Hebreos 7:19 - Northern Tepehuan Bible

¹⁹ Go ïïkidadï sïïrhikami toma lachi mai soi óídakami ix kïïga biïna Diuxi ïmadï tudu. Dïï xibi gia mamaakai Diuxi sïïrhikami go Suxi Kristo saidi ïr dadaxdadamikana. Dai podukai gïr maa ïgai ïmo kïïgadukamioma buaboidaragai ix makïdï gia kïïga gïr soikïi dai kïï kabaka. Kïïga maatï aatïmï tudu sai go utudui buaboidaragaikïdï gia kïïga bia aatïmï oigaragai ix aiyagi Diuxi buitapi dai biagi ïmo urabagi ïgai ïmadï.

Hebreos 7:19 ပူးပေါင်းရင်းမြစ်များ

VUAANA 1:17

Daiñi go Moiseskarukïdï gïr maatïturhi Diuxi ïmo ixtumaxi kïïgadukami. Gïr maatïturhi go sïïrhikami ojixikami. Dïï gia Suxi go Ga Tïanïdamikïdï gïr maatïturhi Diuxi ixtumaxi gïïpi bamioma kïïgadukami. Ïgaikïdï gïr maatïturhi Diuxi xïï kïï tuiga ïgai dai xïï kïï sïïrhi ñokai.

VUAANA 14:6

Daidi Suxi itïtïdai, —Aanï tudu ïr go boi ixtukïdï ajïi odami xako daja Diuxi. Mosïkaxi aanïkïdï mamaatïrïi odami ixtumaxi ïr buaboi. Dai mosïkaxi aanïkïdï kïïgakïrï óídaga odami ïpï. Mai tipu xorai aiyagi mïïka xako daja Diuxi ix maiti gin buaboitudadagi ïgai.

Hechos 13:39

Bïïxi odami ix makïdï buaboitudagi go Suxi Kristo ka mai bia soimaaxkami gïn abhana ixtukïdï gïn aiyagi gïgïbituldaragai. Dïï go Moiseskaru ojadï sïïrhikami xadïrï podukai kïïgakïrï bubaidana odami sai ka mai tipukana soimaaxkami gïn abhana. Kaxkïdï ka maiti ïr gïpiïrï bïïtïkamikagi ïgai.

Romanos 5:2

Buaboidakai aatïmï Suxi Kristo baa aatïmï ïmo gïdukami bhai ïrhiaragïrï ix makïdï gïr maa Diuxi gïr oigïdaitai. Dai xibi bhai ïrhiarakïdï nïnïraka xi urabagi aatïmï Diuxi xudu gï maaxitudagi ïgai xïïxi ïr gïïdukami.

Romanos 7:7

Ïïmo odami potïiya antaada nïidakai idi ojai sai mai kïïgadu Diuxi sïïrhikamigadï. ¡Maiti ïr buaboi gobai! Kïïgadu aba Diuxi sïïrhikamigadï. Ïgaikïdï tudu mamaatïrïi aanï ixtumaxi ïgai daidi ïr soimaaxkami. ¿Dukatai maatïkana aanï aidï saidi ïr soimaaxkami xudu biaka in ïrhiada aanï buxtuidadï ïmai ix mai tipukamudai ïmo sïïrhikamigadï Diuxi ix makïdï gïr daidi ix po buada aatïmï?

Romanos 8:3

Go sïïrhikami ojixikami maiti ixtui ix kïïgakïrï gïr bubaidagi. Mai bia gobai gubukarhigai ixtukïdï gïr soiñagi. Ïïgi sobhikïiña aatïmï adaimïitai gïr ïkidadï tïgibudagai kaxkïdï. Dïï Diuxi gia kïïgakïrï gïr bubaitu. Ïgai otoi maradï sai biakana ïmo tukugai ïpïamaaxkami ix makïdï bia aatïmï soimaaxi ibuadami. Dai gï muatu ïgai gïr soimaaxkamiga bïïtarï. Podukai Suxi tukugadïkïdï Diuxi gamaitï go soimaaxkami bui.

