Hechos 11:23 - Northern Tepehuan Bible

²³ Ayi go Bernabe Antiokiïrï dai kïï bhai gï ïldatu nïiditai xi Diuxi kïïgakïrï nïiditadai go buaboitudadami ami. Dai abïnaki ïgai go buaboitudadami xi ïgai gupurtudana gïn iibhïdaga sai apia oijadana ïgai Gïr Nukadakami.

Tepehuan Northern: Diuusi ñiooquidʌ utuducami oodamicʌdʌ

²³ Dai aʌcai Bernabé tʌʌ isducatai Diuusi aliʌ cʌʌgacʌrʌ nʌiditadai ʌvaavoitudadami dai aliʌ baigʌʌli, dai maa ñiooqui daidʌ itʌtʌdai sai vʌʌsi gʌnibʌdacʌdʌ apiavaavoitudaiña Diuusi.

Hechos 11:23 ပူးပေါင်းရင်းမြစ်များ

Mataibo 16:24

Daidi bhodïrï Suxi potïtïdai mamaatïrdamigadï, —Gïn aagidamu aanï ix dukatai gï agai xi ibuadagi odami ix makïdï ipïrhiadagi saidi ïr gin mamaatïrdamigakagi. Gï agai xi dagitoagi ïgai ïïgi tïgibudadï. Ka maiti gï agai xi ibuadagi ïgai ïïgi ixtumaxi ipïrhiadagi ïgai tudu. Xorai gin oijada ïrhiada gï agai bhaiyoma xi bïïx tasai kusukan dukai imïdagi go kuruxi ixtukïdï gï muatuda aagai ïgai. Gobai itïiya ïrhidi sai gï agai xi bïïx tasai bhai gï dukagi ïgai ix soimaaxi taatagi dai asta sai gï muatudagi gin oiditai. Aidï gia bhaigakamu ïgai xi gin oijadagi daidi ïr gin mamaatïrdamigakagi. Ïma dukai gia cho— itïtïdai.

Markos 2:5

Dai aidïxi Suxi tïï xïï kïïga buaboitudai ïgai, potïtïdai ïgai go kokoadï, —Sogigi aapi— itïtïdai, —Ka bïï buañixikami bii gï ibhïdaga ix makïdï soimaaxi ibuadana aapi— itïtïdai.

VUAANA 15:4

Kaxi an gïn aagidi sai aanï ïr go uba uxiaradï gï dukami ix makïdï kïïga gamaakai gubukarhigai maamaradï. Dai aapimï ïr go uba maamaradï gï dukami kaxkïdï abïr kïïga saïkan dukai óídaka gin abhana nai aanï kïïga saïkami bimu aapimï gïn abhana ïpï— itïtïdai. —Daiñi, ïmo ux maamaradï mai ïïgi ibhiatai ix mai saïkagi uxiaradï. Pomaaxi aapimï ïpï. Mai bhaiga aapimï ix ibuadagi tomarhi ïmo ixtumaxi ix makïdï bhai ïrhidi Diuxi ix mai saïkagi aapimï gin abhana.

Hechos 13:43

Bhodïrï kaxi kugaidakai go ïmpaiñdaragai muidutai go judidiu oi go Pabora ïmadï Bernabe. Dai jaa oi ïpï ix makïdï maiti ïr judidiukatadai dïï gia buaboitudai ïgai Diuxi dai bhïitadai buaboidaradï judidiu. Dai Pabora ïmadï Bernabe mamaakaiña ñoki dai abïnakidiña sai apia buaboitudaiña ïgai maatïkatai ix Diuxi oigïdai dai urhiñdimi soiñi.

Hechos 14:22

Dai dïgabunukai ïgai bïïxi go kiikiïrï ïgai gamaakaiña gubukadagai abhana go buaboitudadami daidi gaabïnakidiña xi kïïgakïrï buaboidaiña ïgai. Dai aagidimi ïgai sai gï agaitadai kia xi odami naana maaxi soi ïrhiaragai taatagi xi gokiïrï ayimu ixtuigako gatïanïda agai Diuxi.

