2 Korintios 1:21 - Northern Tepehuan Bible

²¹ Diuxi ïgai daidi ibuayi ïmo aaduindagai aapimïrï tudu dai aatïmïrï ïpï saidi kaxkïdï kïïga gubuakami gukana aatïmï bïïna darakatai aatïmï Suxi Kristo. Diuxi ïgai daidi gïr maa ïmo sïïrhikami

Tepehuan Northern: Diuusi ñiooquidʌ utuducami oodamicʌdʌ

²¹ Dai Diuusi ʌgai daidʌ gʌrsoicʌi isapiacʌʌga vaavoitudada aatʌmʌ Suusi Cristo. Dai Diuusi ootoi gʌIbʌdaga sai gʌrʌʌmadu daacana,

2 Korintios 1:21 ပူးပေါင်းရင်းမြစ်များ

Isa 9:7

Bhïimu ïgai gubukadadï ix makïdï biakana go Rey Dabid ïïki. Tomax tuigako mos bïïx tasai bamioma gubukan kïïkiadamu ïgai gubukadadï ixtukïdï tïanïi ïgai dai mos kïïgioma oidaka agai ibhïxtaragai tipukatai kokodi ami xako tïanïda agai ïgai. Kïï sïïrhi aataduñimu ïgai dai aagadamu ixtumaxi ïr sïïrhikami. Kïï kaban kïkibamu gubukadadï ix dukatai tïanïda agai ïgai tomax tuigako. Gïr Nukadakami kïïgakïrï oigïdai aaduñdï kaxkïdï bïïxi gubukadadïkïdï gï aagamu ïgai dai kabakami kïïsamu gubukadadï gobai ix makïdï gïr otoxi ïgai.

VUAANA 3:34

Diuxi aagidi Maradï ix tuma ñoki aituldana ïgai óídakami dai mïkadïrï otoi maakakai bïïxi Diuxi Ibhïgadï gubukarhigadï. Dai Diuxi Maradï mai aagaiña ïma maaxi, mosïkaxi gobai ix makïdï Diuxi aagidi. Kaxkïdï gï maatï saidi ïr buaboi ñokidï aagaitai ïgai go baaxi ñoki ix makïdï Diuxi aagidi.

Hechos 10:38

Dai kïïga maatï aapimï ïpï sai Diuxi maa ïïgi Ibhïadï go Suxi ix makïdï ïr Nasaretïrï oidakami sai ïgai biakagi gubukadadï Diuxi Ibhïadï. Aipakoga aimïraiña go Suxi dai Diuxi Ibhïadï gubukadadïkïdï soi ïgai mui odami dai duduadi ïgai mui ix makïdï Diabora soi buididitadai. Diuxi ïmadï dakatadai go Suxi kaxkïdï pomaaxi ibuadana ïgai— itïtïdai Piduru.

Romanos 16:25

Tï oigïda ñokada Diuxi bui tudu xadutudaitai ïgai. Kïïga ixtutuidikïi ïgai xi gïn gupurtudagi go bhai ïrhiaraga aatagikïdï ix makïdï aanï gamamaatïturhiña aagaitai Suxi Kristo. Ïkioma mos ïxtokikana go maatïtuldaragai ix makïdï aagai go Suxi Kristo. Mai kia kïkibakai oidigi abhiadïrï ïxtokikana gobai.

Romanos 8:9

Dïï gia ix gïn ïmadï daja Diuxi Ibhïadï aidï gia ka maiti gïn tïanïi gïn tïgibudaga ïkidadï. Bhaiyoma xibi Diuxi Ibhïadï ïgai dai gïn tïanïi. Xorai mai biakagi Diuxi Ibhïadï ix makïdï Suxi Kristo gïr otoxi, ïgai gia maiti ïr aaduñdï Suxi Kristo.

