2 Timoteo 2:12 - Northern Tepehuan Bible

¹² Xibi gïr kabakadai aatïmï dai maiti gïr daadagitoi ix gïr maitiagi go soi ïrhiaragai xïïxkadï soimaaxi taatamadagi aatïmï. Dai kaxkïdï gï maatï sai gokiïrï gatïanïdamu aatïmï Suxi Kristo ïmadï ïpï dibiakai ïgai. Dïï gia ix potïiyagi ïmoko xibi sai mai maatï Suxi Kristo aidï gia dibiakai Suxi Kristo ïgai po tïimu ïpï sai maiti ïr aaduñdï ix makïdï potïi sai mai maatï Suxi Kristo.

Tepehuan Northern: Diuusi ñiooquidʌ utuducami oodamicʌdʌ

¹² Issoimaa taatamadagi vaavoitudadami dai maivui ñioocadagi Diuusi; sʌʌlicʌdʌ tʌaanʌda agai Suusi Cristo ʌʌmadu siaaco tʌaanʌi ʌgai. Isʌmaadutai gajiaadʌrʌ viaagi Suusi Cristo, Suusi Cristo gajiaadʌrʌ vipieeyi ʌʌpʌ.

2 Timoteo 2:12 ပူးပေါင်းရင်းမြစ်များ

Mataibo 10:33

Dïï gia aagidamu aanï sai maiti ïr gin aaduñi ïgai ix makïdï maiti ipïrhi xi maaxiko aagadagi saidi gin buaboitudai— itïtïdai.

Mataibo 26:35

Daidi go Piduru kabamioma aagidi daidi potïtïdai, —Cho xadïrï— itïtïdai. —Tomaxi gï ïmadï muu xadïrï ïxtona aanï saidi gï maatï— itïtïdai. Dai go gaa mamaatïrdamigadï pokaititadai ïpï.

Mataibo 26:75

Dai amaxi gï tïgito go Piduru saidi Suxi ïkiaxdïrï potïtïdaitadai, —Aapi Piduru, mai kia kujukai takuku aapi baikojo potïimu sai maiti gin maatï aapi— itïtïdaitadai Suxi ïkiaxdïrï. Dai Piduru gï tïgitokatadai gobai dai jii abhiadïrï dai kabami suakaitadai soigamukai.

Markos 10:33

Dai potïtïdai ïgai, —Kaïkabïrai aapimï— itïtïdai. —Aanï ïr Diuxi otosadï ix makïdï aagai Diuxi ïïki dai odami gin tïïgida agai go dudunukami mïï Jerusalenïrï xako iimïdami aatïmï mïtai gin tïañi agai muaragai dai gin tïïgida agai xibhïadïrï óídakami.

Markos 8:38

Xibi óídakami arhiïxi ïr soimaaxi buadami dai adaimïi ïgai jaa ix makïdï didiuxi aagai ïgai. Daiñi, aanï ïr Diuxi otosadï ix makïdï aagai Diuxi ïïki dai ayimu ixtuigako dibiamu aanï tïbagiañdïrï ïmadï Diuxi tïtïañikarudï dai Diuxi gubukadagakïdï. Aanï aagai sai tomax tuma oidakami xibi ix makïdï xaïradagi aanïkïdï dai gin ñokikïdï aanï ïpï xaïrogidamu ïgaikïdï dibiakai aanï— itïtïdai Suxi.

Lukas 12:9

Dïï gia xorai pokaitadagi jaa buitapi ix maiti gin buaboitudai aanï ïpï pokaitadamu sai ïr buaboi ix maiti gin buaboitudai. Pokaitadamu aanï Diuxi tïtïañikarudï buitapi tudu— astïdai.

Lukas 22:30

Kaxkïdï gïn maakimu aanï sïïrhikami sai daraibagi aapimï gin mesaga buidïrï ami gatïanïitai aanï. Gin ïmadï gakuadamu aapimï tudu dai gayïdamu. Dai gïn maakimu aanï sïïrhikami sai gïgïr daraikaruïrï daraibana aapimï dai ami darakatai aagadamu aapimï ix makïdï go Israelitas ïgai dai kïï dui dai ix makïdï mai kïï dui ïpï— itïtïdai.

