1 Korintios 2:7 - Northern Tepehuan Bible

⁷ Go tïgibudagai ix makïdï aagai aanï ïr Diuxi tïgibudadï ix makïdï odami mai maatïkana ïïki abhiadïrï. Gïn aagidamu aanï ix dukatai kaatï go Diuxi tïgibudadï. Daiñi, ïïki mai kia kïkibakai oidigi Diuxi ka podukai gï tïgito dai podukai dáí saidi Suxi Kristo bhai buadana ixdukatai gïr aïna gïïpi xadutudaragai. Gobai tudu ïr Diuxi tïgibudadï ix makïdï odami mai maatïkana ïïkioma.

Tepehuan Northern: Diuusi ñiooquidʌ utuducami oodamicʌdʌ

⁷ Baiyoma aagidiña aatʌmʌ istumaasi gʌrmamaatʌtulidi Diuusi istumaasi ʌʌgi ʌgai maatʌcatadai. Gomaasi gʌtʌtʌgitoitadai ʌgai maiquiaa cʌquivacai oidigi abiaadʌrʌ tʌtʌgitoitadai ʌgai isducatai cʌʌgacʌrʌ gʌrvuvaidagi, tʌsai tomastuigaco oidacana aatʌmʌ ʌgai ʌʌmadu.

1 Korintios 2:7 ပူးပေါင်းရင်းမြစ်များ

Mataibo 11:25

Dai bhodïrï Suxi aagidi ïmo ñoki Diuxi dai potïtïdai, —Aapi gin Oga, aapi bïïxi ïr Tïanïdami tïbagiana dai tami oidigi daama ïpï. Aa gia bhai gin ïrhidi aanï aapikïdï— itïtïdai. —Bhai gin ïrhidi maatïkatai sai tïtïgidi aapi gï tïgibudaga odami ix makïdï ïr aarhi dukai dai mai xii naana maaxi maatï. Ïxto aapi gï tïgibudaga sai mai maatïkana go odami ix makïdï gia poïrhidi ix ka kïïga maatï ixtumaxi tudu.

Mataibo 13:35

Podukai idui ïgai ix duakatai oja ïmo ñokituldiadamigadï Diuxi ïïki. Ïkiaxdïrï oja ïgai ix kaitiada agai Diuxi otosadï tudu. Daidi Diuxi ojadï ikaiti, —Maaxidaragai aatagikïdï gatïtïïgiadamu aanï ñoki go odami. Dai gatïïtïgiadamu aanï ixtumaxi ix makïdï tomarhi ïmo imidagai mai maatïkana ïgai aidï abhiadïrï xi kïkiba oidigi—.

Romanos 11:25

Gin aaduñi, ipïrhidi aanï xi maatïkagi aapimï ïmo maatïtuldaragai Diuxiañdïrï ï ix makïdï ïki abhiadïrï ïxtokikana. Dai aidï gia toma lïïchi mai gïgïrdukïdï gïn ïrhiadamu aapimï kaïkai idi maatïtuldaragai ix makïdï gïn aagidamu aanï. Daiñi, mai xu bïïxkïrï kaapakami ka agai iibhïadï go judidiu maiti ipïrhiditai xi buaboitudagi. Kapakamu ïgai mosïkaxi asta xïïxkadï aiyagi ix xïïkiduka agai buaboitudadami ix makïdï maiti ïr judidiu.

Romanos 8:29

Diuxi ka ïkiaxdïrï maatïkatadai xorai aatïmï daidi ïr ïko bubaidadïka agai. Dai ïgai dáí sai aatïmï ïpïamaaxkana gï maara Suxi Kristo. Podukai Suxi Kristo bïïxi adaama ïr namïakami dai muidu aatïmï ix makïdï ïr susukurhidï.

Romanos 8:30

Diuxi podukai dáí sai aatïmï ïpïamaaxkana Suxi Kristo. Gïr báí ïgai dai kïïgakïrï gïr tïï. Gïr báí sai aatïmï ïpï gïr aiyagi bhai ïrhiaradï Suxi Kristo dai sai gïr aiyagi go xadutudaragai ix makïdï ïgai bia ïpï.

1 Korintios 2:1

Gin aaduñi, gïn tïgitobïrai ix tumaxi gïn aatagidiña aanï baasïkioma aidïxi tukamïrï gïn dibiji aanï dai gïn aagidi ix kaiti Diuxi ñokidï. Mai xu xi ïmo odami saitudakami dukai gïn aatagidiña aanï aidï dai maiti gïn aatagidiña aanï tami idi oidigi daama óídakami tïgibudadïkïdï ïpï.

Efesios 1:4

Daiñi, ïïki, mai kia kïkibakai oidigi, Diuxi gïr darai sai aatïmï ïr ïko bubaidadïkana bïïna darakatai aatïmï Suxi Kristo. Aidïpïrï ïkiaxdïrï kaxi ïko gïr bubaitutadai Diuxi saidi aatïmï ïr ïko darasadïkana daidi sai mai tipukana soimaaxi gïr abhana ixtumaxi gïpiïrï gïr daitudagi ixtumaxi Diuxi buitapi.

Efesios 3:10

Dïï gia xibi ipïrhidi Diuxi xi tïtïañikarudï maatïkana xïï saitudaga Diuxi tïgibudadï. Sai tïtïañikarudï ix makïdï ïr gupudagai bipiakami dukai tïbagiana maatïkana tudu. Kaxkïdï xibi aatïmï buaboitudadamikïdï aatabuayi Diuxi dai aatïmïkïdï gatïtïïgidimi ïgai xïï kabami saitudaga tïgibudadï.

