2 Pedro 1:4 - Northern Tepehuan Bible

⁴ Dai gïr aagidi Suxi mui ñoki kïïga gupukami dai kïïga namïakami ïpï dai ïgaikïdï gï báí ïgai saidi gïr maaki agai naana maaxi kïkïïgadukami ixtumaxi. Sïïrhikïdï gubuka ïgai tudu dai kïï tuiga dai kaxkïdï gïr aagidi ïgai go naana maaxi namïakami ñoki gobai. Dai go ñoki ix makïdï gïr aagidi ïgai gïr maakai tïgibudadï Diuxi saidi ka biakatai aatïmï tïgibudadï Diuxi ka ïpïan tutiakana aatïmï ïgai. Kaxkïdï tomaxi soimaaxi iduña ïrhidi go óídakami ix makïdï mai buaboitudai dai naana maaxi oidaga soimaaxkami tami oidigi daama bïïxkïrï kïïgakïrï bubuakïi aatïmï go soimaaxkamiañdïrï.

Tepehuan Northern: Diuusi ñiooquidʌ utuducami oodamicʌdʌ

⁴ Gomaasicʌdʌ cʌʌ maatʌ aatʌmʌ isDiuusi vaamioma mui naana maasi istumaasi gʌgʌrducami iduñia agai aatʌmʌ gʌrvʌʌtarʌ. Vai poduucai mosʌcaasi cʌʌga ivuaada aatʌmʌ isduucai Diuusi mosʌcaasi cʌʌga ivueeyi. Dai poduucai istutuidi aatʌmʌ isgajiaadʌrʌ viaagi ʌsoimaascami dai maiʌpan duucai ivuaadagi ʌmaivaavoitudadami ismaacʌdʌ ivueeyi mosʌcaasi istumaasi ʌʌgi ʌgai ipʌlidi isivuaadagi.

2 Pedro 1:4 ပူးပေါင်းရင်းမြစ်များ

Romanos 9:4

Go gin aaduñi judidiu ïr piipixaradï Israelkaru dai Diuxi dáí sai ïgai ïr maamaradïkana. Diuxi gïn saagida oidatu dai tïtïgidiña xïïxi ïr gïdukami ïgai dai bhai dui ñoki gïn ïmadï. Go gin aaduñi judidiu bia Diuxi sïïrhikamigadï dai Diuxi aagidi ix dukatai xadutuadagi Diuxi. Dai aagidi ïpï saidi iduñi agai naana maaxi ixtumaxi go judidiu bïïtarï.

2 Korintios 1:20

Daiñi, Suxi Kristo bïïxi sudakami idui ixtumaxi gïr aagidi Diuxi saidi iduña agai gïr bïïtarï. Kïïga ïr gobai buaboi tudu. Kaxkïdï gïn aagidiña aatïmï sai Diuxi ka buaboikïdï idui bïïxi ixtumaxi gïr aagidi. Dai kaxkïdï kïïga ñokaiña aatïmï Diuxi bïïtarï ïpï.

2 Korintios 3:18

Ïpïan dukami gobai xïïxkadï maigobai gï dasagi ïmo ikuxi gïr bupuji buidïrï. Xibi ka kïïga maatï nïidi aatïmï xïïxi bhaibitukami xigiamaaxi Suxi Kristo dai xïï xigian tuiga ïgai. Diuxi Ibhïadï ïgai daidi gïr tïtïïgidi ix maaxi dai ix tuiga Suxi Kristo tudu. Dai Diuxi Ibhïadï aatabuayi aatïmïrï dai gïr soikïi saidi kïï dukai ïma dukai óídakagi aatïmï. Xibi gïr tïanïi Diuxi Ibhïadï dai aatabuayi ïgai gïr ïmadï sai bamioma ïpïan tutiakagi aatïmï Suxi Kristo dai bamioma ïpïan maaxkagi aatïmï.

2 Korintios 6:17

Maiti abïr urapïkïda go óídakami ix makïdï mai buaboitudai dai soimaaxi ibuayi. Maiti gï agai tomarhi xi taatagi aapimï go naana maaxi soimaaxkami ix makïdï ibuayi ïgai tudu. Dai ix ïko darakagi aapimï go soimaaxkamiañdïrï, aidï gia kïïgakïrï gïn nïijadamu aanï.

Galatas 3:16

Dai pomaaxi go ñoki ix makïdï bhai dui Diuxi go Abraamkaru ïmadï ïïki dai ïmadï ïmo pipiixaradï. Dai gïn tïgito abïr nïida sai gïn aagidi aanï sai mos ïmo pipiixaradï Abramkïdï bhai dui ïgai ñoki dai ïgai ïr Suxi Kristo. Aidï Diuxi aagidi go Abraamkaru sai maaki agai ïmo bhai ïrhiaragai dai mai gajiadïrï biamu ïgai go ñoki.

Galatas 6:8

Daiñi, xorai soimaaxi ibuadagi ïïgiditai ïïgi tïgibudadï ïgai ka ïxiandui soimaaxkami dai go ïï soimaaxkami yoobamu ïpï ïmadï go mukigami. Dïï gia xorai kïïga ibuadagi ïïgiditai Diuxi Ibhïadï ïgai gia gaïïxian dui ixtumaxi kïïgadukami dai go kïïgakïrï oidakaragai ix makïdï ïr bïïxkïrï bïïtarï gobai ïr yoobaradïka agai.

