2 Timoteo 3:12 - Northern Tepehuan Bible

¹² Pomaaxkamu aatïmï gïr bïïtarï ix makïdï bïïna daraka Suxi Kristo dai ix makïdï kïïga xadutudaitai óídaka rïrhidi. Mai biïgaka agai xorai soi gïr buidadagi tudu.

Tepehuan Northern: Diuusi ñiooquidʌ utuducami oodamicʌdʌ

¹² Sʌʌlicʌdʌ ʌrvaavoi isvʌʌscatai ismaaacʌdʌ ivuaada ʌliadagi istumaasi Suusi Cristo ipʌlidi ʌgai aliʌ soimaa taata agai.

2 Timoteo 3:12 ပူးပေါင်းရင်းမြစ်များ

Mataibo 16:24

Daidi bhodïrï Suxi potïtïdai mamaatïrdamigadï, —Gïn aagidamu aanï ix dukatai gï agai xi ibuadagi odami ix makïdï ipïrhiadagi saidi ïr gin mamaatïrdamigakagi. Gï agai xi dagitoagi ïgai ïïgi tïgibudadï. Ka maiti gï agai xi ibuadagi ïgai ïïgi ixtumaxi ipïrhiadagi ïgai tudu. Xorai gin oijada ïrhiada gï agai bhaiyoma xi bïïx tasai kusukan dukai imïdagi go kuruxi ixtukïdï gï muatuda aagai ïgai. Gobai itïiya ïrhidi sai gï agai xi bïïx tasai bhai gï dukagi ïgai ix soimaaxi taatagi dai asta sai gï muatudagi gin oiditai. Aidï gia bhaigakamu ïgai xi gin oijadagi daidi ïr gin mamaatïrdamigakagi. Ïma dukai gia cho— itïtïdai.

Mataibo 23:34

—Daiñi, gïn otosdamu aanï ñiñokituldiadamigadï Diuxi dai gïn otosdamu aanï odami ix makïdï kïïga bia tïgibudagai dai jaa ix makïdï gïn tïtïïgiadamu Diuxi ñokidï ïpï. Dai kodamu aapimï ïïmoko kukuruxiana xixakai. Sïïrhikïdï oomarhiga aapimï kaxkïdï. Dai jaa baan tutusamu aapimï judidiu kikiupaigadïana dai gïgïbimu aapimï ikixanaikïdï. Aadaimu aapimï ïgai aipakoga go gïgïr kiikiamu dai soimaaxi taatamitulda agai aapimï. Podukai buidadamu aapimï ix makïdï gïn otosdamu aanï mos ïï oomarhigakatai aapimï— itïtïdai.

Markos 10:30

Daiñi, aanï agai sai ix makïdï podukai dagito ïmo kii ïgai biakamu ïmo ciento bhaabhaki tami oidigi daama. Dai podukai ïpï ix makïdï dagitoagi susukurhi dai xixïgi xiïpï dïïdï dai maamaradï dai dïbïradï ïgai ïmo ciento biakamu go maaxi ix makïdï dagito dïï gia odami soi buidida agai. Dai aïkai gïmai oidigïrï tomax tuigako oidaka agai.

VUAANA 16:2

Daiñi, gokiïrï go gaa judidiu ix makïdï mai buaboitudai gïn daidamu ix bapakïda aapimï kikiupaigadïrï. Dai asta gïn kodada agai pobïn ïrhiditai sai ibuayi Diuxi aaduindadï gïn kodatai.

VUAANA 16:33

—Gïn aagidi aanï idi aatagi sai kïïga bhai gïn ïrhidiña aapimï gin bïïna darakatai aapimï. Daiñi, tami idi oidigi daama taatamu aapimï naana maaxi soi ïrhiaragai soi gïn buididitai jaa. Dïï maiti abïr gïn dagitoka ix gïn maitagi go soi ïrhiaragai. Kaxkïdï tudu kaxi gamaitï aanï buidïrï bïïxi ix tumaxi oidaga tami oidigi daama— itïtïdai.

