1 Korintios 14:3 - Northern Tepehuan Bible

³ Dïï gia ix makïdï aagagi ñoki ix makïdï Diuxiañdïrï imïi ix makïdï jaa maatï kaïkagi aidï gia soikïi ïgai go gaa buaboitudadami. Kïïga gupurtudai ïgai buaboidaradï dai kïïga abïnakidi dai kïïga bhai ïrhiatudai ïpï.

Tepehuan Northern: Diuusi ñiooquidʌ utuducami oodamicʌdʌ

³ Baiyoma ʌgai ismaacʌdʌ aagai Diuusi ñiooquidʌ ʌgai gia oodami ʌʌmadu ñioocai, dai poduucai soicʌi ʌgai vaavoitudadami sai vaamioma cʌʌga vaavoitudana, maacatai ñiooqui dai baiʌʌliatudaitai.

1 Korintios 14:3 ပူးပေါင်းရင်းမြစ်များ

Lukas 3:18

Dai mui naana maaxi ñoki mamaakaiña go Juan go odami podukai aagiditai go bhai ïrhiaragai aatagi.

Hechos 13:15

Daidi go bhaitï gukakïdï ami kiupiïrï nïnïidi ojadï Moises dai aagidi odami ix kaiti gobai ïmadï ojadï jaa aagadami Diuxi ñokidï. Dai bhodïrï báí ïgai go Pabora ïmadï Bernabe daidi itïtïdai, —Gïr dadidakami aapimï, dai ix biakagi aapimï ïmo abïnakidaragai maaxi gïr aaduñi bïïtarï abïr aagada gobai dai abïnakiada gïr aaduñi— itïtïdai.

Hechos 14:22

Dai dïgabunukai ïgai bïïxi go kiikiïrï ïgai gamaakaiña gubukadagai abhana go buaboitudadami daidi gaabïnakidiña xi kïïgakïrï buaboidaiña ïgai. Dai aagidimi ïgai sai gï agaitadai kia xi odami naana maaxi soi ïrhiaragai taatagi xi gokiïrï ayimu ixtuigako gatïanïda agai Diuxi.

Hechos 15:32

Go Udaxi ïmadï Silas ïr aagadami Diuxi ñokidï ïpï dai bhai tïbïpi aatagidi ïgai go buaboitudadami dai abïnaki dai gupukaturhi gïn aatagikïdï.

Hechos 4:36

Dai ïmo buaboitudadami Jose tïgidukatadai. Ïgai ïr pipiixaradï Lebikaru dai Chipreañdïrï oidakami ïgai. Dai go ojotoxikami Bernabe agaiña ïgai. Go Bernabe tïtiaradï itïiya ïrhidi ïmo abïnakiadami.

Hechos 9:31

Dai aidï chïki tasai xioma óídakatadai go buaboitudadami Judeïrï dai Galileïrï dai Samarhiïrï mai tipukatai buidïrï bïïtïkami. Kïïga xadutudaiña ïgai Diuxi dai Diuxi Ibhïadï gamaakaiña gubukadagai xi ïgai bamioma kïïga muidaimi.

Romanos 12:8

Podukai ïpï ix makïdï gamaakiagi ñoki dai gaabïnakiadagi jaa xi kïïgioma buaboitudana, ïgai gï agai xi Diuxi gubukarhigakïdï gamaakiagi ñoki. Dai ix makïdï Diuxi maa gubukarhigai xi gamaakiagi ïgai ïïgi buxtuidadï Diuxi bïïtarï, gï agai xi mai tudadagi ïgai gï ibhïdagïrï gamaakaitai. Dai ix makïdï Diuxi maa gubukarhigai xi ïr ïmo bhaitï kïakamigadïkagi buaboitudadami gï agai xi kïïga aatabuadagi ïpï. Dai xi Diuxi maa ïmoko gubukarhigai xi maakiagi soiñi ix makïdï tïgitokagi jaa gï agai xi bïïxi bhai ïrhiaradïkïdï gamaakiagi ïgai.

Romanos 14:19

Kaxkïdï xibi tï gïr aaga iduñi ïïgi ixtumaxi gïr soiñana bai xioma óídakagi aatïmï gïr oigïdaitai aipakoga. Tï duñi ïïgi ix makïdï ïr soiñikagi ïpï xi bamioma gupurtudagi gïr buaboidaraga.

Romanos 15:2

Gï agai bhaiyoma xi bïïxkatai aatïmï bhai ïrhiatudagi go gaa ibuadatai ixtumaxi ïr soiñi ïgai bïïtarï bai bamioma gubuakagi ïgai buaboidaradï.

1 Korintios 10:23

Ïïmadutai aapimï buaboitudadami pokaitiña sai bia oigaragai ix ibuadagi ïïgi ixtumaxi iduña ïrhiada. Dïï aanï aagai sai maiti gï agai podukai. Mai xu ix bïïxi ix tumaxi duñagi ïmoko ïr soiñi. Mai xu ix bïïxi ix tumaxi iduñagi ïmoko soikïi jaa ix gïrhiagi buaboidaradï tudu.

