Hebreos 9:28 - Northern Tepehuan Bible

²⁸ Dai podukai ïpï Suxi Kristo ïïgi gï dáí mosïkaxi ïmo imidagai ïmo daxdaragai dukai. Podui ïgai bhai buadatai mui óídakami bïïtarï soimaaxi ibuadamikatai óídakami. Dai gobai ix makïdï idui ïgai, gï dasakai ïgai mos arhi ïmo imidagai ïmo daxdaragai dukai óídakami bïïtarï, gobai bïïxkïrï bïïtarï namïaka agai. Dai gokiïrï ïpamu dibiagai ïgai dïï mai daamioma ïpamu bhai buada agaitai gïr soimaaxkamiga bïïtarï. Bhaiyoma dibiagai ïgai dai kïïgakïrï bubaida aagai bïïxkatai ix makïdï bhai ïrhiarakïdï nïnïraka ix dibiagi ïgai ïpamu. Ka bhai dui ïgai kïïgakïrï bubaidaragai bïïxkïrï bïïtarï tudu.

Tepehuan Northern: Diuusi ñiooquidʌ utuducami oodamicʌdʌ

²⁸ Poduucai ʌʌgi Suusi Cristo ali ʌmo imidagai muu tai aasi ʌʌradʌ sai poduucai Diuusi oigʌldiana oodami soimaascamigadʌ. Dai gooquiʌrʌ ʌpaamu divia agai Suusi Cristo dai vaidaquia agai vʌʌscatai ismaacʌdʌ nʌnʌra vaavoitudaitai.

Hebreos 9:28 ပူးပေါင်းရင်းမြစ်များ

Mataibo 20:28

—Gï agai xi gin ïpïan buadagi aapimï tudu. Aanï dibia tami oidigi daama ïmo pioñi dukai dai ïïgi gin tïïgida iñagai saidi soi gin buidadagi daidi gin muagi gin buidïrï bïïtïkamiga. Mukimu aanï dai kïïgakïrï bubaidamu mui óídakami. Podukai dasamu aanï namïgadï ix makïdï buaturhi ïgai soimaaxi ibuadamikatai ïgai tudu. Ïmo pioñi dukai aanï óídakami bïïtarï tudu tomaxi aanï ïr go Diuxi otosadï ix makïdï ïmo kïïrhi busai dai kïïga bia aanï sïïrhikami ix kabami tïanïdagi óídakami— itïtïdai.

Mataibo 25:31

Dai oi Suxi aatagidï daidi ikaiti, —Kïïga ïr buaboi sai imimu aanï tami oidigi daamaiñdïrï, aanï ix makïdï ïr go otosadï Diuxi ix makïdï ïmo kïïrhi busai. Dïï gia gokiïrï ïpamu dibiamu aanï bïïxi gin tïtïañikaruga ïmadï gatïanïda iñagaitai ïmo gïï Rey dukai tami oidigi daama.

Mataibo 26:28

—Idi bino ïr gin ïra gï dukami ix makïdï gï aaxta agai mukukai aanï mui odami bïïtarï. Gin ïrakïdï gï namïatulda agai go ñoki ix makïdï bhai buayi Diuxi odami ïmadï. Gin ïrakïdï oigïrhixikami bii agai mui óídakami soimaaxkamigadï gï aaxtakai gobai tudu— itïtïdai.

VUAANA 14:3

Daiñi kaxi an gïn aagidi sai bhai duñimu aanï xako óídakana aapimï amïka kaxkïdï gï maatï sai dibiamu aanï ïpamu gokiïrï dai gïn baidakamu ix amïka óídakana aapimï gin ïmadï.

Hechos 1:11

—Aapimï kïkïïrhi Galileana oidakami, ¿Tui mïxi mos gukakatai tïbagiamu nïayi? Daiñi, ïgai baa Suxi ix makïdï tïsai aapimï gïn saagidañdïrï ïpamu dibimu podukai ixdukatai tïï aapimï ix jii— itïtïdai ïgai.

