1 Korintios 9:25 - Northern Tepehuan Bible

²⁵ Daiñi, kïï maatï aapimï sai xorai bui kïkiba agadagi jaa ïmo tïtïïbiïrï bia ix kabami aaduintuldagi tukugadï tomaxi soi taadakagi gobai. Pobuayi tïtïïbïdami tudu gamaitia ïrhiditai ixtumaxi tomaxi maitïkidï mai tïbïpi kabaka agai. Dïï aatïmï gïr maitïki ix makïdï gïr maakimu Diuxi gia bïïxkïrï bïïtarï kabaka agai.

1 Korintios 9:25 ပူးပေါင်းရင်းမြစ်များ

1 Korintios 15:54

Xïïxkadï ka biakagi aatïmï gïr tukuga utudui aidï ka buaboi busaimu go ojai xakoga ikaiti sai, Diuxi ka maitï go mukigami bui.

Galatas 5:23

Ga aatabuadatai Diuxi Ibhïadï gïr ïrana kïïga bhai maaxkami dukai buididiña aatïmï jaa ïpï. Dai bhaigakana aatïmï xi ka mai ïïgiadagi ixtumaxi gïr tïanïdagi ïïgi gïr tïgibudaga. Bïïxi gobai ibuayi Diuxi Ibhïadï aatïmïrï xïxkadï ïïgiada aatïmï ïgai. Dai xïïxkadï ïïgiada aatïmï Diuxi Ibhiadï aidï gia ka mai tipu tomarhi ïmo sïïrhikami ix makïdï gïpiïrï gïr daitudagi.

1 Tomoteo 6:12

Bïïxi gï gubukarhigakïdï ibui kïkiba aapi ixtumaxi xia duada ïrhiada gïr buaboidaraga tudu. Daiñi, ka kïïga maaxiko aa aapi buitapi mui odami sai buaboitudai aapi Suxi Kristo dai aidïpïrï Diuxi gï báí pïsai kïïgakïrï oidakana bïïxkïrï bïïtarï. Diuxi gï urhiñdi go kïïgakïrï oidakaragai bïïxkïrï bïïtarï tudu. Kaxkïdï gï agai xi kïïgakïrï oidaka aapi sai maatï taatana aapi ix taadaga xibi go bïïxkïrï oidakaragai. Gobai ïr gï maitïki oiditai aapi gïr buaboidaraga tudu.

2 Timoteo 2:5

Dai gï agai xi ïpïan buadagi aapi xïïxkadï tïtïïbiïrï mïradagi ïmoko biakatai sayudï. Ïgai bia xi mïradagi ix dukai darai go ibuadami go tïtïïbigai ¿aba? Ïmadukai xadïrï maitïna ïgai ixtumaxi.

Tito 1:8

Gï agai bhaiyoma xi kïïga miadïgidarakagi ïgai xïïxkadï daibiadagi odami. Dai gï agai xi ojoidagi ïgai ibuadagi ixtumaxi ïr kïïga. Gï agai xi maatïkagi ïgai ix tuma tïgibudagai ïgai daidi ïr soiñi dai ïgai bhïiyagi. Gï agai xi ïr sïïrhi ibuadamikagi. Gï agai xi bïïxi aïkatïrï ipïrhiada ïgai xi bhai ïrhiatuda Diuxi dai gï agai ïpï xi gï kabakadagi ixtumaxi maiti ïr soiñi bïïtarï.

Tito 2:2

Aagidañi ix makïdï ïr kïkïïrhiodami sai kïï gïn tïgito nïijadagi ïgai sai bïïxi ixtuma buadagi kïï bhai maaxkagi. Sai bhïna kïïga tïgibudagai dai kïïga óídakana sai jaa odami xadutuadana. Aagidañi ïpï sai tomax tumaxi daibuñagi sai apia buaboitudada ïgai dai sai apia oigïdaiña ïgai jaa dai sai gïn kabakadana ïgai soi ïrhiaragai buidïrï.

Hebreos 12:28

Gin aaduñi, gobai ix makïdï bïïxkïrï bïïtarï kabaka agai ïr go utudui oidakaragai ix makïdï gïr maa Diuxi. Ami gïr utudui oidakaragïrï gïr nukadai Diuxi dai gïr oigïdaitai gïr tïanïi ïgai. Dai bïï mai ugiti agai gobai tomarhi ïmo imidagai. Kaxkïdï gï agai sai kïïga bhai gïr ïrhiada aatïmï Diuxi ïmadï sai podukai kïïga ñokada aatïmï ïgai bïïtarï dai kïïga xadutuadagi ixdukai ïgai ipïrhidi. Aa gia gï agai xi kïïga xadutuada aatïmï mos ïxi namïakatai ïgai.

