1 Pedro 4:13 - Northern Tepehuan Bible

¹³ Bhai gïn ïrhiadabïrai bhaiyoma. Gobai ix makïdï taatamaimi aapimï ïr ïmo urabaragai Suxi Kristo ïmadï kaxkïdï. Ïgai podukai soimaaxi taata ïpï tudu. Dai gobai itïiya ïrhidi sai gia kabami bhai gïn ïrhiadamu aapimï xïxkadï dibiagi ïgai ïpamu xïïxkadï gï maaxitudagi xïï xigiamaaxi ïgai dai xïï kabami ïr gubuakami ïpï.

Tepehuan Northern: Diuusi ñiooquidʌ utuducami oodamicʌdʌ

¹³ Baiyoma avʌr baigʌnʌliada mʌsiʌʌscadʌ soimaa taatamadagi. Aapimʌ soimaa taatamai ʌpan duucai Suusi Cristo cascʌdʌ. Dai poduucai baigʌnʌliadamu aapimʌ ʌʌpʌ siʌʌscadʌ diviagi Suusi Cristo dai vʌʌscatai siaa duutuda agai.

1 Pedro 4:13 ပူးပေါင်းရင်းမြစ်များ

Mataibo 16:27

—Gï agai sai maatïkagi aapimï tudu sai imimu aanï tami oidigi daamaiñdïrï dïï gia ayimu ixtuigako dibiamu aanï ïpamu. Aanï ix makïdï ïr otosadï Diuxi dai ïmo kïïrhi busai tudu. Dibiamu aanï gubukarhigadïkïdï gin Oga dai gin oijadamu tïtïañikarudï Diuxi. Dai dibiakai maakimu aanï bïïxi óídakami ixtumaxi ajïakagi ïgai nïiditai aanï ixtumaxi idui ïgai tami oidigi daama. Ïïmoko maakimu aanï bhai ïrhiaragai dai jaa maakimu aanï gïgïbidaragai.

Mataibo 25:21

Daidi amudï potïtïdai, —Kïï idui aapi gin pioñiga— itïtïdai. —Kïï tuiga aapi dai kïï sïïrhi aatadui aapi— itïtïdai. —Kïï idui aapi go chïkikïdï ix makïdï gï nukaturhi aanï, kaxkïdï xibi gï maakimu aanï sïïrhikami sai gïïpi bamioma gatïanïdana aapi. Gin urabañi tudu gin bhai ïrhiaragïrï— itïtïdai.

Mataibo 25:23

Daidi amudï potïtïdai, —Kïï idui aapi gin pioñiga— itïtïdai. —Kïï tuiga aapi dai kïï sïïrhi aatadui aapi— itïtïdai. —Kïï idui aapi go chïkikïdï ix makïdï gï nukaturhi aanï dai kaxkïdï xibi gï maakimu aanï sïïrhikami sai gïïpi bamioma gatïanïdagi aapi. Gin urabañi gin bhai ïrhiaragïrï tudu— itïtïdai.

Mataibo 25:31

Dai oi Suxi aatagidï daidi ikaiti, —Kïïga ïr buaboi sai imimu aanï tami oidigi daamaiñdïrï, aanï ix makïdï ïr go otosadï Diuxi ix makïdï ïmo kïïrhi busai. Dïï gia gokiïrï ïpamu dibiamu aanï bïïxi gin tïtïañikaruga ïmadï gatïanïda iñagaitai ïmo gïï Rey dukai tami oidigi daama.

Mataibo 25:34

Dai bhodïrï aanï ix makïdï ïr go gïï Rey aagidamu ïmo ñoki go buaboitudadami gin sïïrhixapadïrï darakatai ïgai dai potïdamu aanï, —Gimibïrai aapimï ix makïdï Diuxi gin Oga ka maa ïmo gïdukami bhai ïrhiaragai. Aidï abhiadïrï xi mai kia kïkibatadai oidigi Diuxi ka bhai buayitadai ixdukatai gïn tïanïdagi tudu dai gobai ïr gïn bhai ïrhiaraga. Dai xibi ka ayi ix bhïiyagi aapimï gïn bhai ïrhiaraga urabakatai aapimï Diuxi aaduñdï ix makïdï gatïanïi ïgai.

