2 Timoteo 2:15 - Northern Tepehuan Bible

¹⁵ Kïïga gï aaga aapi Timoteo ibuadatai gï aaduindaga. Dai kïï sïïrhi gatïtïïgiada Diuxi ñokidï kïïga ïr buaboi Diuxi ñokidï tudu. Ïmo aatabuadami aapi tudu dai kaxkïdï ibuada aapi ix dukai aagai aanï sai podukai mai tipukagi xaïraragai gï bïïtarï gï nïiditai Diuxi.

Tepehuan Northern: Diuusi ñiooquidʌ utuducami oodamicʌdʌ

¹⁵ Gʌaagañi dai cʌʌga ivuaada gʌaa duiñdaga sipoduucai Diuusi potʌimo isaapi ʌraata vuaadami cʌʌgaducami. Dai poduucai maiviaacamu aapi istuisi siaa ʌradagi cʌʌga gamamaatʌtulditai Diuusi ñiooquidʌ. Diuusi ñiooquidʌ gia ʌrvaavoi.

2 Timoteo 2:15 ပူးပေါင်းရင်းမြစ်များ

Mataibo 13:52

Daidi Suxi potïtïdai, —Aidï gia bïïxkatai ix makïdï ïr ojadami go ïkidadï sïïrhikami dai ka mamaatïrïi xibi go utudui ñoki aagaitai ix dukatai gatïanïi Diuxi, ïgai gï agai sai gatïtïïgiadagi ñoki aagaitai bïïxi ixtumaxi máí ïgai. Aagaitai ixtumaxi ïr buaboi tudu. Gï agai sai gatïtïïgiada ïgai ixtumaxi ïr buaboi aagaitai go ïïkidadï sïïrhikami dai aagaitai go utudui sïïrhikami ïpï tudu. Bïïxi gobai ïr namïakami ñoki kaxkïdï. Dai go naana maaxi namïakami ñoki ïr ïpïan dukami naana maaxi ixtumaxi namïakami ix makïdï biakagi ïmo oidakami kiidïrï. Ïpïan dukami gobai xïïxkadï ïmo oidakami bubiadagi go naana maaxi namïakami ix makïdï bia ïgai dai tïgidiña ïgai jaa sai nïidiña. Ipïrhidiña ïgai ix nïijada ïgai bïïxi go naana maaxi namïakami tudu mai xudu xi ïr ïkidadï ixtumaxi namïakami ix utudukagi ïpï. Dai pomaaxi go ñoki namïakami ïpï. Gï agai xi tïtïïgiadagi gobai xi ïr utudukami ñoki xi ïr ïkidadï ïpï— itïtïdai Suxi.

Markos 4:33

Mos podukai Suxi naana maaxi maaxidaragai aatagikïdï aagaiña Diuxi ñokidï. Bïïxi maatïturhi ïgai odami asta xako ukami ayi odami tïgibudadï ix maatï kajiagi.

Lukas 12:42

Dai Suxi potïtïdai, —Go ñoki gobai ïr toma xorai bïïtarï ix makïdï ïr pipioñikagi duu kïïga ïïgidarakan tuigakami dai biakami kïïga tïgibudagai. Daiñi, ïmo ga amu ix makïdï muidukagi pipioñigadï xïxkadï xibhï imi agadagi gaagaiña ïmo pioñigadï ix makïdï kïïga ïïgidarakagi dai ix makïdï kïïgadu tïgibudadï. Dai tïïgakai ïgai ïmoko pomaaxkami nukaturhiña ïgai go gaa pipioñi sai nukadakana ïgai dai sai bhibhidiña xïïxkadï gï agadagi— itïtïdai.

