Genesis 19:3

Dïï gia go Lot apia aagidimi xi tïbïpikïdï bhai aa ix oidagi kiiyamu. Dai Lot gïïpi bhai dui kuadagai ïmadï pan mai biakami kopodakarui dai bhibhi.

Mataibo 10:41

—Gin aaduñi, kïï maatï aapimï sai Diuxi mamaakai maitïki go ñiñokituldiadamigadï. Dai xi ïïgiadagi aapimï ñokidï ïmo ñokituldiadamigadï Diuxi maatïkatai sai Diuxi bïïtarï ñokai ïgai aidï gia aapimï ïpï buimu maitïki ïpï ïpïan dukai ïgai. Dai pomaaxi ïpï xïïxkadï ïïgiadagi aapimï ïmo buaboitudadami maatïkatai sai kïïga buañixi ibhïadï. Ix ïïgiadagi aapimï ïgai aidï gia buimu aapimï maitïki ïpïan dukai ïgai ïpï.

Lukas 14:23

Baidi amudï potïtïdai, —Imiñi ïpamu tudu dai xibi gia imiñi asta maigobai xako mai guka bhaabhaki go arhi boiyana dai dïdïjoi saagida dai baida xorai tïïgiagi aapi. Kabami abïnakida aapi tudu sai bhaigobai dadana sai kïïga sudana gin kii— itïtïdai.

Lukas 24:29

Dïï gia go iimïdami kabami aagidi sai amaxi biïna ïgai ïmadï. Potïtïdai ïgai, —Tanaxi gïr ïmadï bii. Ka didiaymi oidi di— itïtïdai. Dai go Suxi baa ami kiiyana dai ïmadï bii agai.

Hechos 11:14

Ïgai gï aagidamu ix kaiti Diuxi ñokidï dai ixdukatai kïïgakïrï busiagi aapi ïmadï bïïxi ix makïdï gï ïmadï óídaga— itïtïdai Diuxi tïañikarudï. Pogïdui tudu— ikaiti go Piduru

Hechos 16:31

Daidi Pabora ïmadï Silas itïtïdai aidï, —Buaboitudañi aapi Suxi Kristo. Mos buaboitudakai kïïgakïrï busaimu aapi ïmadï gï aaduñi ïpï ix makïdï gï kiiyïrï óídaga— itïtïdai.

Hechos 16:33

Dai kia ïr tukarïkatadai baidi go maixakarui nukadakami bakuañdi tukugadï Pabora ïmadï Silas mïx xako saasaraitadai. Dai bhodïrï otoma gï bakoi go maixakarui nukadakami ïmadï aaduñdï ïpï ix makïdï kiidïrï óídaga.

Hechos 16:34

Dai gokiïrï baidakai ïgai go Pabora ïmadï Silas gï kiiyamu dai bhibhi. Dai kïï bhai gï ïldatu go kïïrhi buaboitudakai dai aaduñdï ïpï kïï bhai gïn ïjïrhi ïpï.

Hechos 18:8

Dai aidïpïrï ïmo kïïrhi Krispo tïgidukami ïr bhaitï kïakamikatadai ami kiupiïrï dai ïgai ïmadï aaduñdï ix makïdï ami kiiyïrï óídaga bïïxi buaboitu Suxi Kristo. Dai jaa mui Korintoana óídakami kaïkana Pabora aatagidï ïpï dai buaboitu ïpï dai gïn bapakoi.

Hechos 8:12

Dïï gokiïrï ami Samariana dibia Pirhi dai aiturhi óídakami buitapi go bhai ïrhiaragai aatagi. Aagidi ïgai ix dukatai tïanïi Diuxi dai aagidi ïpï Suxi aatagidï ix makïdï bhai ïrhiatudai odami. Dai óídakami ïïgida kaï ñokidï Pirhi dai gïn bapakoi muidutai, kïkïïrhi ïmadï oki.

Hechos 8:38

Daidi go dunukami gatïjai kïïsaragai go kareta dai bïï gokatai tïapai xako kaatïkatadai sudagi. Daidi Pirhi bakoi go dunukami.

Romanos 16:23

Diuxkïdï gïn biaturhi Gayo. Ïgai kiidïrï tudu gin urhiñdaka aanï. Dai ïgai gïr maa oigaragai bïïxkatai buaboitudami xi gïr ïmpaidagi aatïmï kiidïrï ïpï. Diuxkïdï gïn biaturhi Erasto ïpï. Ïgai ïr nukadakami go tuminxi ixtukïdï aatabuayi dudunukami tanai Korintoana. Gïr sukurhi Kuartoxi tïgidukami gïn biaturhi ïpï.