Mataibo 5:12

Bhaiga bïnïrhiada xïïxkadï po gïn buidadagi ïgai tudu. Kïïga maatï aapimï sai bia aapimï ïmo namïakami maitïki tïbagiana kaxkïdï. Daiñi, xïxkadï soi gïn buidadagi jaa gin urabakatai aapimï aidï ïpïandukami aapimï go ñiñokituldiadamigadï Diuxi ix makïdï óídakatadai ïïki. Kïïga maatï aapimï sai podukai buididiña óídakami ïïki go ñiñokituldiadamigadï Diuxi ïpï tudu— itïtïdai.

Markos 8:38

Xibi óídakami arhiïxi ïr soimaaxi buadami dai adaimïi ïgai jaa ix makïdï didiuxi aagai ïgai. Daiñi, aanï ïr Diuxi otosadï ix makïdï aagai Diuxi ïïki dai ayimu ixtuigako dibiamu aanï tïbagiañdïrï ïmadï Diuxi tïtïañikarudï dai Diuxi gubukadagakïdï. Aanï aagai sai tomax tuma oidakami xibi ix makïdï xaïradagi aanïkïdï dai gin ñokikïdï aanï ïpï xaïrogidamu ïgaikïdï dibiakai aanï— itïtïdai Suxi.

Lukas 17:30

Dai pomaaxkamu ïpï xïïxkadï dibiagi aanï. Aidïpïrï maaxitudamu Diuxi xorai aanï dai ïr otosadï Diuxi dai ïmo kïïrhi busai. Aidï gia bïïxi óídakami gin nïijadamu xorai aanï—.

Hechos 16:25

Ami tudu darajatadai go Pabora ïmadï Silas daidi ïraan tukarï gaatagataidai Diuxi ïmadï dai ganïyitadai oigïda ñokaitai Diuxi bïïtarï dai go gaa maamaixapikïdï mos kaïkatadai.

Hechos 5:41

Daidi go ojotoxikami bubuaka abhiadïrï xako darajatadai go bhaitï gukakami dai kïï gïn bhai gïn ïrhiatugai ïgai soimaaxi taatakai Suxi bïïtarï.

Romanos 5:3

Dai xudu gïr aiyagi soi ïrhiaragai aatïmï mos bhai gïr ïrhidiña. Maatï aatïmï sai taatakai soi ïrhiaragai bamioma mamaatïrïi aatïmï xi dukatai mai dagitoagi xi gïr maitiagi soi ïrhiaragai.

Romanos 8:17

Maamaradï aatïmï Diuxi tudu. Kaxkïdï xibi bïïxi go bhai ïrhiaraga ix makïdï Diuxi bhai darasakami bia Suxi Kristo bïïtarï ïr aatïmï gïr bïïtarï ïpï. Dïï gia gï agai xi soimaaxi taatagi aatïmï ïpïan dukai ix dukatai taata Suxi bai podukai gïr aiyagi ïmo xadutudaragai ïgai ïmadï ïpï.

Romanos 8:18

Kïïga maatï aanï sai bïïxi go soi ïrhiaragai ix makïdï taataimi aatïmï xibi maiti ïr ixtumaxi bhaitoma maatïkatai sai Diuxi gïr maaki agai ïmo bhai ïrhiaraga ix makïdï mai bhaiga xi aiyagi gïr tïgibudagai xi maatiagi.

2 Korintios 1:5

Daiñi, toma xïï kabami soimaaxi taata aatïmï oiditai Suxi Kristo, pokaxi gïr mamaakai Diuxi gubukarhigai dai bhai ïrhiaragai ïpï. Ka bïïna daraka aatïmï Suxi Kristo kaxkïdï. Dai kaxkïdï maiti gïr maitiña go soi ïrhiaragai xïïxkadï soimaaxi taatagi aatïmï.

2 Korintios 1:7

Dai kaxkïdï kïïga buaboitudai aatïmï sai xïïxkadï soi gïn ïrhiadagi aapimï soimaaxi taatamaitai gïr ïpïan dukai sai aidï taatamu aapimï go bhai ïrhiaragai gïr ïpïan dukai ïpï gïr soikïitai Diuxi bïïxkatai aatïmï.

