1 Tomoteo 3:16 - Northern Tepehuan Bible

¹⁶ Kïïga maatï aatïmï sai namïga gïr buaboidaraga buaboidaitai aatïmï Suxi Kristo. Daiñi, ïkioma óídakami mai maatïkana ixtumaxi ïr buaboi dïï gia Diuxi gïr tïïgi ixtumaxi ïr buaboi dibiakai Suxi Kristo. Dai xibi naana maaxikïdï maatï aatïmï saidi ïr buaboi ixtumaxi aagai aatïmï aagaitai Suxi Kristo dai sai namïga gïr buaboidaraga. Daiñi, Suxi Kristo gïr aagidi dai gïr maaxiturhi xorai ïgai dibiakai tami oidigi daama. Dai Diuxi Ibhïadï ïpï kïïga aagaiña saidi ïr buaboi xorai gï aagaiña Suxi Kristo. Dai go Diuxi tïtïañikarudï bïïxi nïidiña go Suxi ïpï dai aipakoga óídakami ayi aatagi xorai ïgai. Dai gokiïrioma mui oidigi daama óídakami bhai aa saidi ïr buaboi ïpï dai buaboitu. Bhodïrï gï baidakatu go Suxi tïbagiamu xako oidakamu gïïpi xadutudaragai ïgai bïïtarï. Xadïrï po gï duñimudai bïïxi gobai ix maiti ïr buaboikamudai gïr buaboidaraga di.

Tepehuan Northern: Diuusi ñiooquidʌ utuducami oodamicʌdʌ

¹⁶ Idi ñiooqui ismaacʌdʌ gamamaatʌtuldi aatʌmʌ ʌʌquioma maitʌmaatʌcatadai dai goñiooqui aliʌ cʌʌgadu dai pocaiti: Diuusi divia tami oidigi daama oodami duucai; Dai aidʌsi ʌpan duaaca Diuusi Ibʌadʌ, guvucadadʌcʌdʌ poduucai cʌʌga gʌmaí isʌgai ʌrDiuusi. Dai Diuusi tʌtʌaañicarudʌ nʌidi caduaacacai ʌgai. Dai mui naana maasi oodami saagida gʌaagai isducatai ʌpʌdui Suusi Cristocʌdʌ. Dai vʌʌsi oidigi daama oidaga oodami ismaacʌdʌ cavaavoitudai. Dai ʌpamu ii ʌgai tʌvaagiamu. Ascaiti goñiooqui.

1 Tomoteo 3:16 ပူးပေါင်းရင်းမြစ်များ

Isa 7:14

Po tïtïdai ïgai sai, —Gïr Nukadakami gïn maaki agai aidï ïmo maaxidaragai ixtukïdï maatïkagi aapimï xi ïgai iduñi agai ix dukatai gïn aagidi ïgai ïïki. Gïn aagidamu aanï ix tumaxi ïgai daidi ïr maaxidaragai ka agai. Ïmo tïji ix makïdï mai kia abhana boo kïïrhi tïïgi agai ïmo arhi gïrhi abhana. Gobai ïgai dai maaxidaragai ka agai. Dai ka dibiakai ïgai Emanuel tïïtï agai— itïtïdai Isaias go Israelitas.

Isa 9:6

Kaxi ti oidigi dama dibia ïmo arhi gïrhi ix makïdï gïr otoxi Diuxi. Dai kïrhitukai ïgai Diuxi maa sïïrhikami xi tïanïda ïgai bïïxi aïkatai. Dai naana dukai aagadamu odami. Mai Ajïi Gïr Tïgibudagai Xïïxi Ïr Gïdukami Diuxi, dai Ïgai Ïgai Dai Gïr Maakai Diuxi Tïgibudadï tïimu odami, dai Ïgai Ïr Diuxi Ix makïdï Bïïxi Adama Ïr Gubukan Kïakami, dai Gïr Oga Tomax Tuigako Kïakami agadamu odami ïpï, dai Gïr Bhaitï Kïakamiga Gobai Ix makïdï Dodorhitudai Kokodi. Potïimu odami aagaitai Diuxi otosadï.

