1 Korintios 9:26 - Northern Tepehuan Bible

²⁶ Ïmo gïdukami abïnakidaragai gobai gin bïïtarï tudu maatïkatai sai bïïxkïrï bïïtarï kabaka agai gin maitïkiga. Kaxkïdï kïï sïïrhi dukai oidaga aanï ibuadatai mosïkaxi ixtumaxi bhai ïrhidi Diuxi. Ïpïandukai oidaga aanï ïmo mïradami ix makïdï sïïrhi mïrhikarui kugadïamakoga mïraiña, mai kuga mïraitai dukai tudu. Dai ïpïan dukai ibuayi aanï ïmo kokoadami ïpï ix makïdï kïï sïïrhi surhigai kapixaradï dai mai xu ix mos aipako gakapixaiña ïgai ïbïltapi dukai.

1 Korintios 9:26 ပူးပေါင်းရင်းမြစ်များ

Mataibo 11:12

—Daiñi, aidï abhiadïrï xi gï aga gamamaakaitai go Juan aatagi aidï abhiadïrï ka muidukana go óídakami ix makïdï bhai ïrhiarakïdï ïïgidiña Diuxi. Gïn daadagitoiña ïgai sai gïn tïanïdagi Diuxi tudu. Dai mai bhaigakana jaa xi sobhidagi sai Diuxi tïanïdagi ïgai. Dïï gia oidaga oomarhigami ix makïdï gubuakïdï gatïanïda ïrhidi dai mai dagito ïrhidi ïgai xi Diuxi tïanïdagi óídakami. Pomaaxkana aidï abhiadïrï xi dibia go Juan tudu— itïtïdai.

Lukas 13:24

—Go kïïgakïrï bubaidaragai ïr ïmo kuuparagai arhidukami gajiakoga duu xako gï agai xi bapakiagi odami ïmo kiiyïrï dai go tuidakami go kii ïr Diuxi. Kabami abïr gïn aaga dai bapaki ami xako mai gïdu gajiakoga tudu. Kaxkïdï tudu ayimu ixtuigako tuidakami go kii kuupa agai go kuuparagai dai aidï ka mai bhaigakamu óídakami ix bapakiagi. Muidutai aapimï kidigamadïrï bimu aidï dai gaagamu ixdukatai bapakiagi dai ka mai ixtutuidimu. Aidï gataañimu aapimï baakigai dai potïdamu aapimï Diuxi, —Aapi Tïanïdami, kupiokañi go kuuparagai xi bapakia aatïmï— itïimu aapimï aidï. Dïï gia Diuxi pobai gïn tïdamu, —Maita an maatï xajadïrï óídakami aapimï— itïimu ïgai.

1 Korintios 14:9

Dai pomaaxi aapimï gïn aatagikïdï ïpï. Gï agai ix aagadagi aapimï ñoki ix makïdï maatï kaïkagi go gaa. ¿Ïma dukai dukatai maatï kaïkana ïgai ix kaitiadagi aapimï? Ix aagagi aapimï ñoki ix makïdï mai maatï kaï go gaa aidï gia mos ïïgikïdï ñokadan buayi aapimï.

2 Korintios 5:1

Kïïga maatï aatïmï tudu sai gïr tukuga ix makïdï bia aatïmï tami oidigi daama mai tïbïpi kabaka agai. Idi tukugïrï mosïkaxi chïki tasai óídaka ragai ïmo urhiñaragai dukai. Dai xïxkadï ugitiagi idi gïr tukuga aidï gia buimu aatïmï ïmai tukugai tïbagiañdïrï ix makïdï Diuxi idui dai mai xu ix makïdï odami idui. Dai gïr tukuga utudui ix makïdï bhïimu aatïmï gobai gia mai ugiti agai tomarhi ïmo imidagai.

2 Korintios 5:8

Daiñi, tïtïitoi aatïmï Gïr Nukadakami, ïmadï óídaka rïrhiditai tïbagiana dai kaxkïdï mai buamï rïrhiditai óídaga aatïmï tami oidigi daama. Asta ka bhai duka aatïmï ix dagitoagi gïr tukuga ipïrhiditai ix ïmadï darakagi Suxi Kristo tïbagiana tudu.

Efesios 6:12

Daiñi, gïr buidïrï bïïtïkami maiti ïr odami. Aatïmï kokodai jaa ix makïdï ïr diabora tïtïañikarudï soimaaxi iibhïdagami dai ix makïdï mai nïidi aatïmï. Ïgai ïr gupudagai bipiakami dai tïtïanïdami tami oidigi daama dai maigobai tïbagiana ïpï. Gupuka ïgai dai tïanïi ïgai tanai oidigi daama óídakami. Kaxkïdï tukamugan dukai kaatï oidigi xibi gatïanïitai ïgai.

Filipenses 1:21

Gïn aagidamu aanï ix dukatai nïidi aanï gin oidakaraga ïmadï Suxi Kristo. Daiñi, kïïga bïïnaka oidaga aanï ïmadï ïgai dai ïgai bïïtarï oidaga aanï. Kaxkïdï xi duñada apia bamioma oidakagi aanï tami oidigi daama gobai itïiya ïrhidi sai apia oijadamu aanï Suxi Kristo aaduindadï. Dai gobai gïïpi ibuayi soiñi. Dïï gia xi mukiagi aanï gobai bamioma kïïgadu in bïïtarï. Ix mukiagi aanï aidï gia Suxi Kristo ïmadï dakamu aanï di. Ka mai tïtïgai aanï ix makïdï bamioma gï agai.