Hechos 14:26

Go Atalia gïï sudagi ugidana bipiïyi. Dai ami tïtïsai ïgai ïmo barkoïrï dai iji Antiokiamu. Baasïkioñdïrï go buaboitudadami Antiokiïrï gadáítadai Diuxi sai soiñana go Pabora ïmadï Bernabe aaduindadïrï ix makïdï iduitadai ïgai aidï.

Hechos 15:40

Daidi Pabora bai Silas sai oidana ïgai. Dai mai kia iimïkai ïgai bai go buaboitudadami gadáí Diuxi sai kïïga oigïdaitai nukatikana dai sai maakana gubukadadï, daidi bhodïrï iji ïgai.

Hechos 20:24

Dïï aanï mai buamï in ïrhidi gokïdï. Aanï gin bïïtarï maiti ïr ixtumaxi ix gin aiyagi mukigami ix cho ïpï. Dïï gia nato in ïrhidi aanï go aaduindagai ix makïdï gin maa Suxi Gïr Nukadakami. Ïgai gin tïjai ansai aagaiña aanï go Bhai Ïrhiaragai Ñoki ix makïdï aagai xïï kïï tuiga Diuxi gïr bïïtarï.

Hechos 20:32

Xibi daanïi aanï Diuxi sai ïgai gïn nukadakana dai sai kïïga ïïgiada aapimï Diuxi ñokidï ix makïdï aagai xïï kïï tuiga Diuxi. Diuxi ñokidï kïï gupurtudarhiga dai ïgaikïdï biaka antaada aapimï naana maaxi ixtumaxi kïï bhai maaxkami ix makïdï Diuxi bhai dáí maamaradï bïïtarï.

Hechos 4:36

Dai ïmo buaboitudadami Jose tïgidukatadai. Ïgai ïr pipiixaradï Lebikaru dai Chipreañdïrï oidakami ïgai. Dai go ojotoxikami Bernabe agaiña ïgai. Go Bernabe tïtiaradï itïiya ïrhidi ïmo abïnakiadami.

Romanos 12:8

Podukai ïpï ix makïdï gamaakiagi ñoki dai gaabïnakiadagi jaa xi kïïgioma buaboitudana, ïgai gï agai xi Diuxi gubukarhigakïdï gamaakiagi ñoki. Dai ix makïdï Diuxi maa gubukarhigai xi gamaakiagi ïgai ïïgi buxtuidadï Diuxi bïïtarï, gï agai xi mai tudadagi ïgai gï ibhïdagïrï gamaakaitai. Dai ix makïdï Diuxi maa gubukarhigai xi ïr ïmo bhaitï kïakamigadïkagi buaboitudadami gï agai xi kïïga aatabuadagi ïpï. Dai xi Diuxi maa ïmoko gubukarhigai xi maakiagi soiñi ix makïdï tïgitokagi jaa gï agai xi bïïxi bhai ïrhiaradïkïdï gamaakiagi ïgai.

1 Korintios 15:58

Kaxkïdï gin susukurhi abïr mai dagitokai buaboitudada. Daidi abïr kabami gïn aaga iduñi aaduindadï Gïr Nukadakami bïïxi gïn bhai ïrhiarakïdï. Kïïga maatï aapimï tudu sai duduakamu aapimï ïpamu bïïna darakatai aapimï Gïr Nukadakami dai kaxkïdï ïpï kïï maatï aapimï sai mai mos ïïgikïdï ibuayi aapimï gïn aaduindaga.

2 Korintios 1:17

Dïï gia ïma dukai gin tïgito aanï dai ka maiti gïn dibiji aidï. Dïï maiti gï agai mïsai po ïrhiada aapimï sai mos ïgikïdï ïma dukai gin tïgito aanï. Cho. Kïïga biakatadai aanï ix tuixi ka mai jii aanï gamo gïn dibidamu tudu. Daiñi, aanï mai ïpïan tuiga jaa óídakami ix makïdï ïïgi oidiña tïgibudadï dai yaatagïiña. Pokaitiña ïgai saidi iduña agaiña ixtumaxi dai gokiïrï mai buamï ïrhiditai ïma dukai gïn tïtïitoiña dai ka maiti ibuadana. Xïïxkadï pokaitadagi ïgai saidi iduña agaiña ixtumaxi gobai itïiya ïrhidi sai maiti iduña agaiña bhaiyoma.