2 Korintios 12:11

Gin aaduñi, ka bhaitoma ïmo buirugami dukai ñokai aanï mos ïï dudatai aagaitai aanï ixtumaxi ibuadana aanï. Dïï aapimï ïr gïn duñi ix podukai ñokai aanï. Ix kïïga ñokadamudai aapimï gin bïïtarï aidï gia maiti gï aagadamudai xi kïïga ñokadagi aanï ïïgi gin bïïtarï. Bia aanï xi ïïgi ñokadagi gin bïïtarï sai podukai maatïkagi aapimï sai buaboikïdï ïr otosadï aanï Suxi Kristo tudu. Go odami ix makïdï gïn tïtïïgidiña ñoki pokaitiña saidi kïïgioma ïr ojotosadï ïgai Suxi xi bhai aanï dai ix bhai tomax makïdï ïmai ïpï. Daiñi, kïïga ïr buaboi sai aanï maiti ïr ïmo gïdukami ixtumaxi namïakami. Dïï gia bïïxkïrï mai otïrhioma namïga aanï xi bhai ïgai ix makïdï gïn tïtïïgidiña ñoki.

2 Korintios 5:14

Tomaxi naana kaitiadagi jaa, aatïmï bïïxkïrï kïïga maatï sai Suxi Kristo gïr oigïdai dai kaxkïdï sïïrhikïdï ipïrhidi aatïmï xi ibuadagi ixtumaxi bhai ïrhidi ïgai. Suxi Kristo muu bïïxkatai aatïmï gïr bïïtarï tudu dai gïr maa ïmo utudui oidakaragai. Xibi ka mai bia aatïmï xi ïïgiadagi gïr ïïkidadï oidakaragai. Ka koidadï duu bii aatïmï gïr ïïkidadï oidakaragai bïïtarï tudu. Daiñi, Suxi muu bïïxkatai aatïmï gïr bïïtarï dai gïr maa go utudui oidakaragai sai ka mai ïïgi gïr bïïtarï óídakagi aatïmï, sai ka maiti ibuadagi aatïmï mosïkaxi ixtumaxi bhai ïrhiadagi aatïmï tudu. Ipïrhidi ïgai sai ïgai bïïtarï óídakagi aatïmï bhaiyoma ibuadatai aatïmï ixtumaxi ïgai ipïrhidi. Suxi ka taata go mukigami gïr bïïtarï sai ka mai biakagi aatïmï ix taatagi gobai dai ïko biiyagi Diuxiañdïrï. Dai gï duakatu ïgai ïpamu gïr bïïtarï ïpï sai aatïmï biakana go kïïgakïrï oidakaragai ix makïdï ïgai bia ïpï urabakatai aatïmï Diuxi. Kaxkïdï gï agai sai ïgai bïïtarï óídakagi aatïmï xibi. Sïïrhikïdï kïïga gïr oigïdai ïgai kaxkïdï.

Galatas 6:10

Gin aaduñi, xibi kia oidaga oigaragai xi kïï buidadagi aatïmï jaa kia oidigi daama óídakatai aatïmï. Kaxkïdï gï agai aatïmï xi kïï buidadagi bïïxi óídakami ibuadatai ixtumaxi ïr soiñikagi ïgai bïïtarï dai bamioma bïïtarï ix makïdï ïr ïmo xïgïmï duu gïr ïmadï. Ix makïdï bia ï galbaaxi buaboidaragai ix makïdï bia aatïmï tudu.

Efesios 1:1

Bhaiga. Aanï ïr Pabora dai gïn otoxi idi ojai. Ïmo otosadï aanï Suxi Kristo, Diuxi ipïrhi xi ïr otosadïkana aanï kaxkïdï. Xibi gïn ojidi aanï idi ojai aapimï Efesoïrï óídakami ix makïdï Diuxi ïko bubaitu. Aapimï ix makïdï biïna daraka Suxi Kristo tudu dai mai dagitokai buaboitudai ïgai.