Miq 5:2

Diuxi ikaiti, —Chïkioma go Belen Efrataïrï óídakami xi bhai jaa kiikiïrï óídakami Judeïrï. Dïï tomax chïkidu ïgai bïïxkïrï abhaxdïrï kïkiba agai ïmo bhaitï kïakami ix makïdï tïanïda agai go Israelitas gin bïïtarï. Go ix makïdï kïkiba agai ïr pipiixaradï ka agai go ix makïdï ka bïïxkïrï abhiadïrï, toma xïï ïki gï tïgitokagi ïmoko, kia ïkioma abhiadïrï kaxi ïr oidakamikana ïgai— ikaiti Diuxi.

Mataibo 1:23

Gïr Nukadakami potïtïdaitadai ïgai aidï saidi, Nonoakami bii agai ïmo arhi oki ix makïdï mai kia ïmadï bii tomarhi ïmo kïïrhi dai marata agai ïmo arhi xïïñi dai Emanuel tïïtïmu ïgai. Gobai ïr go ñoki ix makïdï aiturhi go ñokituldiadamigadï Diuxi go óídakami ïïki tudu. Dai go tïtiaradï go Emanuel itïiya ïrhidi sai Diuxi gïr ïmadï daja.

Mataibo 13:11

Daidi Suxi potïtïdai, —Gin aaduñi, ïkioma mai tipukatadai xorai maatïkatadai ix dukatai gaatabuayi Diuxi gatïanïitai ïgai. Dai xibi kaxi gïn maa Diuxi oigaragai sai aapimï gia maatïkana ix dukatai aatabuayi ïgai. Dïï gia go gaa óídakami mai maatï ix dukatai aatabuayi Diuxi.

Mataibo 28:2

Dai todian dukai gigiburhi oidigi ami. Tïbagiañdïrï tïbai ïmo tïañikarudï Diuxi kaxkïdï. Dai maigobai dáí ïgai go gïï odai ixtukïdï kuupidi xako yaasapikatadai Suxi. Dai ami go gïï odiana daiba ïgai.

Mataibo 3:16

Dai kaxi gï bakuanakai go Suxi sai busai ïgai sudagiañdïrï daidi kupioka go tïbagi dai tïï ïgai Diuxi Ibhïadï sai tïbai tïbagiañdïrï ïmo tugu dukai dai Suxi daama daiba.

Mataibo 4:11

Daidi go diabora dagito aidï. Dai bhodïrï ami dada tïtïañikarudï Diuxi dai soi ïgai go Suxi.

Markos 1:13

Gokobhai tasai bii go Suxi oidigana kïkïixi saagida dai go Diabora daibuiña dai tïañimi ïgai go Suxi sai ibuada soimaaxkami sa bhai ïïgidana. Dai Diuxi tïtïañikarudï soikïiña go Suxi.

Markos 16:19

Daidi bhodïrï ka naato aagakai Suxi Gïr Nukadakami aatagidï bai Diuxi baidaja ïgai tïbagiïrï. Dai ami Diuxi maa ïmo gïïdukami sïïrhikami dai maa xi gï sïïrhixapadïrï daibana go Suxi.

Markos 16:5

Mïtai baapa xako yaasapitadai go Suxi dai tïï ïmo gïrhi xi ami sïïrhixapadïrï dajatadai. Yukuxidï mïï tana ugurai dai kïï totoaja. Daidi go oki arhiï duduadimu tïïgakai.

Lukas 2:32

Idi maatïtuldamu ixtumaxi ïr buaboi go odami ix makïdï maiti ïr judidiu. Dai idikïdï gïr ayimu ïmo gïdukami xadutudaragai aatïmï Israelitas. Aatïmï gïr bïïtarï ix makïdï ïr gï aaduñi aapi Diuxi— itïtïdai go Ximuñi Diuxi.

Lukas 20:44

Ami go ojiïrï pokaiti go Dabidkaru sai Diuxi otosadï ïr Tïanïdamigadï. ¿Ix ïr Tïanïdamigadïka ïgai go Dabidkaru aidï gia dukatai ïr pipiixaradïkana ïgai ïpï?— itïtïdai Suxi go tïtïgiadami sïïrhikami.

Lukas 22:43

Dai ïmo tïañikarudï Diuxi dibia ami tïbagiañdïrï dai gï maaxitu ami buitapi go Suxi dai maa gubukarhigai.