Hebreos 12:4

Gïn tïgitobïrai ïpï sai Suxi Kristo gï muatu buidïrï kïkibakai ïgai go soimaaxkami. Go soimaaxkami ix makïdï oidaga ïr gïr buidïrï kaatïkami duu tudu. Dai tomaxi buidïrï gugukimi aapimï go soimaaxkami bïïxkïrï mai kia taata aapimï go mukigami buidïrï gugukatai gobai.

Santiago 1:12

Gin aaduñi, xïxkadï gïr ajiagi ïmo soi ïrhiaragai dai ix kïïga gïr kabakadagi aatïmï dai apia oijadagi gïr buaboidaraga aidï gia bia aatïmï ixtukïdï bhai gïr ïrhiadagi. Gï agai tudu sai bhai gïr ïrhiadagi aatïmï xïïxkadï gïr kabakadagi aatïmï dai apia oijadagi gïr buaboidaraga tomaxi xijiakagi gïr oidakaraga. Gï agai sai bhai gïr ïrhiada aatïmï maatïkatai Diuxi gïr maakimu gïr maitïki ix makïdï ïr go kïïgakïrï oidakaragai bïïxkïrï bïïtarï. Kaxi gïr aagidi Diuxi sai maakimu ïgai go maitïki go odami ix makïdï oigïdai Diuxi tudu.

1 Pedro 1:4

Xibi nïnïraka aatïmï go naana maaxi bhai ïrhiaragai ix makïdï bia Diuxi gïr bïïtarï tudu. Diuxi ka bhai tua naana maaxi bhai ïrhiaragai gïn bïïtarï tïbagiana kaxkïdï. Dai ix makïdï bhai tuajidi ïgai gïn bïïtarï kïïga buañixi dai mai ugiti agai tomarhi ïmo imidagai.

1 Pedro 5:4

Ix podukai nukadakagi aapimï gïn aaduñi Diuxi amadïrï aidï gia Diuxi gïn maakimu ïmo maitïki ix makïdï bïïxkïrï bïïtarï bhai ïrhiaragaka agai. Gïn maakimu ïgai gobai xïxkadï dibiagi Suxi Kristo ïpamu ix makïdï adama ïr gïr Paxturuga tudu.

2 Pedro 1:6

Dai bhodïrï gï agai sai maatiagi aapimï ixdukatai gïn nukadakagi ïpï sai maiti ibuada aapimï soimaaxkami ix makïdï gïn tanïdagi ïïgi gïn tïgibudaga. Dai bhodïrï gï agai sai apia buaboitudada aapimï ïpï xïïxkadï soimaaxi taatamadagi aapimï. Dai gï agai ïpï sai ïïgiada aapimï Diuxi bïïxi aïkatïrï ixtumaxi ibuadagi aapimï.

Apokalipsis 2:10

Daiñi, ka miadaimi xi soimaaxi taatagi aapimï. Aidï go diabora gatïañi agai gïn maamaixaragai. Soimaaxi taatamu aapimï chïki tasai tudu nïidana sa bhai ïr buaboi xi gin buaboitudai aapimï. Dïï maiti abïr duduadikuda dai bhaiyoma abïr apia buaboitudada aapimï tomaxi gïn kodagi go jaa dai aanï gïn maakimu ïmo gïdukami maitïki. Gïn maakimu aanï xi kïïgakïrï óídakana aapimï bïïxkïrï bïïtarï tudu.

Apokalipsis 3:11

Otoma dibiamu aanï tudu. Kaxkïdï abïr oijada go buaboikïdï buaboidaragai ix makïdï ka bia aapimï. Dai maiti abïr gïn dagito xi gïn popoidagi jaa go maitïki ix makïdï bhai daraka gïn bïïtarï.

Apokalipsis 4:10

Daidi go ïmokobhai dan maakoba bhaitï gukakami tootonakïdï gukaiña buidïrï ïgai ix makïdï tomaxtuigako oidaga. Dai ami buidïrï darasaiña bïïxkatai ïgai kororonadï xadutudaitai daidi ikaitiña,

Apokalipsis 4:4

Dai ami go gïï daikarui xikorhi gukatadai ïpï jaa daraikarui. Ïmokobhai dan maakoadu ïgai dai daama daraka go kaaki bhaitï gukakami totoaja yukusukami. Dai bïïxkatai gïn aadaka korona oro duñixikami.