2 Timoteo 1:14 - Northern Tepehuan Bible

¹⁴ Daiñi, Diuxi gï nukaturhi go kïïgadukïdï aatagi kaxkïdï maiti gï dagitoda aapi ix kuga imiagi gï aatagi xïïxkadï gatïtïïgiada aapi ñoki. Kïï sïïrhi aagada tudu. Dai Diuxi Ibhïadï ix makïdï gïr ïmadï daja gï soiñamu sai podukai kïï nukadakana aapi go aatagi.

Tepehuan Northern: Diuusi ñiooquidʌ utuducami oodamicʌdʌ

¹⁴ Gamamaatʌtuldañi aapi Diuusi ñiooquidʌ istumaasi gʌmaatʌtuli aanʌ dai Diuusi Ibʌadʌ ismaacʌdʌ gʌrʌma daja gʌsoicʌdamu.

2 Timoteo 1:14 ပူးပေါင်းရင်းမြစ်များ

Lukas 16:11

Kaxkïdï gï agai aapimï xi kïïga ibuadagi gïn buxtuidagakïdï ix makïdï bipiatu aapimï tami oidigi daama. Gobai ix makïdï oidaga tami oidigi daama mai xii ïr namïakami tudu. ¿Dïï gia xi mai kïïga ibuadagi aapimï gokïdï aidï gia dukatai gïn nukatuldana Diuxi ixtumaxi kïïgakïrï ïr namïakami ix makïdï gamamaakai ïgai tïbagiañdïrï?—

VUAANA 14:17

—Ïgai ïr Diuxi Ibhïgadï dai ïr gamaatïturhiadami ixtumaxi ïr buaboi. Dïï gia go gaa óídakami ix makïdï adaimïi mosïkaxi odami tïgibudadï mai bhaiga ix ïïgiadagi Diuxi Ibhïgadï. Ïgai mai buaboitudai Diuxi Ibhïgadï mai maatïkatai xorai ïgai dai mai maatïkatai ïpï ix dukatai aatabuayi ïgai. Dïï aapimï gia kïïga maatï Diuxi Ibhïadï gïn ïmadï dajatai ïgai. Gïn ïmadï daja ïgai tudu dai gokiïrioma gïn ïrana oidaka agai ïgai ïpï— itïtïdai.

Romanos 3:2

Sïïrhikïdï gïïpi ïr soiñi gobai bïïxi aïkatïrï. Daiñi, Diuxi nukaturhi go judidiu Diuxi ñokidï. Gobai ïr go gïdukïdioma soiñi ix makïdï bia go judidiu gïn abhana.

Romanos 8:11

Daiñi, Diuxi ïgai dai duakaturhi go Suxi Diuxi Ibhïadï gubukadadïkïdï. Dai xibi Diuxi Ibhïadï gïn ïrana daja. Kaxkïdï maatï aatïmï sai Diuxi duakatuda agai gïn tukuga ïpï mukukai aapimï. Gïn duakatudamu Diuxi Ibhïadï gubukarhigadïkïdï ix makïdï gïn ïrana daja.

Romanos 8:13

Ix ïïgiditai óídakagi aapimï gïn ïkidadï tïgibudagai aidï gia mos koimu aapimï. Dïï gia ix Diuxi Ibhïadï gubukarhigakïdï maigobai dasagi aapimï ix makïdï ibuadana ïïgiditai gïn tïgibudaga ïkidadï, aidï gia kïïgakïrï óídakamu aapimï.

Romanos 8:9

Dïï gia ix gïn ïmadï daja Diuxi Ibhïadï aidï gia ka maiti gïn tïanïi gïn tïgibudaga ïkidadï. Bhaiyoma xibi Diuxi Ibhïadï ïgai dai gïn tïanïi. Xorai mai biakagi Diuxi Ibhïadï ix makïdï Suxi Kristo gïr otoxi, ïgai gia maiti ïr aaduñdï Suxi Kristo.