Lukas 24:4

Dai kia mo gukatadai go oki dai mai tïtïïgai ixtumaxi gïn tïtïgitoagi mai tïïgakai tukugadï Suxi bai todian dukai gïn maaxitu goka kïkïïrhi. Ami sonoana gukatadai ïgai xako kaatïkatadai Suxi tukugadï dai yukuxidï go kïkïïrhi kïïga totoarïi.

Lukas 24:51

Dai kia gadaanïi ïgai dai ka taiyako imimi dai gï baidakatu tïbagiamu.

VUAANA 1:14

Daidi go Diuxi Ñokidï tïgidukami ïmo odami busai dai biatu tukuga ïpïamaaxkami ix makïdï bia aatïmï dai bhodïrï óídakami saagida oidatu. Sïïrhikïdï kïï tuiga ïgai dai kïïga gïr maatïturhi ix tumaxi ïr buaboi. Dai aanï Juan ix makïdï ibuayi idi ojai ïmadï jaa mui kïïga nïidi ïgai ix makïdï Diuxi Ñokidï tïgidu. Dai aatïmï ïr nïijadami xïïxi ïr gïdukami ïgai dai xïï kïï tiodi ïgai Diuxi maradïkatai. Diuxi maradï ïmadugakïdï ïgai tudu.

VUAANA 13:3

Dïï Suxi idui ïmo maaxidaragai mai kia gï tïïgidakai ïgai. Kïïga maatïkatadai Suxi sai Diuxi gïr Oga ka maatadai gubukadagai sai tïanïna bïïxi aïkatai ix tumaxi oidaga. Dai kïïga maatïkatadai ïpï sai Diuxiañdïrï dibiatadai ïgai dai ix ka ïpamu imi agaitadai ïgai ïmadï.

VUAANA 15:26

Daiñi— itïtïdai Suxi. —Gokiïrioma dibiagai ïgai ix makïdï Ga Soikïdami tïgidu. Aanï otosamu ïgai mïkadïrï xako daja Diuxi gïr Oga. Ïgai ïr Diuxi Ibhïgadïkamu dai ïgai gamamaatïtulda agai ixtumaxi ïr buaboi. Ïgai maakimu ñoki go óídakami gin aagaitai aanï.

VUAANA 16:28

Buaboi tudu sai Diuxi gin Ogañdïrï dibia aanï tami oidigi daama. Dai xibi otoma imimu aanï tabhiadïrï dai noragimu amïka xako daja ïgai— itïtïdai.

VUAANA 17:5

Xibi gin Oga, gin maaka ï galbaaxi sïïrhikami namïakami ix makïdï biakatadai aanï ïïki aidïxi gï ïmadï dakatadai aanï mai kia kïkibakai oidigi— itïtïdai Suxi.

VUAANA 20:12

Dai tïï ïgai goka Diuxi tïtïañikarudï totoa yukusukami sai ami darajatadai xako kaatïkatadai Suxi tukugadï. Ïmoko mobasana dajatadai dai go gïmai taatápïxiana.

VUAANA 6:62

—¿Bamioma mïx buaboitudamudai ix gin tïïgiadamudai xïïxkadï noragiagi aanï tïbagiamu, aanï ix makïdï kïïgakïrï odami busai tudu?— itïtïdai.

Hechos 1:19

Dai kajiomakai go Jerusalenïrï oidakami ix dukatai pogïduitadai bai Ïrakïrï tïïtï go dïbïrai xako muu Udaxi.

Hechos 10:34

Dai go Piduru maa ñoki aidï daidi itïtïdai, —Xibi ka maatï nïidi aanï ix Diuxi mo ïxi oigïdai odami tomaxi maiti ïr judidiu ïgai. Ïmadugan dukai nïidi ïgai bïïxkatai.

Hechos 14:27

Dai ami Antiokiïrï mos aïkai idui ïgai ïmo ïmpaiñdaragai bïïxi go buaboitudadami ïmadï dai aatagidi bïïxi ixtumaxi iduitadai Diuxi gïn soikïitai gïn aaduindagïrï. Dai aagidi ïpï sai Diuxi ka urhinditadai oigaragai odami ix makïdï maiti ïr judidiu xi ïgai buaboitudada ïpï.