2 Korintios 4:10

Daiñi, oijadami aatïmï Suxi Kristo dai kïïga maatï aatïmï sai go óídakami mua go Suxi. Dai aatïmï bhai aagai ix apia oijadagi go Suxi tomaxi bïïx tasai gïr koda ïrhiadagi óídakami oiditai aatïmï ïgai. Podukai óídaga aatïmï tami oidigi daama tudu gubukadadïkïdï Suxi Kristo. Dai toma xako ajiopadagi aatïmï kïïga nïidiña go óídakami saidi ïr duakakami go Suxi dai sai aatïmï bïïna daraka ïgai. ¿Ïma dukai dukatai óídakana aatïmï gubukadadïkïdï Suxi Kristo ix maiti ïr duakakami ïgai tudu?

2 Korintios 4:17

Go soi ïrhiaragai ix makïdï taatamai aatïmï xibi mai xii kabami bïïtï tudu daidi otoma daibuskïi. Dai gokiïrï gïr buapidamu gobai go bhai ïrhiaragai ix makïdï bïïxi adaama bhai ïrhiaraga dai bïïxkïrï bïïtarïka agai gobai.

Filipenses 3:10

Gin aaduñi, kïïga biaka in ïrhidi bamioma urabaragai Suxi Kristo ïmadï. Taata in ïrhidi sai kïïga gubuakami dukai gaatabuadagi ïgai gin ïmadï ïpïan dukai ix dukatai gubuakami aatadui Diuxi go Suxi ïmadï aidïxi duakaturhi ïgai. Biaka in ïrhidi urabaragai Suxi ïmadï soimaaxi taatakai aanï ïpïan dukai xi taata ïgai. Ïpïan tuigaka in ïrhidi aanï Suxi Kristo asta xako ukami bhai gin dukagi ix mukiagi ïpïan dukai ïgai.

Kolosenses 1:24

Gin aaduñi Diuxi amadïrï, aanï soimaaxi taatamai xibi ibuadatai ïmo aaduindagai ix makïdï ïr soiñi gïn bïïtarï. Dïï gia tomaxi soimaaxi taatakagi aanï bïïxkïrï bhai gin ïrhidiña aanï maatïkatai sai aapimï gïn bïïtarï soimaaxi taataimi aanï. Daiñi, Suxi Kristo soimaaxi taata go buaboitudadami bïïtarï baasïkioma dai xibi aanï in ajïga xi soimaaxi taatagi go buaboitudadami bïïtarï ïpï ïpïan dukai ïgai.

2 Timoteo 2:12

Xibi gïr kabakadai aatïmï dai maiti gïr daadagitoi ix gïr maitiagi go soi ïrhiaragai xïïxkadï soimaaxi taatamadagi aatïmï. Dai kaxkïdï gï maatï sai gokiïrï gatïanïdamu aatïmï Suxi Kristo ïmadï ïpï dibiakai ïgai. Dïï gia ix potïiyagi ïmoko xibi sai mai maatï Suxi Kristo aidï gia dibiakai Suxi Kristo ïgai po tïimu ïpï sai maiti ïr aaduñdï ix makïdï potïi sai mai maatï Suxi Kristo.

1 Pedro 1:13

Aapimï gïn bïïtarï tudu go kïïgakïrï bubaidaragai ix makïdï aagaiña go ñiñokituldiadamigadï Diuxi ïïki. Dai kaxkïdï abïr bhai gïn duka dai kïï sïïrhi tïtïgitoda. Kïïga buaboitudaitai abïr nïnïraka go bhai ïrhiaragai ix makïdï gïn maakimu Diuxi xïïxkadï dibiagi Suxi Kristo ïpamu tudu. Aidï bïïxi óídakami nïijadamu go Suxi dibiakai ïgai dai bïïxi óídakami maatïkamu xorai ïgai.

1 Pedro 2:21

Kïïgakïrï gïn bubaitu Diuxi mïsai kïïga ibuada aapimï tudu. Dai ïgai ipïrhidi sai apia kïïga ibuada aapimï tomaxi soimaaxi gïn taataturhiadagi jaa kïïga ibuadatai aapimï. Suxi Kristo soimaaxi taata kïïga ibuadatai ïgai tudu dai gï agai sai kïïga gïn tïgito nïidagi ixdukatai ibuadana ïgai dai podukai ibuadagi aapimï ïpï.