Filipenses 1:7

Kïïga gïn oigïdai aanï gin aaduñi. Xadïrï maiti gïn oigïdaiña aanï tudu. Aapimï gin soikïiña bïïxi gin aaduindagïrï di. Daiñi, Diuxi kïï tuiga gin bïïtarï dai gin maa oigaragai sai aipakoga aituldana aanï go bhai ïrhiaragai aatagi. Dai gin maa oigaragai saidi gïr buidïrï ñiñokadamiga buitapi maaxituldana aanï saidi ïr buaboi go bhai ïrhiaragai aatagi ïpï. Bïïxi gobai gin maa oigaragai Diuxi sai ibuada aanï. Dai aapimï kïïga gin soikïiña. Dïï gia mai xu xi mosïkaxi gobai bïïtarï gin maa Diuxi oigaragai, gin maa ïgai oigaragai sai maixapikana aanï ïpï. Dai aapimï kïïga gin soikïiña asta maixapikatai aanï tami ïpï. Podukai taatan duu aapimï go soimaaxkami gin ïmadï. Kaxkïdï kïïga gïn oigïdai aanï.

Filemon 1:17

Daiñi aapi Filemon, kïïga gïr aaduñi miadïrï dukai aatïmï gïr ïïmadatai aatïmï. Dai xibi gï daanïi aanï pïsai podukai nïijada aapi go Onesimo ïpï dai pïsai bhai ïrhiarakïdï miadïgida aapi mïï aïkai ïgai, ïpïan dukai xi bhai ïrhiarakïdï gin miadïgidamudai aapi aanï mïï aïkai aanï ïpï.

Hebreos 13:2

Gï agai tudu xi bhai dukai miadïgiadagi gïn dadidakamiga tomaxi mai maatïkagi aapimï. Maiti gï maatï xi bhai maiti ïr tïtïañikarudï ïgai Diuxi kaxkïdï. Ïïmo óídakami ka miadïgidiña tïtïañikarudï Diuxi podukai, mai maatïkatai tudu.

1 Pedro 5:12

Gin aaduñi, go Silbano ïgai dai gin soi ibuadatai aanï idi ojai. Dai ipïrhidi aanï sai maatïkagi aapimï sai ïgai ïr ïmo gïr aduñi Diuxi amadïrï dai kïïga sïïrhi aatabuayi ïgai. Idui aanï idi arhi ojai gïn bïïtarï gïn soiña in ïrhiditai sai tomaxi soimaaxi taatamaimi aapimï bïïxkïrï apia buaboitudana aapimï maatïkatai sai kïï tuiga Diuxi gïn bïïtarï. Daiñi, tami idi ojiïrï gïn maa aanï ñoki dai gïn aagidi ixtumaxi ïr buaboi saidi maatïkana aapimï sai Diuxi kïï tuiga gïn bïïtarï dai gïn maa oigaragai ix taatagi aapimï bïïxi gobai ix makïdï taatamaimi aapimï xibi. Kïïga ïr buaboi tudu sai kïï tuiga Diuxi gïn bïïtarï. Dai kaxkïdï apia kïïga buaboitudai aatïmï maatïkatai sai kïï tuiga Diuxi gïr bïïtarï tudu.

2 Juan 1:10

Gin aaduñi, xi gïn dibidagi ïmo tïtïïgiadami ñoki dai mai buaboi aagagi ïgai aagaitai Suxi Kristo, maiti gï agai xi miadïgidagi aapimï gïn kiiyïrï. Dai maiti gï agai tomarhi xi biatuldadagi aapimï dai tomarhi xi abïnakiadagi sai oijadana ïgai aaduindadï.

3 Juan 1:5

Aapi Gaiyo, kajioma aanï sai kïïga soikïiña aapi gïr aaduñi Diuxi amadïrï ix makïdï aipako gatïtïïgidi Diuxi ñokidï. Sai soikïiña aapi xïïxkadï ami dïgabuskïdagi ïgai xako oidaga aapi dai sai asta soikïiña aapi ix makïdï mai maatïkatadai aapi ïpï. Kïïga ibuayi aapi Diuxi bïïtarï tudu soikïitai gïr aaduñi podukai.

3 Juan 1:8

Kaxkïdï aatïmï ix makïdï gia buaboitudai gï agai sai mamaakadagi ixtumaxi tïgitokagi ïgai dai podukai soikïdagi sai apia aagiada ïgai go buaboi aatagi. Podukai bhaiga aatïmï xi urabagi aaduindadïrï tudu.