1 Korintios 14:12

Kïïga maatï aanï tudu sai biaka ïrhidi aapimï go naana maaxi gubukarhigai ix makïdï gïr maakai Diuxi Ibhïadï. Dïï gia gï agai ix bamioma biaka ïrhiadagi aapimï gubukarhigai saidi ibuadana ixtumaxi bamioma soikïdagi buaboidaradï go gaa buaboitudadami.

1 Korintios 14:17

Dai tomaxi aapimï gia kïïga aagidagi Diuxi ix bhai gïn ïrhidi ïgaikïdï dïï maiti ïr ïmo soiñikamu gobai go gaa bïïtarï mai maatï kaïkatai ïgai gïn ñoki.

1 Korintios 14:26

Ipïrhidi aanï tudu ix maatïkagi aapimï sai gï agai ix ïr soiñikagi jaa bïïtarï bïïxi ixtumaxi ibuadagi aapimï ïmpaiñdaragïrï. Gï agai ix ïr soiñikagi gobai bïïxkatai bïïtarï sai bamioma gïrana buaboidaradï. Daiñi, xïïxkadï gïn ïmpaidadagi aapimï ïïmoko ganïyi ïrhidiña ïmo nïidagai dai ïïmoko biakana ïmo maatïtuldaragai bïïxkatai bïïtarï dai jaa aaga ïrhidiña ixtumaxi maatïturhi Diuxi dai jaa todian dukai ñokaiña ïma maaxi ñokikïdï. Dai jaa maaxi aagaiña ix tïiya ïrhidi. Dai bïïxi gobai gï agai ix ibuadagi aapimï sai podukai bamioma gïrana buaboidaradï bïïxkatai.

1 Korintios 14:31

Kïï bhaiga aapimï bïïxkatai ix gamaakadagi ñoki ix makïdï ïr Diuxiañdïrï tudu. Dïï gia gï agai xi ïpïgioma ñokada ïmoko dai gokiïrï ïmai dai mai xu ix ïmo buidakïdï ïmapi ñokada ïgai. Podukai bïïxkatai bhaigakamu ix maatï kaïkagi ñokidï dai bamioma bhïiyagi abïnakidaragai kaïkatai.

1 Korintios 8:1

Gin aaduñi, gin tïkakai aapimï go ojiïrï ix makïdï gin otoxi aapimï sa bhai kïïgadu ix aatïmï buaboitudadami ugiagi kuadagai ix makïdï gï dadaxdi go uubixi. Daiñi, kïïga maatï aatïmï sai go kuadagai ix makïdï gï dadaxdi uubixi maiti ïr ixtumaxi. Dïï maiti gï agai ix gïgïrdukïdï gïr ïrhiada aatïmï maatïkatai gobai. Maiti gï agai ix po gïr ïrhiada sai bamioma maatï aatïmï xi jaa tudu. ¿Tumaxi ïr soiñi gobai di? Gï agai bhaiyoma sai gïr oigïdada aipakoga. Ix gïr oigïdada aatïmï aidï gia gïr soikïdamu aipakoga ïpï sai bamioma gïrhiagi gïr buaboidaraga. Dai gobai gia ïr soiñi.

2 Korintios 1:4

Daiñi, Diuxi ïgai dai gïr bhai ïrhiatudai xïïxkadï taatagi aatïmï tomax makïdï soi ïrhiaragai. Dai kaxkïdï bhaiga aatïmï xi soikïdagi jaa xïïxkadï soimaaxi taatagi ïgai sai bhai gïn ïrhiadagi ïgai ïpï go galbaaxi bhai ïrhiaragaikïdï ix makïdï gïr mamaakai Diuxi xïïxkadï soimaaxi taatagi aatïmï.

2 Korintios 2:7

Dai bhaiyoma gï agai sai oigïldagi aapimï dai bhai ïrhiatudagi ïgai. Tadu maitï go soi ïrhiaragai dai dagito ïgai go buaboidaragai.

Efesios 4:29

Maiti abïr xigalnaxi ñoki aagada ïpï toma lachi. Gï agai xi aagada aapimï mosïkaxi ix makïdï ïr soiñi jaa bïïtarï xi kïïga abïnakiadan taadakagi ïgai kaïkatai.

Kolosenses 4:8

Pomaaxi bïïtarï aagidi aanï sai gamo imïna tudu. Aagidi aanï go Tikiko sai gïn aagidana ïgai ix tumaxi po gï buimi aatïmïkïdï sai podukai gïn abïnakidana ïgai.

1Tesalonicenses 2:11

Dai kïï maatï aapimï sai gïn oigïdaiña aatïmï gïr maamara dukai. Gïn ojoga dukai aatïmï tudu dai gïn abïnakidiña aatïmï dai gïn mamaakaiña ñoki ix dukatai gï agai ix óídakagi aapimï Diuxi maamaradïkatai. Kaxkïdï tudu Diuxi ïgai dai gïn báí saidi urabakana aapimï go ix makïdï Diuxi tïanïi sai podukai nïijadana aapimï xïï xigian dukai tïanïi Diuxi.

