2 Korintios 6:6 - Northern Tepehuan Bible

⁶ Aatïmï naana dukai mamaaxidi go óídakami buitapi sai sïïrhi aatabuayi aatïmï tudu. Daiñi, go óídakami kïïga nïidiña sai bïïxi ixtuma ibuadagi aatïmï kïïga buañixi Diuxi bïïtarï. Dai kïïga nïnïidiña ïgai ïpï sai aatïmï kïïga maatï dai kïïga oidiña ixtumaxi ïr buaboi. Mai bhakoikana aatïmï buidïrï jaa dai bhaiyoma kïï tutiakana aatïmï jaa bïïtarï. Diuxi Ibhïadï gubukarhigadïkïdï óídaga aatïmï tudu dai kïïga oigïdaiña aatïmï bïïxi óídakami.

Tepehuan Northern: Diuusi ñiooquidʌ utuducami oodamicʌdʌ

⁶ Dai maigoogosi gʌrducamica aatʌmʌ. Dai cʌʌ maatʌ aanʌ Diuusi ñiooquidʌ. Dai maibaacocoi aatʌmʌ tomasi aa oodami naana caiti gʌrnʌidi gʌrñiooquidi. Dai cʌʌ tuutuiga aatʌmʌ. Dai Diuusi Ibʌadʌ gʌrʌʌmadu daja. Dai sʌʌlicʌdʌ oigʌadai aatʌmʌ vʌʌsi ʌvaavoitudadami.

2 Korintios 6:6 ပူးပေါင်းရင်းမြစ်များ

Romanos 12:9

Gï agai xi kïïgakïrï gïn oigïada aapimï. Gajiadïrï abïr bia gobai ix makïdï ïr soimaaxkami daidi abïr kabami bhïiyi ix makïdï gia ïr kïïga.

Romanos 15:19

Suxi Kristo ïgai dai podukai aatadui saidi Diuxi Ibhïadï gubukarhigakïdï ibuadana aanï naana maaxi maaxidaragai ix makïdï ïïgi Diuxi ixtutuidikïi xi buadagi. Podukai Diuxi Ibhïadï gubukarhigakïdï kïïga aagidi aanï Diuxi ñokidï bïïxi óídakami aipakoga. Jerusalenïrï gin aaga aanï dai bïïxi aipako aiturhi aanï go bhai ïrhiaragai aatagi aagaitai go Kristo asta mïï Ilirikana ukami.

1 Korintios 12:8

Daiñi, Diuxi Ibhïadï mamaakai gubukarhigai ïïmoko sai gatïtïïgiada ñoki aagaitai tïgibudagai ix makïdï kïïga ïr soiñi. Dai jaa mamaakai ïgai gubukarhigai ix kïïga maatïkana dai aagaiña ixtumaxi Diuxi gïn tïtïgiadagi.

1 Korintios 13:4

Odami ix makïdï kïïga oigïdaiña jaa mai ojodatai kïï tutiakana tomaxi soi buidadagi jaa. Ix makïdï kïïga oigïdaiña jaa mai ïgakoñikana ïpï dai mai pokaitiña ïgai ix ïr namïakami ïïgi ïgai dai mai gïgïrdukïdï gïn ïrhidiña.

1 Korintios 2:16

¿Maiti ix podukai ojixi Diuxi ñokidïrï? Ami ikaiti sai, Tomarhi ïmo oidakami mai maatï ix tumaxi gï tïtïitoi Diuxi Dai mai tipu ïpï xorai maakiagi ñoki Diuxi, ikaiti ojai. Dïï aatïmï gia maatï kaï Diuxi Ibhïadï maatïtuldaradï. Aatïmï bia Suxi Kristo tïgibudadï tudu kaxkïdï.

1 Korintios 2:4

Kaxkïdï gï maatï sai Diuxi Ibhïadï gubukadadï ïgai ix makïdï kabami aatadui gin ïmadï amïka gïn saagida dakatai aanï aidï dai mai xu xi ïïgi aanï idui go aaduindagai. Ipïrhiditadai aanï xi buaboitudaiña aapimï Diuxi, kïï gubuakatai ïgai tudu dai mai xu xi buaboitudaiña aapimï oidigi daama óídakami tïgibudadï. Kaxkïdï maiti gïn aagidiña aanï aatagi ix makïdï óídakami saitudakami dukai kaïkagi.

