Hebreos 6:17 - Northern Tepehuan Bible

¹⁷ Dai podukai ïpï Diuxi aidïxi aagidi ïgai go Abraam ïïki sai buaboikïdï maaki agai ïmo bhai ïrhiaragai abhana aidï aagidi ïgai ïmo xadutudikami ñoki. Podukai aagidi ïgai ipïrhiditadai sai go Abraam ïmadï piipixaradï kïïga maatïkana sai Diuxi mai ïma dukai gï tïgito agaitadai. Ipïrhiditadai sai maatïkana ïgai sai buaboikïdï iduña agai ixtumaxi aagidi tudu. Kaxkïdï ïïgi gï báí Diuxi aagiditai ïmo xadutudikami ñoki. Podukai aagidi ïgai saidi maaki agai go bhai ïrhiaragai tudu.

Tepehuan Northern: Diuusi ñiooquidʌ utuducami oodamicʌdʌ

¹⁷ Diuusi pocaiti sai istumaasi aagai ʌgai ʌrvaavoi. Diuusi ipʌliditadai sai cʌʌga maatʌna Avraañicaru ʌʌmadu cajiudadʌ sai ʌgai sʌʌlicʌdʌ iduñia agai istumaasi aagidi sai iduñia agaitadai cascʌdʌ.

Hebreos 6:17 ပူးပေါင်းရင်းမြစ်များ

VUAANA 10:10

Daiñi, go bhaitï gukakami ïïxibogami mos soi buadana odami. Ïpïan buadana ïgai ïïxibogami ix makïdï gaïïxiada ïrhidi dai kodada ïrhidi kañiñiru. Dïï aanï mai podukai aatabuayi. Aanï gia dibia sai kïïgakïrï óídakana aapimï kïïga biakatai bïïxi ix tumaxi gï agadagi gïn iibhïdaga bïïtarï— itïtïdai.

Romanos 11:29

Xadïrï ïma dukai gï tïgitona Diuxi kaxi maakakai ïmo oidaragai. Dai xadïrï ïma dukai gï tïgitona ïgai kaxi ïko bubaidakai óídakami ïpï. Bïïxkïrï ibuayi ïgai ixdukatai aagadagi.

Romanos 8:17

Maamaradï aatïmï Diuxi tudu. Kaxkïdï xibi bïïxi go bhai ïrhiaraga ix makïdï Diuxi bhai darasakami bia Suxi Kristo bïïtarï ïr aatïmï gïr bïïtarï ïpï. Dïï gia gï agai xi soimaaxi taatagi aatïmï ïpïan dukai ix dukatai taata Suxi bai podukai gïr aiyagi ïmo xadutudaragai ïgai ïmadï ïpï.

Galatas 3:29

Dai bïïna darakatai aapimï Suxi Kristo gobai itïiya ïrhidi saidi ïr piipixaradï aapimï go Abraamkaru dai gïn ajïga xi gïn aiyagi go bhai ïrhiaragai ix makïdï aagidi Diuxi go Abraam. Gobai ix makïdï aagidi ïgai saidi iduña agai piipixaradï bïïtarï tudu.

Efesios 1:11

Ïkobai gïr bubaitu Diuxi bïïnakai aatïmï Suxi Kristo tudu. Tukamidïrï abhiadïrï ïïgi podukai gï tïgitokatadai Diuxi xi aatïmï ix makïdï bïïna daraja Suxi Kristo ïr ïko bubaidadïkana. Podukai dáí ïgai saidi ïpï gï duna ixdukatai ïgai ipïrhidi. Bïïxkïrï ibuayi ïgai ixdukatai gï tïgitokagi kaxkïdï.

Hebreos 11:7

Go Noékaru kïïga buaboitu Diuxi ïpï xïxkadï Diuxi aagidi sai dupitulda agai go oidigi sudagikïdï. Dai tomaxi mai kia nïiditadai ïgai tomarhi ïmo imidagai ix dupikïdagi oidigi bïïxkïrï buaboitu ïgai Diuxi. Duadimuka antaadatu ïgai tudu gï tïgitokatai xïïxi ïr gïdukami Diuxi dai kïïga buaboidaitai ïïgidi. Kaxkïdï idui ïgai go gïï barko ixtukïdï kïïgakïrï busai ïgai ïmadï modukai aaduñdï. Kïïga buaboitu ïgai Diuxi tudu dai kaxkïdï kïïga ïïgidi. Dai podukai maaxiko aa ïgai ix go gaa oidakami oidigi daama kabami ïr soimaaxi ibuadami mai buaboidaitai ïgai Diuxi. Dïï go Noé gia buaboitu Diuxi dai kaxkïdï buañixikami bii ïgai Diuxi bïïtarï.

Hebreos 11:9

Dai apia buaboidaitai jii ïgai dai ayi go dïbïriana xako maa Diuxi sai ami oidakana ïgai. Dai ikuxi bhaabhakiïrï oidatu ïgai ami ïmo xibhïadïrï imïdami dukai. Dai go Isaak dai go Jakobo podukai óídatu ïpï ikuxi bhaabhakiïrï. Go Isaak dai Jakobo bïïtarïtadai go ñoki ïpï ix makïdï aagidi Diuxi go Abraam aidïxi potïtïdai ïgai sai maaki agai ïmo gïï dïbïrai.