1 Korintios 1:8

Ïgai tudu gïn soiñamu xibi ix kabakan dukai gukibana aapimï gïn buaboidaragïrï asta go kugatïrï tasïrï ukami bai podukai xïïxkadï dibiagi Suxi Kristo Gïr Nukadakami mai tipukagi tomarhi ïmo ixtumaxi ixtukïdï gïpiïrï gïn bupadagi jaa.

2 Korintios 5:5

Dai Diuxi ka bhai dui ix dukatai biakagi aatïmï gïr tukugai utudui. Asta gïr maa ïgai ïïgi Ibhïadï sai gïr ïmadï dakana tudu. Kaxkïdï kïïga maatï aatïmï saidi iduñimu Diuxi ixtumaxi gïr aagidi. Kïïga maatï aatïmï sai buaboikïdï gïr maaki agai gïr tukugai utudukami tudu. Ïma dukai xadïrï gïr maakimudai ïgai Ibhïadï sai gïr ïmadï dakana tudu.

Kolosenses 2:7

Daiñi, ïpïan dukami ïmo uxi ix makïdï kïïga kabakami kïïka kïï tukabi ukami bia tatakadï podukai abïr gubukan gukada aapimï ïpï kïïga gïn daagïkan dukai aapimï Suxi Kristo ïmadï. Gï agai xi ïmo simiento gï dukamikagi Suxi Kristo gïn bïïtarï tudu sai aapimï daama kaban gukakagi ïgai gïn buaboidaragakïdï. Aidï gia kïïga gïïrhimu dai gubukan kïakamu gïn buaboidaraga ix makïdï gïn tïtïgidi aatïmï. Dai aidï ïpï kïïga maaxkamu jaa bïïtarï xïï kabami bhai gïn ïrhidi aapimï Diuxikïdï.

1Tesalonicenses 3:13

Aidï gia Suxi Kristo gïn maakimu gubukarhigai gïn ibhïdagïrï. Dai podukai gokiïrï xïxkadï dibiagi Suxi Kristo ïmadï bïïxkatai ix makïdï urabaka ïgai kïïga mai duadimukatai gukakamu aapimï ïgai buitapi dai Diuxi gïr Oga buitapi ïpï. Mai tipukamu tudu ixtukïdï gïpiïrï gïn bupadagi ixtumaxi aidï. Mosïkaxi Diuxi bïïtarï óídakamu aapimï tudu kïïga oigïdaitai aapimï jaa.

2 Tesalonicenses 2:8

aidï gia kïïga gï maaxitudamu ïgai. Daidi dibiamu Suxi Gïr Nukadakami dai maitïmu go soimaaxi buadami xi mos nïidamu ïgai ix maaxi tiodi Suxi Diuxikatai ïgai dai amaxi ugitimu gubukarhigadï. Daidi buidïrï buxtamu Suxi go soimaaxi buadami ïgai xi mosïkaxikïdï mukimu.

2 Tesalonicenses 3:3

Kïï maatï aatïmï tudu sai tomaxi oidaga mui soimaaxi ibuadami ix makïdï soi gïr buidada ïrhidi dïï bïïxkïrï maiti gïr dagitomu Gïr Nukadakami. Kaxkïdï gï maatï ïpï sai gïn maakimu ïgai gubukarhigai dai gïn nukadakamu xïïxkadï soi gïn buidada agadagi go diabora.

Hebreos 13:9

Kaxkïdï maiti abïr gïn dagito sai ïmapïbuadagi gïn buaboidaraga ïpï. Maiti abïr bhïbhïda ïma maaxi tïgibudagai ix makïdï maiti ïr buaboi tudu. Dukami maiti abïr bhïbhïda tïgibudagai ix makïdï gïr daidi ïïmo kuadagai. Daiñi, xïïxkadï maatïkagi aatïmï xïï kïï tuiga Diuxi gïr bïïtarï dai buaboitudagi aatïmï, gobai gïr soikïi dai gïr mamaakai gubukarhigai gïr iibhïdagïrï. Dïï gia xorai oijadagi go sïïrhikami ïïkidadï ix makïdï gadaidi sai kuadana ïgai ïïmo kuadagai, gobai mai soikïi xi bhïiya ïgai gubukarhigai ibhïgadïrï. Dai xadïrï gïr soikïiña gobai aatïmï ïpï.