1 Korintios 3:16

Gin aaduñi, kïïga maatï aapimï sai aapimï ïr Diuxi bakidï dukai xako oidakami ïgai. Kaxkïdï tudu Diuxi Ibhïadï aapimïrï daja.

1 Korintios 6:19

Kïï sïïrhi abïr gïn tïgitoka tudu sai gïn tukuga ïr Diuxi Ibhïadï bakidï dukai gïn ïrana dakatai ïgai. Dai Diuxi ïgai dai gïn maa ïïgi Ibhïgadï sai gïn ïmadï dakana. Kaxkïdï ka mai bia aapimï sïïrhikami ix ïïgi gïn tïanïdagi aapimï.

1 Korintios 9:17

Kaxkïdï tudu tomaxi maiti ipïrhiadagi aanï ix aagagi go bhai ïrhiaragai aatagi tomax dukai bia aanï sïïrhikami ix aagagi dai mai tipu maitïki gin bïïtarï. Dïï gia ix ïïgi gin bhai ïrhiaragakïdï aagagi aanï aidï gia kïïga buyiña aanï maitïki.

2 Korintios 5:16

Kïïga maatï aatïmï xibi sai Suxi Kristo muu bïïxi óídakami bïïtarï tudu dai kaxkïdï ka ïma dukai nïidi aatïmï óídakami dai mai xu ixdukatai nïidiña aatïmï ïkioma. Ka ïmai tïgibudagaikïdï nïidi aatïmï odami tudu dai mai xu xi go tïgibudadïkïdï ix makïdï go gaa oidigi daama óídakami oidiña. Dai xibi ka ïma dukai nïidi aatïmï Suxi Kristo ïpï. Ïkioma mai kïïgakïrï nïidiña aatïmï ïgai. Ïkioma nïidiña aatïmï ixdukai go ix makïdï mai buaboitudai nïidi tudu. Dïï xibi gia ka buaboitudakai aatïmï ka gïïpi ïma dukai nïidi aatïmï go Suxi.

Galatas 2:7

Bhai aa ïgai tudu sai kïïgadu ix duu aagai aanï sai go buaboitudadami mai bia xi ïïgiadagi go sïïrhikamigadï Moises dai sai maiti gï agai xi gïn circuncidandoagi ïgai ïpï sai kïï biïna Diuxi ïmadï. Kïïga maatï tïï ïgai sai Diuxi kïï tuiga gin bïïtarï gin maakaitai ïmo sïïrhikami. Kaxkïdï bhai aa ïgai sai kïïgadu gin aatagi. Maatï tïï ïgai tudu sai ïpïan dukai xi Diuxi maa sïïrhikami go Piduru ix tïtïgiadagi ïgai ñoki go judidiu podukai gin maa Diuxi sïïrhikami aanï xi tïtïgiada aanï ñoki go ix makïdï maiti ïr judidiu. Sai tïtïgiada aanï go bhai ïrhiaragai aatagi tudu. Dai asta pobai in tïtïdai go bhaitï gukakami sai aanï ïmadï go Bernabé ïr ïmo aadunumï ïgai ïmadï. Dai gïr aagidi ïgai sai aatïmï aituldana aatagi go odami ix makïdï maiti ïr judidiu dai ïgai aitulda aagai aatagi go ix makïdï gia ïr judidiu. Pobai gïr tïtïdai go kïkïïrhi ix makïdï odami bamioma xadutudai tudu. Dïï gia gï agai xi maatïkagi aapimï sai Diuxi ïmadugan dukai nïidi bïïxi odami dai kaxkïdï aanï in bïïtarï go bhaitï gukakami mos ïr kïkïïrhi ïpïandukai toma xorai tomaxi odami gia bamioma tïtïanïdami dukai nïidi. Kïïga bhai aa ïgai tudu sai kïïgadu gïr aaduindaga dai maiti gïr aagidi ïgai sai ïma dukai gatïtïïgiada aatïmï aatagi.