Romanos 3:25

Mukukai Suxi Kristo kuruxiana Diuxi gïr tïtïgidi ixtuma gïgïbidaragai gïr ajïakatadai soimaaxi buadatai aatïmï. Ami kuruxiana Suxi aaxi ïradï bai oigïrhixikami biïna bïïxi buaboitudadami. Dai Diuxi gïr tïtïïgidi xïï sïïrhi aatabuadana ïgai ïïki abhiadïrï ïpï dai mai otoma bhamukuitai ïgai nïiditai soimaaxkami ix makïdï ibuadana óídakami ïkioma dai mai otoma gïgïbituldatai ïpï.

Romanos 5:15

Suxi mai ïpïan dui go Adán tudu. Daiñi, go oidaragai ix makïdï Diuxi gïr urhiñdi mai ïpïamaaxi go soimaaxkami ix makïdï idui go Adán. Go soimaaxkami ix makïdï idui Adán bua mukigami bïïxi óídakami bïïtarï. Dïï gia baamioma gubuka go oidaragai ix makïdï gïr urhiñdi Diuxi mos ïï kïï tuigakatai ïgai. Suxi Kristokïdï gïr urhiñdi ïgai ix dukatai muidutai aatïmï kïïgakïrï oidakagi bïïxkïrï bïïtarï tudu.

Romanos 6:10

Aidïxi muu Kristo, aidï abhiadïrï go soimaaxkami ka mai bia gubukarhigai ïgai bui. Ka mai mukimu ïgai tomarhi ïmo imidagai. Dai xibi bhai ïrhiatudai ïgai Diuxi oidakaradïkïdï.

Romanos 8:23

Dai aatïmï aijiïgïi ïpï tomaxi ka bia aatïmï xibi go ïpïgadadï oidaragai ix makïdï gïr maakai Diuxi. Diuxi Ibhïadï tudu ïr ïpïgadadï oidaragai ix makïdï Diuxi gïr maakai. Dïï tomaxi ïgai gïr ïmadï daja aatïmï mos nïnïraka kia xi Diuxi aagagi bïïxkatai buitapi xi aatïmï ïr maamaradï ïgai. Aidïpïrï buimu aatïmï utudui tukugai. Gobai nïnïraka aatïmï kia dai mos aijiïgïi gïr ïrabiadïrï.

Romanos 8:3

Go sïïrhikami ojixikami maiti ixtui ix kïïgakïrï gïr bubaidagi. Mai bia gobai gubukarhigai ixtukïdï gïr soiñagi. Ïïgi sobhikïiña aatïmï adaimïitai gïr ïkidadï tïgibudagai kaxkïdï. Dïï Diuxi gia kïïgakïrï gïr bubaitu. Ïgai otoi maradï sai biakana ïmo tukugai ïpïamaaxkami ix makïdï bia aatïmï soimaaxi ibuadami. Dai gï muatu ïgai gïr soimaaxkamiga bïïtarï. Podukai Suxi tukugadïkïdï Diuxi gamaitï go soimaaxkami bui.

1 Korintios 1:7

Dai kaxkïdï xibi ka bia aapimï bïïxi aïkatai go gubukarhigai ix makïdï maakai Diuxi go buaboitudadami. Dai xibi bïïxi bhai gïn ïrhiaragakïdï nïnïraka aapimï ix dibiagi Suxi Gïr Nukadakami.

1 Korintios 15:54

Xïïxkadï ka biakagi aatïmï gïr tukuga utudui aidï ka buaboi busaimu go ojai xakoga ikaiti sai, Diuxi ka maitï go mukigami bui.

1Tesalonicenses 1:10

Gïr aagidiña ïgai ïpï sai nïnïraka aapimï ix dibiagi Diuxi Maradï tïbagiañdïrï ïpamu. Kïïga buaboitudai aapimï tudu sai muu Suxi Kristo dai sai Diuxi duakaturhi ïpamu. Buaboitudai aapimï sai Suxi Kristo kïïgakïrï gïr bubaida agai sai maiti gïr aïna go gïgïbidaragai ix makïdï maaki agai Diuxi bïïxi go gaa oidigi daama óídakami.