1 Pedro 5:1

Xibi ojamu aanï ïmo ñoki go bhaitï gukakamigadï go buaboitudadami bïïtarï. Gin kaïkabïrai, aanï ïpï ïr ïmo bhaitï kïakamigadï go buaboitudadami ïpï dai nïidi aanï aidïxi soimaaxi taatamaitadai Suxi Kristo. Aanï ïpï urabamu Suxi xïïxkadï dibiagi ïgai dai gï maaxitudagi xïïxi ïr gïdukami ïgai.

1 Pedro 5:10

Kïï tuiga Diuxi gïn bïïtarï tudu dai gïn báí ïgai saidi aapimï ïpï gïn ajiagi go gïdukami xadutudaragai ix makïdï biakamu ïgai bïïxkïrï bïïtarï. Aapimï gïn aji agai go xadutudaragai gobai bïïnakatai aapimï Suxi Kristo tudu. Dïï gia gï agai sai soimaaxi taatamadagi aapimï kia dïï gia mai xii tïbïragaka agai go soimaaxi taataragai. Dai gokiïrï bhai gïn buadamu Diuxi sai maiti gïn biïgakagi tomarhi ïmo ixtumaxi gïn ibhïdagïrï. Kïïga gïn gupurtuda agai ïgai aidï gïn ibhïdagïrï saidi mai tipukagi ixtukïdï dagitoagi aapimï gïn buaboidaraga. Po duñimu Diuxi kïï tuigakatai ïgai gïn bïïtarï tudu.

Udaxi 1:24

Gïn aaduñi, mosïka arhi ïmaduga Diuxi dai ïgai bhai dui go kïïgakïrï bubaidaragai gïr bïïtarï Suxi Kristokïdï ix makïdï ïr Gïr Nukadakami. Kïïga ixtutuidikïi Diuxi ix gïn nukadakagi dai gïn soikïdagi sai mai dagitoagi aapimï gïn buaboidaraga sai podukai mai gïpiïrï surhigiagi aapimï. Dai kïï bhaiga ïgai sai bhai gïn buadagi saidi kïïga bhai ïrhiarakïdï gukakagi aapimï ami xako kabami totoarïi buitapi Diuxi. Kabami totoarïi Diuxi tudu mos ïï kïïga xigiamaaxkatai ïgai dai mos ïï kabami gubuakatai ïgai ïpï. Kïïga ixtutuidikïi ïgai ix bhai gïn duñagi sai mai biakagi aapimï toma lïïchi soimaaxkami gïn abhana dai bhodïrï baan gïn tutusamu ïgai ami buitapi ïgai ka kïïga bhai gïn dunakai ïgai.

Apokalipsis 1:7

Kïïga gï tïgito kaïka idi ñoki, daiñi, ayimu ixtuigako dibiamu Suxi Kristo iikomai saagida imïitai dai bïïxi óídakami nïijadamu. Asta go odami ix makïdï sïi kuruxiana xixakai bïïxi nïijadamu ïpï. Dai bïïxi oidigi daama óídakami kabami suanïdamu nïiditai. Kïïga ïr buaboi xi pobai gï duñagai gobai.

Apokalipsis 1:9

Gin aaduñi, kïï maatï aanï sai soimaaxi gïn taatamiturhiña jaa bïïna darakatai aapimï Suxi Kristo dai aanï ïpï taataiña xi soimaaxi gin taatamiturhi jaa bïïna dakatai aanï Suxi Kristo ïpï. Ïmo xïgïmï aatïmï tudu soimaaxi gïr taatamiturhitai jaa aatïmï bïïxkatai. Dïï gia ïmaduga Gïr Nukadakami dai ïgai ïr Suxi Kristo. Dai bïïna darakatai aatïmï ïgai buyiña aatïmï gubukarhigai ixtukïdï gïr kabakadagi go soi ïrhiaragai bui. Gïn aagidamu aanï ix dukatai gin daibusai ïmo imidagai tumiñoko. Ïmo arhi oidigana dajatadai aanï aidï ix makïdï go gïï sudagi ïrana kaatï. Patmos tïgidu go arhi oidigi ïgai. Ami gin maixatutadai jaa aagaitai aanï Diuxi ñokidï dai aagaitai Suxi Kristo. Ami dajatadai aanï tudu dai ïmo imidagai gin tïanïitadai Diuxi Ibhïadï dai aanï kïïga ïïgidimi bai todian dukai ïgai gubukadadïkïdï kaï aanï ix gïgïrï ño ïmoko gin gokiañdïrï. Po ïrhiadan kaiti trompeta.