Galatas 3:21

Daiñi, Diuxi kïïgakïrï nïidi odami buaboitudakai ïgai Suxi Kristo dai mamaakai ïgai gubukarhigai sai kïïgakïrï óídakana bïïxkïrï bïïtarï. Gobai ïr go bhai ïrhiaragai ix makïdï agaitadai Diuxi ïïki aidïxi aagidi ïgai go ñoki go Abraamkaru. Dïï gia go sïïrhikami tomarhi ïmo imidagai mai maa gubukarhigai odami sai kïïgakïrï óídakagi. Xi go sïïrhikami soiñamudai odami xi kïïgakïrï óídakagi aidï gia kïïgakïrï nïijadamudai Diuxi odami ïïgiditai odami go sïïrhikami. Dïï maiti ïr podukai. ¿Gobai ix tïiya ïrhidi sai gïn bupui bïïtïkan duu go sïïrhikami ïmadï go ñoki ix makïdï aagidi Diuxi go Abraamkaru aagaitai ïmo bhai ïrhiaragai? Cho. Xadïrï. Bhaiyoma go sïïrhikami ïgai dai maatïturhi bïïxi oidigi daama óídakami sai ïr soimaaxi ibuadami. Go sïïrhikamikïdï mamaatïrïi odami saidi ïr gïpiïrï bïïtïkami. Ïgaikïdï mamaatïrïi odami sai tïgito ïmo kïïgakïrï bubiadami tudu. Soikïi gobai odami sai buaboitudaiña Suxi Kristo tudu. Podukai go sïïrhikami ïmadï aatabuayi go ñoki ix makïdï aagidi Diuxi go Abraam ïïki aagaitai go bhai ïrhiaragai.

Galatas 3:24

Ïmo tïtïgiadami ñoki duu gïr bïïtarï go sïïrhikami tudu. Gobai gïr tïtïgidi sai buañixikami bipiïyi aatïmï buaboitudakai aatïmï Suxi Kristo.

Efesios 3:12

Suxi Kristo kïïga idui ixdukatai Diuxi gï tïgito ïïki kaxkïdï aatïmï xibi mai duadimudakïdï aatagïi Diuxi ïmadï mos buaboidakai aatïmï Suxi Kristo. Xibi kïïga bia aatïmï ïïmadaragai ïmadï Diuxi.

1 Tomoteo 1:1

Bhaiga Timoteo. Aanï ïr Pabora dai gï otoxdi idi ojai. Kïï maatï aapi sai aanï ïr otosadï Diuxi ïmadï Suxi Kristo. Otosadï aanï Diuxi ix makïdï kïïgakïrï gïr bubaitu dai otosadï aanï Suxi Kristo ïpï ix makïdï nïnïraka aatïmï sai ïpamu dibiana. Ïgai bïï gokatai gin tïjai ansaidi ïr otosadïkana.

Hebreos 10:1

Gin aaduñi, gï agai xi maatïkagi aapimï sai oidaka agai naana maaxi kïkïïgadukami ixtumaxi gokiïrioma kia. Dai go ïïkidadï sïïrhikami mosïkaxi ïr ïmo maaxidaragai gï dukami bïïtarï go kïkïïgadukami ixtumaxi ix makïdï dadi agai. Go ïïkidadï ixtumaxi ix makïdï aagai go sïïrhikami maiti ïr go kïkïïgadukami ixtumaxi ix makïdï dadi agai tudu. Go odami ix makïdï xadutuada ïrhidi Diuxi oiditai go ïïkidadï sïïrhikami bia xi apia umiïrï ibuadagi daxdaragai tudu. Dïï modukai mai kïïgakïrï buañixikami bipiïyi ïgai Diuxi bïïtarï. Go sïïrhikami ïïkidadï mai bia gubukarhigai xi kïïgakïrï buañixikami biagi odami kaxkïdï.

Hebreos 11:40

Aatïmï gïr tïtïitoitadai Diuxi aidï, kaxkïdï mai otoma maa ïgai ixtumaxi aagidi. Podukai gï tïgito ïgai sai bamioma kïïgadu aatïmï gïr bïïtarï xi go ïïkidadï buaboitudadami nïnïrakagi kia asta xïxkadï bhïiyagi aatïmï ïpï ixtumaxi bia Diuxi gïr bïïtarï. Podukai gï tïgito Diuxi sai gïr aïna gobai bïïxkatai aatïmï buaboitudadami ïmapi tudu dai mai xu xi mosïkaxi go ïïki óídakami aiyagi gobai ïpïgioma. Podukai gï tïgito Diuxi dai kaxkïdï go buaboitudadami ïïkidadï mai otoma biatu ixtumaxi bia Diuxi bïïxkatai aatïmï gïr bïïtarï, ïgai ïmadï aatïmï ïpï tudu.

