Filipenses 1:7 - Northern Tepehuan Bible

⁷ Kïïga gïn oigïdai aanï gin aaduñi. Xadïrï maiti gïn oigïdaiña aanï tudu. Aapimï gin soikïiña bïïxi gin aaduindagïrï di. Daiñi, Diuxi kïï tuiga gin bïïtarï dai gin maa oigaragai sai aipakoga aituldana aanï go bhai ïrhiaragai aatagi. Dai gin maa oigaragai saidi gïr buidïrï ñiñokadamiga buitapi maaxituldana aanï saidi ïr buaboi go bhai ïrhiaragai aatagi ïpï. Bïïxi gobai gin maa oigaragai Diuxi sai ibuada aanï. Dai aapimï kïïga gin soikïiña. Dïï gia mai xu xi mosïkaxi gobai bïïtarï gin maa Diuxi oigaragai, gin maa ïgai oigaragai sai maixapikana aanï ïpï. Dai aapimï kïïga gin soikïiña asta maixapikatai aanï tami ïpï. Podukai taatan duu aapimï go soimaaxkami gin ïmadï. Kaxkïdï kïïga gïn oigïdai aanï.

Filipenses 1:7 ပူးပေါင်းရင်းမြစ်များ

Hechos 20:23

Mos maatï aanï sai bïïxi go gïgïr kiikiïrï xako aimïraiña aanï Diuxi Ibhïadï gin maatïturhimitadai xi maatïkagi aanï sai gin maixatuda iñagai dai soimaaxi taatamu aanï.

Hechos 21:33

Daidi go komandante ayi amïka xako kïakatadai Pabora dai maixapikami bhïiyi dai gatïjai mïsai burana goka kadenakïdï. Dai bhodïrï tïkakai ïgai go odami daidi itïtïdai aidï, —¿Borai idi kïïrhi? ¿Ix tuma soimaaxi buadami gobai?— itïtïdai.

1 Korintios 13:7

Ïgai apia oigïdai jaa tomax buidadagi dai apia buaboituda ïrhidi jaa ïpï nïnïrakatai ix kïï buadagi. Odami ix makïdï kïïga oigïdai jaa mos apia kapatudaiña ïïgi iibhïadï dai mai daadagitoiña ix maitiagi soi ïrhiaragai tomax daibuñagi.

1 Korintios 9:23

Bïïxi gobai ibuayi aanï ipïrhiditai sai aipakoga aïna go bhai ïrhiaragai aatagi. Dai pobuayi aanï biaka iñïrhiditai urabaragai mui buaboitudadami ïmadï ïpï buyitai aatïmï go bhai ïrhiaragai ix makïdï bia Diuxi gïr bïïtarï.

2 Korintios 3:2

Toma xorai ix makïdï maatïka ïrhiadagi ix maaxi aatabuayi aatïmï mosïkaxi bia xi nïñiadagi ix dukatai óídaga aapimï dai gokïdï maatïkamu ïgai sai sïïrhi aatabuayi aatïmï. Gin aaduñi, gïn tïïtïitoi aatïmï toma xakoga ajiopadagi aatïmï. Aapimï ïr go paperhi ojixikami gïn dukami tudu gïr bïïtarï ixtukïdï kïïga mamaatïrïi óídakami ix bhai kïïga aatabuayi aatïmï. Kïïgakïrï óídaga aapimï ïïgiditai gïr ñoki tudu dai gobai ïr ïmo maaxidaragai sai kïïga aatabuayi aatïmï.

2 Korintios 7:3

Idi maiti ïr ïmo bhagaidaragai dukai dai bhaiyoma ipïrhidi aanï sai maatïkagi aapimï sai gïn oigïdai aatïmï. Dai apia kïïga gïn oigïdadamu aatïmï asta xïïxkadï ukami óídakagi aatïmï tami oidigi daama.

Galatas 5:6

Ka bïïna daraka aatïmï Suxi Kristo tudu xi kaxkïdï mai xudu xi circuncidadugakagi ïmoko xiïpï xi mai circuncidadugakagi ïpï. Maiti ïr ixtumaxi gobai. Xibi mosïkaxi namïga xi buaboitudagi aatïmï Suxi Kristo dai xi gïr oigïdadagi aipakoga. Podukai tudu gïr oigïdaitai aipakoga maaxitudai aatïmï sai kïïgakïrï buaboitudai aatïmï.

Efesios 3:1

Aanï Pabora maixapi xibi mos ïïgiditai aanï Suxi Kristo. Aagaiña aanï go bhai ïrhiaragai aatagi gïn buitapi aapimï ix makïdï maiti ïr judidiu kaxkïdï maixapi aanï xibi.

Efesios 4:1

Aanï gin maixatu mos ïïgiditai aanï Suxi Kristo. Dai aanï xibi bïïxi gin ibhïdagakïdï gïn abïnakida in ïrhidi xi kïï bhai maaxkami dukai óídakana aapimï. Gï agai xi kïï bhai maaxkami dukai óídakagi aapimï aidï dai podukai maaxitudagi sai gia ïr buaboi sai Diuxi ka ïkobai gïn bubaitu.