2 Korintios 1:23

Xibi gïn aagidamu aanï ix tuixidï maiti gïn dibiji aanï gamo Korintoïrï baasïki. Dai Diuxi ïr nïijadami sai buaboi aagai aanï. Maiti ipïrhiditadai aanï sai kabami gïn bhagaidagi kaxkïdï mai jii aanï gamoko baasïki.

2 Korintios 11:11

Dïï gia maiti gï agai sai po gïn ïrhiada aapimï sai maiti gïn oigïdai aanï mai taanïitai aanï tuminxi. Maiti ipïrhidi aanï ix soi gïn buada aapimï bhaiyoma. Gïn oigïdai aanï kaxkïdï. Diuxi maatï sai buaboikïdï gïn oigïdai aanï tudu.

2 Korintios 11:4

Daiñi, kïï maatï aanï sai mai kïïga gïn nukadai aapimï dai asta bhai ïrhiarakïdï miadïgidiña aapimï tomax makïdï tïtïïgiadami ñoki ix makïdï gïn dibidagi. Kaïkana aapimï jaa ix makïdï ïma maaxi gïn tïtïïgidiña ñoki. Kaïkana aapimï ix makïdï ïma dukai aagaiña go Suxi Kristo tudu. Kaïkana aapimï tomaxi maiti ïr ïgalbaaxi aatagikagi ix makïdï gïn tïtïïgidiña aatïmï. Daiñi, ka bia aapimï Diuxi Ibhïadï gïn ïmadï dai ka buaboitu aapimï go bhai ïrhiaragai aatagi. Dïï gia bïïxkïrï kaïkana aapimï gamaakadami aatagi ix makïdï ïma dukai aagaiña Diuxi Ibhïadï dai ix makïdï ïma dukai aagaiña go bhai ïrhiaragai aatagi ïpï. Gatïtïïgidiña ïgai ïma maaxi ñoki tudu dai aapimï bïïxkïrï daadagitoiña ix gïn maakadagi ïgai ñoki dai bhai ïrhiarakïdï kaïkana aapimï. Mai kïï ibuayi aapimï pobuadatai.

2 Korintios 11:6

Tomaxi mai xii saitudaga aanï gatïtïïgiditai ñoki ïmpaiñdaragiana dïï gia kïïga maatï aanï go aatagi ix makïdï gïr biturhi Diuxi. Kïïga maatï aapimï saidi ïr buaboi gobai. Kïïga máí aapimï sai gia maatï aanï ixtumaxi ïr buaboi tudu nïiditai aapimï gin aaduindagai dai kaïkatai gin aatagi ïpï.

2 Korintios 12:15

Kaxkïdï bïïxi gin bhai ïrhiarakïdï bhai aagai aanï ix gïn bïïtarï xia duadiagi bïïxi xïïxi bia aanï dai asta bïïxi gin gubukarhiga ïpï mos ïï kïïga gïn oigïdatai aanï. Daiñi, aanï gia kïïga gïn oigïdai. Asta bamioma gïn oigïdai aanï xibi ix bhai ïkioma tudu. Dïï gia aapimï ka mai xii kïïga gin oigïdai. Kïïgioma gin oigïdaitadai aapimï baasïkioma tudu. ¿Bhai ix ïr sïïrhi podukai?

2 Korintios 13:10

Xibi gïn aagidamu aanï ix tuixi ïkiaxdïrï gïn otoxdi aanï idi ojai mai kia imïkai aanï gamoko. Ipïrhidi aanï xi gïn soiñagi idi ojai ix kïïga ibuadagi aapimï tudu. Maiti ipïrhidi aanï xi gïn maakadagi gïgïbidaragai amïka aïkai aanï kaxkïdï. Suxi Kristo gin maa sïïrhikami saidi gïn soikïdagi aanï tudu dai mai xu xi gin maa ïgai sïïrhikami ix soi gïn duadiagi aanï ibuadatai gin aaduindaga.

2 Korintios 2:10

Dai kaxkïdï kïïga buaboitudai aanï saidi gin ïïgiada agai aapimï xibi ïpï daidi oigïlda agai aapimï go soimaaxi ibuadami. Aanï ka oigïrhi ïpï maatïkatai sai aapimï oigïldamu. Aanï bia ïmo sïïrhikami Suxi Kristo amadïrï dai ka oigïrhi aanï go soimaaxi ibuadami tudu. Kaxkïdï gï agai ix oigïrhiada aapimï ïpï. Aanï ka oigïrhi buamï in ïrhiditai aapimï gïn bïïtarï tudu.