2 Timoteo 1:9

Daiñi, Diuxi kïïgakïrï gïr bubaitu dai gïr báí saidi ïr ïko darasadïkana aatïmï. Dai mai xu ix kïïga idui aatïmï xi kaxkïdï ïkobai gïr bubaitu ïgai dai bhaiyoma kïï tuiga dai ïgai podukai gï tïgito ïïki mai kia tipukatai oidigi. Kaxkïdï kïïgakïrï gïr bubaitu ïgai.

Hebreos 1:2

Dïï gia xibiapioma Diuxi otoi ïmai kïïrhi bamioma namïakami xi go ñiñokituldiadamigadï Diuxi. Otoi ïgai Maradï tudu sai gïr aiturhiña ñoki xibi karhioga ugiti agaitai oidigi. Diuxi Maradï ïgai tudu ix makïdï idui go oidigi. Dai Diuxi ka aagai sai Maradï ïr tuidadïka agai bïïxi ixtumaxi ix makïdï idui ïgai.

Hebreos 11:3

Daiñi, buaboitudai aatïmï Diuxi dai kaxkïdï kïïga maatï aatïmï sai go ïï ñokidïkïdï idui ïgai bïïxi ixtumaxi. Bïïxi ixtumaxi nïidi aatïmï idui ïgai tudu. Aidïpïrï mai tipukatadai kia bïïxi gobai ix makïdï nïidi aatïmï aipakoga xibi. Dai mos ño ïgai bai oidatu bïïxi gobai.

1 Pedro 1:11

Suxi Kristo Ibhïadï ka ïkiaxdïrï maatïturhitadai go ñiñokituldiadamigadï saidi Suxi Kristo soimaaxi taata agai dai sai gokiïrï oidaka agai naana maaxi bhai ïrhiaragai. Dai go ñiñokituldiadamigadï Diuxi maatïka ïrhiditadai ix tuigako daibuña agai bïïxi gobai dai xorai bïïtarïka agai gobai ïpï.

1 Pedro 5:1

Xibi ojamu aanï ïmo ñoki go bhaitï gukakamigadï go buaboitudadami bïïtarï. Gin kaïkabïrai, aanï ïpï ïr ïmo bhaitï kïakamigadï go buaboitudadami ïpï dai nïidi aanï aidïxi soimaaxi taatamaitadai Suxi Kristo. Aanï ïpï urabamu Suxi xïïxkadï dibiagi ïgai dai gï maaxitudagi xïïxi ïr gïdukami ïgai.

1 Pedro 5:10

Kïï tuiga Diuxi gïn bïïtarï tudu dai gïn báí ïgai saidi aapimï ïpï gïn ajiagi go gïdukami xadutudaragai ix makïdï biakamu ïgai bïïxkïrï bïïtarï. Aapimï gïn aji agai go xadutudaragai gobai bïïnakatai aapimï Suxi Kristo tudu. Dïï gia gï agai sai soimaaxi taatamadagi aapimï kia dïï gia mai xii tïbïragaka agai go soimaaxi taataragai. Dai gokiïrï bhai gïn buadamu Diuxi sai maiti gïn biïgakagi tomarhi ïmo ixtumaxi gïn ibhïdagïrï. Kïïga gïn gupurtuda agai ïgai aidï gïn ibhïdagïrï saidi mai tipukagi ixtukïdï dagitoagi aapimï gïn buaboidaraga. Po duñimu Diuxi kïï tuigakatai ïgai gïn bïïtarï tudu.

2 Pedro 1:3

Gin aaduñi, kaxi gïr maa Suxi Kristo bïïxi aïkatai ixtumaxi tïgito aatïmï buaboitudadami saidi bhaigakana aatïmï xi kïïga buañixikami oidakagi Diuxi buitapi. Podui ïgai ïïgi gubukarhigadïkïdï tudu Diuxikatai ïgai. Ka máí aatïmï Suxi Kristo tudu dai kaxkïdï gïr maa ïgai bïïxi ixtumaxi tïgito aatïmï. Gïr tïtïgidi ïgai xïïxi ïr gïdukami ïgai tudu dai xïïxi kïï tuiga ïpï dai ka maatïkatai aatïmï gobai ka ipïrhi aatïmï xi oijadagi. Gïr tïtïïgidi ïgai xïïxi ïr gïdukami ïgai dai xïï kïï tuiga dai gobai ïr ïmo abïnakidaragai dukai gïr bïïtarï ix urabagi aatïmï. Podukai gïr abïnaki ïgai ix urabagi aatïmï tudu.

Apokalipsis 13:8

Dai bhaitoma bïïxi oidigi daama óídakami xadutuada agai go kïixi Diuxi dukai. Dïï gia go odami ix makïdï ojixi go libroïrï ix makïdï bia go Arhi Kañiru ïgai gia mai xadutuada agai go gïï kïixi. Go Arhi Kañiru ïgai makïdï gï muatu dai bia ïmo libro xako ojixi odami ix makïdï bïïxkïrï bïïtarï óídaka agai. Aidï abhiadïrï xi mai kia kïkibatadai oidigi biakana ïgai go libro tudu. Dai odami ix makïdï ojixi ami libroïrï gia mai xadutuada agai go gïï kïixi.