2 Korintios 6:5 - Northern Tepehuan Bible

⁵ Ïïmo imidagai gïr gïikarsaiña jaa dai ïïmo imidagai gïr maamaixapaiña ïpï. Ïïmapïkïrï gïr bupui surhigïiña mui óídakami dai gïr iñakidiña gïr kïïdaitai. Sïïrhikïdï biakana aatïmï xi kabami aatabuadagi dai mui tukagi mai kokosïiña aatïmï dai taatamaiña bhiugigai ïpï.

Tepehuan Northern: Diuusi ñiooquidʌ utuducami oodamicʌdʌ

⁵ Daidʌ cavami gʌrgʌvaiña oodami, dai gʌrmamaisapaiña. Daidʌ ʌʌmapʌcʌrʌ gʌrcʌʌdaiña oodami dai siaa caitiña iiñaquidatai. Dai ʌʌmo imidagai aliʌsi gaaata vuaadana aatʌmʌ dai ʌʌmo imidagai maicocoosʌiña dai bibiuugʌiña aatʌmʌ.

2 Korintios 6:5 ပူးပေါင်းရင်းမြစ်များ

Isa 53:5

Dïï aatïmï ïgai dai mai ïïgidi Diuxi bhaiyoma, kaxkïdï ïr aatïmï gïr duñi xi gï sïïxitu ïgai. Aatïmï gïr aïkatadai gïgïbidaragai. Dïï ïgai taata gïïgïbidaragai gïr bïïtarï soi maaxi ibuadatai aatïmï. Gïï taata ïgai gïgïbidaragai dai podukai gïr abhan dáí ïgai bhai ïrhiaragai. Ïgai gï muragi dai podukai gïr duduaditu.

Mataibo 14:10

Daidi otoi ïgai ïmo sandaru sai imïna mïï maixakaruana dai sai mïï guikutana modï. Dai aagidi ïgai ïpï sai buapana ïgai modï ïmo asokorhiïrï dai sai tïïgidana go arhi oki. Po dui go sandaru tudu ix dukai aagidi go rey. Maa ïgai go arhi oki Juan modï bai ïgai tïïgi dïïdï.

Mataibo 14:3

Go Herodes ka ïïkioñdïrï aidïxi kia oidakatadai go Juan gatïjaitadai mïsai bhïna ïgai dai sai burana kadenakïdï dai sai maixana. Ïmo oki Erodiaxi tïgidukami ïr duñidï gobai. Go oki ïgai ïr oñigadïkatadai Pirhi ix makïdï ïr sukurhidï go rey Herodes. Dai go rey gaïïxiditadai dai ïmadï bitadai go oñigadï go sukurhidï. Ïmadï bitadai ïgai go Erodiaxi tudu.

Mataibo 9:15

Daidi potïtïdai Suxi, —Gïn aagidamu aanï ïmo maaxidaragai aatagi sai maatïkana aapimï ix tui. Daiñi, aanï ïr ïmo ontadami dukai ïmo kunataragïrï. Dai gin mamaatïrdamiga ïr bapaidarxikami dukai ami go kunataragïrï. Kaxkïdï gï agai sai kïïga bhai gïn ïrhiada ïgai dai gakuada gin ïmadï darakatai. Xadïrï soi gïn ïrhidiña ïgai dai maiti gakuadana kia ïmadï dakatai aanï tudu. Dïï gia ayimu ixtuigako maigobai gin baidakatudamu aanï dai aidï gia maiti gakuadamu ïgai ïïmo imidagai ïmo xadutudaragai dukai— itïtïdai.

Hechos 13:3

Daidi go buaboitudadami gadaañigi Diuxi mai dïïkakai kuadagai dai bhodïrï darai ïgai noonobidï daama go Bernabe ïmadï Saulo daidi ka otoi sai iimïna dai gaatabuada.