Hebreos 11:6

Dai gokïdï gï maatï sai go Enok kïïga buaboitu Diuxi. Xi ïmo odami mai buaboitudagi xadïrï bhai ïrhidiña Diuxi ïgaikïdï tudu. Kaxkïdï tudu xorai uraba ïrhiadagi Diuxi gï agai xi buaboitudagi ix oidaga Diuxi. Dai gï agai ïpï xi buaboitudagi sai Diuxi kïïga buidada agai ïgai kabami gï aajagïitai gaagaitai urabaragai Diuxi ïmadï.

Hebreos 4:16

Dai kaxkïdï ïpï gï agai xi mai duduadikoitai daanïda aatïmï Diuxi kïïga ïïmadan dukai. Kïï tuiga ïgai gïr bïïtarï tudu dai daanïkai aatïmï gïr tïïgidamu ïgai xïï soi gï ïrhidi ïgai gïr bïïtarï gïr soikïitai xïïxkadï tïgitokagi aatïmï.

Hebreos 6:18

Goka ñoki aagidi Diuxi go Abraam tudu sai podukai kïïga maatïkana aatïmï saidi iduñi agai ixtumaxi gïr aagidi. Ïmoko ïr go ñoki xako aagidi ïgai ïmo xadutudikami ñoki. Aagidi ïgai ïmo xadutudikami ñoki tudu dai kïïga maatï aatïmï sai Diuxi tomarhi ïmo imidagai mai yaatagïi. Gobai ïr go ïpïgadï ñoki ix makïdï aagidi Diuxi go Abraam. Dai go gïmai ñoki ïr xako ïïgi gï báí ïgai dai aagidi saidi buaboikïdï iduñi agai ixtumaxi aagidi ïgai. Gobai ïr ï goka ñoki ix makïdï aagidi Diuxi go Abraam. Dai kïïga maatï aatïmï sai Diuxi apia mo maaxi bïïxkïrï bïïtarï. Mai ïmapïbuayi ïgai tudu dai kaxkïdï maatï aatïmï sai ñokidï mai ïmapïduñimu ïpï. Goka ñoki gïr aagidi Diuxi tudu sai mai buamï gïr ïrhiadagi aatïmï kïïga maatïkatai saidi iduñimu ixtumaxi gïr aagidi. Sai mai buamï gïr ïrhidiña aatïmï tudu ix makïdï ka dagito bïïxi go ïma maaxi buaboidaragai dai ka mosïkaxi Diuxi buaboitudai xibi. Buaboitudai aatïmï sai ïgai kïïgakïrï gïr bubaidi tudu.

Hebreos 7:11

Daiñi, aidïxi maa Diuxi go sïïrhikami go Israelitas aidï darai ïgai go Lebi piipixaradï saidi ïr dadaxdadamikana. Darai ïgai go Aaron ïmadï maamaradï tudu. Ïgai ibuadana daxdaragai go óídakami bïïtarï ix dukatai aagai go Moises sïïrhikamigadïrï. Dïï gia tomaxi dudatai ibuadana ïgai daxdaragai bïïxkïrï maiti ixtui ïgai xi kïïgakïrï buañixikami biagi go óídakami. Kia biïgatadai bamioma ixtumaxi. Kaxkïdï biïgatadai ix ïmai daxdadami dibiagi ix makïdï ïma maaxkagi. Ix makïdï mai ïpïamaaxkagi go piipixaradï go Lebi dai Aaron tudu. Gï agaitadai ïmoko ix makïdï ïpïamaaxkana go Melkisedek bhaiyoma. Kia biïgatadai ïmo daxdadami ix makïdï gia kïïgakïrï buañixikami biana go óídakami tudu.