2 Korintios 2:4

Baasïkioma gia kabami soi gin ïrhiditadai aanï dai asta suakaitadai ibuadatai go gïmai ojai xako kabami gïn ñokidi aanï. Dïï gia gï agai sai maatïkagi aapimï sai maiti ipïrhiditadai aanï sai soi gïn ïrhiatudagi go ojaikïdï dai bhaiyoma ipïrhiditadai aanï sai maatïkagi aapimï xïï kïïga gïn oigïdai aanï.

2 Korintios 3:3

Daiñi, Suxi Kristo ipïrhidi sai bïïxi óídakami maatïkagi sai go aaduindagai ix makïdï idui aatïmï gïn saagida kïïga idui soiñi aapimï gïn bïïtarï. Mai aagai aatïmï ïmo paperhi xiïpï ïmo odai kaparakami xako ojixikagi lapixikïdï sai namïga gïr aaduindagai tudu. Dai bhaiyoma xibi Diuxi Ibhïadï gïn soi gïn iibhïdagïrï sai ïma dukai óídakana aapimï dai gobai ïgai dai maaxitudai sai namïga gïr aaduindaga. Diuxi Ibhïadï idui ïmo aaduindagai gïn iibhïdagïrï gïn nukadakatai aatïmï dai gïn tïtïgiditai aatïmï ñoki tudu. Ka ïma dukai óídatu aapimï dai kaxkïdï kïïga maatiga maaxi sai Suxi Kristo idui ïmo kïïgadukami aaduindagai aapimïrï kaïkatai aapimï gïr ñoki. Dai gobai ïr ïmo maaxidaragai saidi ïr ojotosadï aatïmï Suxi Kristo dai sai namïga gïr aaduindagai.

2 Korintios 4:6

Daiñi, Diuxi ño ïïki aidïxi kia tukamukatadai oidigi daidi itïi ïgai, Ipïrhidi aanï sai oidakana kudagi, itïi ïgai. Dai ka oidatu kudagi dai ka kudidikami bii oidigi. Dai xibi ka kudidakan dukai bia ïgai gïr iibhïdaga ïpï gïr tïtïïgiditai ïgai ixtumaxi ïr buaboi. Po dui ïgai sai ka maatïkana aatïmï xïïxi ïr gïdukami ïgai dai xïï xigian tuiga. Gïr tïgito nïiditai aatïmï Suxi Kristo podukai kïïga mamaatïrïi aatïmï xïïxi ïr gïdukami Diuxi dai xïï xigian tuiga ïgai tudu.

2 Korintios 7:2

Gin aaduñi, ipïrhidi aatïmï xi kïïgioma gïr oigïada aapimï dai ix kïïga gïr ïmadagi aapimï ïpï. Aatïmï ka naana dukai mamaaxidi sai gïn oigïdai aatïmï tudu. Daiñi, tomarhi ïmo imidagai maiti soimaaxi gïn duñi aatïmï dai maiti gïn bupuirumagi aatïmï toma lïïchi ïpï gïn oigïdatai aatïmï.

Galatas 3:2

Kïï maatï aapimï sai buaboitu aapimï go bhai ïrhiaragai aatagi kaïkai aapimï dai kaxkïdï dibia Diuxi Ibhïadï gïn ïmadï. Dai mai xu xi dibia ïgai ïïgiditai aapimï go Moises sïïrhikamigadï.

Galatas 3:5

Daiñi, kïï maatï aapimï sai Diuxi ïgai dai gïn maa Diuxi Ibhïadï. Dai Diuxi Ibhïadï gubuakami aatabuayi gïn saagida saidi ibuada aapimï naana maaxi maaxidaragai ix makïdï odami ïïgi mai bhaiga xi ibuadagi. Gobai ïr ïmo gïdukami bhai ïrhiaragai gïn bïïtarï. Dïï gia gin aagidabïrai ix tuixi podukai gïn maa gubukarhigai Diuxi sai pomaaxi ibuada aapimï. ¿Kïïga mïx ïïgidi go sïïrhikami xi kaxkïdï podukai aatabuayi Diuxi? Cho. Daiñi, gïn aagidamu aanï ix tuixi pomaaxi ibuayi maaxidaragai Diuxi gïn saagida. Kïïga buaboitu aapimï go bhai ïrhiaragai aatagi mos kaïkai aapimï dai kaxkïdï aatabuayi Diuxi podukai gïn saagida ibuadatai naana maaxi maaxidaragai. Podukai nïidi aatïmï sai Diuxi gïr urhiñdi naana maaxi bhai ïrhiaragai mos buaboitudakai aatïmï dai mai xu xi ibuadatai aatïmï ixtumaxi.

