2 Korintios 6:4 - Northern Tepehuan Bible

⁴ Ipïrhidi aatïmï sai go óídakami kïïga maatïkana ibhïgadïrï sai buaboi aagai aatïmï tudu ojotosadïkatai aatïmï Diuxi. Gïr kabakadaiña aatïmï tudu daidi apia kïïga ibuadana gïr aaduindaga tomaxi naana dukai soimaaxi taatamaiña aatïmï.

Tepehuan Northern: Diuusi ñiooquidʌ utuducami oodamicʌdʌ

⁴ Baiyoma ipʌlidi aatʌmʌ iscʌʌga oidacagi ivuaadatai Diuusi aa duiñdadʌ vai poduucai vaamioma cʌʌga vaavoitudagi oodami Diuusi ñiooquidʌ. Cascʌdʌ soimaasi taatamai aatʌmʌ dai maivui ñioocai Diuusi, tomasi ʌʌmo imidagai maitʌtʌʌgai aatʌmʌ istumaasi gʌrtʌtʌgitoagi tomali siaaco iimiagi.

2 Korintios 6:4 ပူးပေါင်းရင်းမြစ်များ

Lukas 21:19

Soimaaxi gïn taatamituldamu jaa tudu dïï aapimï abïr gïn kabakada go soi ïrhiaragai buidïrï dai kïïgakïrï bubuakimu aapimï— itïtïdai.

VUAANA 16:33

—Gïn aagidi aanï idi aatagi sai kïïga bhai gïn ïrhidiña aapimï gin bïïna darakatai aapimï. Daiñi, tami idi oidigi daama taatamu aapimï naana maaxi soi ïrhiaragai soi gïn buididitai jaa. Dïï maiti abïr gïn dagitoka ix gïn maitagi go soi ïrhiaragai. Kaxkïdï tudu kaxi gamaitï aanï buidïrï bïïxi ix tumaxi oidaga tami oidigi daama— itïtïdai.

Hechos 2:22

Bhodïrï Piduru oi aatagidï daidi ikaiti, —Kaïkabïrai aapimï Israelïrï oidakami. Kïï maatï aapimï sai Diuxi maa gubukadagai Suxi go Nasaretañdïrï oidakami. Kaxkïdï kïïga maatiga maaxi xi ïgai ïr Diuxi otosadïkatadai. Go Suxi idui naana maaxi maaxidaragai aapimï gïn buitapi ix makïdï ïïgi Diuxi ixtutuidi xi buadagi di. Dai aapimï ïr nïijadami gobai.

Hechos 20:34

Bhaiyoma kïïga maatï aapimï sai kïïga gaatabuadana aanï dai gamaitïkïiña ixtukïdï oidakagi aanï dai ixtukïdï oidakagi go ix makïdï gin ïmadï ajiopaiña ïpï.

Hechos 9:16

Aanï tïïgidamu go Saulo sai gï agadamu xi kabami soimaaxi taatagi ïgai ibuadatai gin aaduindaga— ikaiti Suxi.

Romanos 14:18

Xorai podukai oidakagi Suxi Kristo bïïtarï maakimu bhai ïrhiaraga Diuxi dai odami kïï tuigakami dukai nïijadamu ïpï.

Romanos 16:10

Diuxkïdï abïr biatulda Apeles. Ïgai mos apia buaboitu tomaxi kabami taata soi ïrhiaragai dai maiti gï dagito xi gï maitiagi go soi ïrhiaragai. Diuxkïdï abïr biatulda Aristobulo aaduñdï ïpï.

Romanos 3:5

Ïïmo odami pokaitiña sai go soimaaxi ix makïdï odami ibuayi kïïga mamaaxidi xïï kïïga buañixi Diuxi. Kaxkïdï pokaitiña ïgai sai mai kïïga ibuayi Diuxi gïgïbiditai soimaaxi buadami. ¡Mos ïr ïï buirudagai gobai ix makïdï aagai ïgai!

Romanos 5:8

Dïï Kristo gia muu gïr bïïtarï aidïxi kia ïr soimaaxi ibuadamikatadai aatïmï dai podukai gïr tïtïgidi Diuxi xïï kïïga gïr oigïdai ïgai.

1 Korintios 3:5

¿Tumaxiïrï ïr gïdukami go Apolos tudu ix urabakagi aapimï ïgai? ¿Dai tumaxiïrï ïr gïdukami aanï ix gin urabakagi aapimï ïpï? Daiñi, aatïmï mos ïr pipioñigadï Diuxi. Dai mos ibuadatadai aatïmï go aaduindagai ix makïdï gïr maa Diuxi dai gïn aagidi Diuxi ñokidï bai aapimï buaboitu.