Hechos 20:28

Kaxkïdï gïn nukadakabïrai ïïgi aapimï bhaitï gukakami daidi kïïga abïr nukada go buaboitudadami ïpï ix makïdï gïn nukaturhi Diuxi Ibhïadï. Ïgai tudu gïn darai saidi ïr nukadakamikana aapimï go buaboitudadami ix makïdï Diuxi sabïrhi ïïgi maradï ïradïkïdï. Go buaboitudadami ïpïan dukamikana kañiñiru. Diuxi sosoigadï gïn dukamikana ïgai dai gï aagaiña xorai nukadakagi ïgai.

Romanos 10:12

Pomaaxi bïïxi odami bïïtarï xi ïr judiukagi, xi maiti ïr judiukagi ïpï. Diuxi ïr tïanïdamigadï bïïxi óídakami dai maakai ïmo gïdukami bhai ïrhiaraga bïïxkatai xorai tanïdagi soiñi.

Romanos 10:18

¿Dai go judidiu ix bhai mai kaï go bhai ïrhiaraga aatagi? Kaï aba ïgai. Kaxkïdï Diuxi ñokidï ikaiti, Bïïxi aipako oidigi daama ayi go aatagi. Oidigi ugidïrioma ukami ayi Diuxi ñokidï tudu, ikaiti go ojai.

Romanos 16:25

Tï oigïda ñokada Diuxi bui tudu xadutudaitai ïgai. Kïïga ixtutuidikïi ïgai xi gïn gupurtudagi go bhai ïrhiaraga aatagikïdï ix makïdï aanï gamamaatïturhiña aagaitai Suxi Kristo. Ïkioma mos ïxtokikana go maatïtuldaragai ix makïdï aagai go Suxi Kristo. Mai kia kïkibakai oidigi abhiadïrï ïxtokikana gobai.

Romanos 16:26

Dïï xibi gia mos nïiditai aatïmï ojadï go aagadami Diuxi ñokidï ka máí aatïmï gobai ix makïdï ïxtokikana ïkioma. Podukai tudu tïjai Diuxi dai ïgai bïïxkïrï mo maaxkana. Dai xibi kaxi bïïxi aipako óídakami buitapi ayi go bhai ïrhiaragai aatagi bai podukai buaboidaitai ïïgiadagi ïgai.

Romanos 3:4

Xadïrï maiti duna Diuxi idukatai aagagi ïgai. Diuxi mai yaatagïi tomaxi odami gia ïr yaatabogami bïïxkatai. Podukai tudu agai Diuxi ñokidï. Ami ikaiti sai, Bïïxkïrï buaboi aagai Diuxi. Xudu jaa gïpiïrï buaja ïrhiadagi Diuxi, ïgai gatïtïïgiada agai sai mai soimaaxi buayi ïgai, ikaiti go ojai.

Romanos 8:3

Go sïïrhikami ojixikami maiti ixtui ix kïïgakïrï gïr bubaidagi. Mai bia gobai gubukarhigai ixtukïdï gïr soiñagi. Ïïgi sobhikïiña aatïmï adaimïitai gïr ïkidadï tïgibudagai kaxkïdï. Dïï Diuxi gia kïïgakïrï gïr bubaitu. Ïgai otoi maradï sai biakana ïmo tukugai ïpïamaaxkami ix makïdï bia aatïmï soimaaxi ibuadami. Dai gï muatu ïgai gïr soimaaxkamiga bïïtarï. Podukai Suxi tukugadïkïdï Diuxi gamaitï go soimaaxkami bui.

Romanos 9:5

Go gin aaduñi judidiu ïr piipixaradï go Abraamkaru dai Isaakaru dai Israelkaru. Dai Suxi Kristo Diuxi Otosadï ïr judiukatadai ïpï. Suxi Kristo ïr Diuxi dai bïïxi adaama ïr Tïanïdami ïgai. Kaxkïdï gï agai xi gï xadutuadagi ïgai bïïxkïrï bïïtarï.

