Hebreos 5:9 - Northern Tepehuan Bible

^9-10 Kïïga ïïgidi ïgai tudu tomaxi soimaaxi taata dai podukai bïïxi naato idui ïgai bïïxi aïkatai ixtumaxi gï agaitadai saidi ïr go bhaitï kïakïdï dadaxdadamikana ïgai gïr bïïtarï. Dai aidïxi kaxi iduitadai ïgai bïïxi ixtumaxi gï agai aidï gia Diuxi maa go sïïrhikami saidi ïr dadaxdadamikana ïgai bïïxkïrï bïïtarï. Dai kaxkïdï xibi kïï bhaiga Suxi Kristo ix kïïgakïrï bubiadagi odami bïïxkïrï bïïtarï ix makïdï ïïgiadagi. Diuxi ïgai dai maa sïïrhikami go Suxi tudu ïpïan dukai xi maa ïgai sïïrhikami go Melkisedek ïïki.

Tepehuan Northern: Diuusi ñiooquidʌ utuducami oodamicʌdʌ

⁹ Poduucai sʌʌlicʌdʌ cʌʌga istutuidi iscʌʌgacʌrʌ vuviadagi sioorʌ ʌʌgiadagi vai poduucai oidacagi Diuusi ʌʌmadu tomastuigaco.

Hebreos 5:9 ပူးပေါင်းရင်းမြစ်များ

Mataibo 17:5

Dai kia ñokaitadai go Piduru bai ïmo ikomai iña ami xako daraja ïgai. Kabami kudaka maaxi ami go ikomai ïrana dai Diuxi ño abhai ikomai ïrañdïrï daidi itïi ïgai, —Idi Suxi ïr gin Maara dai kïïgakïrï oigïdai aanï. Kïïga bhai gin ïrhidi nïiditai gobai— itïi. —Gïn tïgito abïr kaï ñokidï ïgai tudu— ikaiti Diuxi go ikomai saagidañdïrï.

Lukas 13:32

Dai Suxi potïtïdai, —Agia kaxokai ïrhiadan tuiga go Herodes. Aagidabïrai tudu sai xibi dai xoroko kia bubaidamu aanï tïtïañikarudï diabora go odamiañdïrï dai duduadadamu aanï odami kia ïpï dai baasïmakïdï ka naatomu aanï gin aaduindaga— itïtïdai.

VUAANA 19:30

Dai mos bixusukai Suxi go bino sai bhodïrï itïi, —Ka natorhixikami bii bïïxi aïkatai— itïi go Suxi. Dai koidamu kuiki modï dai muu.

Hechos 3:15

Podukai mua aapimï go ix makïdï gïr maakai gïr iibhïdaga. Mua aapimï dïï Diuxi duakaturhi ïgai dai aatïmï ïr nïijadami ix duaka ïgai— ikaiti.

Hechos 4:12

Daiñi, Diuxi otoi go Suxi Kristo sai ïgai ïïgi biakana gubukadagai ix kïïgakïrï bubiadagi odami tomax xako oidakami. Mai tipu ïmai bïïxi oidigi daama —itïtïdai Piduru.

Hechos 5:32

Dai aatïmï ïmadï Diuxi Ibhïadï ïr aagadami ixtumaxi dui Diuxi aidï. Dai Diuxi otoi Ibhïadï saidi abhana dakana odami ix makïdï ïïgida kaïkana Diuxi— ikaiti go Piduru.

Romanos 1:5

Suxi Kristo kïï tuiga aatïmï ojotosadï gïr bïïtarï kaxkïdï gïr dáí ïgai saidi ïr ojotosadïkana aatïmï bai jaa mui odami ix makïdï maiti ïr judidiu buaboitudaiña dai ïïgidiña ïgai. Podukai gïr otoi Suxi Kristo baidi mui odami ix makïdï maiti ïr judidiu kïï xadutuadana ïgai.

Romanos 10:16

Dïï mai xu bïïxi óídakami buaboitu go bhai ïrhiaraga aatagi. Go Isaiaskaru ïpï pokaiti ïki sai mai xu bïïxi óídakami buaboitudai. Ïgai gatïkaka Diuxi aidï daidi ikaiti, Gïr Nukadakami, ¿Oidaga xi ïmadutai xorai buaboida kaï gïr aatagi? ikaiti.

Romanos 15:18

Xibi mai duadimukai aagai aanï ix tumaxi dui Suxi Kristo aanïkïdï. Suxi Kristo ipïrhidi xi odami ix makïdï maiti ïr judidiu ïïgiadagi Diuxi kaxkïdï aatadui ïgai aanïkïdï. Go odami ix makïdï maiti ïr judidiu kaïkana ixtumaxi aagaiña aanï dai nïidiña ixtuma ibuadana kaxkïdï ïïgidi ïgai Diuxi.