1 Korintios 4:1

Gin susukurhi, aanï ïmadï go Apolos ïr ojotosadï Suxi Kristo. Dai gï aagai ix pipioñigadï Suxi Kristo dukai gïr nïijada aapimï. Kaxkïdï tudu ïgai gïr maa ïmo sïïrhikami xi kïïga aagadagi aatïmï go maatïtuldaragai ix makïdï ïïgi Diuxi maatïkana ïkioma.

1 Korintios 9:11

Dai pomaaxi aatïmïkïdï ïpï aanï ïmadï Bernabé tudu. Aatïmï ïr gaïsadami dukai gïn aagiditai aatïmï Diuxi ñokidï. Gïn mamaakaiña aatïmï soiñi gïn ibhïdaga bïïtarï tudu. Kaxkïdï ¿Dukatai maiti ïr sïïrhikana xi aadïrï gïr maakimudai aapimï soiñi gïr tukuga bïïtarï?

2 Korintios 11:23

Go ix makïdï gin bui ñokaiña gïn aagidiña sai kïïga aatabuadana ïgai Suxi Kristo bïïtarï ïpï. Dïï gia, daiñi, kïïga maatï aanï sai ïmo buirudagai dukai ikaidaga ixtumaxi gin aagida iñagai xibi dïï bïïxkïrï ïr buaboi sai aanï bamioma kïïga aatadui Suxi bïïtarï ix bhai ïgai. Kabamioma gaatabuadana aanï ix bhai ïgai tudu. Muiyoma imidagai gin maixatu aanï ibuadatai aanï Suxi aaduindadï dai muiyoma imidagai gin gïïgïtu aanï ïpï. Mai bhaiga aanï xi gin tïgitoagi xïïki imidagai gin gïïgïtu aanï tudu. Dai mui imidagai bhaitoma muu aanï ibuadatai aaduindadï Suxi ïpï.

2 Korintios 11:27

Kabami soimaaxi taatamaiña aanï gaatabuadatai tudu. Mui imidagai mai kokosïiña aanï dai bhibhiuguiña dai tonomokïrïiña ïpï. Dudatai mai biakana aanï kuadagai dai ïbamukurïiña ïpï mai biakatai kïïga yukuxi ixtukïdï gin ukadagi.

2 Korintios 11:9

Aidïxi gïn ïmadï dakatadai aanï mai dagito aanï ix xia buadagi aapimï gïn tuminxiga gin bïïtarï. Dai bhaiyoma go buaboitudadami Masedoniïrï óídakami gin buapi tuminxi aidïxi ka mai biakatadai aanï ixtukïdï oidakagi. ¿Ïmo soimaaxkami ix dukai mïx nïidi aapimï ix maiti gïn dagito aanï ix soi gïn buadagi aapimï? Xadïrï soimaaxkana gobai. Tomarhi ïmo imidagai maiti ipïrhidi aanï sai xia buadagi aapimï gïn buxtuidaga gin bïïtarï tudu.

2 Korintios 12:10

Kaxkïdï bhai gin ïrhidiña aanï xïïxkadï mai gubuakan taadakagi aanï, dai xïïxkadï soimaaxi ñoki gin buidïrï surhigidagi óídakami, dai xïïxkadï soimaaxi taatamadagi aanï ïpï dai xïïxkadï gin bui surhigiagi óídakami dai naana dukai xijiakagi gin oidakaraga oiditai aanï Suxi Kristo. Bïïxi gobaikïdï bhai gin ïrhidiña aanï tomaxi mai gubuka aanï. Kïïga maatï aanï sai xïïxkadï mai gubuaka antaadakagi aanï ïïgi amaxi bamioma gubuakana aanï gubukarhigadïkïdï Suxi Kristo tudu.

2 Korintios 12:12

Aidïxi gïn ïmadï dakatadai aanï baasïkioma kïïga gin mamaaxiditadai aanï sai ïr otosadï aanï Suxi Kristo tudu. Kïïga mai ojodatai aatabuadana aanï aidï tudu daidi ibuadana naana maaxi maaxidaragai ix makïdï odami ïïgi maiti ixtutuidikïi xi ibuadagi. Kïïga xigian buadana aanï ibuadatai gin aaduindaga tudu ibuadatai aanï naana maaxi ix makïdï ïbogiami Diuxi gubukarhigadïkïdï ixtutuidi ïmoko xi ibuadagi.