2 Korintios 6:1

Gin aaduñi, aanï aatabuayi Diuxi ïmadï ibuadatai aaduindadï dai gin soikïi jaa buaboitudadami ïpï. Dai xibi bïïxi gïr ibhïdagakïdï gïn maakai aatïmï ñoki idi ojiïrï. Gïn tïgitobïrai xïï kïï tuiga Diuxi aapimï gïn bïïtarï gïn maakakai ïgai ix dukatai kïïgakïrï bubuakiagi aapimï tudu. Diuxi gïn maa ïmo kïïgadukami oidaragai tudu. Dai xibi kabami gïn abïnakidimi aatïmï sai kïïga óídakagi aapimï ixdukatai gï agai maamaradïkatai aapimï Diuxi. Ïma dukai maiti ibuadamu soiñi gïn bïïtarï bïïxi gobai ix makïdï gïn maa Diuxi.

Kolosenses 1:6

Dai go bhai ïrhiaragai aatagi ix makïdï kaï aapimï ka bïïxi aipakoga oidigi daama aijimi. Dai bïïxi aipakoga xako ajïi go bhai ïrhiaragai aatagi ïpï jaa óídakami buaboitudaiña ïpïan dukai aapimï. Dai go aatagi soikïi óídakami aipakoga sai ïma dukai óídakana ixdukai bhai ïrhidi Diuxi ïpï. Ïpïan dukai gïn soi aapimï ïpï aidïxi kaï aapimï dai buaboitu. Aidï tudu máí aapimï xïï kïï tuiga Diuxi gïn bïïtarï.

2 Timoteo 3:10

Dïï aapi gia mai ïpïamaaxi go bupuirumadami. Aapi gia kïïga máí ixtumaxi gï tïtïgidiña aanï dai gin ïpïan dukai ibuayi ïpï. Kïï maatï aapi ixtumaxi bïïtarï oidaga aanï dai aapi pomaaxi bïïtarï oidaga ïpï. Kïï gï tïgito nïidiña aapi xïï kïïga buaboitudai aanï Suxi Kristo dai nïidi aapi ïpï ix mai daadagitoiña aanï ix gin maitiagi soi ïrhiaragai dai ix oigïdai aanï jaa. Nïidi aapi sai apia oidiña aanï gïr buaboidaraga tomaxi soi taatamaiña aanï. Bïïxi gobai gï tïgito nïidi aapi dai gin ïpïan dukai buayi.

1 Pedro 5:12

Gin aaduñi, go Silbano ïgai dai gin soi ibuadatai aanï idi ojai. Dai ipïrhidi aanï sai maatïkagi aapimï sai ïgai ïr ïmo gïr aduñi Diuxi amadïrï dai kïïga sïïrhi aatabuayi ïgai. Idui aanï idi arhi ojai gïn bïïtarï gïn soiña in ïrhiditai sai tomaxi soimaaxi taatamaimi aapimï bïïxkïrï apia buaboitudana aapimï maatïkatai sai kïï tuiga Diuxi gïn bïïtarï. Daiñi, tami idi ojiïrï gïn maa aanï ñoki dai gïn aagidi ixtumaxi ïr buaboi saidi maatïkana aapimï sai Diuxi kïï tuiga gïn bïïtarï dai gïn maa oigaragai ix taatagi aapimï bïïxi gobai ix makïdï taatamaimi aapimï xibi. Kïïga ïr buaboi tudu sai kïï tuiga Diuxi gïn bïïtarï. Dai kaxkïdï apia kïïga buaboitudai aatïmï maatïkatai sai kïï tuiga Diuxi gïr bïïtarï tudu.

1 Juan 2:28

Kïïga gïn oigïdai aanï aapimï gin aaduñi, maamaradïkatai aapimï Diuxi. Apia abïr kïïga urabakatai óídaka Suxi Kristo ïmadï tudu sai podukai xïïxkadï dibiagi ïgai ka kïïga ïïmadagi aapimï dai mai xaïradagi aapimï.