1 Korintios 3:8 - Northern Tepehuan Bible

⁸ Aanï ix makïdï ïr gaïsadami dukai dai ïgai ix makïdï ïr gabaagadami dukai ïpï aagaitai Diuxi ñokidï mos ïr pipioñigadï Diuxi dai ïmapi gaatabuayi aatïmï. Dai kïïga gï maatï sai Diuxi maakimu bïïxi pipioñigadï maitïkidï xïïxi ajïga ïïmoko aaduindadï bïïtarï.

Tepehuan Northern: Diuusi ñiooquidʌ utuducami oodamicʌdʌ

⁸ Dai vʌʌsi Diuusi pipiooñigadʌ ʌpan ducami dai Diuusi aa namʌquida agai gʌpipiooñiga tʌvaagiʌrʌ isʌmaadutai vaamioma cʌʌga iduñiagi aa duiñdadʌ tami oidigi daama vaamioma aa namʌquidamu ʌgai mʌʌca.

1 Korintios 3:8 ပူးပေါင်းရင်းမြစ်များ

Mataibo 16:27

—Gï agai sai maatïkagi aapimï tudu sai imimu aanï tami oidigi daamaiñdïrï dïï gia ayimu ixtuigako dibiamu aanï ïpamu. Aanï ix makïdï ïr otosadï Diuxi dai ïmo kïïrhi busai tudu. Dibiamu aanï gubukarhigadïkïdï gin Oga dai gin oijadamu tïtïañikarudï Diuxi. Dai dibiakai maakimu aanï bïïxi óídakami ixtumaxi ajïakagi ïgai nïiditai aanï ixtumaxi idui ïgai tami oidigi daama. Ïïmoko maakimu aanï bhai ïrhiaragai dai jaa maakimu aanï gïgïbidaragai.

Lukas 19:19

—Daidi go rey potïtïdai, —Kïï dui aapi. Gï maakimu aanï sïïrhikami sai tïanïda aapi taama gïgïr kiiki— itïtïdai.

Romanos 2:6

Dai Diuxi nïida agai ix dukatai óídatu odami dai iduñagai bïïxkatai ïmadï ïïgi ix dukatai gïn ajïakagi.

1 Korintios 15:58

Kaxkïdï gin susukurhi abïr mai dagitokai buaboitudada. Daidi abïr kabami gïn aaga iduñi aaduindadï Gïr Nukadakami bïïxi gïn bhai ïrhiarakïdï. Kïïga maatï aapimï tudu sai duduakamu aapimï ïpamu bïïna darakatai aapimï Gïr Nukadakami dai kaxkïdï ïpï kïï maatï aapimï sai mai mos ïïgikïdï ibuayi aapimï gïn aaduindaga.

1 Korintios 3:14

Dai ix makïdï kabakami bii aaduindadï dai mai mïi ïgai gia kïïga buimu maitïkidï.

1 Korintios 3:7

Kaxkïdï maiti gï agai tudu ix gïgïrdukïdï dukai gïr aagagi aapimï tomarhi aagaitai go ïsadami xiïpï ix makïdï ïr gabaagadami dukai. Mos aagaiña aatïmï Diuxi ñokidï kaxkïdï. Diuxi ïgai daidi ïr gïdukïdï. Ïgai tudu gïïrhidi gïn buaboidaraga ïxikami dukai.

1 Korintios 3:9

Aanï ïmadï go Apolos ïr pipioñigadï Diuxi tudu dai ïmadï aatabuayi aatïmï Diuxi dai aapimï ïr ïpïan dukami ïïxidï Diuxi. Gin aaduñi, kaxi aagai aanï sai aapimï ïr ïpïan dukami ïïxidï Diuxi dai xibi aanï aagai sai aapimï dai ïr ïpïan dukami Diuxi bakidï ïpï ix makïdï bañidimi ïgai.

1 Korintios 4:15

Daiñi, gïn oga gin dukami aanï Diuxiïrï. Aanï tudu ïgai dai gïn soi tukamïrï saidi buaboitudaiña aapimï Suxi Kristo gïn aagidakai aanï go bhai ïrhiaragai aatagi. Kaxkïdï tomaxi biakagi aapimï sïïrhikïdï mui odami xorai gïn tïïgidagi ñoki aagaitai Suxi Kristo, bïïxkïrï mos arhi ïmaduga ix makïdï ïr gïn oga dukai. Dai aanï ïr ïgai.