Galatas 5:22

Dïï gia xïïxkadï ïïgiadagi aatïmï Diuxi Ibhïadï gïr ïrana aatabuayi ïgai dai bhai buayi naana maaxi kïïgadukami gïr ïrañdïrï. Ïïgiditai aatïmï Diuxi Ibhïadï oigïdaiña aatïmï jaa dai bhai gïr ïrhidiña dai gïr ibhïxtakan taadakana aatïmï gïr ibhïdagïrï. Kïïga gïr kabakadaiña aatïmï ïpï xïxkadï soimaaxi taatamadagi. Kïï tutiakana aatïmï jaa bïïtarï dai ibuadana ixtumaxi ïr kïïga. Bïïxkïrï ibuadana aatïmï ix tumaxi aagagi aatïmï ïpï.

Efesios 3:4

Dïï gia xibi ix gïn tïgito nïijadagi aapimï go ojai ix makïdï idui aanï aidï gia aapimï ïpï maatïkamu gobai ix makïdï aanï máí. Máí aanï tudu sai gï tïgito Diuxi ïïki ix dukatai iduñagi Suxi Kristo. Gobai tudu ïxtokikana ïïki abhiadïrï.

Efesios 4:2

Maiti abïr gïgïrdukïdï gïn ïrhiada ïïgi aapimï toma lachi dai kïïga abïr tutiaka jaa bïïtarï. Gupurtudabїrai gïn iibhïdaga daidi abïr mai ojodada go gaa buaboitudadami. Bhaiyoma abïr gïn oigïada aipakoga tomax dukai.

Efesios 4:32

Daiñi, Suxi Kristo bhai dui gïr bïïtarï kaxkïdï Diuxi soi gï ïrhidi gïr nïiditai dai gïr oigïrhi. Xibi aapimï abïr kïï tutiaka jaa bïïtarï ïpï daidi abïr soi gïn ïrhiada nïiditai. Daidi abïr oigïrhiada ïpï ïpïan dukai xi Diuxi gïr oigïrhi.

Kolosenses 2:3

Suxi Kristo tudu ïgai dai gïr tïtïgidi Diuxi tïgibudadï. Daiñi, Diuxi bïïxi maatï dai tïgibudadï kïï saitudaga. Dai ïxtokikana Diuxi tïgibudadï gïr bïïtarï ïpïan dukai mui tuminxi yaasapikami. Dïï gia Suxi Kristo ïgai dai gïr tïtïgidi gobai.

Kolosenses 3:12

Daiñi, xibi aapimï buaboitudadami kaxi ïr ïko bubaidadï Diuxi. Ïkobai darasaka aapimï Diuxi bïïtarï tudu dai gïn oigïdai ïgai. Kaxkïdï abïr soi gïn ïrhiada nïiditai jaa ix makïdï soimaaxi taatamadagi daidi abïr kïï tutiaka buidïrï jaa odami ïpï. Maiti abïr gïgïrdukïdï gïn ïrhiada daidi abïr kïï bhai maaxkami buidadagi jaa mai omarhigakatai buidïrï. Maiti abïr otoma ojodada go jaa xïïxkadï mai kïï ibuadagi ïgai.

1Tesalonicenses 2:10

Aapimï ïr nïijadami sai óídakatadai aatïmï Diuxi bïïtarï kïï buañixikan dukai dai Diuxi ïr nïijadami ïpï. Kaxkïdï mai tipu ixtukïdï gïpiïrï gïr bupadagi go gaa.

1 Tomoteo 4:12

Maiti gï dagito ïpï xi jaa soi dukai gï nïijadagi utudukatai aapi kia dai bhaiyoma kïïga ibuada aapi dai kïïga ñokada dai kïïga buaboitudada dai kïïga oigïdada aapi jaa. Kïïga buañixikami dukai oidaka tudu dai podukai tïïgida go gaa buaboitudadami ix dukatai gï agai ix oidakagi ïgai.

