2 Korintios 11:13 - Northern Tepehuan Bible

¹³ Yaatabogami tudu ïgai dai Suxi ojotosadï gïn aagaiña dïï maiti ïr buaboi. Mos yaatagidiña ïgai óídakami dai bupuirumadaiña tudu.

Tepehuan Northern: Diuusi ñiooquidʌ utuducami oodamicʌdʌ

¹³ Ʌgai pocaitiña saidʌ ʌrSuusi Cristo ojootosadʌ dʌmos maitʌrvaavoi. Ʌgai mosʌryaatavogami.

2 Korintios 11:13 ပူးပေါင်းရင်းမြစ်များ

Mataibo 25:24

Dai bhodïrï dibia ix makïdï ïmo mirhi tuminxi bhïitadai dai aagada agai ix idui ïgai go tuminxi. Daidi ikaiti ïgai, —Gin amu, kïï maatï aanï saidi aapi mai taata gatïanïi. Dai kïï maatï aanï ïpï sai gaïxidiña aapi ïïxidï jaa. Dai buyiña aapi maitïkidï jaa mai aatabuadatai aapi— itïtïdai.

Hechos 15:1

Aidï tuigako ayi jaa kïkïïrhi ami Antiokiïrï xako darajatadai Pabora ïmadï Bernabe. Judeañdïrï iimïdami go kïkïïrhi ïgai. Dai aïkai gïn aaga maakaimitadai aatagi go buaboitudadami. Daidi ikaitimi aidï, —Gï agai mïxi gïn circuncidandoagi aapimï ix dukai gïr biturhi go Moises ïïki. Ïma dukai mai kïïgakïrï bubuakimu aapimï— ikaitimi.

Hechos 15:24

Gïr aaduñi, kajioma aatïmï sai gamoko iji kïkïïrhi tabhiadïrï ix makïdï aatïmï mai otoi. Ïgai naana maaxi gïn tïgitoturhi gïn aatagikïdï xi aapimï ka mai xioma daraja bii. Aatïmï mai aagidi xi podukai gïn aatagiadagi ïgai.

Hechos 20:30

Dai asta ïïmoko gïn aaduñi ïpï ipïrhiadamu xi ïr bhaitï gukakamikagi dai naana maaxi yaatagi gïn aagidamu, ipïrhiditai xi mui odami ïïgiadagi ïgai aatagidï.

Romanos 16:18

Ix makïdï pomaaxi gamamaakai aatagi maiti ibuayi Kristo Gïr Nukadakami aaduindadï tudu. Dai bhaiyoma ïïgi ibuayi ixtumaxi bhai ïrhidi ïgai. Xigian dukai aatagaiña ïgai dai aagai ïïgi ix ixtumaxi kaïka ïrhiadagi óídakami. Podukai buirumadai ïgai mui ix makïdï maiti gïn nukadatai óídaga.

2 Korintios 11:15

Go yaatabogami ïgai ïr pipioñigadï go diabora tudu. Kaxkïdï kïïga bhai maaxi ibuadami dukai gïn dadasai ïgai. Dïï gia taata agai ïgai go gïgïbidaragai ix makïdï ïr ajïakami ïgai soimaaxi ibuadamikatai ïgai. Gïgïbidaragai amakoga iimïdami ïgai tudu.

2 Korintios 2:17

Diuxi ïgai dai gïr maa ïmo sïïrhikami tudu. Dai kaxkïdï Diuxi gubukarhigadïkïdï aatabuayi aatïmï dai kïïga sïïrhi ñokai aatïmï ojotosadïkatai aatïmï Suxi Kristo. Dai mai xu xi tuminxikïdï gaatabuayi aatïmï gatïtïïgiditai Diuxi ñokidï aipakoga. Jaa gia go ïï tuminxikïdï gatïtïïgidiña ñoki dïï aatïmï gia cho. Kïïga maatï aatïmï sai Diuxi bïïxi nïidi ixtuma ibuadagi aatïmï kaxkïdï.