2 Korintios 2:17

Diuxi ïgai dai gïr maa ïmo sïïrhikami tudu. Dai kaxkïdï Diuxi gubukarhigadïkïdï aatabuayi aatïmï dai kïïga sïïrhi ñokai aatïmï ojotosadïkatai aatïmï Suxi Kristo. Dai mai xu xi tuminxikïdï gaatabuayi aatïmï gatïtïïgiditai Diuxi ñokidï aipakoga. Jaa gia go ïï tuminxikïdï gatïtïïgidiña ñoki dïï aatïmï gia cho. Kïïga maatï aatïmï sai Diuxi bïïxi nïidi ixtuma ibuadagi aatïmï kaxkïdï.

2 Korintios 3:6

Diuxi gïr maa go gubukarhigai saidi gatïtïïgiada aatïmï go utudui sïïrhikami ix makïdï bhai dui ïgai óídakami ïmadï tudu. Dai go utudui sïïrhikami mai ïpïamaaxi go ïïkidadï sïïrhikami ix makïdï maa Diuxi go Moiseskaru ïïki. Go ïïkidadï sïïrhikami ïr ïmo ojixikami ix makïdï biakatadai ix ïïgiadagi go óídakami. Dïï maiti idui soiñi gobai go óídakami bïïtarï dai bhaiyoma go ïïgi gïgïbidaragai dai mukigami buapidi gobai óídakami. Dïï gia go utudui sïïrhikami ix makïdï gïr maakai Diuxi xibi bhobai aagai sai gïr maakai Diuxi ïïgi Ibhïadï. Dai kaxkïdï xibi ka kïïgakïrï óídaga aatïmï bïïxkïrï bïïtarï gïr maakakai Diuxi ïïgi Ibhïadï.

2 Korintios 4:17

Go soi ïrhiaragai ix makïdï taatamai aatïmï xibi mai xii kabami bïïtï tudu daidi otoma daibuskïi. Dai gokiïrï gïr buapidamu gobai go bhai ïrhiaragai ix makïdï bïïxi adaama bhai ïrhiaraga dai bïïxkïrï bïïtarïka agai gobai.

2 Korintios 4:2

aagaitai ixtumaxi ïr buaboi. Oidaga jaa ix makïdï ïxtotai dukai ibuadana naana maaxi xaïrarakami dai bupuirumadai ïgai óídakami mai sïïrhi aagaitai ïgai Diuxi ñokidï. Dïï gia aanï ïmadï ix makïdï gin soikïi gin aaduindagïrï mai pobuayi. Aatïmï bhaiyoma aagai mosïkaxi ixtumaxi ïr buaboi gïr nïiditai Diuxi. Pobuayi aatïmï saidi bïïxi óídakami kïïga maatïkana iibhïadïrï sai mai yaatagïi aatïmï.

2 Korintios 4:8

Gin aaduñi, aatïmï naana dukai soimaaxi taatamaiña dïï bïïxkïrï kïïga maatïkana aatïmï sai oidaga soiñi gïr bïïtarï. Ïïmo imidagai mai tïtïgaiña aatïmï ix dukatai iduñagi dai gïr soiñagi ïïgi aatïmï dïï gia Diuxikïdï tïtïgaiña aatïmï ixdukatai kïïgakïrï bubuakiagi.

2 Korintios 7:11

Dïï aapimï gia kïïga gïn tïgito nïidiña ix kaiti go ojai ix makïdï gïn otoxdi aanï baasïkioma. Soi gïn ïldatu aapimï ix dukatai Diuxi ipïrhidi ix soi gïr ïrhiadagi aatïmï xïïxkadï oidakagi soimaaxi ibuadami gïr saagida tudu. Dai xibi ipïrhidi aanï ix tïtïgitoagi aapimï go naana maaxi kïkïïgadukami soiñi ix makïdï idui Diuxi gïn iibhïdagïrï go soi ïrhiaragaikïdï gobai. Kabami soi gïn ïrhiditadai aapimï oidakatai ïmo soimaaxi ibuadami gïn saagida tudu dai kabami gïn aaga ibuadatai ixtumaxi Diuxi ipïrhidi. Kïïga ipïrhiditadai aapimï xi ibuadagi ixtumaxi ïr kïïga tudu. Asta bhakoikan taadatu aapimï go soimaaxkami buidïrï dai kabami buamï gïn ïrhiditadai aapimï xi duñada apia imïdagi go soi soimaaxkami gïn saagida. Kaxi gïgïbiturhi aapimï go soimaaxi ibuadami ix dukai gïn aagidi aanï tudu. Podukai gïn maaxiturhi aapimï saidi ka mai tipu ixtukïdï gïpiïrï gïn bupadagi jaa. Kïïga gïn soi go soi ïrhiaragai ix ïmadukai gïn tïtïgitoagi aapimï tudu.