Efesios 6:20

Gin aaduñi, kïïga burhidi aanï xibi kadenakïdï mos aagaitai Diuxi ñokidï. Kaxkïdï abïr daanïda gin bïïtarï sai mai duadimudagaikïdï aagada aanï Diuxi ñokidï. Gï agai sai mai duadimudagaikïdï ñokada aanï tudu.

Filipenses 1:12

Gin aaduñi Diuxi amadïrï, naana maaxi daibuskïi gin ïmadï maixapikatai aanï tami. Dïï gia gï agai xi maatïkagi aapimï sai gobai maiti gin sobhikïi xi apia aagada aanï go bhai ïrhiaragai aatagi. Gin soikïi gobai bhaiyoma sai muiyoma óídakami buitapi aitulda aanï.

Filipenses 1:13

Asta go sandadaru ix makïdï nukadai go gïï dunukami kiidï kajioma gin maixatu aanï ibuadatai aanï Suxi Kristo aaduindadï. Dai bïïxi go gaa óídakami kajioma ïpï.

Filipenses 1:14

Dai go buaboitudadami gïn tïgito nïidiña ïpï ixdukatai aatabuayi Diuxi aanïkïdï maixapikatai aanï. Dai podukai nïiditai ix dukatai aatabuayi Diuxi aanïkïdï go bamioma muidukïdï kïïgioma buaboitudai Diuxi Gïr Nukadakami. Dai kïïgioma mai duadikoikatai aagai ïgai Diuxi ñokidï ïpï.

Filipenses 1:5

Dudatai gin tïgitokana aanï sai gin ïmadï gaatabuadana aapimï aidï abhiadïrï xi buaboitu aapimï. Gin soikïiña aapimï aipako aagaitai go bhai ïrhiaragai aatagi tudu. Kaxkïdï bhai gin ïrhidiña aanï gïn tïgitokatai.

Filipenses 2:22

Dïï gia kïïga maatï aapimï xïï kïïga gin soikïi go Timoteo aaduindagïrï. Kïï maatï aapimï tudu sai ix dukai ïmo arhi gïrhi oigïdai ogadï dai soikïi aaduindagïrï podukai gin soikïiña Timoteo ipïrhiditai sai aipakoga aiyagi go bhai ïrhiaragai aatagi.

Filipenses 4:14

Dïï gia bïïxkïrï kïïga idui aapimï gin otosdakai soiñi xibi soimaaxi taatakatai aanï.

Filipenses 4:15

Aapimï Filipoana óídakami, aidïxi tukamïrï gïn aiturhi aanï go bhai ïrhiaragai aatagi gin mamaakaiña aapimï soiñi. Dai gokiïrï aidïxi jii aanï abhiadïrï Masedoniañdïrï oidigi gin otosdiña aapimï soiñi ïpï saidi aituldana aanï go bhai ïrhiaragai aatagi maigobioma. Dai mosïkaxi aapimï buaboitudadami ix makïdï ami Filipoana gïn ïmpaidiña gin soikïiña podukai. Mai tipukatadai jaa xorai gin soikïiña podukai.

Filipenses 4:3

Dai aapi kïïrhi ix makïdï kïïgakïrï gin soikïiña aaduindagïrï, aapi kïï maatï xorai aapi. Ipïrhidi aanï sai soiñana aapi go Eubodia ïmadï go Síntike sai gïn oigïdada ïgai ïpamu. Ïgai bïï gokatai ïr maamaradï Diuxi tudu dai gin ïmadï gaatabuadaiña ïpï aipakoga gaaiturhitai go bhai ïrhiaragai aatagi. Uurapïkïiña ïgai go Klemente ïmadï go gaa buaboitudadami ïpï ix makïdï gin soikïiña. Ga soikïiña ix makïdï tïtiaradï ojixi go libroana xako ojixi ix makïdï bïïxkïrï bïïtarï óídaka agai. Ipïrhidi aanï sai aapi kïïrhi soiñana sai bhai buada ïgai ñoki tudu saidi gïn oigïdada ïgai ïpamu.

Kolosenses 4:18

Xibi tami gïn ojidi aanï ïpï ïmo biatuldaragai ïïgi gin nobikïdï. Aanï ïr Pabora dai gïn ojidi tudu. Daanïdabïrai Diuxi gin bïïtarï maixapikatai aanï tanai. Gin aaduñi, ipïrhidi aanï sai kïïga maatï taatana aapimï xïï kïï tuiga Diuxi gïn bïïtarï. Mosïkaxi

Kolosenses 4:3

Daanïdabïrai gïr bïïtarï tudu sai mai dagitoagi ïgai tomarhi ïmo ixtumaxi ix gïr sobhidagi ix aagiada aatïmï Diuxi ñokidï aipakoga. Sai aagiada aatïmï go aatagi aagaitai Suxi Kristo tudu. Gobai ïr go aatagi ix makïdï ïxtokikana ïkioma ix makïdï gïr tïtïgidi Diuxi utudami. Gobai tudu aagaiña aanï dai gokïdï gin maixatu aanï xibi.