Lukas 9:26

Daiñi, aanï ïgai ix makïdï ïr Diuxi otosadï dai kïïrhi busai dai ayimu ixtugako imimu aanï tami oidigi daamaiñdïrï. Dïï gia gokiïrï dibiamu aanï ïpamu gin tïtïañikaruga ïmadï dai maaxitudamu xïïxi ïr gïdukami aanï dai xïïxi ïr gïdukami gin Oga ïpï. Gïn aagidamu aanï ix dukatai iduñimu aanï dibiakai. Amaxi aagadamu aanï sai maiti ïr gin aaduñi xorai mai buaboituda ïrhiada gin ñoki ïmadï xorai gin xaïradagi.

Hechos 14:22

Dai dïgabunukai ïgai bïïxi go kiikiïrï ïgai gamaakaiña gubukadagai abhana go buaboitudadami daidi gaabïnakidiña xi kïïgakïrï buaboidaiña ïgai. Dai aagidimi ïgai sai gï agaitadai kia xi odami naana maaxi soi ïrhiaragai taatagi xi gokiïrï ayimu ixtuigako gatïanïda agai Diuxi.

Romanos 5:17

Go Adán soimaaxi dui ïïki kaxkïdï aidï abhiadïrï go mukigami apia kïïkigiña. Dïï go aaduindagai ix makïdï idui Suxi Kristo gïïpi bamioma gubuka xi bhai go soimaaxkami ix makïdï iduitadai Adán. Suxikïdï gïr maakai Diuxi ix dukatai kïïgakïrï gïr nïijadagi ïgai. Ïmo oidaragai dukai gïr maakai gobai gïr oigïdaitai. Dai kïïgakïrï nïijadamu Diuxi odami ix makïdï buaboidakai bhïiyagi óídaradï dai ïgai kïïgakïrï óídakamu Suxi Kristo gubukadadïkïdï.

Romanos 8:17

Maamaradï aatïmï Diuxi tudu. Kaxkïdï xibi bïïxi go bhai ïrhiaraga ix makïdï Diuxi bhai darasakami bia Suxi Kristo bïïtarï ïr aatïmï gïr bïïtarï ïpï. Dïï gia gï agai xi soimaaxi taatagi aatïmï ïpïan dukai ix dukatai taata Suxi bai podukai gïr aiyagi ïmo xadutudaragai ïgai ïmadï ïpï.

1 Tomoteo 5:8

Dïï gia xi ïmadutai go buaboitudadami mai nukadakagi ïïgi aaduñdï gobai itïiya ïrhidi sai ka dagito ïgai buaboidaradï dai bamioma galtuiga xi bhai go gaa ix makïdï mai buaboitudai. Dai bamioma ïr galtuigakami ïgai ix mai nukadakagi maamaradï dai dïïdïdï.

Apokalipsis 1:6

Podukai bhai dui ïgai sai gatïanïna aatïmï ïgai ïmadï xïxkadï gatïanïdagi ïgai dai sai ïr dadaxdadamikana aatïmï ïpï ibuadatai daxdaragai Ogadï bïïtarï. Diuxi bïïtarï tudu. Pomaaxi idui Suxi Kristo xi kaxkïdï gï agai xi xadutuada aatïmï bïïxkïrï bïïtarï adaama Tïanïdamikatai ïgai. Gobai gia ïr buaboi.

Apokalipsis 1:9

Gin aaduñi, kïï maatï aanï sai soimaaxi gïn taatamiturhiña jaa bïïna darakatai aapimï Suxi Kristo dai aanï ïpï taataiña xi soimaaxi gin taatamiturhi jaa bïïna dakatai aanï Suxi Kristo ïpï. Ïmo xïgïmï aatïmï tudu soimaaxi gïr taatamiturhitai jaa aatïmï bïïxkatai. Dïï gia ïmaduga Gïr Nukadakami dai ïgai ïr Suxi Kristo. Dai bïïna darakatai aatïmï ïgai buyiña aatïmï gubukarhigai ixtukïdï gïr kabakadagi go soi ïrhiaragai bui. Gïn aagidamu aanï ix dukatai gin daibusai ïmo imidagai tumiñoko. Ïmo arhi oidigana dajatadai aanï aidï ix makïdï go gïï sudagi ïrana kaatï. Patmos tïgidu go arhi oidigi ïgai. Ami gin maixatutadai jaa aagaitai aanï Diuxi ñokidï dai aagaitai Suxi Kristo. Ami dajatadai aanï tudu dai ïmo imidagai gin tïanïitadai Diuxi Ibhïadï dai aanï kïïga ïïgidimi bai todian dukai ïgai gubukadadïkïdï kaï aanï ix gïgïrï ño ïmoko gin gokiañdïrï. Po ïrhiadan kaiti trompeta.