1 Korintios 15:47

Dïbïraiñdïrï idui Diuxi go Adán tukugadï dai bïïxkatai aatïmï bia gïr tukuga ix maaxi biakatadai go Adán. Dïï gia Suxi Kristo ayi gokiïrï xi go Adán tïbagiañdïrï dibiakai ïgai dai gïïpi ïma maaxi aaduindagai idui. Xibi bïïxkatai aatïmï ix makïdï buaboitudai biakamu gïr tukuga ix maaxi bia ïgai.

1 Korintios 2:7

Go tïgibudagai ix makïdï aagai aanï ïr Diuxi tïgibudadï ix makïdï odami mai maatïkana ïïki abhiadïrï. Gïn aagidamu aanï ix dukatai kaatï go Diuxi tïgibudadï. Daiñi, ïïki mai kia kïkibakai oidigi Diuxi ka podukai gï tïgito dai podukai dáí saidi Suxi Kristo bhai buadana ixdukatai gïr aïna gïïpi xadutudaragai. Gobai tudu ïr Diuxi tïgibudadï ix makïdï odami mai maatïkana ïïkioma.

2 Korintios 1:19

Daiñi, aanï ïmadï go Silbano dai go Timoteo ïr oijadami Suxi Kristo. Dai Suxi Kristo mai ïma dukai gï tïtïitoi xïïxkadï pokaitadagi saidi iduña agai ixtumaxi. Bïïxkïrï ibuayi ïgai ixtumaxi aagadagi tudu. Mai yaatagïi ïgai. Kaxkïdï gï maatï sai aatïmï mai yaatagïi ïpï gïn tïtïgiditai aatïmï ñoki aagaitai Suxi Kristo. Oijadami aatïmï Suxi Kristo kaxkïdï. Ïpïan buayi aatïmï ïgai tudu dai ïgai mai yaatagïi.

Galatas 4:4

Dïï gia Diuxi maiti ipïrhidi xi pipioñi dukai óídakagi aatïmï tomarhi xi ïr arhi dukaikagi ïpï. Kaxi ïr maamaradï aatïmï kaxkïdï. Ipïrhidi ïgai xi gïgïr odamikagi aatïmï tudu bai gïr maakana ïgai bïïxi ixtumaxi gïr ajïga maamaradïkatai aatïmï. Kaxkïdï ka aïkai ixtuigako Diuxi ipïrhi aidï bhai dui ïgai gïr bïïtarï xi ka bhaigakana aatïmï xi ka biakagi ixtumaxi gïr ajïga. Otoi ïgai Maradï tami oidigi daama tudu dai ïgai ïmo kïïrhi busai. Dai biakatadai ïgai xi ïïgiadagi go sïïrhikami

Efesios 1:9

Daiñi, Diuxi gïr tïtïgidi tïgibudadï ix makïdï ïkioma ïxtokikana. Kaxi ïkiaxdïrï podukai gï tïgitokana ïgai xi Suxi Kristokïdï pobï gï duñagi ixtumaxi ïgai ipïrhidi tudu.

Efesios 6:19

Dai aanï gin bïïtarï abïr daanïda ïpï xi kïïga maatïtai aagada aanï Diuxi tïgibudadï ix makïdï ïxtokikana ïkioma. Bai mai duadimudakïdï aagada aanï sai Diuxi podukai gï tïgito xi go bhai ïrhiaragai aatagi ïr bïïtarïkana go ix makïdï maiti ïr judidiu ïpï.

Kolosenses 1:23

Dïï gia tomaxi ïr buaboi sai Suxi Kristo ka bhai dui gïn bïïtarï bïïxkïrï gï agai xi apia buaboitudada aapimï ixtumaxi ïr buaboi. Kabami abïr gugukada tudu kïïga buaboidaitai ixtumaxi ïr buaboi. Daiñi, aidï abhiadïrï xi tukamïrï kaï aapimï go bhai ïrhiaragai aatagi kïïga bhai gïn ïrhidiña aapimï. Bhai gïn ïrhidiña nïnïrakatai go naana maaxi kïkïïgadukami ix makïdï bia Diuxi gïn bïïtarï. Apia abïr buaboidaitai nïnïraka gobai tudu. Dai maiti abïr gïn dagito xi gin maitiagi ïma maaxi tïgibudagai. Maiti abïr gïn dagito xi tomarhi ïmo ixtumaxi gïn popoidagi gïn bhai ïrhiaraga tudu ix makïdï bhïiyi aapimï xudu tukamidïrï buaboitu aapimï. Daiñi, ix makïdï buaboitu aapimï ïr go galbaaxi bhai ïrhiaragai aatagi ix makïdï gï aiturhi bïïxi go gaa oidigi daama óídakami. Dai Diuxi gin maa sïïrhikami saidi aipakoga aagaiña aanï go galbaaxi bhai ïrhiaragai aatagi ïpï.