1Tesalonicenses 5:5

Daiñi, go soimaaxi maiti gïr tïanïi tomarhi aatïmï tomarhi aapimï ïpï. Mai tukarï dukai óídaga aatïmï tudu dai ïïgidi aatïmï bhaiyoma ixtumaxi ïr kïïga dai tasïrï dukai óídaga.

2 Timoteo 1:8

Maiti gï agai xi xaïrada aapi aagaitai ix tuma maatï Suxi Kristokïdï tudu. Dai maiti xaïrada aanïkïdï ïpï tomaxi gin maixatu aanï aagaitai aanï Suxi Kristo. Daiñi, oidaga ix makïdï soi gïr buidada ïrhidi oiditai aatïmï Suxi Kristo dai kaxkïdï gï agai xi Diuxi gubukarhigadïkïdï kabakadagi aapi gï ibhïdaga dai bhai gï dukagi ix gin urabagi soimaaxi taatamaitai gin ïmadï.

2 Timoteo 2:9

Dïï gia oidaga odami ix makïdï soimaaxi gin taatamiturhi gin sobhida ïrhiditai sai mai aagana aanï go bhai ïrhiaragai aatagi. Ïgai asta gin buu kadenakïdï ïmo soimaaxi ibuadami dukai dai gin maixa gin sobhida ïrhiditai. Dïï gia mai tipu xorai kadenakïdï burhiagi Diuxi ñokidï sai maiti ibuada gobai aaduindadï. Mai bhaiga ix sobhidagi gobai tudu.

Filemon 1:13

Kïïga maatï aapi sai gin maixatu aanï aagaitai aanï go bhai ïrhiaragai aatagi. Dai ipïrhiditadai aanï xi tami gin ïmadï dakamudai go Onesimo sai podukai gin soikïdamudai ïgai maixapikatai aanï. Podukai gin soikïdamudai ïgai ïpïan dukai ix dukatai gin soiñamudai aapi ix tami gin ïmadï dakamudai aapi.

Hebreos 3:1

Gin aaduñi, Suxi ïgai daidi ïr bhai buadami gïr soimaaxkamiga bïïtarï go bhaitï kïakïdï dadaxdadamikatai ïgai. Dai kaxkïdï kïïga gï agai xi gïn tïgitokagi aapimï xorai go Suxi. Ïgai ïr Otosadï Diuxi tudu daidi ïr Bïïxi Adaama Dadaxdadami gïr bïïtarï. Aatïmï gïr bïïtarï tudu ix makïdï buaboitudai dai aipako aagaiña aatagi aagaitai ïgai. Gobai gï agai xi gïn tïgitokagi aapimï buaboitudadami. Aapimï tudu ïr ïko bubaidadï Diuxi ix makïdï bapaidi ïgai sai oidiña aapimï.

1 Pedro 4:13

Bhai gïn ïrhiadabïrai bhaiyoma. Gobai ix makïdï taatamaimi aapimï ïr ïmo urabaragai Suxi Kristo ïmadï kaxkïdï. Ïgai podukai soimaaxi taata ïpï tudu. Dai gobai itïiya ïrhidi sai gia kabami bhai gïn ïrhiadamu aapimï xïxkadï dibiagi ïgai ïpamu xïïxkadï gï maaxitudagi xïï xigiamaaxi ïgai dai xïï kabami ïr gubuakami ïpï.

1 Pedro 5:1

Xibi ojamu aanï ïmo ñoki go bhaitï gukakamigadï go buaboitudadami bïïtarï. Gin kaïkabïrai, aanï ïpï ïr ïmo bhaitï kïakamigadï go buaboitudadami ïpï dai nïidi aanï aidïxi soimaaxi taatamaitadai Suxi Kristo. Aanï ïpï urabamu Suxi xïïxkadï dibiagi ïgai dai gï maaxitudagi xïïxi ïr gïdukami ïgai.

2 Pedro 1:13

Po in ïrhidi aanï tudu saidi kïïgadu xi podukai dudatai gïn mamaakadagi aanï ñoki asta xïïxkadï ukami oidakagi aanï tami oidigi daama kia.

1 Juan 3:14

Daiñi, kïïga maatï aatïmï sai ka mai koidadï gïr duu gïr iibhïdaga xibi. Kïïga maatiga maaxi gobai, gïr oigïdai aatïmï aipakoga kaxkïdï. Gobai ïr ïmo maaxidaragai ix ka duduakatu gïr ibhïdaga tudu. Dïï gia odami ix makïdï mai oigïdadagi jaa ïgai gia apia kia ïr koidadï dukai iibhïadï.