Apokalipsis 2:13

dai maatï aanï sai go diabora ïgai dai gatïanïi ami go gïï kiikiïrï xako óídaga aapimï. Dai maatï aanï sai tomaxi tïanïi ïgai ami aapimï bïïxkïrï apia gin buaboitudai. Mai dagito aapimï gïn buaboidaraga tudu tomaxi ami xako óídaga aapimï gï muatu go kïïrhi Antipas tïgidukïdï ix makïdï sïïrhi ñokaiña gin bïïtarï aagaitai ixtumaxi ïr buaboi. Maiti gin dagito aapimï tomaxi ami gïn kiikiïrï oidaga go diabora tudu.

Apokalipsis 20:4

Dai bhodïrï nïidi aanï gïgïrï daraikarui dai daama daraja ix makïdï ïr Suxi Kristo darasadï dudunukami. Dai tïï aanï ïpï xi duduakatu mui koidadï. Gobai ix makïdï tïï aanï ïr go ïpïgadï duakaragai agaikïdï. Dai aidïpïrï duduakatu koidadï ix makïdï gïn guikomatu kuxibodï aagaitai ïgai Suxi ñokidï dai Diuxi ñokidï. Duduaka ix makïdï mai xadutugi go kïixi dai tomarhi mai xadutugi ubixigadï dai maiti gïn dagito ix gïn tïpaltudagi kokobadïrï xiïpï ïïkadïrï. Ïgai tudu duduakatu ïpamu dai bhïiyi sïïrhikami dai gatïanïda agai Suxi Kristo ïmadï ïmo mirhi umigi.

Apokalipsis 3:10

Kaxi gïn aagidi aanï mïsai gïn kabakadana xïïxkadï soimaaxi taatagi dai kïïga gin ïïgidi aapimï. Kïïga gïn kabakadai aapimï tudu. Dai kaxkïdï gïn nukadakamu aanï xi maiti gïn aiyagi ix soimaaxi taatagi xïïxkadï kabami soimaaxi taatagi bïïxi go gaa óídakami. Ayimu tudu ixtuigako soimaaxi taatamitulda iñagai bïïxi óídakami nïidana sa bhai mai ïma dukai gïn tïtïgitona ïgai. Dïï aapimï maiti gïn ayimu gobai gïn nukadatai aanï.

Apokalipsis 3:21

Dai Diuxi gin Oga gin maa oigaragai xi abhana daibana aanï ïgai daikarudïana xakoga dakatai gatïanïi ïgai sai gatïanïna aanï ïgai ïmadï. Maitï aanï go soimaaxi buidïrï tudu kaxkïdï gin maa oigaragai xi daibana aanï ami. Dai aanï podukai maakimu oigaragai ïpï xorai maitiagi soimaaxi buidïrï sai daibana ïgai gin ïmadï gin daikarugana xakoga gatïanïi aanï reykatai aanï.

Apokalipsis 3:8

Kïï maatï aanï bïïxi ixtumaxi ibuayi aapimï. Daiñi, tomaxi mai xii gupuka aapimï bïïxkïrï kïïga ïïgidi aapimï gin ñoki dai mai ïxto xi gin buaboitudai. Kaxkïdï gïn maa aanï oigaragai sai aagada aapimï gin ñoki dai mai tipu xorai gïn sobhidagi.

Apokalipsis 5:10

Aapi bhai dui ïgai bïïtarï sai Diuxi ïgai dai gatïanïna aaduñdïkatai ïgai Diuxi. Dai bhai dui aapi sai ïr dadaxdadamikana ïgai ïpï ibuadatai daxdaragai gïr Diuxiga. Dai gokiïrioma go odami ix makïdï sabïrhi aapi gatïanïda agai bïïxi go oidigi— ikaiti go maakoba duduakakami ixtumaxi ïmadï go ïmokobhai dan maakoba bhaitï gukakami.