Hebreos 7:20

Aidïxi maa Diuxi sïïrhikami go Suxi saidi ïr dadaxdadamikana, aagidi ïgai ïmo xadutudikami ñoki daidi potïtïdai sai, Kaxi gï dáí aanï saidi bïïxkïrï bïïtarï ïr dadaxdadamikana aapi, itïtïdai. Ka aagai aanï ïmo xadutudikami ñoki tudu dai xadïrï dagitona aanï gin ñoki dai ïmadukai iduñagi, itïtïdai. Daiñi, aidïxi maa Diuxi go ïïkidadï sïïrhikami go óídakami dai darai ïgai go ïïkidadï dadaxdadami aidï mai aagidi Diuxi ïmo xadutudikami ñoki podukai. Dïï gia aidïxi dáí ïgai go Suxi Kristo aidï gia aagidi ïgai ïmo xadutudikami ñoki aagaitai sai bïïxkïrï bïïtarï ïr dadaxdadamika agai Suxi.

Hebreos 7:25

Kaxkïdï bia ïgai gubukarhigai ix kïïgakïrï bubiadagi odami ix makïdï urapïkïdagi Diuxi buaboitudaitai ïgai Suxi Kristo. Bïïxkïrï bïïtarï daja Suxi tudu dai bïïxkïrï bïïtarï apia gadaanturhiada agai ïgai xorai urabagi.

Hebreos 8:6

Gin aaduñi, ka aagai aanï ix maaxi aaduindadï go dadaxdadamigadï go judidiu. Tami idi oidigi daama ibuadana ïgai aaduindadï tudu. Dïï gia Diuxi maa ïmo aaduindagai gïïpi bamioma namïakami go Suxi Kristo. Gïïpi bamioma namïakami xi bhai go dadaxdamigadï go judidiu aaduindadï tudu. Suxi Kristo namïaturhi ïmo utudui sïïrhikami gïr bïïtarï ix makïdï gïïpi bamioma kïïgadu xi bhai go ïïkidadï sïïrhikami. Go utudui sïïrhikamiïrï gïr aagidi Diuxi saidi gïr maaki agai ixtumaxi gïïpi bamioma kïïgadukami xi bhai ix makïdï biakana óídakami oiditai go ïïkidadï sïïrhikami tudu. Agia ïr buaboi sai bamioma namïga Suxi aaduindadï xi bhai aaduindadï go Judidiu dadaxdadamigadï ix makïdï ibuadana ïgai oiditai go ïïkidadï sïïrhikami.

Hebreos 9:9

Dïï gia bïïxi gobai ix makïdï aagai go ïïkidadï sïïrhikami gobai mos ïr ïmo maaxidaragai dukai aagaitai go aaduindagai ix makïdï idui Suxi Kristo. Daiñi, go dadaxdadami ix makïdï oidiña go ïïkidadï sïïrhikami ibuayi aaduindadï ïmo kiupiïrï ix makïdï tami oidigi daama kïïga dai ïgai maiti ixtutuidikïi xi kïïgakïrï bubiadagi óídakami. Dïï gia Suxi Kristo gia baa go kiupiana ix makïdï tïbagiana kïïga dai ïgai gia ixtutuidikïi xi kïïgakïrï bubiadagi óídakami. Bïïxi go oidaragai ïmadï daxdaragai ix makïdï buapaiña go óídakami go kiupiïrï ïïgiditai ïgai go ïïkidadï sïïrhikami, bïïxi gobai mai bhaigakatadai xi kïïgakïrï buañixikami biagi iibhïadï go odami ix makïdï buapaiña tudu.

Santiago 4:8

Kïïga abïr uraba Diuxi tudu dai kïïga ïïmada baidi ïgai aadïrï gïn ïïmadamu ïpï ïmo gïn aadunumï dukai. Aapimï ix makïdï soimaaxi ibuayi, dagitobïrai gïn soimaaxkamiga tudu. Mai kïï maatï aapimï ix bhai kïïgakïrï oijadagi Diuxi tïgibudadï xiïpï xi oijadagi go tami oidigi daama óídakami tïgibudadï. Gobai maiti ïr tïgibudadï Diuxi tudu. Mosïkaxi Diuxi tïgibudadï abïr oijada bhaiyoma.