Efesios 4:13

Suxi Kristo darai odami podukai gïr saagida saidi gïr soiñana xi aatïmï gïr abïnakiadagi aipakoga. Dai apia gïr abïnakiadamu aatïmï aipakoga aidï asta xïïxkadï kïïga ïmo tïgibudagai bipiatu aatïmï. Biakamu aatïmï ïmo tïgibudagai aidï oiditai gïr buaboidaraga ix makïdï ïmaduga dai kïïga ïïmadatai aatïmï Diuxi Maradï ïpï. Podukai gïïrhimu aatïmï asta xïïxkadï kïïga odan tutiakagi aatïmï ïpïan dukai Suxi Kristo.

Kolosenses 3:10

Xibi ka bhïiyi aapimï go utudui oidakaragai dai ka utudutudaimi aapimï. Xibi Diuxi ix makïdï gïn idui aatabuayi aapimïrï dai ka ïpïan tuigakami bijimi aapimï Diuxi. Gïn utudutuldaimi Diuxi sai podukai kïïga maatïkana aapimï ïgai dai kïïga ïmadaiña aapimï ïpï.

Hebreos 9:15

Ïmo kïïgadukami daxdaragai idui Suxi Kristo mukukai gïr soimaaxkamiga bïïtarï tudu. Dai kaxkïdï ixtui ïgai xi bhai duñagi ïmo utudui sïïrhikami gïr bïïtarï. Ïïkioma aidïxi kia namïakatadai go ïïkidadï sïïrhikami aidï kia gïpiïrï bïïtïkamikana aatïmï go soimaaxkamikïdï ix makïdï ibuadana aatïmï. Dïï gia Suxi Kristo bhai dui go kïïgakïrï bubaidaragai gïr bïïtarï mukukai ïgai. Daiñi, Diuxi bapaidi mui odami saidi ïr maamaradïkana. Dai pokaiti Diuxi saidi maaki agai naana maaxi ixtumaxi maamaradï bïïtarï ix makïdï tomarhi ïmo imidagai mai ugiatïi. Dai Suxi ïgai dai bhai dui Diuxi maamaradï bïïtarï saidi bhaigakana ïgai ix biakagi bïïxi ixtumaxi Diuxi maaki ïrhidi.

Santiago 1:27

Dïï gia Diuxi pokaiti sai odami ix makïdï mai sarabidi go soimaaxkami ix makïdï oidaga tami oidigi daama dai bhaiyoma kïïga soikïdagi aarhi mai dïïdïkami ïmadï bipiudu, sai ïgai gia kïïga oidi go buaboidaragai ix makïdï kïïga buañixi. Oidi ïgai go buaboidaragai ix makïdï mai bia soimaaxi tudu.

2 Pedro 1:1

Bhaiga gin aaduñi Diuxi amadïrï. Aanï ïr Ximuñi Piduru dai ïmo pioñigadï aanï Suxi Kristo otosadïkatai aanï ïgai. Gïn ojidi aanï aapimï ix makïdï buaboitudai ïpïandukai aatïmï ix makïdï ïr ojotosadï Suxi Kristo. Suxi Kristo ïr gïr Diuxiga dai gïr kïïgakïrï bubiadamiga. Kïïga buañixikami dukai dai kïïga sïïrhi aatadui ïgai dai podukai aatadunakai ïgai gïn ayi aapimï oigaragai ix kïïgakïrï bubuakiagi aapimï.

2 Pedro 3:13

Po gï duñimu tudu. Dïï gia aatïmï nïnïraka ixtuigako iduña agai Diuxi ïmai tïbagi utudui ïmadï ïmo oidigi utudui ïpï ix dukai aagai Diuxi ïïki. Amaxi kaxi idunakai gobai bïïxi óídakami ibuadamu mosïkaxi ixtumaxi ïr sïïrhi ix dukai Diuxi ipïrhidi.

2 Pedro 3:9

Dai gobai itïiya ïrhidi sai maiti ïr buaboi ixdukai aagai ïïmo odami sai mai obaiga Gïr Nukadakami ix dibiagi ïpamu ixdukai gïr aagidi ïgai. Gia dibiamu ïgai tudu. Dïï mos nïnïrai kia gïn tïgitokatai ïgai aapimï. Mai otoma ojodai ïgai soimaaxi ibuadami tudu dai bhaiyoma mamaakai ïgai oigaragai bïïxkatai sai ïma dukai gïn tïtïgitokagi kia. Maiti ipïrhidi Diuxi sai xia gï duñagi tomarhi ïmo odami ibhïadï ïkobai biïkai ïgai Diuxiañdïrï dai kaxkïdï nïnïrai ïgai kia.

1 Juan 2:25

Dai go urabaragai ïgai ïmadï gobai kaxi ïr go kïïgakïrï oidakaragai bïïxkïrï bïïtarï ix makïdï gïr aagidi Suxi Kristo sai gïr maaki agai.

1 Juan 3:2

Gin aaduñi, kaxi ïr maamaradï aatïmï Diuxi xibi. Dïï gia maiti gïr tïtïïgidi Diuxi kia ix maaxka ragai aatïmï xïïxkadï dibiagi Suxi Kristo. Dïï gia kïïga maatï aatïmï sai xïïxkadï dibiagi Suxi Kristo kïïga nïijadamu aatïmï dai maatïkamu ix maaxi ïgai. Dai mos nïiditai aatïmï ix maaxi ïgai aidï gia ka ïpïan mamaaxkamu aatïmï ïgai.