Hechos 14:19

Dai aidïpïrï ami dada judidiu Antiokiañdïrï dai Ikoniañdïrï óídakami. Dai ïgai bui ñokaitadai go Pabora dai bhaakoitu go odami ïgai bui. Baidi go óídakami maikakarai go Pabora mua ïrhiditai. Dai bhodïrï ka maikarsakai tïbaimu ïgai go Pabora dai busaitu kiikiañdïrï maigobai dai ami bia po gïn ïrhiditai ix ka muatadai.

Hechos 14:23

Dai bïïxi aipakoga xako gïn ïmpaidiña buaboitudadami go Pabora ïmadï Bernabe darai bhaitï gukakami bai ïgai nukadakana go buaboitudadami. Dai kaxi po duñakai ïgai sai bhodïrï gadáí ïgai Diuxi go buaboitudadami bïïtarï mai dïïkai kuadagai. Daidi itïtïdai ïgai Diuxi, —Aapi Diuxi ïr nukadakami ka agai idi buaboitudadami— itïtïdai ïgai daanïitai.

Hechos 17:5

Dai gokïdï bhaakoi go judidiu ix makïdï mai buaboitu ïgamukatai ïgai. Dai mui ïmpagi ïgai kïkïïrhi paparugami dai soimaaxi ibuadami ix makïdï no kayana ajiopaitadai. Abïnaki ïgai bai bui surhigïna go buaboitudadami kaburhi gukakatai. Mos gïgïr ijiñakimi ïgai aidï dai mos xixokai ïgai bui ñokaitai go gaa. Daidi go judidiu ïgai ïmadï go soimaaxi ibuadami mïï ayi kiidïrï ïmo kïïrhi Jason tïgidukami dai daitu kitaagiña. Gaagaimitadai ïgai go Pabora ïmadï Silas dai bukia ïrhiditadai dai tïïgida agaitadai go odami.

Hechos 20:31

Gïn nukadabïrai tudu. Daidi abïr gïn tïgito ajiopada ix dukatai aatadui aanï gïn ïmadï dakatai. Baika umigi aitu aanï gamamaakaitai ñoki modukai tasïrï dai tukarï. Dai tomaxi dudatai dai kabami soimaaxi taata aanï tomax dukai apia dukai gïn mamaakaiña aanï ñoki tomaxi suanïitadai aanï.

Hechos 23:10

Daidi go komandante ka duadimu xi go odami bïïxi naato saasasagi Pabora tukugadï mos ïï bhaakoikatai. Dai gatïjai sandaru sai dadana dai sai gubudakïdï busaidana go Pabora abhai saagidañdïrï dai sai bhïkaiña kuartelamu.

Hechos 23:35

Baidi go dunukami itïtïdai aidï, —Nïnïrakamu aatïmï kia ix dadiagi go ix makïdï gïpiïrï gï bupai, aidï gia kaïkamu aanï ix tumaxi gin aagiadagi aapimï— itïtïdai. Dai bhodïrï gatïjai ïgai mïsai nukadakana go Pabora kiidïrï go gïï Rey Herodes tïgidukami.

Hechos 24:27

Podukai aitu Pabora goka umigi maixakaruïrï. Daidi bhodïrï go Felix gatïïgi gï sïïrhikamiga mïtai dáí ïmai ix makïdï Porcio Festo tïgidu. Dïï mos mai kia gatïïgidakai go Felix ipïrhiditadai ix go judidiu kïïgakïrï gï nïijadagi xi kaxkïdï anaaxi maixakaruana biatadai ïgai go Pabora.

Hechos 26:10

Dai podukai idui aanï Jerusalenïrï. Go bhaitï gukakami dadaxdadami judidiu gin maatadai sïïrhikami dai aanï podukai biakatadai oigaragai dai podukai maixatu aanï mui buaboitudadamigadï Suxi Kristo. Dai ïkobïrako xuduku gïn koditudagi ïgai aanï bhai aagaiña xi podukai gïn buadagi ïgai.

Hechos 26:29

Daidi Pabora itïtïdai aidï, —Aanï mos ipïrhidi xi buaboitudagi aapi tomaxi gï aagadagi ix gï aagida aanï mui ñoki xi chïki ïpï. Tomax dukai daanïi aanï Diuxi aapi bïïtarï dai go gaa bïïtarï ïpï ix makïdï kaï gin aatagai xibi. Daanïi aanï xi aapimï gin ïpïan dukamikagi buaboitudakai Suxi Kristo. Dïï gia mai daanïi aanï Diuxi xi gïn maixatudagi aapimï ix duu daja aanï— ikaiti Pabora.