2 Korintios 4:2

aagaitai ixtumaxi ïr buaboi. Oidaga jaa ix makïdï ïxtotai dukai ibuadana naana maaxi xaïrarakami dai bupuirumadai ïgai óídakami mai sïïrhi aagaitai ïgai Diuxi ñokidï. Dïï gia aanï ïmadï ix makïdï gin soikïi gin aaduindagïrï mai pobuayi. Aatïmï bhaiyoma aagai mosïkaxi ixtumaxi ïr buaboi gïr nïiditai Diuxi. Pobuayi aatïmï saidi bïïxi óídakami kïïga maatïkana iibhïadïrï sai mai yaatagïi aatïmï.

Galatas 1:7

Gin aaduñi, kajiomakana aanï sai gïn bupuirumadaiña jaa odami dai podukai soi gïn ïrhiatudai ïgai aapimï. Gïn tïtïgidiña ïgai ïmai aatagi ix makïdï mai buaboikïdï ïr go bhai ïrhiaragai aatagi. Mai sïïrhi aagai ïgai go bhai ïrhiaragai aatagi aagaitai Suxi Kristo tudu dai bhaiyoma saagida aagaiña ïgai yaatagi. Podukai gia ka maiti ïr bhai ïrhiaragai aatagi gobai di.

Galatas 2:4

Maiti gï circuncido go Tito tudu tomaxi go odami ix makïdï buaboitudadami gïn aagaiña ïïgi dai maiti ïr buaboitudadami, ïgai gia pokaititadai sai gï agaitadai ix gï circuncidandoagi ïgai. Go odami ïgai kajiomatadai ïmo aatagi aatïmïkïdï ix makïdï bïïna daraja Suxi Kristo. Kajioma ïgai sai ka mai gubuakïdï bia aatïmï xi ïïgiadagi go Moises sïïrhikamigadï tudu. Dai mai bhai ïrhidi ïgai gokïdï. Ami ayitadai ïgai gïr saagida dai ïxto dukai nïida ïrhiditadai ix dukatai ibuadana aatïmï. Ipïrhiditadai ïgai xi gubuakïdï ïïgiadagi aatïmï go sïïrhikami ïpamu dai xi gïr circuncidandoagi aatïmï.

Galatas 4:17

Daiñi, kïï maatï aanï sai oidaga jaa ix makïdï ipïrhidi sai ïmo gïn buidïrï kaatïkami dukai gin nïijadagi aapimï. Ïgai gïn aagidiña naana maaxi aatagi ix makïdï maiti ïr buaboi. Ïgai kabami gaagadan buayi ixtumaxi ïr soiñi aapimï gïn bïïtarï dai maiti ïr buaboi. Mos ipïrhidi ïgai xi urabagi aapimï kaxkïdï pobuayi ïgai. Gïn oigïdadan buayi ïgai tudu dïï maiti ïr buaboi. Bhaiyoma pobuayi ïgai ipïrhiditai sai ka maiti gin urabagi aapimï. Ipïrhidi ïgai xi mosïkaxi ïgai urabagi aapimï tudu. Ipïrhidi ïgai xi ïkobai gïn biagi aatïmïañdïrï ix makïdï aagai ixtumaxi ïr buaboi. Kaxkïdï gïn oigïdadan buayi ïgai.

Galatas 6:12

Gin aaduñi, go circuncision ïr ïmo aaduindagai ix makïdï go ïïgi tukugadïkïdï ibuayi odami. Maiti ïr ibhïgadïkïdï tudu. Dai mai gubudakïdï gï agai xi gïn circuncidandoagi aapimï. Dïï gia gïn aagidamu aanï ix tuixi gubudakïdï gïn tïanïi jaa sai gïn circuncidandoagi aapimï. Buamï ïrhidi ïgai ix kaitiadagi go judidiu kaxkïdï. Dai pokaitada ïrhidi ïgai ïpï sai kïïga xadutudai ïgai go Moises sïïrhikamigadï kaxkïdï gïn tïanïi ïgai sai gïn circuncidandoagi aapimï. Dïï gia tomarhi ïïgi ïgai mai kïïga ïïgidi go Moises sïïrhikamigadï. Dai bïïxkïrï mai bhai aagaiña ïgai sai kïïgakïrï bubuakiagi aapimï mos buaboitudakai aapimï ixtumaxi idui Suxi Kristo kuruxiana. Gïgïrdukïdï gïn ïrhidi bhaiyoma dai ibuada ïrhidi aaduindagai ïïgi gubukarhigadïkïdï dai kaxkïdï gïn tïanïi ïgai sai gïn circuncidandoagi aapimï.