Romanos 2:8

Dïï gia Diuxi kabami bhamuka agai buidïrï ix makïdï ïïgi gïn tïgito ajiopadagi dai maiti ibuayi ixtumaxi ïr sïïrhi apia adaimïitai ïgai go soimaaxkami.

Romanos 6:17

Ïkioma aapimï ïr pipioñigadïkana go soimaaxkami. Dïï xibi aanï aagai ansai bhai gin ïrhidi Diuxikïdï. Xibi aapimï bïïxi gïn bhai ïrhiarakïdï ïïgidi go ñoki ix makïdï gïn maatïturhi aanï kaxkïdï.

2 Korintios 10:5

Maitïkïi aatïmï bïïxi go tïgibudagai ix makïdï sobhikïi odami ix maatiagi Diuxi tudu. Dai maigobai ïkobai bipiayi aatïmï bïïxi go tïgibudagai ix makïdï gïr sobhikïdagi ix ïïgiadagi aatïmï Suxi Kristo ïpï. Po buayi aatïmï saidi bhodïrï bïïxkatai aatïmï bhïna mosïkaxi go tïgibudagai ix makïdï ipïrhidi Suxi Kristo xi oijadagi aatïmï.

Filipenses 2:12

Daiñi, aapimï gin aaduñi ix makïdï oigïdai aanï, gï agai xi ïïgiadagi aapimï Diuxi. Kïïga ïïgidiña aapimï tudu aidïxi gïn ïmadï dakatadai aanï. Dai xibi bamioma gï agai xi ïïgiadagi aapimï mïkaxi dakatai aanï. Kïïga xadutudaitai abïr gïn aaga dai kïïgakïrï óídaka ixdukatai óídaga odami ix makïdï ka kïïgakïrï bubuaka. Kabami abïr gïn aaga tudu

2 Tesalonicenses 1:8

Dai aidï gï sïïrhiñdamu Suxi ïmadï go odami ix makïdï maiti ipïrhi ix urabagi Diuxi. Gïgïbituldamu ïgai tudu ix makïdï mai buaboitu go bhai ïrhiaragai aatagi ix makïdï aagai Suxi Kristo.

2 Tesalonicenses 2:16

Gïr susukurhi, gïn daanturhiña aatïmï sai gïn abïnakidiña Diuxi dai sai gupurtudana ïgai gïn buaboidaraga. Dai kïï gubuakatai gïn buaboidaraga aidï gia bïïxi ixtumaxi aagidagi aapimï jaa kïïga ibuadamu soiñi dai bïïxi ixtumaxi ibuadagi aapimï jaa bïïtarï kïïga ibuadamu soiñi ïpï. Suxi Kristo Gïr Nukadakami ïmadï Diuxi gïr Oga ïgai dai kïï tutuiga gïr bïïtarï tudu dai gïr oigïdai dai gïr maakai ibhïxtaragai ix makïdï mai ugiatïkïi dai gïr maakai ïmo nïnïraragai kïïgadukami ïpï.

2 Timoteo 2:10

Dai kaxkïdï bhai aagaiña aanï xi soiñagi go odami ix makïdï Diuxi ïko bubaitu tomaxi naana dukai soimaaxi taatamaiña aanï soikïitai. Soiña in ïrhidi buaboitudadami tudu sai bïïxkïrï bïïtarï biakana ïgai gïïpi bhai ïrhiaragai bïïna darakatai ïgai Suxi Kristo.

Hebreos 1:14

Go tïtïañikarudï Diuxi mos ïr pipioñigadï kaxkïdï. Dai Diuxi otosaiña ïgai sai soikïiña ïgai odami ix makïdï kïïgakïrï bubuaki agai. Sai soikïiña ïgai go buaboitudadami tudu.

Hebreos 11:40

Aatïmï gïr tïtïitoitadai Diuxi aidï, kaxkïdï mai otoma maa ïgai ixtumaxi aagidi. Podukai gï tïgito ïgai sai bamioma kïïgadu aatïmï gïr bïïtarï xi go ïïkidadï buaboitudadami nïnïrakagi kia asta xïxkadï bhïiyagi aatïmï ïpï ixtumaxi bia Diuxi gïr bïïtarï. Podukai gï tïgito Diuxi sai gïr aïna gobai bïïxkatai aatïmï buaboitudadami ïmapi tudu dai mai xu xi mosïkaxi go ïïki óídakami aiyagi gobai ïpïgioma. Podukai gï tïgito Diuxi dai kaxkïdï go buaboitudadami ïïkidadï mai otoma biatu ixtumaxi bia Diuxi bïïxkatai aatïmï gïr bïïtarï, ïgai ïmadï aatïmï ïpï tudu.