Hebreos 6:12

Kïïga maatï aapimï sai bia aapimï ïmo kïïgadukami nïnïraragai tudu. Dai kaxkïdï mai paparugakamu aapimï maatïkatai gobai. Dai bhaiyoma kabami gïn aagamu aapimï ïpïan dukai jaa ix makïdï kïïga buaboitudai ïpï. Kïïga gïn kapatudai ïgai go soimaaxi buidïrï tudu. Podukai ibuayi ïgai bhïiya ïrhiditai ixtumaxi Diuxi ka aagai sai gïr maaki agai. Dai podukai abïr ibuada aapimï ïpï.

Hebreos 6:16

Daiñi, xïïxkadï ïmo odami podukai aagadagi saidi iduñi agai ixtumaxi aagaiña ïmo ñoki xadutudikami aagaitai ïmo ixtumaxi kabami namïakami. Dai ka potïkai ïgai ka mai tipu bamioma ñoki. Ka gubukamikïdï bia ïgai xi iduñagi ixdukatai bia ïgai ñoki.

Hebreos 6:18

Goka ñoki aagidi Diuxi go Abraam tudu sai podukai kïïga maatïkana aatïmï saidi iduñi agai ixtumaxi gïr aagidi. Ïmoko ïr go ñoki xako aagidi ïgai ïmo xadutudikami ñoki. Aagidi ïgai ïmo xadutudikami ñoki tudu dai kïïga maatï aatïmï sai Diuxi tomarhi ïmo imidagai mai yaatagïi. Gobai ïr go ïpïgadï ñoki ix makïdï aagidi Diuxi go Abraam. Dai go gïmai ñoki ïr xako ïïgi gï báí ïgai dai aagidi saidi buaboikïdï iduñi agai ixtumaxi aagidi ïgai. Gobai ïr ï goka ñoki ix makïdï aagidi Diuxi go Abraam. Dai kïïga maatï aatïmï sai Diuxi apia mo maaxi bïïxkïrï bïïtarï. Mai ïmapïbuayi ïgai tudu dai kaxkïdï maatï aatïmï sai ñokidï mai ïmapïduñimu ïpï. Goka ñoki gïr aagidi Diuxi tudu sai mai buamï gïr ïrhiadagi aatïmï kïïga maatïkatai saidi iduñimu ixtumaxi gïr aagidi. Sai mai buamï gïr ïrhidiña aatïmï tudu ix makïdï ka dagito bïïxi go ïma maaxi buaboidaragai dai ka mosïkaxi Diuxi buaboitudai xibi. Buaboitudai aatïmï sai ïgai kïïgakïrï gïr bubaidi tudu.

Santiago 1:17

Mosïkaxi Diuxi gïr Oga ix makïdï idui go xixabugai dai go tasai dai go masadai ïgai dai tïbagiañdïrï gïr oidi bïïxi ixtumaxi ix makïdï buaboikïdï ïr kïkïïgadukami tudu. Dai kïïga gï maatï sai Diuxi tomarhi ïmo imidagai gïr maakimu soimaaxkami ixtumaxi. Daiñi, tomaxi go xixabugai ïmadï go tasai dai masadai gia ïmapïbuadana dai tutukuiña ïïmo imidagai dïï gia Diuxi apia mo maaxkana dai mai ïmapïbuayi toma lïïchi. Kaxkïdï bhaiga aatïmï xi kïïga buaboitudada ïgai.

Santiago 2:5

Gin aaduñi, kïïga gïn oigïdai aanï. Kïïga abïr gïn tïgito kaïka ixtumaxi gïn aagidamu aanï. Gïn maakimu aanï ñoki tudu. Daiñi, Diuxi ka podukai dáí sai mui soititigami ïr buaboitudadamika agai dai podukai gïn bipidakami dukai bii agai iibhïadïrï buaboitudaitai ïgai tomaxi tami oidigi daama bhaitoma mai bia ïgai ixtumaxi. Biakamu ïgai oigaragai xi Diuxi tïanïdagi tudu. Gobai tudu ïr go bhai ïrhiaragai ix makïdï maaki agai Diuxi go odami ix makïdï oigïdai Diuxi. Ka podukai aagai ïgai tudu.

1 Pedro 1:3

Gin aaduñi, gï agai sai kïïga ñokada aatïmï Diuxi bïïtarï. Gï agai sai kïïga ñokada aatïmï bïïtarï ïgai ix makïdï ïr Diuxigadï Gïr Nukadakami Suxi Kristo tudu. Soi ïlda gïr tïï ïgai kaxkïdï daidi gïr maa ïmo utudui oidakaragai. Gï duakatu Suxi Kristo ïpamu tudu gokiïrï xi mutadai ïgai dai kaxkïdï bia aatïmï ïmo kïïgadukami nïnïraragai xibi. Dai kïïga gupuka antaadakana aatïmï gïr utudui oidakaragai bïïtarï maatïkatai sai bia aatïmï go kïïgadukami nïnïraragai gobai.

1 Pedro 3:7

Dai aapimï kïkïïrhi ix makïdï ka ooñiga, kïïga abïr xadutuada gïn ooñiga. Kïïga abïr gïn tïgito nïida dai maatïka ix dukatai kïï buidadagi gïn ooñiga dai podukai abïr ibuada. Ïgai mai ïpïan gupuka kïkïïrhi tudu. Dïï gia Diuxi kïï tuiga ïgai bïïtarï dai kïïgakïrï bubaitu sai bïïxkïrï bïïtarï óídakana ïgai ïpïan dukai aapimï. Kïïga abïr xadutuada gïn ooñiga dai kïïga buidada ïgai tudu. Ix mai kïïga óídakagi aapimï gïn ooñiga ïmadï gobai gïn sobhida antaada xi daanïdagi aapimï Diuxi tudu.