1 Tomoteo 5:2

Dai gï agai xi xadutuada aapi rhiokodami ïpï gï dïïdï dukai. Dai xadutuadañi go utu iimïdami oki ïpï gï susukurhi dukai.

2 Timoteo 3:10

Dïï aapi gia mai ïpïamaaxi go bupuirumadami. Aapi gia kïïga máí ixtumaxi gï tïtïgidiña aanï dai gin ïpïan dukai ibuayi ïpï. Kïï maatï aapi ixtumaxi bïïtarï oidaga aanï dai aapi pomaaxi bïïtarï oidaga ïpï. Kïï gï tïgito nïidiña aapi xïï kïïga buaboitudai aanï Suxi Kristo dai nïidi aapi ïpï ix mai daadagitoiña aanï ix gin maitiagi soi ïrhiaragai dai ix oigïdai aanï jaa. Nïidi aapi sai apia oidiña aanï gïr buaboidaraga tomaxi soi taatamaiña aanï. Bïïxi gobai gï tïgito nïidi aapi dai gin ïpïan dukai buayi.

Tito 2:7

Gï agai tudu xi kïïga ibuadagi aapi Tito dai podukai kïïga maaxitudagi ix dukatai ibuadagi go gaa. Gï agai xi sïïrhi ibuadagi dai ñokadagi aapi dai kïïga xadutudaitai dukai gamaakadagi ñoki.

Santiago 3:17

Go tïgibudagai ix makïdï gamamaakai Diuxi gia mai pomaaxi. Go Diuxiañdïrï tïgibudagai gia kïïga buañixi dai odami ix makïdï oijadagi gobai gaagaiña ix dukatai xioma urabakatai óídakagi jaa ïmadï. Mai oomarhigakana ïgai dai bhaiyoma kïï tutiakana ïgai dai kïïga abokan dukai óídakana. Soi gïn ïrhidiña ïgai jaa bïïtarï xïïxkadï soimaaxi taatamadagi ïgai dai kïïga buididiña. Ïmadugan dukai nïidiña ïgai bïïxi óídakami ïpï. Dai mai yaatagïiña ïgai dai bhaiyoma bïïxi ixtumaxi aagadagi ïgai gobai ibuadana. Po maaxi go tïgibudagai ix makïdï gamamaakai Diuxi tudu.

1 Pedro 1:12

Go ñiñokituldiadamigadï Diuxi kïïga máí sai mai kia bhai duña agaitadai Diuxi go kïïgakïrï bubaidaragai aidïxi kia oidakatadai ïgai. Diuxi podukai maatïturhi ïgai kaxkïdï. Dai kaxkïdï maatïkatadai ïgai saidi go ñoki ix makïdï gatïtïïgitadai ïgai ïïki ïr aapimï gïn bïïtarï ix makïdï gokiïrioma dada. Dai xibi Diuxi ka otoi Ibhïadï tïbagiañdïrï. Dai gïn otoxdi Diuxi tïtïïgiadami ñoki xorai gïn aiturhiadagi go bhai ïrhiaragai aatagi ïpï. Diuxi Ibhïadï gubukarhigadïkïdï gïn aiturhi ïgai go aatagi aagaitai go kïïgakïrï bubaidaragai tudu. Agia xigiamaaxi aatabuayi Diuxi. Asta go tïtïañikarudï Diuxi kïïga gïn tïgito nïnïidi ka daibuskïitai bïïxi ixtumaxi aagaiña go ñiñokituldiadamigadï Diuxi ïïki abhiadïrï tudu.

1 Pedro 1:22

Daiñi gin aaduñi, aapimï ka ïïgidi go buaboi aatagi dai ka buañixikami bii gïn ibhïdaga. Kaxkïdï gï agai sai kïïgakïrï gïn oigïdada aapimï aipakoga bïïxi gïn ibhïdagakïdï.

1 Juan 3:18

Gin aaduñi, maiti gï agai sai mosïkaxi pokaitadagi aatïmï sai oigïdai aatïmï jaa. Gï agai bhaiyoma sai ibuada aatïmï ixtumaxi ïr soiñikagi jaa bïïtarï dai podukai mamaaxdagi sai buaboikïdï oigïdai aatïmï.