Efesios 4:14

Podukai gïr soikïitai go mui soikïdadami ix makïdï Diuxi darai gïr bïïtarï ka mai aarhi dukaikamu aatïmï. Go aarhi gia otoma bhïiyiña ïmai tïgibudagai kaïkatai aatagidï jaa. Otoma buaboitudaiña ïgai yaatabogami tudu ix makïdï bupuirumadai odami. Dïï aatïmï gia mai pomaaxkamu aidï.

Filipenses 3:18

Daiñi, dudatai gïn aagidiña aanï sai oidaga mui odami ix makïdï ïr buidïrï bïtïkami ixtumaxi idui Suxi Kristo kuruxiana. Dai xibi asta suakaiña aanï soi gin ïrhiarakïdï gïn aagiditai ïpamu.

Filipenses 3:2

Gïn nukadabïrai tudu go odamikïdï ix makïdï ojoidi xi ikitikïdagi tukugadï óídakami circuncidanduitai. Po kaitiña ïgai sai bia xi circuncidandoagi tukugadï saidi ïr Diuxi maamaradïkana. Dïï gobai gia maiti ïr buaboi. Ïmo gïdukami soimaaxi ibuayi ïgai ix makïdï pokaiti sai Diuxi maamaradï bipiïyi odami gïn ikitïkai tukugadï. Aanï googoxi omarhigakami dai tukurakami dukai nïidi ix makïdï po maaxi mamaakai aatagi. Soi buayi ïgai odami ibhïadï di.

Kolosenses 2:4

Dïï gia gïn tïgitobïrai sai oidaga jaa ix makïdï sastudaga aatagidï dai ipïrhiadamu ix gïn bupuirumadagi. Kaxkïdï gïn ojidi aanï podukai aagaitai Suxi Kristo.

Kolosenses 2:8

Daiñi, Suxi Kristo kïïgakïrï ïr Diuxi ïpïan ïxi Ogadï. Mai bii toma lïïchi xi kïïgakïrï ïr Diuxika ïgai ïpïan ïxi Ogadï tudu. Tomaxi gïr ïpïamaaxi biatu ïgai tukugadï bïïxkïrï kïïgakïrï ïr Diuxi ïgai. Dai kaxkïdï buaboitudakai aapimï ka bïïna bii aapimï Suxi Kristo dai ka maiti gïn biïga ixtumaxi gïn ibhïdagïrï. Ïgai tudu bïïxi adaama ïr Tïanïdami. Ïgai bamioma ïr gatïanïdami xi bhai tomax makïdï gubukadagai bipiakami tudu. Kaxkïdï maiti abïr gïn dagito xi gïn bupuirumadagi odami ix makïdï tïtïïgidi mosïkaxi óídakami tïgibudadï ix makïdï maiti ïr buaboi. Gobai maiti ïr soiñi. Aagaiña ïgai bituldaradï óídakami mosïkaxi dai mai aagai ïgai Suxi Kristo. Maiti abïr ïïgiada aatagidï ïgai. Tadu maamaixapikan dukai bii aapimï ïïgiditai aatagidï.

1 Juan 2:18

Gin aaduñi Diuxi amadïrï, ka miadaimi ix ugitiagi oidigi. Dai aapimï kajiomakana saidi dibiagai ïmoko ix makïdï Suxi Kristo dukai gï dasa agai daidi ïr buidïrï kaatïkamigadïka agai Suxi Kristo. Dai xibi kaxi oidaga mui óídakami ix makïdï Suxi Kristo dukai gïn darasai dïï bhaiyoma ïr buidïrï bïïtïkamigadï ïgai. Kaxkïdï gï maatï xibi sai ka miadaimi ix ugitiagi oidigi.

