2 Korintios 6:10 - Northern Tepehuan Bible

¹⁰ Tomaxi naana maaxi dïgabuskïi soi ïrhiaragai bïïxkïrï aatïmï bhai gïr ïrhidiña. Dai tomaxi ïr soititigami aatïmï bïïxkïrï kïïga soikïiña aatïmï jaa sai biakana ïgai naana maaxi kïïga namïakami ixtumaxi iibhïadïrï bïïtarï. Bhaitoma mai bia aatïmï ixtumaxi tami oidigi daama tudu dïï gia bïïxkïrï bhai gïr ïrhidiña ïpïan dukami ix biakamudai aatïmï bïïxi aïkatai ixtumaxi oidaga. Podukai óídaga aatïmï tudu dai kaxkïdï kïïga gï maatï saidi ïr buaboi gïr ñoki ojotosadïkatai aatïmï Suxi.

Tepehuan Northern: Diuusi ñiooquidʌ utuducami oodamicʌdʌ

¹⁰ Tomasi ʌʌmo imidagai soimaasi taatamai aatʌmʌ vʌʌscʌrʌ baigʌrʌlidiña. Tomasi ʌrsoituutuigami aatʌmʌ vʌʌscʌrʌ soicʌi aatʌmʌ mui oodami idi ñiooquicʌdʌ ismaacʌdʌ aagidi aatʌmʌ. Maiviaa aatʌmʌ tomali ʌmo istumaasi dʌmos Diuusi gʌrmaacai vʌʌsi istumaasi tʌgito aatʌmʌ. Vʌʌsi gomaasicʌdʌ cʌʌga gʌmaatʌ tʌsiaatʌmʌ ʌrDiuusi ojootosadʌ.

2 Korintios 6:10 ပူးပေါင်းရင်းမြစ်များ

Mataibo 5:12

Bhaiga bïnïrhiada xïïxkadï po gïn buidadagi ïgai tudu. Kïïga maatï aapimï sai bia aapimï ïmo namïakami maitïki tïbagiana kaxkïdï. Daiñi, xïxkadï soi gïn buidadagi jaa gin urabakatai aapimï aidï ïpïandukami aapimï go ñiñokituldiadamigadï Diuxi ix makïdï óídakatadai ïïki. Kïïga maatï aapimï sai podukai buididiña óídakami ïïki go ñiñokituldiadamigadï Diuxi ïpï tudu— itïtïdai.

Mataibo 5:4

—Dai aapimï ix makïdï soigakoñi xibi ka kïïga bia ïmo bhai ïrhiaragai ïpï. Kïïga bhai gïn ïjïldamu aapimï xïxkadï gïn tïanïdagi Diuxi tudu— itïtïdai.

Lukas 6:21

—Ka kïïga bia bhai ïrhiaragai aapimï ix makïdï bhiugikoñi duu xibi tudu. Kïïga tataaxkoñikan taadakamu aapimï gokiïrï kaxkïdï. Dai aapimï ix makïdï soigakoñikagi xibi ka bia bhai ïrhiaragai Diuxi amadïrï ïpï. Kïïga bhai gïn ïjïldamu aapimï gïn tïanïitai Diuxi— itïtïdai.

VUAANA 16:22

Pomaaxi aapimïkïdï ïpï. Xibi soi gïn ïrhidi aapimï maatïkatai ix imi agai aanï, dïï gia gokiïrï gïn tïïgimu aanï ïpamu dai aidï gia bhai gïn ïrhiadamu aapimï. Dai mai tipukamu xorai gïn bopoidagi gïn bhai ïrhiaraga aidï.

Hechos 16:25

Ami tudu darajatadai go Pabora ïmadï Silas daidi ïraan tukarï gaatagataidai Diuxi ïmadï dai ganïyitadai oigïda ñokaitai Diuxi bïïtarï dai go gaa maamaixapikïdï mos kaïkatadai.

Hechos 3:6

Dïï go Piduru mos potïtïdai, —Maiti an bia tuminxi dïï gia ïma maaxi gia gï maakimu aanï— itïtïdai. Dai bhodïrï itïtïdai, —Kïkibañi dai aimïrada gubukadadïkïdï Suxi Kristo go Nasaretañdïrï oidakami— itïtïdai Piduru.

Hechos 5:41

Daidi go ojotoxikami bubuaka abhiadïrï xako darajatadai go bhaitï gukakami dai kïï gïn bhai gïn ïrhiatugai ïgai soimaaxi taatakai Suxi bïïtarï.

