Hebreos 9:27 - Northern Tepehuan Bible

²⁷ Daiñi, odami mos arhi ïmo imidagai mumukui. Dai gokiïrï arhi ïmo imidagai aagada agai Diuxi ix bhai kïïga dui ïgai xiïpï xi mai kïïga dui ïpï.

Tepehuan Northern: Diuusi ñiooquidʌ utuducami oodamicʌdʌ

²⁷ Oodami ali ʌmojoco cooyi dai gooquiʌrʌ Diuusi nʌidamu ismaacʌdʌ ʌrcʌʌga ivuaadami dai ismaacʌdʌ ʌrmaicʌʌga ivuaadami.

Hebreos 9:27 ပူးပေါင်းရင်းမြစ်များ

Genesis 3:19

—Daiñi kïïrhi— itïtïdai —Xibi kabami bajuradamu aapi dai gamaitïmu ixtukïdï oidakagi asta xudu ka mukiagi dai dïbïrai gï naatoagi aapi ïpamu. Mos ïr dïbïraiñdïrï duñixikami aapi di dai dïbïrai gï naatomu aapi ïpamu pïx xudu mukiagi— itïtïdai.

Lukas 20:32

Dai gokiïrï muu go oki ïpï.

Hechos 17:31

Daiñi, Diuxi ka dáí ïmo kïïrhi xi ïgai nïijadamu oidigi daama óídakami dai ïgai aagadamu ix makïdï ïr kïïga ibuadami dai ix makïdï ïr soimaaxi ibuadami. Kïï nïijadamu ïgai dai sïïrhi aagadamu. Dai Diuxi ka dáí ix tuma tasïrï pobï gï duñagai gobai ïpï. Kïï maatï aatïmï xi ïr buaboi ka agai gobai, Diuxi duakaturhi go kïïrhi ïgai aidïxi mutadai ïgai kaxkïdï— itïtïdai Pabora.

Romanos 2:5

Dïï sïïrhikïdï mai tïtïkaidaga aapimï dai ïïgi gïn abhana dadasai aapimï gïïpioma gïgïbidaragai. Ayimu tudu ixtuigako Diuxi gatïtïïgida agai xïï kabami bhamu ïgai soimaaxi iibhïdakami bui. Aidïpïrï Diuxi aagada agai xorai biaka agai gïgïbidaragai dai xorai mai biaka agai. Sïïrhi aagada agai aidï.

Romanos 5:12

Go Adankaru soimaaxi dui ïïki dai podukai ayi go mukigami oidigi daama dai xibi go mukigami bïïxi óídakami ajïi soimaaxi buadatai óídakami.

1 Korintios 4:5

Kaxkïdï abïr mai ïïgi aagada aapimï ïmai ix bhai kïïga aatabuayi mai kia dibiakai Suxi Kristo. Dagitobïrai bhaiyoma Gïr Nukadakami sai ïgai aagana dibiakai ïgai. Ïgai tudu maaxi aagamu ixtumaxi ïxtotai ibuadana odami dai asta tïgibudadï bïïxi maaxi aagamu ïpï dibiakai. Aidï gia Diuxi ïgai dai aagidamu ñoki bïïxi pipioñigadï ïïgi ix makïdï ñoki ajïakagi ïgai. Aagidamu ïgai bïïxkatai sai kïï idui aidï.

2 Korintios 5:10

Kïïga maatï aatïmï tudu saidi biakamu aatïmï bïïxkatai xi amïka baan gukibagi buidïrï Suxi. Ami buidïrï gukibamu aatïmï tudu xako aagada agai Suxi ix bhai kïïgadu ix makïdï idui aatïmï tami oidigi daama xiïpï ix mai kïïgadu ïpï dai gïr maakimu ïgai ixtumaxi gïr ajïakagi bïïxkatai aatïmï.

2 Timoteo 4:1

Aapi Timoteo, gï tïanïi aanï pïsai gatïtïïgiada aapi Diuxi ñokidï. Gï agai xi apia gatïtïïgidiña aapi tomax tuigako, tomaxi po ïrhiada maaxkagi ïïmo imidagai ix maiti gï agai ix gatïtïïgiadagi, aapi mos apia gatïtïïgiada gobai tomax dukai. Gï agai xi mamaakada aapi ñoki go gaa sai maatïkana xïïxkadï mai kïïga ibuayi. Dai gï agai xi bui ñokada aapi dai asta bhagaidadagi ix makïdï soimaaxi ibuadagi ïpï. Dïï gia tomaxi gï agadagi xi bhagaidagi maiti gï agai xi ojodada aapi. Gï agai xi apia tïtïgiada aapi ñoki dai abïnakiadagi ïgai bhaiyoma. Daiñi, kïï maatï aapi sai xïxkadï dibiagi Suxi Kristo gatïanïda agaitai sai aagadamu ïgai xorai kïïga idui dai xorai mai kïïga idui dai ix tuma ajiagai odami. Aagadamu bïïxkatai bïïtarï tudu, koidadï bïïtarï dai ïpï ix makïdï kia duduakagi dibiakai ïgai. Dai kaxkïdï xibi gï tïanïi aanï gin kaïkatai Diuxi ïmadï Suxi Kristo pïsai kïïga tïtïgiada aapi Diuxi ñokidï.

Hebreos 10:27

Ix modukai maiti ipïrhiada ïgai ix buaboitudagi aidï gia ka mos duadimuka agai ïgai nïnïrakatai sai Diuxi aagadagi ix bhai kïïga dui ïgai ix mai kïïga dui ïpï. Dai gokiïrï taatamu ïgai gïgïbidaragai go gïï taiyïrï xako xia gïn duñimu go buidïrï bïïtïkamigadï Diuxi.

Hebreos 6:2

Ka máí aatïmï go bakuanaragai aatagi ïpï. Dai ka máí aatïmï ix tuixi go bhaitï gukakami buaboitudadami go odami daama darasai ïkadï. Ka máí aatïmï ïpï sai duduaka agai koidadï dai sai Diuxi aaga agai xorai kïï dui dai xorai mai kïï dui. Bïïxi gobai ka máí aatïmï aidïxi tukamïrï buaboitu aatïmï.

1 Juan 4:17

Dai bïïx tasai bamioma kïïga oigïdai aatïmï jaa dai bamioma oigïdai aatïmï Diuxi ïpï uraba óídakatai aatïmï ïgai. Kaxkïdï mai bia aatïmï ixtukïdï duduadikudagi ix kaitiadagi Diuxi xïxkadï aagagi ïgai ix bhai kïï dui aatïmï. Ïpïan dukai óídaga aatïmï Suxi Kristo kaxkïdï, oigïdatai aatïmï Diuxi dai oigïdatai aatïmï jaa ïpï.

Udaxi 1:15

—Daiñi, Diuxi maatï bïïxi go soimaaxkami ix makïdï ibuadana go odami ix makïdï mai ïïgidi Diuxi. Dai maatï ïgai xïxkadï galnaxi ñoki aagagi ïgai buidïrï Diuxi ïpï. Dai ka dibiakai aagada agai Diuxi ixtuma gïgïbidaragai aji agai bïïxkatai ïgai— ikaiti go Enok ïïki.

Apokalipsis 20:11

Dai bhodïrï nïidi aanï ïmo gïï daikarui tojakami dai ami daikaruana daja Diuxi. Dai maiti ixtui go oidigi dai go tïbagi xi ami dakagi Diuxi buitapi mos ïï gubuakamikatai ïgai dai mos ïï gïdukatai xi kaxkïdï mai tiputa go oidigi ïmadï tïbagi ami dakatai Diuxi.