1 Pedro 5:10

Kïï tuiga Diuxi gïn bïïtarï tudu dai gïn báí ïgai saidi aapimï ïpï gïn ajiagi go gïdukami xadutudaragai ix makïdï biakamu ïgai bïïxkïrï bïïtarï. Aapimï gïn aji agai go xadutudaragai gobai bïïnakatai aapimï Suxi Kristo tudu. Dïï gia gï agai sai soimaaxi taatamadagi aapimï kia dïï gia mai xii tïbïragaka agai go soimaaxi taataragai. Dai gokiïrï bhai gïn buadamu Diuxi sai maiti gïn biïgakagi tomarhi ïmo ixtumaxi gïn ibhïdagïrï. Kïïga gïn gupurtuda agai ïgai aidï gïn ibhïdagïrï saidi mai tipukagi ixtukïdï dagitoagi aapimï gïn buaboidaraga. Po duñimu Diuxi kïï tuigakatai ïgai gïn bïïtarï tudu.

1 Juan 2:20

Dïï aapimï gia mai pomaaxi. Kïïga maatï aapimï tudu sai Suxi Kristo ïr ïkobai busaidadï Diuxi. Dai ïkobai gïn bubaitu Suxi Kristo sai ïïgi Diuxi bïïtarïkana aapimï. Ïkobai gïn bubaitu ïgai aidïxi gïn maa ïgai Diuxi Ibhïadï sai gïn ïmadï dakana tudu. Dai ka kïïga maatï aapimï ixtumaxi ïr buaboi dai ka mai ïpïamaaxi aapimï go gaa ix makïdï gïr dagito.

1 Juan 2:27

Daiñi, Suxi Kristo gïn maa Diuxi Ibhïadï sai gïn ïmadï oidakana. Ïgai gïn maatïtulda agai bïïxi ixtumaxi ix makïdï gï agai ix maatïkagi aapimï dai bïïxi aïkatai ixtumaxi gïn maatïtuldagi ïgai kïïga ïr buaboi. Xadïrï gïn yaatagidana ïgai tudu. Kaxkïdï mai aagai aapimï ïmai xorai gïn maatïturhiadagi. Diuxi Ibhïadï gïn maatïturhiadamu kaxkïdï. Ïïgiadabïrai ixtumaxi gïn mamaatïturhiadagi Diuxi Ibhïadï tudu dai podukai urabakatai óídaka aapimï Suxi Kristo.

Apokalipsis 1:6

Podukai bhai dui ïgai sai gatïanïna aatïmï ïgai ïmadï xïxkadï gatïanïdagi ïgai dai sai ïr dadaxdadamikana aatïmï ïpï ibuadatai daxdaragai Ogadï bïïtarï. Diuxi bïïtarï tudu. Pomaaxi idui Suxi Kristo xi kaxkïdï gï agai xi xadutuada aatïmï bïïxkïrï bïïtarï adaama Tïanïdamikatai ïgai. Gobai gia ïr buaboi.

Apokalipsis 3:18

Kaxkïdï gïn daanïi aanï mïsai gin sabïdana ixtumaxi biïga gïn ibhïdaga bïïtarï. Gin sabïdabïrai ixtumaxi namïakami ix makïdï ïr oro dukai kïï buañixikami dai ixtumaxi ïr yukuxi dukai ïpï kïï totoakami. Aidï gia ïr buaboikamu xi gïn bidakami dukaikamu aapimï dai kïïga biakamu ixtumaxi gïn aadagi sai ka mai xaïradagi aapimï mai yukusukan dukaikatai gïn ibhïdagakïdï. Aidï gia ïr ïpïan dukaikamu xi gïn duadi gïn bupuji dai bhaigakamu aapimï xi maatï nïijadagi ixtumaxi ïr buaboi.