Romanos 11:12

Bïïxi óídakami gïn ayi xibi xi buaboitudagi dai kïïgakïrï bubuakiagi maiti ipïldakai go judidiu xi buaboitudagi. Gobai gia ïr ïmo bhai ïrhiaraga bïïtarï gobai ix makïdï maiti ïr judidiu. Dïï gokiïrioma kia gïïpioma oidatumu bhai ïrhiaraga bïïxkatai bïïtarï xïïxkadï go judidiu kïïgakïrï buaboitudagi.

Romanos 12:15

Xïïxkadï bhai gïn ïrhiadagi gïn aaduñi Diuxiamadïrï, aapimï abïr bhai gïn ïrhiada ïpï. Dai xudu soi gïn ïrhiadagi ïgai, aapimï abïr soi gïn ïrhiada ïpï ïgai ïmadï.

Romanos 15:13

Diuxi ïgai dai gïr maakai gubukarhigai xi aatïmï bhai ïrhiarakïdï nïnïrakana ixtumaxi bia ïgai gïr bïïtarï. Kaxkïdï daanïi aanï sai ïgai kabami gïn bhai ïrhiatudana dai sai gïn maakana ïmo kïïgadukami ibhïxtaragai. Aidï gia Diuxi Ibhïadï gubukarhigakïdï kïïga bhai gin ïrhiadamu aapimï nïnïrakatai ixtuma kïïgadukami bia Diuxi gïn bïïtarï.

Romanos 8:32

Daiñi, Diuxi mai tudayitai gatïïgi ïïgi maradï sai mukuna gïr bïïtarï. Kaxkïdï kïïga maatï aatïmï sai gïr maakimu ïgai bïïxi aïkatai go gaa ixtumaxi ix makïdï bia ïgai gïr bïïtarï ïpï.

Romanos 9:2

potïkai aanï saidi bïïxkïrï mos kabami soi gin ïrhidiña dai asta kokokan taadagakana gin ibhïdaga soi ïrhiaragaikïdï.

2 Korintios 2:4

Baasïkioma gia kabami soi gin ïrhiditadai aanï dai asta suakaitadai ibuadatai go gïmai ojai xako kabami gïn ñokidi aanï. Dïï gia gï agai sai maatïkagi aapimï sai maiti ipïrhiditadai aanï sai soi gïn ïrhiatudagi go ojaikïdï dai bhaiyoma ipïrhiditadai aanï sai maatïkagi aapimï xïï kïïga gïn oigïdai aanï.

2 Korintios 4:15

Gin aaduñi, gïn tïgitobïrai xïï kïï tuiga Diuxi gïn bïïtarï dai gïn aiturhi go bhai ïrhiaragai aatagi. Podui ïgai tomaxi gï agaitadai ix soimaaxi taatagi aatïmï gïn aiturhitai gobai tudu dai gobai ïr ïmo maaxidaragai sai gïn oigïdai Diuxi dai sai kïï tuiga ïgai gïn bïïtarï. Diuxi ipïrhidi sai aapimï ïmadï jaa mui óídakami aipakoga óídakami maatïkagi xïï kïï tuiga ïgai gïn bïïtarï tudu saidi podukai bhai gïn ïrhiadagi aapimï Diuxi ïmadï dai bïïx tasai bamioma kïïga ñokadagi aapimï ïgai bïïtarï ïpï. Buaboikïdï ipïrhidi Diuxi ix maatïkagi aapimï ixtumaxi ïr buaboi tudu dai kaxkïdï asta dagito ïgai ix soimaaxi taatamadagi aatïmï gïn aiturhitai Diuxi ñokidï.

2 Korintios 4:7

Gin aaduñi, go bhai ïrhiaragai aatagi ix makïdï gïr nukaturhi Diuxi kabami namïga. Bamioma namïga gobai xi bhai gïïpi tuminxi tudu. Dai Diuxi kïï gubuakami dukai aatabuayi iibhïadïrï óídakami kaïkatai ïgai go bhai ïrhiaragai aatagi. Dïï gia aatïmï mai gupuka dai mai xii kabami ïr namïakami aatïmï. Ïpïan dukami aatïmï ajayi mai xii namïakami dïï biakami tuminxi ïrana. Tomaxi mai namïga aatïmï dïï gia bia aatïmï go bhai ïrhiaragai aatagi dai gobai gia namïga. Podukai gï tïgito Diuxi tudu dai gïr nukaturhi go bhai ïrhiaragai aatagi tomaxi mai gupuka aatïmï. Podui ïgai sai bïïxi óídakami maatïkana sai ïïgi aatïmï mai bia gubukarhigai dai sai bhaiyoma Diuxi ïgai dai ibuayi aaduindadï aatïmïkïdï kïïga gubuakatai ïgai.