Hechos 2:22

Bhodïrï Piduru oi aatagidï daidi ikaiti, —Kaïkabïrai aapimï Israelïrï oidakami. Kïï maatï aapimï sai Diuxi maa gubukadagai Suxi go Nasaretañdïrï oidakami. Kaxkïdï kïïga maatiga maaxi xi ïgai ïr Diuxi otosadïkatadai. Go Suxi idui naana maaxi maaxidaragai aapimï gïn buitapi ix makïdï ïïgi Diuxi ixtutuidi xi buadagi di. Dai aapimï ïr nïijadami gobai.

Hechos 20:27

Maiti an ïxto aanï Diuxi ñokidï aidï. Kïïga gïn aagidi aanï bïï sudakami.

Romanos 14:18

Xorai podukai oidakagi Suxi Kristo bïïtarï maakimu bhai ïrhiaraga Diuxi dai odami kïï tuigakami dukai nïijadamu ïpï.

Romanos 16:10

Diuxkïdï abïr biatulda Apeles. Ïgai mos apia buaboitu tomaxi kabami taata soi ïrhiaragai dai maiti gï dagito xi gï maitiagi go soi ïrhiaragai. Diuxkïdï abïr biatulda Aristobulo aaduñdï ïpï.

Romanos 6:13

Maiti abïr gatïïgida gïn tukuga xi ïr aaduinkarudï go soimaaxkami tudu. Bhaiyoma abïr gïn tïïgida xi ïr Diuxi aaduinkarudïkana aapimï xi ibuadagi aapimï ixtumaxi ïr kïïga. Aapimï ka gokiamako bia go mukigami aidï dai kaxi ïr duduakakami kïïgakïrï. Kaxkïdï abïr gatïïgida gïn tukuga bai podukai ïïgiadagi aapimï ixtumaxi ïr sïïrhi.

1 Korintios 2:6

Daiñi, xïïxkadï gamamaakadagi aanï aatagi buaboitudadami ix makïdï kaxi kabakami imïi buaboidaradï aidï gia aagidiña aanï tïgibudagai bamioma saitudakami ix makïdï Diuxiañdïrï imïi. Dïï gia tami oidigi daama óídakami xadïrï saitudakami ïrhidiña go tïgibudagai ix makïdï Diuxiañdïrï imïi. Ïma maaxi tïgibudagai gobai kaxkïdï. Dai go gupudagai bipiakami ïpï pobïnïrhidi ix mai saitudaga go tïgibudagai ixtukïdï gamaakaiña aanï aatagi. Dïï go gupudagai bipiakami mai tïbïpi kapaka agai dai gubukadadï ugiti agai ïpï.

2 Korintios 10:18

Diuxi mai kïïgakïrï nïidi odami ix makïdï pokaitadagi sai ïïgi kïïga idui tudu. Dai bhaiyoma mosïkaxi Diuxi ïgai dai bhaiga xi aagadagi xorai kïïga idui dai xorai kïïga nïijada agai ïgai.

2 Korintios 3:6

Diuxi gïr maa go gubukarhigai saidi gatïtïïgiada aatïmï go utudui sïïrhikami ix makïdï bhai dui ïgai óídakami ïmadï tudu. Dai go utudui sïïrhikami mai ïpïamaaxi go ïïkidadï sïïrhikami ix makïdï maa Diuxi go Moiseskaru ïïki. Go ïïkidadï sïïrhikami ïr ïmo ojixikami ix makïdï biakatadai ix ïïgiadagi go óídakami. Dïï maiti idui soiñi gobai go óídakami bïïtarï dai bhaiyoma go ïïgi gïgïbidaragai dai mukigami buapidi gobai óídakami. Dïï gia go utudui sïïrhikami ix makïdï gïr maakai Diuxi xibi bhobai aagai sai gïr maakai Diuxi ïïgi Ibhïadï. Dai kaxkïdï xibi ka kïïgakïrï óídaga aatïmï bïïxkïrï bïïtarï gïr maakakai Diuxi ïïgi Ibhïadï.