Hebreos 11:8

Go Abraamkaru kïïga buaboitu ïpï dai kaxkïdï buaboidaitai ïïgidi ïgai Diuxi. Diuxi aagidi sai dagitona kiidï dai sai imïna xibhïakoga xako Diuxi maaki agai ïmai dïbïrai xako oidakagi. Dai bïïxkïrï ïïgidi ïgai tomaxi mai maatïkatadai xako imi agai kia.

Hebreos 12:2

Gin aaduñi, ix dukai ïmo mïradami bia xi kïïga gï tïgito nïidagi xako mïmïrai ïgai dai bia xi sïïrhi bhaitiakoga nïijadagi. Podukai ïpï aatïmï ïpï apia kïïga oijada ïrhiada aatïmï gïr buaboidaraga gï agai xi tïgito ajiopada aatïmï Suxi Kristo ixdukatai idui ïgai dai podukai ibuadagi aatïmï ïpï. Gïn tïgitobïrai tudu sai ïgai kïïga buaboitudaiña sai Diuxi maaki agai ïmo gïdukami bhai ïrhiaragai dai kaxkïdï gï kabakatu ïgai kuruxiana nagiïkatai. Kïïga maatïkatadai ïgai sai go kuruxi ïr ïmo gïgïbidaragai soimaaxi ibuadami bïïtarï tudu. Dïï bïïxkïrï mai buamï ïrhidi ïgai tomaxi xaïraraga xi óídakami podukai ïmo soimaaxi buadami dukai gïgïbituldagi xixakai kuruxiana. Dai xibi ka bhïiyi ïgai ïmo gïdukami xadutudaragai sïïrhixapadïrï daibakai ïgai Diuxi amïka xakoga dakatai gatïanïi Diuxi. Podukai go bïïxi adama gatïanïdami bii Suxi tudu.

Hebreos 2:10

Daiñi, Diuxi ïgai daidi idui dai nukadai bïïxi ixtumaxi. Dai ïgai kïïgakïrï bubaida ïrhidi mui maamaradï dai baidaja ïrhidi maigobai xako maakimu ïgai ïmo gïdukami bhai ïrhiaragai dai xadutudaragai. Kaxkïdï kïï bhai maaxi idui Diuxi aidïxi dagito ïgai sai soimaaxi taatana Suxi gïr bïïtarï. Podui ïgai sai kïï bhai gï dukana Suxi Kristo ix gïr bhaitï imïdagi dai gïr tïïgidagi boi ix dukatai kïïgakïrï bubuakiagi aatïmï. Ïgai tudu bhai dui go kïïgakïrï bubaidaragai gïr bïïtarï.

Hebreos 2:3

Dïï gia go utudui ñoki aagaitai go kïïgakïrï bubaidaragai bamioma namïga xi bhai go sïïrhikami ïkidadï. Gïr Nukadakami ix makïdï adaama namïga ïgai dai gïr aiturhi go utudui ñoki tudu dai mai xu xi go tïtïañikarudï ïgai dai gïr aiturhi gobai. Kaxkïdï bamioma namïga go utudui ñoki xi bhai go sïïrhikami ïïkidadï. Diuxi Maradï ïgai dai xibiapioma gïr aiturhi go utudui aatagi tudu aagaitai go kïïgakïrï bubaidaragai. Dai naana maaxi oidaga maaxidaragai saidi ïr buaboi aatagidï Suxi Kristo. Daiñi, kaxi gïr aagidakai ïgai go utudui aatagi bai go odami ix makïdï kaïkana kïïga gïr aagidiña ïpï saidi ïr buaboi gobai. Dai Diuxi ibuadana naana maaxi maaxidaragai ïpï sai podukai ïpï maatïkana aatïmï saidi ïr buaboi go utudui aatagi. Dai ïkobïrakoga xïïxkadï ipïrhiadagi Diuxi gamamaakai ïgai naana maaxi gubukarhigai go odami ix makïdï buaboitudai go aatagi ïpï. Diuxi Ibhïadï ïgai dai mamaakai go naana maaxi gubukarhigai buaboitudadami tudu. Dai nïiditai aatïmï sai go buaboitudadami biakana gubukarhigai Diuxi amadïrï saidi ibuada ïgai naana maaxi aaduindagai, gokïdï maatï aatïmï saidi ïr buaboi go aatagi ix makïdï buaboitudai ïgai ïpï. Naana maaxikïdï gï maatï saidi ïr buaboi go aatagi tudu. Sïïrhikïdï namïga go ñoki aagaitai go kïïgakïrï bubaidaragai tudu. ¿Kaxkïdï dukatai kïïgakïrï bubuakïna aatïmï ix mai buaboitudagi aatïmï? Gïr Nukadakami ïgai dai gïr aiturhi gobai di.