Hechos 28:30

Daidi Pabora anaaxi bii goka umigi ïmo baaki rentadugamiïrï. Dai ami miadïgidiña ïgai bïïxkatai xorai daibidiña.

Hechos 5:18

Dai bui ïgai go ojotoxikami dai maamaixa.

1 Korintios 15:10

Sïïrhikïdï kïï tuiga Diuxi gin bïïtarï tudu ix kaxkïdï otosadï gin dáí ïgai. Dai kïïga ibuayi soiñi xi otosadï gin dáí Diuxi kaxkïdï tudu gin maakai ïgai gubukarhigai sai ibuadana aanï naana maaxi aaduindagai. Dai asta kabamioma gin aaga aanï ix bhai go gaa ojotosadï Suxi. Dïï mai xu ix ïïgi gin gubukarhigakïdï ibuayi aanï go aaduindagai. Diuxi ïgai dai aatabuayi aanïkïdï bhaiyoma kïï tuigakatai ïgai gin bïïtarï.

1 Korintios 4:11

Daiñi, aatïmï ix makïdï ïr ojotosadï Suxi Kristo dudatai bhiugikorïiña dai tonokorïiña. Potadakana aatïmï aidï abhiadïrï ix gïr aaga aatïmï gïr aaduindaga dai asta xibi ukami kia. Mui imidagai mai kïïga biakana aatïmï yukuxi ixtukïdï gïr ukadagi. Dai muiyoko gïr gïbaiña jaa dai mai biakana aatïmï ïïgi gïr kii ïpï aipakoga ajiopaitai.

1 Korintios 7:5

Odami ix makïdï ïr gïn kukunakami maiti gï aagai ix daidagi aduñdï ix abhana boiyagi tudu. Mosïkaxi ix maiti ipïrhiada ïgai ix ïmapi bopodagi chïki tasai sai kïïgioma gadaanïna ïgai Diuxi, aidï gia bhaiga ïgai xi aatagadagi dai bhaiduñagi ñoki ix mai ïmapi bopobagi dïï mosïkaxi chïki tasai bïïtarï. Dai gokiïrï ka nato daanïkai ïgai Diuxi chïki tasai aidï gia gï agai ix ïmapi bopodagi ïgai. Tadu báí go diabora sai soimaaxi ibuadana ïmai ïmadï.

2 Korintios 11:27

Kabami soimaaxi taatamaiña aanï gaatabuadatai tudu. Mui imidagai mai kokosïiña aanï dai bhibhiuguiña dai tonomokïrïiña ïpï. Dudatai mai biakana aanï kuadagai dai ïbamukurïiña ïpï mai biakatai kïïga yukuxi ixtukïdï gin ukadagi.

Efesios 3:1

Aanï Pabora maixapi xibi mos ïïgiditai aanï Suxi Kristo. Aagaiña aanï go bhai ïrhiaragai aatagi gïn buitapi aapimï ix makïdï maiti ïr judidiu kaxkïdï maixapi aanï xibi.

Filipenses 1:13

Asta go sandadaru ix makïdï nukadai go gïï dunukami kiidï kajioma gin maixatu aanï ibuadatai aanï Suxi Kristo aaduindadï. Dai bïïxi go gaa óídakami kajioma ïpï.

1Tesalonicenses 2:9

Kïïga gïn tïgito aapimï ïrhi aanï xïï kabami aatadui aatïmï gïn ïmadï darakatai. Ga aatabuadana aatïmï tasïrï dai modukai tukarï sai biakana aatïmï ixtukïdï óídakagi dai mai xu ix aapimïañdïrï bui ixtumaxi gïn aagiditai go aatagi. Maiti ipïrhiditadai aatïmï ix soi gïn buadagi aapimï gïr maakaitai soiñi kaxkïdï.