Kolosenses 1:6

Dai go bhai ïrhiaragai aatagi ix makïdï kaï aapimï ka bïïxi aipakoga oidigi daama aijimi. Dai bïïxi aipakoga xako ajïi go bhai ïrhiaragai aatagi ïpï jaa óídakami buaboitudaiña ïpïan dukai aapimï. Dai go aatagi soikïi óídakami aipakoga sai ïma dukai óídakana ixdukai bhai ïrhidi Diuxi ïpï. Ïpïan dukai gïn soi aapimï ïpï aidïxi kaï aapimï dai buaboitu. Aidï tudu máí aapimï xïï kïï tuiga Diuxi gïn bïïtarï.

Kolosenses 2:2

Kabami ipïrhidi aanï tudu sai aapimï ïmadï bïïxkatai ïgai kïïga abïnakian taadakagi dai sai kïïga gïn urabakagi gïn oigïdaitai aipakoga. Kabami ipïrhidi aanï sai biakana aapimï ïmo ixtumaxi kïïga namïakami. Ipïrhidi aanï sai gïn ibhïxtakan taadakagi aapimï kïïga maatïkatai aapimï Suxi Kristo tudu. Daiñi, go óídakami ïïki mai maatïkatadai sai oidaka agai ïmo kïïgakïrï bubiadami ix makïdï odami ïrana oidaka agai. Diuxi mai maaxiturhi ïgai kaxkïdï. Dïï gia ipïrhidi aanï sai aapimï gia kïïga maatïkana.

2 Tesalonicenses 1:10

Gobai ïr gïgïbidaradï ix makïdï Suxi maakimu go ix makïdï mai buaboitudai dibiakai ïgai. Dai amaxi bïïxi go buaboitudadami xadutulda ñokadamu Suxi bïïtarï. Dai aapimï ami darakamu dai xadutulda ñokadamu ïgai bïïtarï ïpï. Aapimï kïïga buaboitu gïr aatagi di.

2 Tesalonicenses 2:7

Xibi go soimaaxi buadami ïgai ïxtotai aatabuayi dai abïnakidimi odami xibi sai bui surhigïiña Diuxi. Dïï gia xïïxkadï maigobai imiagi ix makïdï sobhikïi

1 Tomoteo 3:9

Gï agai tudu xi kïï maatïkagi ïgai sai kïïga buañixikami dukai oidaga Diuxi buitapi kïïga oiditai go buaboidaragai ix makïdï gïr tïtïgidi Diuxi.

Hebreos 1:3

Diuxi Maradï kïïga ïmadugan tuiga Diuxi ïmadï dai maatïkatai aatïmï Diuxi Maradï podukai máí aatïmï xïï gïïdu dai xïï xigiamaaxi Diuxi. Dai ñokidï Diuxi Maradï sïïrhikïdï gubuka. Go ïïgi ñokidïkïdï gatïanïi ïgai bïïxi ixtumaxi dai nukadai ïpï sai mai xia gï buadagi. Ïgai tudu bhai dui ix dukatai gï buanadagi gïr soimaaxkamiga gïr ibhïdagïrï. Dai bhodïrï kaxi gïr buanakai jii ïgai tïbagiamu dai ami daiba sïïrhixapadïrï Diuxi ix makïdï bïïxi adaama gubuka.