Efesios 2:22

Dai xibi aapimï ix makïdï maiti ïr judidiu bïïna daraka Suxi Kristo ïpï. Xibi aapimï ojodai dukai gïn darasaka Diuxi kiidïrï ïpï. Podukai aatïmï bïïxkatai ïr tutuidadï Diuxi kiidï dukai xako oidaga ïgai gïr ïrana dakatai Diuxi Ibhïadï.

Efesios 5:18

Maiti abïr nabaakorïda. Gobai mos xia buayi odami. Bhaiyoma abïr gïn dagito xi gïn tïanïdagi Diuxi Ibhïadï.

Kolosenses 4:11

Dai go Suxi ix makïdï Justo aagaiña aatïmï, ïgai gïn otoxdi ïmo biatuldaragai ïpï. Gin aaduñi, muidu go judidiu ix makïdï buaboitudai dïï mosïkaxi go Aristarko dai go Markos dai go Suxi Justo ïgai dai gin ïmadï gaatabuayi tanai. Agia kïïga ïr ïmo bhai ïrhiaragai gin bïïtarï gin soikïitai ïgai. Gin soikïi ïgai aipakoga aiturhitai aatïmï go bhai ïrhiaragai ñoki ix makïdï aagai ixdukatai tïanïi Diuxi.

1Tesalonicenses 5:19

Maiti abïr sobhikïda Diuxi Ibhïgadï xïïxkadï gïn saagida gaatabuadagi ïgai.

1 Tomoteo 1:11

Podukai aagidiña aanï odami xïïxkadï aagidagi aanï go bhai ïrhiaragai aatagi aagaitai Suxi Kristo. Gobai ïr ïmo aatagi kïïga namïakami. Dai Diuxi ix makïdï kïïga bhai gï ïrhidiña ïgai dai gin tïïgi go bhai ïrhiaragai aatagi. Ïgai tudu gï agai xi xadutuadagi odami aagaitai xïïxi ïr gïdukami.

1 Tomoteo 6:20

Aapi Timoteo, kïïga inukada go buaboidaragai ix makïdï gï nukaturhi Diuxi. Gï agai xi kïï sïïrhi tïtïgiada aapi gobai sai mai gai imïna tudu. Dai maiti urapïkïda aapi aagadami aatagi ix makïdï ïr ïïgi odami tïgibudadï dai ix makïdï maiti ïr soiñi. Naana maaxi aagai ixtumaxi tudu. Pokaitiña ïgai saidi ïr mamaatïkami dïï maiti ïr buaboi. Maiti urapïkïda ïgai tudu.

2 Timoteo 1:12

Dai xibi maixapi aanï ibuadatai go aaduindagai ix makïdï gin maa ïgai dïï mai xaïrai aanï gokïdï. Kaxkïdï tudu kïïga maatï aanï ix tuiga Suxi Kristo ix makïdï buaboitudai aanï dai gobai ïr ïmo abïnakidaragai gin ibhïdaga bïïtarï. Kïïga buaboitudai aanï tudu dai asta nukaturhi aanï gin ibhïdaga. Kaxkïdï tudu kïï maatï aanï sai ïgai bia gubukarhigai ix gin nukadakagi asta xïïxkadï dibiagi ïgai ïpamu.

2 Timoteo 2:2

Aapi Timoteo kïïga kaïkana gin aatagi dai jaa mui kaïkana ïpï dai aagai saidi ïr buaboi. Dai xibi gï agai xi nukatulda aapi go aatagi jaa kïkïïrhi sai maigobioma aituldana ïgai ï galbaaxi aatagi. Gï agai xi nukatulda aapi jaa ix makïdï sïïrhi aatabuayi tudu sai mai sarabidagi gobai ïma maaxi aatagi. Dai Diuxi gï maakimu gubukarhigai idi aaduindagai bïïtarï.

1 Pedro 1:22

Daiñi gin aaduñi, aapimï ka ïïgidi go buaboi aatagi dai ka buañixikami bii gïn ibhïdaga. Kaxkïdï gï agai sai kïïgakïrï gïn oigïdada aapimï aipakoga bïïxi gïn ibhïdagakïdï.