VUAANA 17:14

Xibi kaxi gatïïgi aanï gï ñoki gin mamaatïrdamiga ix kaxkïdï go gaa kïïdai. Ka maiti ïr aaduñdï gobai go gaa xibi ix makïdï adaimïi ïïgi tïgibudadï kaxkïdï kïïdai go gaa. Xibi gin ïpïamaaxi gobai, aanï ïpï maiti ïr aaduñdï go gaa ix makïdï adaimïi ïïgi tïgibudadï— itïtïdai.

Hechos 14:22

Dai dïgabunukai ïgai bïïxi go kiikiïrï ïgai gamaakaiña gubukadagai abhana go buaboitudadami daidi gaabïnakidiña xi kïïgakïrï buaboidaiña ïgai. Dai aagidimi ïgai sai gï agaitadai kia xi odami naana maaxi soi ïrhiaragai taatagi xi gokiïrï ayimu ixtuigako gatïanïda agai Diuxi.

1 Korintios 15:19

Ix ïr buaboikamudai sai mosïkaxi tami idi oidigi daama gïr soikïi Suxi dai amaxi ka kokai aatïmï ka maiti gïr soiña agai aidï gia sogigi aatïmï ix makïdï buaboitudai. Xi ïr buaboikamudai gobai aidï gia ka maiti ïr buaboikamudai gïr nïnïraraga. Ix ïr buaboikamudai gobai aidï gia bamioma soi dukai óídakamudai aatïmï ix bhai bïïxi go gaa óídakami tudu.

2 Korintios 1:12

Gin aaduñi, aanï ïmadï Timoteo kïïga maatï gïr ibhïdagïrï sai tomarhi ïmo imidagai mai yaatagidi aatïmï go óídakami dai mai buirumagi aatïmï. Kïïga ibhïxtakan taadaga gïr iibhïdaga kïï sïïrhi ibuadatai aatïmï óídakami bïïtarï tudu gïr soikïitai Diuxi. Dai asta bamioma kïïga ibuadana aatïmï aapimï gïn bïïtarï gïr aaduñikatai aapimï Diuxi amadïrï. Kïïga sïïrhi ibuadana aatïmï tudu oiditai Diuxi tïgibudadï dai mai xu xi oidiña aatïmï go oidigi daama óídakami tïgibudadï. Dai pokaiti aatïmï sai gobai gia kïïga namïga, sïïrhi ibuadatai aatïmï tudu.

2 Korintios 4:9

Soi gïr buididiña jaa dïï gia xadïrï ïïgi gïr biana Diuxi. Tomaxi gïr bui susurhigïi jaa dïï gia Diuxi mai daadagitoi ix gïr kodagi ïgai.

1 Tomoteo 2:2

Daidi abïr daanturhiada go gïgïr dudunukami dai bïïxi go gaa gupudagai bipiakami ïpï. Abïr daanïda ïgai bïïtarï bai kïïga aatabuadagi ïgai. Gï agai gobai sai podukai xioma óídakana aatïmï bïïxkatai xadutudaitai Diuxi dai kïïga gïr xadutudaitai aipakoga ïpï.

1 Tomoteo 3:16

Kïïga maatï aatïmï sai namïga gïr buaboidaraga buaboidaitai aatïmï Suxi Kristo. Daiñi, ïkioma óídakami mai maatïkana ixtumaxi ïr buaboi dïï gia Diuxi gïr tïïgi ixtumaxi ïr buaboi dibiakai Suxi Kristo. Dai xibi naana maaxikïdï maatï aatïmï saidi ïr buaboi ixtumaxi aagai aatïmï aagaitai Suxi Kristo dai sai namïga gïr buaboidaraga. Daiñi, Suxi Kristo gïr aagidi dai gïr maaxiturhi xorai ïgai dibiakai tami oidigi daama. Dai Diuxi Ibhïadï ïpï kïïga aagaiña saidi ïr buaboi xorai gï aagaiña Suxi Kristo. Dai go Diuxi tïtïañikarudï bïïxi nïidiña go Suxi ïpï dai aipakoga óídakami ayi aatagi xorai ïgai. Dai gokiïrioma mui oidigi daama óídakami bhai aa saidi ïr buaboi ïpï dai buaboitu. Bhodïrï gï baidakatu go Suxi tïbagiamu xako oidakamu gïïpi xadutudaragai ïgai bïïtarï. Xadïrï po gï duñimudai bïïxi gobai ix maiti ïr buaboikamudai gïr buaboidaraga di.