Hebreos 12:2

Gin aaduñi, ix dukai ïmo mïradami bia xi kïïga gï tïgito nïidagi xako mïmïrai ïgai dai bia xi sïïrhi bhaitiakoga nïijadagi. Podukai ïpï aatïmï ïpï apia kïïga oijada ïrhiada aatïmï gïr buaboidaraga gï agai xi tïgito ajiopada aatïmï Suxi Kristo ixdukatai idui ïgai dai podukai ibuadagi aatïmï ïpï. Gïn tïgitobïrai tudu sai ïgai kïïga buaboitudaiña sai Diuxi maaki agai ïmo gïdukami bhai ïrhiaragai dai kaxkïdï gï kabakatu ïgai kuruxiana nagiïkatai. Kïïga maatïkatadai ïgai sai go kuruxi ïr ïmo gïgïbidaragai soimaaxi ibuadami bïïtarï tudu. Dïï bïïxkïrï mai buamï ïrhidi ïgai tomaxi xaïraraga xi óídakami podukai ïmo soimaaxi buadami dukai gïgïbituldagi xixakai kuruxiana. Dai xibi ka bhïiyi ïgai ïmo gïdukami xadutudaragai sïïrhixapadïrï daibakai ïgai Diuxi amïka xakoga dakatai gatïanïi Diuxi. Podukai go bïïxi adama gatïanïdami bii Suxi tudu.

Hebreos 7:7

Dai kïïga gï maatï sai xorai gamaakadagi ïmo bhai ïrhiaragai Diuxi amadïrï bamioma namïga xi bhai ix makïdï bhïiyagi go bhai ïrhiaragai. Maatiga maaxi gobai. Kaxkïdï gï maatï sai bamioma ïr ïmo namïakamikatadai go Melkisedek xi bhai go Abraam.

Hebreos 8:1

Kïïga gï maatï tudu gobaikïdï ix makïdï oja aanï tami ukami sai aatïmï gïr bïïtarï Suxi Kristo ïr go bhaitï kïakami dadaxdadami. Dai gï maatï ïpï sai bamioma namïga ïgai xi bhai bïïxi go ïïkidadï bhaitï gukakamigadï dadaxdadami. Ka daiba ïgai sïïrhixapadïrï xakoga dakatai gatïanïi Diuxi amïï tïbagiana. Ami tudu kabami xadutudikami bii Suxi.

1 Pedro 1:12

Go ñiñokituldiadamigadï Diuxi kïïga máí sai mai kia bhai duña agaitadai Diuxi go kïïgakïrï bubaidaragai aidïxi kia oidakatadai ïgai. Diuxi podukai maatïturhi ïgai kaxkïdï. Dai kaxkïdï maatïkatadai ïgai saidi go ñoki ix makïdï gatïtïïgitadai ïgai ïïki ïr aapimï gïn bïïtarï ix makïdï gokiïrioma dada. Dai xibi Diuxi ka otoi Ibhïadï tïbagiañdïrï. Dai gïn otoxdi Diuxi tïtïïgiadami ñoki xorai gïn aiturhiadagi go bhai ïrhiaragai aatagi ïpï. Diuxi Ibhïadï gubukarhigadïkïdï gïn aiturhi ïgai go aatagi aagaitai go kïïgakïrï bubaidaragai tudu. Agia xigiamaaxi aatabuayi Diuxi. Asta go tïtïañikarudï Diuxi kïïga gïn tïgito nïnïidi ka daibuskïitai bïïxi ixtumaxi aagaiña go ñiñokituldiadamigadï Diuxi ïïki abhiadïrï tudu.

1 Pedro 1:20

Ka ïki abhiadïrï ka podukai gï tïgitokatadai Diuxi sai Suxi Kristo ïgaika agai dai kïïgakïrï gïn bubaida agai. Ka podukai dáítadai ïgai mai kia idunakai oidigi tudu. Dïï gia asta utudami xibiapioma dibia go Suxi karhioga ugiti agaitai oidigi. Dibia ïgai kïïgakïrï gïn bubaida agaitai tudu.

1 Pedro 1:21

Dai kïïga maatï aapimï Suxi dai kïïga maatï aapimï ix tuma idui ïgai ïpï dai kaxkïdï buaboitudai aapimï Diuxi. Buaboitudai aapimï ïgai ix makïdï duakatu go Suxi dai maa go adaama namïakami sïïrhikami tudu. Dai xibi bia aapimï ïmo kïïgadukami nïnïraragai ka buaboitudakai aapimï Diuxi.