2 Tesalonicenses 2:1

Gïr susukurhi, xibi gïn aagida rïrhidi ix tuma daibuña agai xïïxkadï dibiagi Suxi Kristo Gïr Nukadakami ïpamu. Aidï ïmpaidamu ïgai bïïxkatai aatïmï buaboitudadami sai mïï buidïrï aïna.

2 Timoteo 4:8

Dai kïï maatï aanï sai sïïrhi aatabuayi ïgai ix makïdï aagada agai ix bhai kïï idui aanï. Dai kïï maatï aanï ïpï sai bhai dasakami bia ïgai gin maitïki kïï sïïrhi oidakatai aanï. Dai mai xu xi mosïkaxi aanï gin maakimu ïgai maitïki ïpï. Bïïxi ix makïdï bhai ïrhiarakïdï nïnïraka ix dibiagi ïgai buimu maitïki ïpï.

Tito 2:13

Podukai gïr maatïturhimi Diuxi ix dukatai óídakana aatïmï xibi kia nïnïrakatai aatïmï xi aiyagi gïr bhai ïrhiaraga. Nïnïraka aatïmï xi dibiagi Suxi Kristo tudu ix makïdï ïr gïr Diuxiga. Aidï dibiakai ïgai gï maaxitudamu xïïxi ïr gïdukami.

Hebreos 1:14

Go tïtïañikarudï Diuxi mos ïr pipioñigadï kaxkïdï. Dai Diuxi otosaiña ïgai sai soikïiña ïgai odami ix makïdï kïïgakïrï bubuaki agai. Sai soikïiña ïgai go buaboitudadami tudu.

Hebreos 10:10

Kaxkïdï tudu Suxi gia idui ixtumaxi Diuxi ipïrhidi dasakai tukugadï gïr bïïtarï. Dai podukai ïkobai gïr bubaitu ïgai Diuxi bïïtarï. Gobai ïr go utudui sïïrhikami dai gobai gia mos arhi ïmo imidagai gï idui dai bïïxkïrï bïïtarï namïaka agai.

Hebreos 12:14

Kabami abïr gïn aaga gaagaitai ix dukatai xioma oidakagi jaa óídakami ïmadï kïïgakïrï gïn nïiditai aipakoga. Dai kabami abïr gïn aaga ïpï oidakatai ix dukatai gï agai xi oidakagi odami ix makïdï ïkobai daraka go soimaaxkamiañdïrï. Kaxkïdï tudu xorai mai ïkobai dakagi soimaaxkamiañdïrï mai biakamu oigaragai ix aiyagi Diuxi Gïr Nukadakami buitapi.

Hebreos 2:3

Dïï gia go utudui ñoki aagaitai go kïïgakïrï bubaidaragai bamioma namïga xi bhai go sïïrhikami ïkidadï. Gïr Nukadakami ix makïdï adaama namïga ïgai dai gïr aiturhi go utudui ñoki tudu dai mai xu xi go tïtïañikarudï ïgai dai gïr aiturhi gobai. Kaxkïdï bamioma namïga go utudui ñoki xi bhai go sïïrhikami ïïkidadï. Diuxi Maradï ïgai dai xibiapioma gïr aiturhi go utudui aatagi tudu aagaitai go kïïgakïrï bubaidaragai. Dai naana maaxi oidaga maaxidaragai saidi ïr buaboi aatagidï Suxi Kristo. Daiñi, kaxi gïr aagidakai ïgai go utudui aatagi bai go odami ix makïdï kaïkana kïïga gïr aagidiña ïpï saidi ïr buaboi gobai. Dai Diuxi ibuadana naana maaxi maaxidaragai ïpï sai podukai ïpï maatïkana aatïmï saidi ïr buaboi go utudui aatagi. Dai ïkobïrakoga xïïxkadï ipïrhiadagi Diuxi gamamaakai ïgai naana maaxi gubukarhigai go odami ix makïdï buaboitudai go aatagi ïpï. Diuxi Ibhïadï ïgai dai mamaakai go naana maaxi gubukarhigai buaboitudadami tudu. Dai nïiditai aatïmï sai go buaboitudadami biakana gubukarhigai Diuxi amadïrï saidi ibuada ïgai naana maaxi aaduindagai, gokïdï maatï aatïmï saidi ïr buaboi go aatagi ix makïdï buaboitudai ïgai ïpï. Naana maaxikïdï gï maatï saidi ïr buaboi go aatagi tudu. Sïïrhikïdï namïga go ñoki aagaitai go kïïgakïrï bubaidaragai tudu. ¿Kaxkïdï dukatai kïïgakïrï bubuakïna aatïmï ix mai buaboitudagi aatïmï? Gïr Nukadakami ïgai dai gïr aiturhi gobai di.