2 Korintios 8:9

Kïï maatï aapimï sai gïr Suxi Kristo Tïanïdamiga kïïga gïn oigïdai dai kïïga gïn tïtïïgidi ïgai ix xïï kïï tuiga ïgai gïn bïïtarï gïn oigïdatai. Kïïga biakatadai ïgai naana maaxi ixtumaxi kïïga namïakami mai kia dibiakai tami oidigi daama tudu. Dïï gia dagito ïgai bïïxi gobai dai ïmo soitigami bii. Po dui ïgai saidi biakana aapimï naana maaxi ixtumaxi kïïga namïakami gïn iibhïdaga bïïtarï tudu.

Efesios 3:16

Kïïga maatï aanï sai Diuxi kabami ïr gïdukami kaxkïdï daanïi aanï saidi Ibhïadïkïdï gïn maakana ïgai gubukarhigai gïn ibïgaïrï.

Efesios 3:8

Daiñi, tomaxi aanï ïr ïmo buaboitudadami bamioma mai namïakïdï, bïïxkïrï Diuxi gin maakai idi gïdukami bhai ïrhiaragai. Gin maa ïgai xi aagidagi aanï go ix makïdï maiti ïr judidiu xïï kïï tuiga Suxi Kristo gïr bïïtarï bïïnakai aatïmï ïgai. Odami tïgibudadï mai ajïi ix maatiagi xïïxi ïr namïakami Suxi Kristo gïr bïïtarï tudu.

Filipenses 2:17

Daiñi, aanï aatabuayi gïn soiña iñïrhiditai sai kïïga buaboitudana aapimï. Dai xïduñada gin muatudagi aanï dai gï aaxtagi gin ïra gïn soikïitai aanï podukai gobai mos ïr ïmo daxdaragai dukaikamu Diuxi bïïtarï. Ïmo bhai ïrhiaragaikamudai gobai gin bïïtarï tudu. Dai ipïrhidi aanï xi bhai gïn ïrhiadagi aapimï gin ïmadï.

Filipenses 4:4

Dai bïïxkatai aapimï, abïr bhai gïn ïrhiada bïïnakatai aapimï Suxi Kristo Gïr Nukadakami. Gïn aagidamu aanï ïpamu abïr bhai gïn ïrhiada aapimï.

Kolosenses 1:24

Gin aaduñi Diuxi amadïrï, aanï soimaaxi taatamai xibi ibuadatai ïmo aaduindagai ix makïdï ïr soiñi gïn bïïtarï. Dïï gia tomaxi soimaaxi taatakagi aanï bïïxkïrï bhai gin ïrhidiña aanï maatïkatai sai aapimï gïn bïïtarï soimaaxi taataimi aanï. Daiñi, Suxi Kristo soimaaxi taata go buaboitudadami bïïtarï baasïkioma dai xibi aanï in ajïga xi soimaaxi taatagi go buaboitudadami bïïtarï ïpï ïpïan dukai ïgai.

Kolosenses 3:16

Gïn tïgito abïr ajiopada aatagidï Suxi Kristo dai abïr dagito sai ïgai ñokidï gïn tïanïdagi gïn tïgibudagïrï dai saidi gïn tïanïdagi gobai bïïxi ix tumaxiïrï ibuadagi aapimï ïpï. Podukai abïr bhïiyi kïïgadukami tïgibudagai daidi aipako abïr gïn mamaatïturhiada aapimï dai aipakoga abïr gïn mamaakada ñoki. Dai bïïxi gïn ibhïdakïdï abïr ganïyi go naana maaxi nïidadï Diuxi ix makïdï aagai xïïxi ïr gïdukami Diuxi. Daidi abïr gamamaakada ïmo Diuxiatanamїidaragai Diuxi bïïxi gïn ibhïdagakïdï.