Kolosenses 1:29

Dai kaxkïdï ïpï tomaxi xijiakan taadakagi bïïxkïrï kabami gin aajagïi aanï dai aatabuayi gin maakaitai Suxi Kristo gubukarhigai.

2 Timoteo 1:12

Dai xibi maixapi aanï ibuadatai go aaduindagai ix makïdï gin maa ïgai dïï mai xaïrai aanï gokïdï. Kaxkïdï tudu kïïga maatï aanï ix tuiga Suxi Kristo ix makïdï buaboitudai aanï dai gobai ïr ïmo abïnakidaragai gin ibhïdaga bïïtarï. Kïïga buaboitudai aanï tudu dai asta nukaturhi aanï gin ibhïdaga. Kaxkïdï tudu kïï maatï aanï sai ïgai bia gubukarhigai ix gin nukadakagi asta xïïxkadï dibiagi ïgai ïpamu.

2 Timoteo 2:5

Dai gï agai xi ïpïan buadagi aapi xïïxkadï tïtïïbiïrï mïradagi ïmoko biakatai sayudï. Ïgai bia xi mïradagi ix dukai darai go ibuadami go tïtïïbigai ¿aba? Ïmadukai xadïrï maitïna ïgai ixtumaxi.

Hebreos 12:1

Gin aaduñi Diuxi amadïrï, kaxi gïn aagidi aanï sai muidukana go óídakami ix makïdï kïïga buaboitudai Diuxi ïïki abhiadïrï. Gïr xikorhi gukakan duu ïgai gïr aagiditai sai mai ugutai buaboitudada aatïmï Diuxi tudu. Kaxkïdï ïpï tï tai aatïmï kabami gïr aga dai kïïga buaboitudaitai óídaka ïpï. Tï kabami gïr aga ïpïan dukai ïmo mïmïradami ix makïdï maigobai dadasai bïïxi ixtumaxi sobhikïdagi ix mïradagi ïgai. Tï maigobai dasa bïïxi ixtumaxi gïr sobhikïdagi saidi kïïga buaboidaitai óídakagi aatïmï tudu. Tï gajiadïrï bia bïïxi go soimaaxkami ix makïdï dudatai gïr sobhikïi. Gï agai tudu xi mai ojodatai oijadagi aatïmï go oidakaragai ix makïdï gïr maa Diuxi.

Hebreos 4:1

Diuxi aagidi go Israelitas sai maaki agai ïmo ibhïxtaragai ami go Kanaanïrï dai gobai ïr ïmo bhai ïrhiaragai aatagitadai go Israelitas bïïtarï. Dïï mai baapa ïgai ami. Dai aatïmï ïpï gïr aagidi Diuxi sai gïr maakai ïgai ïmo ibhïxtaragai ïpï dai kia bia aatïmï oigaragai ix bhïiyagi gobai. Gobai ïr ïmo gïdukami bhai ïrhiaragai ñoki dai kabami namïakami aatïmï gïr bïïtarï. Kaxkïdï gï agai xi kïïga gïn tïgito nïijada aapimï. Tadu mai bhïiyi ïmadutai aapimï go ibhïxtaragai ix makïdï gïr maakia ïrhidi Diuxi. Daiñi, muidutai go Israelitas po dui ïïki. Mai baapa ïgai Kanaanïrï xako bhai duitadai Diuxi ïmo ibhïxtaragai ïgai bïïtarï. Diuxi aagidi sai ka bhai duitadai ïmo ibhïxtaragai ïgai bïïtarï dai gobai ïr ïmo bhai ïrhiaragai ñokikatadai ïgai bïïtarï tudu. Dïï mai buaboida kaï ïgai kaxkïdï maiti idui soiñi go ñoki ïgai bïïtarï. Mai ïpïan dui ïgai jaa ix makïdï gia kïïga buaboida kaï go ñoki kaxkïdï.

1 Pedro 5:1

Xibi ojamu aanï ïmo ñoki go bhaitï gukakamigadï go buaboitudadami bïïtarï. Gin kaïkabïrai, aanï ïpï ïr ïmo bhaitï kïakamigadï go buaboitudadami ïpï dai nïidi aanï aidïxi soimaaxi taatamaitadai Suxi Kristo. Aanï ïpï urabamu Suxi xïïxkadï dibiagi ïgai dai gï maaxitudagi xïïxi ïr gïdukami ïgai.

2 Pedro 1:10

Maiti abïr pobuada aapimï gin aaduñi dai bhaiyoma abïr kabami gïn aaga daidi kïï bhai tutiaka ix dukai aagai idi ojai. Podukai maatiga maaxkamu sai buaboikïdï ïr ïko bubaidadï aapimï Diuxi. Ix kabami gïn aagagi dai kïï bhai tutiakagi ix dukai aagai aanï aidï gia tomarhi ïmo imidagai mai gïpiïrï surhigimu aapimï.