Hebreos 4:15

Daiñi, aatïmï óídakami sïïrhikïdï mai gupuka go soimaaxkami buidïrï. Dai kaxkïdï tïgito aatïmï xorai gïr soikïdagi. Dai Suxi Kristo ïgai dai gïr soikïi gabhaitïkïakami dadaxdamikatai ïgai. Dai ïgai kïïga maatï xïï mai gupuka aatïmï. Kïïga maatï ïgai ix taadaga xïïxkadï gïr tïgibudaga gïr abïnakiadagi ix mai kïïga ïïgiada aatïmï Diuxi tudu. Bïïxi taata ïgai gobai ix xïïxi taatamaiña aatïmï tudu. Dai tomaxi pomaaxi taata ïgai bïïxkïrï mai soimaaxi idui ïgai tomarhi ïmo imidagai. Dai bïïxkïrï ïgai tomaxi mai soimaaxi idui bïïxkïrï soi gïlda gïr nïidiña ïgai mai gupukatai aatïmï. Ïmo oidigi daama oidakami odami ïgai ïpï kaxkïdï.

Hebreos 5:9

Kïïga ïïgidi ïgai tudu tomaxi soimaaxi taata dai podukai bïïxi naato idui ïgai bïïxi aïkatai ixtumaxi gï agaitadai saidi ïr go bhaitï kïakïdï dadaxdadamikana ïgai gïr bïïtarï. Dai aidïxi kaxi iduitadai ïgai bïïxi ixtumaxi gï agai aidï gia Diuxi maa go sïïrhikami saidi ïr dadaxdadamikana ïgai bïïxkïrï bïïtarï. Dai kaxkïdï xibi kïï bhaiga Suxi Kristo ix kïïgakïrï bubiadagi odami bïïxkïrï bïïtarï ix makïdï ïïgiadagi. Diuxi ïgai dai maa sïïrhikami go Suxi tudu ïpïan dukai xi maa ïgai sïïrhikami go Melkisedek ïïki.

Hebreos 7:27

Daiñi, go ïïkidadï bhaitï gukakamigadï go dadaxdadami biakana ix bïïx tasai daxdadagi buxtaki. Po buadana ïgai bhai buada ïrhiditai ïïgi soimaaxkamigadï bïïtarï dai go óídakami soimaaxkamigadï bïïtarï ïpï. Dïï gia Suxi mai bia xi pobuadagi. Ïgai gia mosïkaxi ïmo daxdaragai idui ix makïdï bïïxkïrï bïïtarï namïga. Podukai idui ïgai aidïxi ïïgi gï dáí ïgai ïmo daxdaragai dukai gïr soimaaxkamiga bïïtarï. Ïgai tudu ïr go dadaxdadami bïïxi adaama kïïgadukïdï ix makïdï tïgitokatadai aatïmï.

Hebreos 9:25

Dai maiti gï agai xi muiyoko gï daxdadagi Suxi Kristo ix dukatai ibuadana go dadaxdadami go buxtaki. Umiïrï bapakïiña go bhaitï kïakamigadï go dadaxdadami go tukabiïrï xako bïïxi adaama xadutudikami tukabi tïgidu tudu dai ami dadaxdaiña ïgai ïradï buxtaki.