1Tesalonicenses 1:6

Dai aapimï sïïrhikïdï kïïga ibuayi ïpï. Ibuayi aapimï ïpïandukai aatïmï ïmadï Gïr Nukadakami tudu. Daiñi, kajioma aatïmï sai jaa maiti ipïrhidi ix buaboitudada aapimï dai bhaiyoma soi gïn buididiña buaboitudakai aapimï. Dïï gia kajioma aatïmï ïpï sai tomax dukai maiti gïn daadagitoiña aapimï ix gïn maitiagi go soi ïrhiaragai xïxkadï soi gïn buididiña jaa. Saidi as gïn soikïiña Diuxi Ibhïadï sai bhai gïn ïrhidiña aapimï bhaiyoma. Podukai tudu ibuayi aapimï ix dukai ibuayi aatïmï ïmadï Gïr Nukadakami Aatïmï ïpï maiti gïr daadagitoiña ix gïr maitagi go soi ïrhiaragai tomaxi soi gïr buidadagi jaa.

1Tesalonicenses 5:16

Dai abïr bïïxkïrï bhai gïn ïrhiada.

1 Tomoteo 6:18

Aagidañi go buaboitudadami ix makïdï kïïga gïn bidaka sai kïïga ibuada ixtumaxi ïr soiñi. Sai bïïxi bhai ïrhiaradïkïdï maakana soiñi xorai tïgitokagi tudu.

Hebreos 10:34

Soi gïn ïrhidiña aapimï ïgai bïïtarï ix makïdï gïn maamaixatudiña ïpï. Dai tomaxi go dudunukami gïn bopoidiña gïn buxtuidaga aapimï bïïxkïrï mai buamï ïrhidiña. Bhai gïn ïrhidiña aapimï bhaiyoma maatïkatai sai bia aapimï ixtumaxi bamioma kïïgadukami ix makïdï tomarhi ïmo imidagai mai ugiti agai.

Santiago 2:5

Gin aaduñi, kïïga gïn oigïdai aanï. Kïïga abïr gïn tïgito kaïka ixtumaxi gïn aagidamu aanï. Gïn maakimu aanï ñoki tudu. Daiñi, Diuxi ka podukai dáí sai mui soititigami ïr buaboitudadamika agai dai podukai gïn bipidakami dukai bii agai iibhïadïrï buaboitudaitai ïgai tomaxi tami oidigi daama bhaitoma mai bia ïgai ixtumaxi. Biakamu ïgai oigaragai xi Diuxi tïanïdagi tudu. Gobai tudu ïr go bhai ïrhiaragai ix makïdï maaki agai Diuxi go odami ix makïdï oigïdai Diuxi. Ka podukai aagai ïgai tudu.

1 Pedro 4:13

Bhai gïn ïrhiadabïrai bhaiyoma. Gobai ix makïdï taatamaimi aapimï ïr ïmo urabaragai Suxi Kristo ïmadï kaxkïdï. Ïgai podukai soimaaxi taata ïpï tudu. Dai gobai itïiya ïrhidi sai gia kabami bhai gïn ïrhiadamu aapimï xïxkadï dibiagi ïgai ïpamu xïïxkadï gï maaxitudagi xïï xigiamaaxi ïgai dai xïï kabami ïr gubuakami ïpï.

Apokalipsis 2:9

Maatï aanï bïïxi ixtumaxi ibuayi aapimï. Kïï maatï aanï tudu xïï kabami soi taatamaiña aapimï dai xïïxi ïr soititigami aapimï ïpï mai biakatai bhaitoma ixtumaxi oidaga tami idi oidigi daama. Dïï gia bïïxkïrï ka bia aapimï mui namïakami ixtumaxi ix makïdï gïn maa Diuxi gïn ibhïdaga bïïtarï xi kaxkïdï gia ïr gïn bipidakami aapimï gïn ibhïdagakïdï. Maatï aanï ix makïdï pokaitiña sai kïïgakïrï ïr judidiu dai pokaitiña saidi ïr gin aaduñi dïï maiti ïr buaboi. Ïgai galnaaxi ñokai gin bui tudu pokaititai saidi ïr gin aaduñi. Urabaka ïgai go diabora bhaiyoma di.

Apokalipsis 21:7

—Daiñi, maakimu aanï ixtumaxi kïï namïakami xorai maitiagi go soimaaxkami. Maakimu aanï oigaragai xi aanï kïïgakïrï ïr Diuxigadïkana dai xi ïgai ïr gin maamarakana tudu.