1 Korintios 9:7

Dukami sandadaru aaduindadïañdïrï óídaga ïpï. Xadïrï ïïgi dasana ixtukïdï oidakagi ¿aba? ¡Cho! Go gobierno ïgai dai dadasai gobai bhaiyoma dai podukai aa namïidiña aaduindadï. Dai podukai ïpï ïmo ïsïkami uba kïï bhaiga ix ugiagi ibhiadï dai podukai aaduindadïañdïrï oidakagi. Dai ïmo nukadakami kañiñiru ïpï kïïga bhaiga ix buiyagi lïïchi bibhadï ïpï ix bhiugimukagi ïgai. Dai podukai aatïmï ïpï bia oigaragai ix gïn tanïdagi soiñi aapimï gïn aagiditai go aatagi. Gobai ïr gïr aaduindaga di dai bia aatïmï oigaragai xi gïr aaduindagaiñdïrï óídakagi ïpï.

Galatas 6:4

Dai gï agai ïmoko ïïgi ix maatï nïijadagi ix bhai kïïga ibuayi. Bïïxkatai aatïmï bia ix ïjïgi ibuadagi ixtumaxi ïr kïïga tudu. Dai xorai maiti ibuadagi ixtumaxi ïr kïïga ïïgi ïr duñidï. Maiti gï agai xi ïmo gïdukïdï gï ïrhiadagi ïmoko nïiditai ixtumaxi ibuayi jaa tudu dai pokaititai sai kïïgioma ibuayi ixtumaxi ïr kïïga xi bhai jaa. Gï agai bhaiyoma xi mosïkaxi tïgito nïijada ïmoko ixtumaxi ibuayi ïïgi ïmoko dai maatïkagi sa bhai kïïgadu. Dai ix kïï ibuadagi ïmoko aidï gia biakamu ixtukïdï bhai gï ïrhiadagi nïiditai ïïgi aaduindadï.

Hebreos 6:10

Kaxkïdï tudu Diuxi bïïxkïrï sïïrhi ibuayi. Dai ïgai kïïga gï tïgitoka agai xïï kabami gaatabuadana aapimï Diuxi bïïtarï dai xïï kïïga soikïi aapimï go gaa buaboitudadami ïpï. Xibi ukami kia pomaaxi ibuayi aapimï tudu dai gobai ïr ïmo maaxidaragai sai kïïga oigïdai aapimï Diuxi. Bïïxi gobai gï tïgitokamu Diuxi tudu daidi gïn maakimu go bhai ïrhiaragai ix makïdï ïr sïïrhi gïn bïïtarï kïïga ibuadatai aapimï.

1 Pedro 5:4

Ix podukai nukadakagi aapimï gïn aaduñi Diuxi amadïrï aidï gia Diuxi gïn maakimu ïmo maitïki ix makïdï bïïxkïrï bïïtarï bhai ïrhiaragaka agai. Gïn maakimu ïgai gobai xïxkadï dibiagi Suxi Kristo ïpamu ix makïdï adama ïr gïr Paxturuga tudu.

2 Juan 1:8

Maiti abïr gïn dagito sai gïn bupuirumadagi ïgai tudu. Daiñi, kabami gïr aajagïiña aatïmï gïn soiña ïrhiditai saidi bïï sudakami bhïiyagi aapimï gïn maitïki ix makïdï gïn maaki ïrhidi Diuxi oiditai aapimï ixtumaxi ïr buaboi. Dïï gia xi gïn dagitoagi aapimï xi gïn bupuirumadagi go yaatabogami ïgai aidï gia ka mai bïï sudakami bhïiyi antaada aapimï gïn maitïki. Gïn nukadabïrai tudu saidi bïï sudakami bhïna aapimï gïn maitïki.

Apokalipsis 2:23

Dai kodamu aanï ix makïdï ïïgidi aatagidï ïpï. Aidï gia bïïxi go buaboitudadami ix makïdï aipakoga gïn ïmpaidiña maatï nïijadamu sai aanï bïïxi maatï ixtumaxi tïtïitoi odami dai ixtumaxi ibuada ïrhidiña ïpï. Dai maatïkamu ïgai xi aanï maakimu ixtumaxi ajïakagi bïïxi odami. Gobai ïr go ñoki ix makïdï bia aanï go soimaaxi ibuadami bïïtarï.

Apokalipsis 22:12

Daidi Suxi Kristo ikaiti, —Otoma ayimu aanï dai bhïidatikamu aanï maitïkidï bïïxi óídakami. Maakimu aanï bïïxi odami ixtumaxi ajïakagi tudu, ïïgi ixdukatai aatadui ïgai.