2 Korintios 4:2

aagaitai ixtumaxi ïr buaboi. Oidaga jaa ix makïdï ïxtotai dukai ibuadana naana maaxi xaïrarakami dai bupuirumadai ïgai óídakami mai sïïrhi aagaitai ïgai Diuxi ñokidï. Dïï gia aanï ïmadï ix makïdï gin soikïi gin aaduindagïrï mai pobuayi. Aatïmï bhaiyoma aagai mosïkaxi ixtumaxi ïr buaboi gïr nïiditai Diuxi. Pobuayi aatïmï saidi bïïxi óídakami kïïga maatïkana iibhïadïrï sai mai yaatagïi aatïmï.

2 Korintios 5:9

Dai kaxkïdï tomax xako darakagi aatïmï xi tïbagiana xi tami oidigi daama ïpï tomax dukai ipïrhidi aatïmï xi ibuadagi ixtumaxi bhai ïrhidi Suxi, maatïkatai sai ïmadï daraka ragai.

Galatas 1:10

Daiñi, aanï kïïga buamï in ïrhidi ix tïiyagi Diuxi nïiditai ïgai ix dukatai gatïtïïgidi aanï aatagi. Dïï gia mai buamï ïrhidi aanï ix tïiyagi odami. Mosïkaxi Diuxi buamï ïrhidi aanï ix tïiyagi tudu. Daiñi, oidaga odami ix makïdï pokaitiña sai aanï naana dukai aagaiña aatagi aagaitai ïïgi ixtumaxi kaïka ïrhiada odami. Pokaitiña ïgai sai aanï mos gaagaiña ix dukatai kïïgakïrï gin nïijadagi óídakami. Dïï maiti ïr buaboi gobai. Aanï ipïrhidi bhaiyoma sai kïïgakïrï gin nïijadagi Diuxi pioñigadïkatai aanï Suxi Kristo dai mai xu xi ipïrhidi aanï xi odami kïïgakïrï gin nïijadagi. Ka aagai aanï tudu sai xorai mai sïïrhi aagagi go bhai ïrhiaragai aatagi gï agai xi taatagi gïgïbidaragai bïïxkïrï bïïtarï. ¿Kaxkïdï dukatai naana dukai aagaiña aanï go aatagi? Mai bhaiga. Maatiga maaxi gobai di. Pioñigadï aanï Suxi Kristo tudu xi kaxkïdï bia aanï xi sïïrhi aagagi go aatagi dai mai xu xi mos aagagi aanï ixtumaxi odami kaïka ïrhiadagi.

Efesios 1:13

Xibi aapimï ix makïdï maiti ïr judidiu kaxi kaïkana ix makïdï ïr buaboi. Kaïkana aapimï go bhai ïrhiaragai aatagi tudu. Dai xibi ka buaboitudai aapimï Suxi Kristo ïpï dai ka kïïgakïrï bubuaka aapimï. Xibi buaboitudakai aapimï gïn tïpaltu Diuxi gïn maakakai Diuxi Ibhïadï gïn abhana. Ka ïkiaxdïrï podukai agaitadai Diuxi ix otosa agaitadai Ibhïadï dai kaxkïdï otoi ïgai.

1Tesalonicenses 2:4

Bhaiyoma Diuxi kïïga maatï ixdukatai aatabuayi aatïmï dai bhai aa tïxi aipakoga aituldana odami go bhai ïrhiaragai aatagi. Diuxi bïïxi maatï asta ixtuma tïtïitoi aatïmï tudu dai kaxkïdï ñokai aatïmï ixdukatai Diuxi ipïrhidi dai mai xu ixdukatai odami ipïrhidi.

1Tesalonicenses 5:14

Gïr susukurhi, ix makïdï gïn urapïkïi dai paparïga abïr maakada ñoki. Daidi ix makïdï duduadikui abïr abïnakidada. Dai ix makïdï mai gupuka buaboidaradï abïr soikïda. Ïgai bïïxkatai gï agai xi mai dagitokai soiñagi aapimï dai mai ojodadagi.