Kolosenses 1:11

Daanïiña aatïmï Diuxi ix makïdï kabami gubuka kïï gïdukatai ïgai tudu. Daanïi aatïmï Diuxi sai gin maakana gubukarhigadï. Podukai bhaigakamu aapimï xi mai ojodatai buidïrï gukiba go soimaaxi. Ipïrhidi aatïmï sai kïïga bhai ïrhiarakïdï

Kolosenses 1:24

Gin aaduñi Diuxi amadïrï, aanï soimaaxi taatamai xibi ibuadatai ïmo aaduindagai ix makïdï ïr soiñi gïn bïïtarï. Dïï gia tomaxi soimaaxi taatakagi aanï bïïxkïrï bhai gin ïrhidiña aanï maatïkatai sai aapimï gïn bïïtarï soimaaxi taataimi aanï. Daiñi, Suxi Kristo soimaaxi taata go buaboitudadami bïïtarï baasïkioma dai xibi aanï in ajïga xi soimaaxi taatagi go buaboitudadami bïïtarï ïpï ïpïan dukai ïgai.

1Tesalonicenses 3:7

Dai kaxkïdï tomaxi kabami soi taadakana aatïmï soi gïr buididitai jaa bïïxkïrï bhai gïr ïrhidiña aatïmï maatïkatai sai apia kabakan dukai gïïrhimi gïn buaboidaraga.

1Tesalonicenses 5:14

Gïr susukurhi, ix makïdï gïn urapïkïi dai paparïga abïr maakada ñoki. Daidi ix makïdï duduadikui abïr abïnakidada. Dai ix makïdï mai gupuka buaboidaradï abïr soikïda. Ïgai bïïxkatai gï agai xi mai dagitokai soiñagi aapimï dai mai ojodadagi.

1 Tomoteo 2:15

Gï agai bhaiyoma xi kïïga nukadakagi ïgai maamaradï dai kïïga gïrhidagi. Gï agai xi pobuadagi ïgai kïïga buaboidaitai Diuxi dai oigïdaitai jaa dai kïïga buañixikan dukai óídakatai. Ix kïïga xadutudaitai óídakagi ïgai podukai aidï gia Diuxi maakimu ïmo kïïgakïrï oidakaragai. Pomaaxi tudu oki bïïtarï.

1 Tomoteo 4:6

Daiñi aapi Timoteo, kïï maatï aanï sai arhidukatai abhiadïrï ka kïïga ïïgidiña aapi go buaboikïdï ñoki. Dai xibi gï agai xi tïtïïgiada aapi ñoki go gaa buaboitudadami aagaitai idi ñoki ix makïdï gï ojidi aanï. Ix podukai gatïtïïgiadagi aapi aidï gia kïïga ibuadamu aapi go aaduindagai ix makïdï gï maa Suxi Kristo pioñigadïkatai aapi. Dai go ñokikïdï ix makïdï tïtïgiadagi aapi buimu aapi bamioma soiñi gï ibhïdagïrï ïpï.

1 Tomoteo 6:11

Dïï gia aapi Timoteo maiti gï agai xi bhïiyagi tïgibudagai podukai. Aapi ïr pioñigadï Diuxi dai kaxkïdï gï agai bhaiyoma xi bhïiyagi aapi tïgibudagai xi ïïgiadgi Diuxi dai buañixikami dukai oidakagi. Ïïgi tomax maaxi daibuñagi gï agai xi apia buaboitudada aapi Diuxi dai xi kïïga oigïdada aapi jaa ïpï. Gï kabakadañi soi ïrhiaragai bïïtarï xïïxkadï soi gï buidadagi jaa buaboitudaitai aapi tudu dai bhaiyoma kïïga tuigaka aapi ïgai bïïtarï.

2 Timoteo 1:8

Maiti gï agai xi xaïrada aapi aagaitai ix tuma maatï Suxi Kristokïdï tudu. Dai maiti xaïrada aanïkïdï ïpï tomaxi gin maixatu aanï aagaitai aanï Suxi Kristo. Daiñi, oidaga ix makïdï soi gïr buidada ïrhidi oiditai aatïmï Suxi Kristo dai kaxkïdï gï agai xi Diuxi gubukarhigadïkïdï kabakadagi aapi gï ibhïdaga dai bhai gï dukagi ix gin urabagi soimaaxi taatamaitai gin ïmadï.