1 Pedro 2:24

Aatïmï gïr ajïakatadai gïgïbidaragai soimaaxi ibuadamikatai aatïmï tudu dïï gia Suxi taata go gïgïbidaragai gïr bïïtarï mukukai kuruxiana. Po dui ïgai saidi ka maiti gïr tïanïdagi go soimaaxkami. Ïpïan dukami gïr bia ïgai ïmo mukiadï ix makïdï ka mai bhaiga xi ïïgiadagi go soimaaxkami tudu. Ka mai bia aatïmï xi ïïgiadagi go soimaaxkami tudu ka koidadï dukai biïkai aatïmï go soimaaxkami bïïtarï. Po dui ïgai sai ka ïma dukai óídakagi aatïmï ibuadatai ixtumaxi ipïrhidi Diuxi. Gï muragitu ïgai saidi kïïgakïrï bubuakïna aatïmï tudu.

1 Pedro 3:18

Asta Suxi Kristo soimaaxi taata kïïga ibuadatai ïgai tudu. Muu ïgai bhai buadatai gïr soimaaxkamiga bïïtarï. Dai podukai bhai dui ïgai gïr bïïtarï bïïxkïrï bïïtarï dai ka mai biïga bamioma daxdaragai xibi. Kïïga buañixikami ïgai tudu dai muu ïgai aatïmï soimaaxi ibuadami gïr bïïtarï sai kïï biïna aatïmï Diuxi ïmadï. Gï muatu tukugadï tudu dïï gia gï duakaturhi ïpamu Ibhïadï.

2 Pedro 3:12

Gï agai sai bhai ïrhiarakïdï nïnïrakagi aatïmï ix aiyagi ix tuigako ugitituda agai Diuxi bïïxi aïkatai ixtumaxi. Aidï ïmo gïï táíkïdï ugiti agai go tïbagi dai bïïxi ixtumaxi ami oidaga mïi agai.

1 Juan 3:2

Gin aaduñi, kaxi ïr maamaradï aatïmï Diuxi xibi. Dïï gia maiti gïr tïtïïgidi Diuxi kia ix maaxka ragai aatïmï xïïxkadï dibiagi Suxi Kristo. Dïï gia kïïga maatï aatïmï sai xïïxkadï dibiagi Suxi Kristo kïïga nïijadamu aatïmï dai maatïkamu ix maaxi ïgai. Dai mos nïiditai aatïmï ix maaxi ïgai aidï gia ka ïpïan mamaaxkamu aatïmï ïgai.

1 Juan 3:5

Dai kïïga maatï aapimï sai Suxi Kristo mai soimaaxi ibuayi tomarhi ïmo imidagai. Dai bhaiyoma dibia ïgai tami oidigi daama buanada agaitai gïr soimaaxkamiga.

Udaxi 1:21

Daiñi, Diuxi kïïga gïn oigïdai. Dai gï agai sai buaboitudada aapimï ix kïïga gïn oigïdai ïgai. Bïïx tasai abïr podukai óídaka aapimï, buaboitudatai sai Diuxi gïn oigïdai tudu. Dai kïïga buaboitudaitai abïr nïnïraka saidi Gïr Nukadakami Suxi Kristo gïn tïïgidana xïï kïï tuiga ïgai gïn bïïtarï. Gïn maakai ïgai go bïïxkïrï bïïtarï oidakaragai tudu mos ïï kïï tuigakatai ïgai gïn bïïtarï.

Apokalipsis 1:7

Kïïga gï tïgito kaïka idi ñoki, daiñi, ayimu ixtuigako dibiamu Suxi Kristo iikomai saagida imïitai dai bïïxi óídakami nïijadamu. Asta go odami ix makïdï sïi kuruxiana xixakai bïïxi nïijadamu ïpï. Dai bïïxi oidigi daama óídakami kabami suanïdamu nïiditai. Kïïga ïr buaboi xi pobai gï duñagai gobai.