1 Pedro 3:18

Asta Suxi Kristo soimaaxi taata kïïga ibuadatai ïgai tudu. Muu ïgai bhai buadatai gïr soimaaxkamiga bïïtarï. Dai podukai bhai dui ïgai gïr bïïtarï bïïxkïrï bïïtarï dai ka mai biïga bamioma daxdaragai xibi. Kïïga buañixikami ïgai tudu dai muu ïgai aatïmï soimaaxi ibuadami gïr bïïtarï sai kïï biïna aatïmï Diuxi ïmadï. Gï muatu tukugadï tudu dïï gia gï duakaturhi ïpamu Ibhïadï.

1 Pedro 3:22

Dai xibi Suxi Kristo bia ïmo gïdukami sïïrhikami sïïrhixapadïrï dakatai ïgai Diuxi amïka tïbagiana. Dai ami gatïanïi ïgai bïïxi go tïtïañikarudï Diuxi dai bïïxi go gubukadagai bipiakami ix makïdï ami tïbagiana daraka.

1 Juan 1:2

Ïgai tudu gïr maakai go utudui oidakaragai bïïxkïrï bïïtarï. Biatu ïgai tukugai dai gï maaxitu gïr buitapi tami oidigi daama. Kïïga nïidi aatïmï tudu dai kaxkïdï gïn aagidimi aatïmï xibi sai ïgai duduakatudai odami iibhïadï sai mai kona ïgai tomarhi ïmo imidagai. Ïmadï dakatadai ïgai Diuxi gïr oga ïïki abhiadïrï dai xibiapioma dibia ïgai tami idi oidigi daama gïr bïïtarï.

1 Juan 3:5

Dai kïïga maatï aapimï sai Suxi Kristo mai soimaaxi ibuayi tomarhi ïmo imidagai. Dai bhaiyoma dibia ïgai tami oidigi daama buanada agaitai gïr soimaaxkamiga.

1 Juan 3:8

Dïï gia odami ix makïdï oijadagi go soimaaxkami gobai itïiya ïrhidi sai urabaka ïgai go diabora. Go diabora apia soimaaxi ibuadana aidï abhiadïrï xi kïkiba oidigi tudu. Apia kia soimaaxi ibuayi xibi ïpï. Dïï gia Diuxi Maradï dibia tami oidigi daama dai xia dodai ïgai aaduindadï go diabora. Gobai bïïtarï dibia ïgai tudu.

Apokalipsis 17:5

Dai kobadïrï biakatadai ïmo ojai ix makïdï ikaiti, Aanï ïr dïïdï bïïxi kïkïïlmïrhiakami oki dai aanïañdïrï bubuaka bïïxi galnaaxi buirudagai ix makïdï oidaga oidigi daama, ikaiti ojai go oki kobadïrï. Go ojai ïr tïtiaradï go oki dïï odami mai maatïkana ix tïiya ïrhidi.

Apokalipsis 17:7

Daidi go Diuxi tïañikarudï pobai in tïtïdai, —¿Tuipïxi mai tïtïgai aapi ixtumaxi gï tïgitoagi nïiditai gobai? Daiñi, odami mai maatï ix tïiya ïrhidi gobai ix makïdï nïidi aapi. Mai maatï ïgai ix tuma bïïtarï go oki tudu ix makïdï daama daitugai go gïï kïixi kubarakami momokami dai biakami bhaibuxtama aagadï. Dïï gia xibi gï aagidamu aanï ix tuma bïïtarï gobai— in tïtïdai.

Apokalipsis 7:9

Dai bhodïrï tïï aanï sïïrhikïdï mui naana maaxi odami bïïxi aipakoga oidigi daamaiñdïrï óídakami. Ami gukatadai ïgai go gïï daikarui buidïrï xako sonoana kïïka go Arhi Kañiru tïgidukïdï. Mai bhaigakatadai tomarhi ïmadutai xi ïkaldagi go odami mos ïï muidukatai ïgai. Gukatadai odami bïïxi gïgïrï kiikiañdïrï óídakami tudu dai bïïxi go naana maaxi ñokadami saagidañdïrï dai gïn aadati ïgai yukuxi totoakami dai dagï guka ïgai soubarhi aagadï.