1 Tomoteo 4:10

Aanï ïmadï aapi Timoteo kïïgakïrï ïr buaboidadami Diuxi ix makïdï tomarhi ïmo imidagai mai muki agai dai ix makïdï bhai dui kïïgakïrï bubaidaragai bïïxi óídakami bïïtarï. Dïï gia tomaxi bhai dui ïgai bïïxi óídakami bïïtarï mosïkaxi ix makïdï buaboitudagi kïïgakïrï bubuaki agai. Kaxkïdï kabami gaatabuadana aatïmï soiña ïrhiditai óídakami sai buaboitudaiña.

2 Timoteo 1:8

Maiti gï agai xi xaïrada aapi aagaitai ix tuma maatï Suxi Kristokïdï tudu. Dai maiti xaïrada aanïkïdï ïpï tomaxi gin maixatu aanï aagaitai aanï Suxi Kristo. Daiñi, oidaga ix makïdï soi gïr buidada ïrhidi oiditai aatïmï Suxi Kristo dai kaxkïdï gï agai xi Diuxi gubukarhigadïkïdï kabakadagi aapi gï ibhïdaga dai bhai gï dukagi ix gin urabagi soimaaxi taatamaitai gin ïmadï.

2 Timoteo 2:9

Dïï gia oidaga odami ix makïdï soimaaxi gin taatamiturhi gin sobhida ïrhiditai sai mai aagana aanï go bhai ïrhiaragai aatagi. Ïgai asta gin buu kadenakïdï ïmo soimaaxi ibuadami dukai dai gin maixa gin sobhida ïrhiditai. Dïï gia mai tipu xorai kadenakïdï burhiagi Diuxi ñokidï sai maiti ibuada gobai aaduindadï. Mai bhaiga ix sobhidagi gobai tudu.

2 Timoteo 4:5

Dïï gia aapi maiti gï agai ix pobuadagi. Gï agai xi kïïga sïïrhi gï tïgitokagi aapi bhaiyoma dai mai dagitoagi ix gï maitiagi soi ïrhiaragai gï kabakadaitai aapi xïïxkadï soimaaxi taatakagi. Mos sai aapia aagada aapi go bhai ïrhiaragai aatagi aipakoga daidi kïïga ibuada gï aaduindaga ix makïdï gï maa Diuxi.

Hebreos 11:36

Go óídakami parunaiña jaa dai asta gïbaiña ikixanaikïdï dai bupuraiña kadenakïdï dai maamaixapaiña. Dïï bïïxkïrï apia buaboitudaiña ïgai.

Hebreos 13:17

Gin aaduñi, ïïgiadabïrai gïn bhaitï gukakamiga Diuxi amadïrï. Kaxkïdï tudu gïn nukadai ïgai sai kïïga imïna gïn buaboidaraga. Dai biakamu ïgai ix Diuxi buitapi gukibagi dai aagadagi ixtuma dui ïgai gïn nukadatai. Kïïga abïr ibuada tudu sai ïgai bhai gïn ïrhidiña gïn nukadatai dai maiti abïr ibuada ixtumaxi ixtukïdï soi gïn ïrhiadagi ïgai.

Hebreos 13:23

Gï agai xi maatïkagi aapimï sai ka busai go Timoteo maixakaruañdïrï. Dai ix otoma aiyagi ïgai tami aidï gia gin oijadamu ïgai xïxkadï gïn dibidagi aanï gamoko.

Apokalipsis 2:10

Daiñi, ka miadaimi xi soimaaxi taatagi aapimï. Aidï go diabora gatïañi agai gïn maamaixaragai. Soimaaxi taatamu aapimï chïki tasai tudu nïidana sa bhai ïr buaboi xi gin buaboitudai aapimï. Dïï maiti abïr duduadikuda dai bhaiyoma abïr apia buaboitudada aapimï tomaxi gïn kodagi go jaa dai aanï gïn maakimu ïmo gïdukami maitïki. Gïn maakimu aanï xi kïïgakïrï óídakana aapimï bïïxkïrï bïïtarï tudu.