1 Tomoteo 6:3

Daiñi, oidaga jaa ix makïdï aagaiña ïma maaxi ñoki ix makïdï maiti ïr gïr buaboidaraga ñokidï. Mai aagaiña ïgai go ñoki ix makïdï gïr tïïgi Suxi Kristo tudu. Suxi Kristo gïr maatïturhi ix dukatai ïïgiadagi Diuxi.

Tito 1:1

Bhaiga Tito. Aanï ïr Pabora ix makïdï gï otoxdi idi ojai. Pioñigadï aanï Diuxi ix makïdï gin maa ïmo sïïrhikami saidi ïr otosadïkana aanï Suxi Kristo. Aatabuayi aanï soiña iñïrhiditai buaboitudadami, kaxkïdï tudu Diuxi ïko bubaidadï ïgai. Soiña in ïrhidi sai kïïga buaboitudana ïgai. Kaxkïdï tïtïïgidiña aanï ixtumaxi ïr buaboi sai buaboitudaiña dai Diuxi maaxi tutiakana ïgai.

Tito 2:12

Dai xibi maatï nïiditai aatïmï xïï kïï tuiga Diuxi gobai gïr soikïi naana maaxi ixtumaxiïrï. Gïr soikïi gobai xi dagitoagi aatïmï ixtumaxi mai bhai ïrhidi Diuxi. Dai gïr soikïi ïpï xi gajiadïrï biagi aatïmï go soimaaxi ix makïdï ibuada ïrhidiña odami ix makïdï mai buaboitudai. Dai maatï nïiditai aatïmï xïï kïï tuiga Diuxi gobai gïr soikïi xi sïïrhi gïr tïtïgitoagi ïpï dai xi buañixikan dukai óídakagi idi oidigi daama kïïga ïïgiditai aatïmï Diuxi. Bïïxi gobai gïr soikïi maatï nïiditai aatïmï xïï kïï tuiga Diuxi otosakai ïgai Suxi Kristo.

1 Pedro 3:14

Dïï gia xïduñada gïn kïïdadagi jaa kïïga ibuadatai aapimï ixtumaxi ïr sïïrhi dai soimaaxi gïn taataturhiadagi ïgai maiti abïr buamï gïn ïrhiada. Diuxi gï tïgito nïidamu dai gïn maakimu bhai ïrhiaragai kaxkïdï. Maiti abïr duduadikuda xïïxkadï pokaitadagi jaa saidi soimaaxi gïn buidada agai tudu.

2 Pedro 3:11

Ugida agai bïïxi aïkatai ixtumaxi nïidi aatïmï tudu. Kaxkïdï maatiga maaxi sai gï agai sai kïïga buañixikami dukai óídakagi aatïmï kïïga ïïgiditai aatïmï Diuxi.

Apokalipsis 12:4

Dai nïidi aanï xi bhajidïkïdï bui ïgai bhaitoma tajukami go xixabugai tïbagiana dai oidigi daama surhi. Dai bhodïrï buidïrï kïkiba ïgai go oki nonoakïdï. Nïnïraka ix busiagi go arhi odami dai ugiagai.

Apokalipsis 7:14

Dai potïtïdai aanï, —Aapi bhaitï kïakami, aapi maatï xorai ïgai. Aanï gia xadïrï maatïkana— antïtïdai aanï. Daidi pobai in tïtïdai go bhaitï kïakami, —Gobai ïr go odami ix makïdï kabami soimaaxi taatamaiña buaboidaitai gobai go Arhi Kañiru tïgidukïdï. Kïïga bapakoi gobai yukuxidï dai totoatu ïradïkïdï go Arhi Kañiru ix makïdï itïiya ïrhidi sai kïïga buañidi bïïxi soimaaxi iibhïadïañdïrï— ikaiti.