1 Tomoteo 4:6

Daiñi aapi Timoteo, kïï maatï aanï sai arhidukatai abhiadïrï ka kïïga ïïgidiña aapi go buaboikïdï ñoki. Dai xibi gï agai xi tïtïïgiada aapi ñoki go gaa buaboitudadami aagaitai idi ñoki ix makïdï gï ojidi aanï. Ix podukai gatïtïïgiadagi aapi aidï gia kïïga ibuadamu aapi go aaduindagai ix makïdï gï maa Suxi Kristo pioñigadïkatai aapi. Dai go ñokikïdï ix makïdï tïtïgiadagi aapi buimu aapi bamioma soiñi gï ibhïdagïrï ïpï.

Hebreos 4:11

Gï agai xi kïïga gïr tïgito nïidagi aatïmï tudu daidi bhïiyagi go ibhïxtaragai ix makïdï bia Diuxi gïr bïïtarï. Tadu mai ïïgidi aatïmï Diuxi ïpïan dukai go Israelitas ïïki. Xi pobuadagi aatïmï aidï gia xia gïr duadamu aatïmï ïpï ïpïan dukai ïgai.

Santiago 1:12

Gin aaduñi, xïxkadï gïr ajiagi ïmo soi ïrhiaragai dai ix kïïga gïr kabakadagi aatïmï dai apia oijadagi gïr buaboidaraga aidï gia bia aatïmï ixtukïdï bhai gïr ïrhiadagi. Gï agai tudu sai bhai gïr ïrhiadagi aatïmï xïïxkadï gïr kabakadagi aatïmï dai apia oijadagi gïr buaboidaraga tomaxi xijiakagi gïr oidakaraga. Gï agai sai bhai gïr ïrhiada aatïmï maatïkatai Diuxi gïr maakimu gïr maitïki ix makïdï ïr go kïïgakïrï oidakaragai bïïxkïrï bïïtarï. Kaxi gïr aagidi Diuxi sai maakimu ïgai go maitïki go odami ix makïdï oigïdai Diuxi tudu.

Santiago 1:18

Diuxi ïgai dai gïr maa gïr utudui oidakaragai tudu aidïxi buaboitu aatïmï Diuxi ñokidï ix makïdï kïïga ïr buaboi. Podui ïgai saidi ïko darasadïkana aatïmï, saidi podukai aatïmï ix makïdï buaboitudai ïpïgioma ïko ïr darasadïkana ix bhai ïma maaxi ixtumaxi ix makïdï idui ïgai tudu. Podukai aatïmï bamioma namïakami bii Diuxi bïïtarï xi bhai go gaa ixtumaxi ix makïdï idui ïgai. Ïïgi podukai gï tïgito Diuxi dai kaxkïdï podui ïgai.

2 Pedro 1:10

Maiti abïr pobuada aapimï gin aaduñi dai bhaiyoma abïr kabami gïn aaga daidi kïï bhai tutiaka ix dukai aagai idi ojai. Podukai maatiga maaxkamu sai buaboikïdï ïr ïko bubaidadï aapimï Diuxi. Ix kabami gïn aagagi dai kïï bhai tutiakagi ix dukai aagai aanï aidï gia tomarhi ïmo imidagai mai gïpiïrï surhigimu aapimï.

2 Pedro 1:15

Kaxkïdï kabami gin aajagïi aanï gïn soiña ïrhiditai saidi gïn tïgitokagi aapimï ixtumaxi gïn aagidiña aanï. Dai kaxkïdï gïn ojidi aanï xibi saidi ka ojixikami biakagi aapimï gobai xïïxkadï ka mai tipukagi aanï tami oidigi daama.

2 Pedro 3:14

Gobai nïnïraka aapimï tudu gin aaduñi. Dai kaxkïdï abïr kabami gïn aga dai buañixikami dukai óídaka sai mai tipukagi ixtukïdï gïpiïrï gïn bupadagi jaa. Podukai abïr ibuada saidi kïïga xioma uraban dukai óídakana aapimï buitapi Diuxi.