2 Timoteo 2:24

Daiñi, aapi ïr aatabuadami Diuxi bïïtarï. Dai odami ix makïdï ibuayi Diuxi aaduindadï maiti gï agai ix kokoadagi dai bhaiyoma gï agai ix kïï tutiakagi buidïrï jaa. Gï agai xi maatïkagi ïgai ix dukatai tïtïïgiadagi ñoki jaa dai gï aagai ix mai oton bhamuakagi xïïxkadï soi buidadagi jaa ïpï.

2 Timoteo 4:5

Dïï gia aapi maiti gï agai ix pobuadagi. Gï agai xi kïïga sïïrhi gï tïgitokagi aapi bhaiyoma dai mai dagitoagi ix gï maitiagi soi ïrhiaragai gï kabakadaitai aapi xïïxkadï soimaaxi taatakagi. Mos sai aapia aagada aapi go bhai ïrhiaragai aatagi aipakoga daidi kïïga ibuada gï aaduindaga ix makïdï gï maa Diuxi.

Hebreos 12:1

Gin aaduñi Diuxi amadïrï, kaxi gïn aagidi aanï sai muidukana go óídakami ix makïdï kïïga buaboitudai Diuxi ïïki abhiadïrï. Gïr xikorhi gukakan duu ïgai gïr aagiditai sai mai ugutai buaboitudada aatïmï Diuxi tudu. Kaxkïdï ïpï tï tai aatïmï kabami gïr aga dai kïïga buaboitudaitai óídaka ïpï. Tï kabami gïr aga ïpïan dukai ïmo mïmïradami ix makïdï maigobai dadasai bïïxi ixtumaxi sobhikïdagi ix mïradagi ïgai. Tï maigobai dasa bïïxi ixtumaxi gïr sobhikïdagi saidi kïïga buaboidaitai óídakagi aatïmï tudu. Tï gajiadïrï bia bïïxi go soimaaxkami ix makïdï dudatai gïr sobhikïi. Gï agai tudu xi mai ojodatai oijadagi aatïmï go oidakaragai ix makïdï gïr maa Diuxi.

Apokalipsis 1:9

Gin aaduñi, kïï maatï aanï sai soimaaxi gïn taatamiturhiña jaa bïïna darakatai aapimï Suxi Kristo dai aanï ïpï taataiña xi soimaaxi gin taatamiturhi jaa bïïna dakatai aanï Suxi Kristo ïpï. Ïmo xïgïmï aatïmï tudu soimaaxi gïr taatamiturhitai jaa aatïmï bïïxkatai. Dïï gia ïmaduga Gïr Nukadakami dai ïgai ïr Suxi Kristo. Dai bïïna darakatai aatïmï ïgai buyiña aatïmï gubukarhigai ixtukïdï gïr kabakadagi go soi ïrhiaragai bui. Gïn aagidamu aanï ix dukatai gin daibusai ïmo imidagai tumiñoko. Ïmo arhi oidigana dajatadai aanï aidï ix makïdï go gïï sudagi ïrana kaatï. Patmos tïgidu go arhi oidigi ïgai. Ami gin maixatutadai jaa aagaitai aanï Diuxi ñokidï dai aagaitai Suxi Kristo. Ami dajatadai aanï tudu dai ïmo imidagai gin tïanïitadai Diuxi Ibhïadï dai aanï kïïga ïïgidimi bai todian dukai ïgai gubukadadïkïdï kaï aanï ix gïgïrï ño ïmoko gin gokiañdïrï. Po ïrhiadan kaiti trompeta.

Apokalipsis 3:10

Kaxi gïn aagidi aanï mïsai gïn kabakadana xïïxkadï soimaaxi taatagi dai kïïga gin ïïgidi aapimï. Kïïga gïn kabakadai aapimï tudu. Dai kaxkïdï gïn nukadakamu aanï xi maiti gïn aiyagi ix soimaaxi taatagi xïïxkadï kabami soimaaxi taatagi bïïxi go gaa óídakami. Ayimu tudu ixtuigako soimaaxi taatamitulda iñagai bïïxi óídakami nïidana sa bhai mai ïma dukai gïn tïtïgitona ïgai. Dïï aapimï maiti gïn ayimu gobai gïn nukadatai aanï.