Hebreos 9:12

Dai aidïxi baa ïgai amïka bhïkai ïgai ïrai ïpï ïmo daxdaragai bïïtarï. Dïï mai xu xi bhïkai ïgai ïradï buxtaki. Dukami mai bhïkai ïgai ïradï xixibato ïmadï baakaxi maamaradï. Ïïgi ïradï bhïkai ïgai bhaiyoma dai podukai bhai dui ïgai kïïgakïrï bubaidaragai gïr bïïtarï. Kaxkïdï mos arhi ïmo imidagai baa ïgai ïradïkïdï dai ka maiti gï agai xi muiyoko bapakïdagi ïgai. Ka bhai duñixi go kïïgakïrï bubaidaragai bïïxkïrï bïïtarï tudu.

Hebreos 9:15

Ïmo kïïgadukami daxdaragai idui Suxi Kristo mukukai gïr soimaaxkamiga bïïtarï tudu. Dai kaxkïdï ixtui ïgai xi bhai duñagi ïmo utudui sïïrhikami gïr bïïtarï. Ïïkioma aidïxi kia namïakatadai go ïïkidadï sïïrhikami aidï kia gïpiïrï bïïtïkamikana aatïmï go soimaaxkamikïdï ix makïdï ibuadana aatïmï. Dïï gia Suxi Kristo bhai dui go kïïgakïrï bubaidaragai gïr bïïtarï mukukai ïgai. Daiñi, Diuxi bapaidi mui odami saidi ïr maamaradïkana. Dai pokaiti Diuxi saidi maaki agai naana maaxi ixtumaxi maamaradï bïïtarï ix makïdï tomarhi ïmo imidagai mai ugiatïi. Dai Suxi ïgai dai bhai dui Diuxi maamaradï bïïtarï saidi bhaigakana ïgai ix biakagi bïïxi ixtumaxi Diuxi maaki ïrhidi.

Hebreos 9:28

Dai podukai ïpï Suxi Kristo ïïgi gï dáí mosïkaxi ïmo imidagai ïmo daxdaragai dukai. Podui ïgai bhai buadatai mui óídakami bïïtarï soimaaxi ibuadamikatai óídakami. Dai gobai ix makïdï idui ïgai, gï dasakai ïgai mos arhi ïmo imidagai ïmo daxdaragai dukai óídakami bïïtarï, gobai bïïxkïrï bïïtarï namïaka agai. Dai gokiïrï ïpamu dibiagai ïgai dïï mai daamioma ïpamu bhai buada agaitai gïr soimaaxkamiga bïïtarï. Bhaiyoma dibiagai ïgai dai kïïgakïrï bubaida aagai bïïxkatai ix makïdï bhai ïrhiarakïdï nïnïraka ix dibiagi ïgai ïpamu. Ka bhai dui ïgai kïïgakïrï bubaidaragai bïïxkïrï bïïtarï tudu.

1 Pedro 1:22

Daiñi gin aaduñi, aapimï ka ïïgidi go buaboi aatagi dai ka buañixikami bii gïn ibhïdaga. Kaxkïdï gï agai sai kïïgakïrï gïn oigïdada aapimï aipakoga bïïxi gïn ibhïdagakïdï.

1 Juan 5:20

Daiñi, kïïga maatï aatïmï sai dibia Diuxi Maradï tami oidigi daama dai gïr tïtïïgidi xorai buaboikïdï ïr Diuxi. Suxi Kristo ïgai dai gïr tïtïïgidi tudu. Dai xibi ka urabakatai aatïmï Suxi Kristo ka uraba bii aatïmï Diuxi ïpï. Suxi Kristo ïr Diuxi kaxkïdï. Buaboikïdï ïr Diuxi ïgai dai mai tipu ïmai. Mai tipu ïmai xorai gamaakadagi go utudui oidakaragai bïïxkïrï bïïtarï tudu. Mosïkaxi Suxi gïr maakai gobai.

Udaxi 1:21

Daiñi, Diuxi kïïga gïn oigïdai. Dai gï agai sai buaboitudada aapimï ix kïïga gïn oigïdai ïgai. Bïïx tasai abïr podukai óídaka aapimï, buaboitudatai sai Diuxi gïn oigïdai tudu. Dai kïïga buaboitudaitai abïr nïnïraka saidi Gïr Nukadakami Suxi Kristo gïn tïïgidana xïï kïï tuiga ïgai gïn bïïtarï. Gïn maakai ïgai go bïïxkïrï bïïtarï oidakaragai tudu mos ïï kïï tuigakatai ïgai gïn bïïtarï.