Hebreos 7:27 - Northern Tepehuan Bible

²⁷ Daiñi, go ïïkidadï bhaitï gukakamigadï go dadaxdadami biakana ix bïïx tasai daxdadagi buxtaki. Po buadana ïgai bhai buada ïrhiditai ïïgi soimaaxkamigadï bïïtarï dai go óídakami soimaaxkamigadï bïïtarï ïpï. Dïï gia Suxi mai bia xi pobuadagi. Ïgai gia mosïkaxi ïmo daxdaragai idui ix makïdï bïïxkïrï bïïtarï namïga. Podukai idui ïgai aidïxi ïïgi gï dáí ïgai ïmo daxdaragai dukai gïr soimaaxkamiga bïïtarï. Ïgai tudu ïr go dadaxdadami bïïxi adaama kïïgadukïdï ix makïdï tïgitokatadai aatïmï.

Tepehuan Northern: Diuusi ñiooquidʌ utuducami oodamicʌdʌ

²⁷ Ʌpapaali baitʌguucacamigadʌ Levícaru cajiudadʌ ʌgai viaa iscoodadagi vustaqui dai dadasdiadagi Diuusi. Ʌgai povueeyi sai Diuusi oigʌldiana soimaascamigadʌ ʌgai ʌpʌga dai gotorʌ oodami soimaascamigadʌ. Dʌmos Suusi Cristo maiʌpan duucai ivueeyi ʌgai. Suusi Cristo tomali ʌmo imidagai maisoimaasi ivueeyi cascʌdʌ maiviaacatadai iscoodadagi vustaqui sai Diuusi oigʌldiana. Tomali maiviaa iscoodadagi vustaqui ʌoodami vʌʌtarʌ sai Diuusi oigʌldiana soimaascamigadʌ baiyoma ʌgai gʌmuaatu curusiaba vʌʌsi oodami vʌʌtarʌ. Ʌgai Diuusi dasdiaradʌ ducami. Mosʌmo imidagai podui Suusi Cristo. Daidʌ ʌpapaali baitʌguucacamigadʌ Levícaru cajiudadʌ ivuaadatai gʌaa duiñdagai vʌʌs tasai.

Hebreos 7:27 ပူးပေါင်းရင်းမြစ်များ

Lebitiko 16:11

—Gï agadamu xi go Aaron muagi go turu dai gin daaxida gobai bai ïgaikïdï oigïlda kïkibagi ïgai soimaaxkamigadïkïdï ïmadï modukai aaduñdï ïpï ix makïdï kiidïrï óídaga— itïtïdai.

Romanos 6:10

Aidïxi muu Kristo, aidï abhiadïrï go soimaaxkami ka mai bia gubukarhigai ïgai bui. Ka mai mukimu ïgai tomarhi ïmo imidagai. Dai xibi bhai ïrhiatudai ïgai Diuxi oidakaradïkïdï.

Efesios 2:22

Dai xibi aapimï ix makïdï maiti ïr judidiu bïïna daraka Suxi Kristo ïpï. Xibi aapimï ojodai dukai gïn darasaka Diuxi kiidïrï ïpï. Podukai aatïmï bïïxkatai ïr tutuidadï Diuxi kiidï dukai xako oidaga ïgai gïr ïrana dakatai Diuxi Ibhïadï.

Efesios 5:2

Kïïga abïr oigïada jaa aidï. Daiñi, Suxi Kristo gïr oigïdai kaxkïdï ïïgi gï dagito ïgai sai gï muatudana ïmo daxdaragai dukai. Podukai bhai dui ïgai gïr bïïtarï soimaaxi idunakai aatïmï. Dai Diuxi kïï bhai ïlda tïï Suxi Kristo daxdaradï. Kïï xigian dukai ubagi ïgai.

Tito 2:14

Suxi Kristo tudu ïgai dai gï dagito ix gï muatudagi kïïgakïrï gïr bubaiditai gïr soimaaxkamiañdïrï. Podukai bhai dui ïgai saidi ïr aaduñdïkana aatïmï Diuxi kïïga buañixikami gïr biakai ïgai. Dai xibi ka kïïgakïrï buabuakïkai aatïmï ipïrhidi ïgai sai bïïxi gïr bhai ïrhiarakïdï ibuadagi aatïmï ixtumaxi ïr kïïga.

Hebreos 5:1

Daiñi, kïïga gï maatï sai bïïxi go kïkïïrhi ix makïdï ïr bhaitï gukakamigadï go dadaxdadami ïr ïko bubaidadï Diuxi. Ïïgi go kïkïïrhi aaduñdïañdïrï dadasaiña Diuxi go bhaitï gukakami dadaxdadami tudu. Dadasaiña ïgai saidi ibuadana ïgai aaduñdï bïïtarï ixtumaxi gï aagadagi Diuxi buitapi. Diuxi mamaakaiña sïïrhikami go kïkïïrhi ïgai saidi buapidiña oidaragai Diuxi go odami bïïtarï dai sai dadaxdiña Diuxi buxtaki go óídakami soimaaxkamigadï bïïtarï ïpï.

Hebreos 5:3

Kaxkïdï mai mosïkaxi go odami soimaaxkamigadï bïïtarï biakatadai ïgai xi ibuadagi daaxdaragai. Biakatadai ïgai xi ibuadagi daaxdaragai ïïgi soimaaxkamigadï bïïtarï ïpï.