1 Juan 4:1

Gin aaduñi, mui odami aipakoga óídakami ikaitiña sai ïgai ïr ñiñokituldiadamigadï Diuxi dai yaatagïiña ïgai. Maiti gï agai sai buaboitudadagi aapimï tudu. Gï agai bhaiyoma sai kïïga gïn tïgito kaïkagi aapimï dai maatïkagi xorai tïgibudadïkïdï ñokai ïgai. Ix bhai Diuxi Ibhïadïkïdï ñokai ïgai xi ïmai tïgibudadïkïdï ïpï.

Apokalipsis 19:20

Dai ami kokodiïrï gï bhïitu go gïï kïixi modukai ïmadï go gïmai ix makïdï Diuxi ñokituldiadamigadï gï aagaiña ïïgi dai maiti ïr buaboi. Ïgai tudu ïgai dai ibuadana naana maaxi maaxidaragai soikïitai go kïïxi sai odami buaboitudaiña. Podukai bupuirumadaiña ïgai mui óídakami. Bupuirumadaiña ïgai ix makïdï gïn dagito ix gïn tïpaltudagi tïtiaradïkïdï go kïïxi tudu dai ix makïdï xadutudaiña go kïixi maaxkami ubixi. Gï bhïitu tudu go gïï kïixi ïmadï modukai go gïmai bupuirumadami óídakami dai apia dukai duduakakami gïn surhitu ïgai go gïï taiyïrï xako asufrekïdï mïmïjïi táí.

Apokalipsis 2:2

—Aapimï buaboitudadami Efesoïrï óídakami, kïï maatï aanï xïï kabami gïn aaga aapimï ibuadatai naana maaxi gin bïïtarï. Dai maatï aanï xïï kïïga gïn kabakadai aapimï xïxkadï soimaaxi taatamaiña. Maatï aanï ïpï sai mai daadagitoi aapimï xi gïn uurapïkïdagi soimaaxi ibuadami. Maatï aanï sai oidaga ïïmoko ix makïdï pokaitiña saidi ïr Suxi Kristo ojotosadï dïï maiti ïr buaboi. Dai aapimï kïïga gïn tïgito kaï aatagidï dai nïidi oidakaradï dai máí ix ïr yaatabogami ïgai.

Apokalipsis 2:20

Dïï bïïxkïrï oidaga ixtukïdï mai bhai gin ïrhidi aapimïkïdï. Daiñi, gïn saagida daja ïmo oki ïpïan tuigakami go oki Jezabel tïgidukïdï ix makïdï oidakatadai ïïki. Go ix makïdï gïn saagida daja pokaiti saidi ïr ïmo Diuxi ñokituldiadamigadï dai maiti ïr buaboi. Ga mamaakai ïgai ñoki gin pipioñi. Ga mamaakai ñoki buaboitudadami tudu dai abïnakidi sai aipako bopoiña jaa ïmadï dai sai kuadana kuadagai ix makïdï gï dadaxdi uubixi. Podukai buirumadai ïgai gin aaduñi ix makïdï gin buaboitudai. Dai aapimï daadagitoiña ix podukai gamaakada ïgai aatagi. Gokïdï mai bhai gin ïrhidi aanï.

Apokalipsis 2:9

Maatï aanï bïïxi ixtumaxi ibuayi aapimï. Kïï maatï aanï tudu xïï kabami soi taatamaiña aapimï dai xïïxi ïr soititigami aapimï ïpï mai biakatai bhaitoma ixtumaxi oidaga tami idi oidigi daama. Dïï gia bïïxkïrï ka bia aapimï mui namïakami ixtumaxi ix makïdï gïn maa Diuxi gïn ibhïdaga bïïtarï xi kaxkïdï gia ïr gïn bipidakami aapimï gïn ibhïdagakïdï. Maatï aanï ix makïdï pokaitiña sai kïïgakïrï ïr judidiu dai pokaitiña saidi ïr gin aaduñi dïï maiti ïr buaboi. Ïgai galnaaxi ñokai gin bui tudu pokaititai saidi ïr gin aaduñi. Urabaka ïgai go diabora bhaiyoma di.