Hebreos 8:4

Dai xibi tïbagiana ibuayi ïgai aaduindadï. Ix tami oidigi daama dakamudai ïgai kia aidï gia maiti ïr dadaxdadamikamudai ïgai. Kaxkïdï tudu tami oidigi daama kaxi oidaga go ïïkidadï dadaxdadami dai ïgai kaxi ibuayi daxdaragai Diuxi bïïtarï. Kaxi ibuayi ïgai ix makïdï aagai go Moises sïïrhikamigadï. Mai biïga ïmai xi daamioma ibuadagi ïgalbaaxi aaduindagai tudu.

Hebreos 9:12

Dai aidïxi baa ïgai amïka bhïkai ïgai ïrai ïpï ïmo daxdaragai bïïtarï. Dïï mai xu xi bhïkai ïgai ïradï buxtaki. Dukami mai bhïkai ïgai ïradï xixibato ïmadï baakaxi maamaradï. Ïïgi ïradï bhïkai ïgai bhaiyoma dai podukai bhai dui ïgai kïïgakïrï bubaidaragai gïr bïïtarï. Kaxkïdï mos arhi ïmo imidagai baa ïgai ïradïkïdï dai ka maiti gï agai xi muiyoko bapakïdagi ïgai. Ka bhai duñixi go kïïgakïrï bubaidaragai bïïxkïrï bïïtarï tudu.

Hebreos 9:14

Dïï gia xibi Diuxi Ibhïadï ix makïdï bïïxkïrï bïïtarï oidaga, maa gubukarhigai go Suxi Kristo sai ïïgi gï dasana ïgai ïmo daxdaragai dukai. Dai Suxi gia mai bia toma lïïchi soimaaxkami abhana dai muu ïgai ïmo daxdaragai dukai gïr bïïtarï sai podukai kïïga buanaiña ïgai gïr soimaaxkamiga. Ïgai gia mai xu xi mosïkaxi buanai gïr tutukuga ix dukai ibuadana go ïïkidadï dadaxdadami. Suxi Kristo gia asta gïr ibhïdaga bïïxi buañixikami biayi. Kïïga buanai ïgai bïïxi go naana maaxi ixtumaxi ix makïdï ibuadana aatïmï ix makïdï maiti ïr soiñikana. Buañixikami gïr biayi ïgai sai bhaigakana aatïmï xi ibuadagi xadutudaragai Diuxi bïïtarï tudu. Gïïpi bamioma kïïgadukami idui Suxi Kristo daaxdaragai xi bhai go ïïkidadï dadaxdadami. Suxi daxdaradï gia mai biïga toma lïïchi ixtukïdï kïïgakïrï gïr buanadagi tudu.

Hebreos 9:25

Dai maiti gï agai xi muiyoko gï daxdadagi Suxi Kristo ix dukatai ibuadana go dadaxdadami go buxtaki. Umiïrï bapakïiña go bhaitï kïakamigadï go dadaxdadami go tukabiïrï xako bïïxi adaama xadutudikami tukabi tïgidu tudu dai ami dadaxdaiña ïgai ïradï buxtaki.

Hebreos 9:26

Dïï gia Suxi Kristo aaduindadï ix makïdï idui ïgai mai ïpïamaaxi go ïïkidadï dadaxdadami aaduindadï. Xi ïpïamaaxkamudai gobai aidï gia biakmudai Suxi xi dudatai ibuadagi daxdaragai aidïxi abhiadïrï kïïkiba go oidigi asta xibi ukami. Dïï gia mai pomaaxi Suxi Kristo aaduindadï tudu. Ïgai gia mosïkaxi ïmo imidagai dibia tami oidigi daama xibi ka ugiti agaitai oidigi. Dai aidïxi dibia ïïgi gï dáí ïgai ïmo daxdaragai dukai mosïkaxi ïmo imidagai dai podukai maigobai dáí ïgai gïr soimaaxkamiga bïïxkïrï bïïtarï.

Hebreos 9:28

Dai podukai ïpï Suxi Kristo ïïgi gï dáí mosïkaxi ïmo imidagai ïmo daxdaragai dukai. Podui ïgai bhai buadatai mui óídakami bïïtarï soimaaxi ibuadamikatai óídakami. Dai gobai ix makïdï idui ïgai, gï dasakai ïgai mos arhi ïmo imidagai ïmo daxdaragai dukai óídakami bïïtarï, gobai bïïxkïrï bïïtarï namïaka agai. Dai gokiïrï ïpamu dibiagai ïgai dïï mai daamioma ïpamu bhai buada agaitai gïr soimaaxkamiga bïïtarï. Bhaiyoma dibiagai ïgai dai kïïgakïrï bubaida aagai bïïxkatai ix makïdï bhai ïrhiarakïdï nïnïraka ix dibiagi ïgai ïpamu. Ka bhai dui ïgai kïïgakïrï bubaidaragai bïïxkïrï bïïtarï tudu.

Hebreos 9:7

Dai mosïkaxi go bhaitï kïakamigadï go dadaxdadami biakana oigaragai xi bapakïdagi go bïïxi adaama xadutudikïdï tukabiïrï ix makïdï tukabioma daja. Umiïrï bapakïiña ïgai ami dai biakana xi ami buapagi ïmo ïrai daxdaragai ixtukïdï bhai duñagi soimaaxkamigadï dai go gaa óídakami soimaaxkamigadï ïpï. Ïma dukai mai tipukatadai oigaragai xi bakiagi ami.