1Tesalonicenses 2:3

Dai go ix makïdï gïn aiturhi aatïmï gïr aatagi gobai kïïga ïr buaboi. Maiti gïn buirumagi aatïmï tudu dai bhaiyoma kïï sïïrhi gïn aagidi dai gïn tanïiña mïsai buaboitudaiña gïr aatagi. Dai tomarhi mai gaagaitadai aatïmï ixtumaxi ïïgi gïr bïïtarï gïn aagiditai gobai.

1Tesalonicenses 4:1

Gïr susukurhi, gïn aagida ïragai ïpï ïmo ñoki ix dukatai gï agai ix oidakagi buaboitudadami. Kaxi gïn aagidi aatïmï tudu ixdukatai ipïrhidi Diuxi ix óídakagi aapimï. Dai kïï maatï aapimï sai Suxi Kristo gïr maa ïmo sïïrhikami ix kaxkïdï sïïrhikïdï gïn abïnakida rïrhidi sai kïïga óídakagi aapimï ixdukatai Diuxi ipïrhidi. Dai ka podukai óídaga aapimï dïï bïïxkïrï gïn abïnakidimi aatïmï sai apia kïïgioma óídakagi aapimï ix dukatai ipïrhidi Diuxi.

1Tesalonicenses 4:18

Gï agai tudu xi gïn abïnakidada aapimï aipakoga aagaitai idi aatagi.

2 Tesalonicenses 3:12

Daiñi, bia aatïmï ïmo sïïrhikami ix makïdï gïr maa Suxi Kristo ix kaxkïdï tïanïi aatïmï ïgai sai mai paparïgakana dai sai kïï bhai maaxkami gaatabuadana bhaiyoma dai sai ïïgi maitïkïiña ixtuma kuadana.

1 Tomoteo 1:4

Aagidañi sai ka mai ïïgiada ïgai go naana maaxi aatagi ix makïdï ïr ïïgi odami aatagidï tudu. Ojoidi ïgai xi aatagadagi aagaitai ix tïtïgidukatadai óídakami ïïki. Tïbïpi aatagaiña ïgai gokïdï dai mai naato aagaiña ix tïtïgidu mos ïï mudukatai go ïïki óídakami. Aagidañi sai ka mai pobuada ïgai. Kaxkïdï tudu gïn bupui ñokaiña ïgai aagaitai pomaaxkami aatagi dai gobai maiti ibuayi soiñi. Mai soikïi gobai odami sai maatïkana Diuxi tïgibudadï tudu. Kaxkïdï tudu mosïkaxi buaboidaitai ix tumaxi ïr buaboi gï maatïkana Diuxi tïgibudadï. Dai go gaa aatagidï maiti ïr buaboi. Kaxkïdï gï bia aanï amïï Efesoana tudu sai daidana aapi go gaa sai ka mai pomaaxi aatagada.

1 Tomoteo 4:13

Gï dibidamu aanï amïka dïï asta xïxkadï aiyagi aanï gï agai xi gïn ïmpaidagi aapimï. Dai ami gïn ïmpaiñdaragïrï gï agai xi nïñiada aapi Diuxi ñokidï aagaitai go gaa buitapi ix kaiti gobai sai go gaa kaïkana. Gï agai xi podukai abïnakidada aapi go gaa dai tïtïïgiadagi ñoki.

1 Tomoteo 6:2

Dai xi ïr buaboitudadamikagi amudï ïmo pioñi aidï gia maiti gï agai go pioñi xi soi dukai nïijadagi amudï poïrhiditai sai ïïpïan namïga ïgai buaboitudadamikatai bïï gokatai. Bhaiyoma ïmo pioñi bia sïïrhikami xi bamioma ïïgiadagi dai xadutuadagi amudï xi ïr buaboitudadamikagi ïgai. Ïmo xïgïmï ïgai ïmadï amudï di. Dai kaxkïdï go pioñi gï agai xi kïïgioma gaatabuadagi dai ibuadagi soiñi xïgidï bïïtarï oigïdaitai ïgai. Gï agai xi gatïtïïgiada ñoki aapi Timoteo idikïdï ix makïdï gï aagidimi aanï. Tïañiñi bïïxi go buaboitudadami sai ïïgiada gobai.

Tito 1:9

Xïxkadï darasa agadagi aapi buaboitudadami bhaitï gukakamigadï gï agai xi kïïga gïn tïgito nïijada sa bhai buaboitudai ïgai go buaboikïdï aatagi ix makïdï gatïtïïgidi aatïmï. Ix kïïga buaboitudagi ïgai ix tumaxi ïr buaboi aidï gia bhaigakamu ïgai xi kïïga maakadagi ñoki go gaa buaboitudadami dai bhaigakamu xi abïnakidadagi go gaa ïpï sai kïïga oijadana gïr buaboidaraga. Dai podukai ïpï xi go bhaitï gukakami kïïga buaboitudagi ixtumaxi ïr buaboi aidï gia bhaigakamu ïgai xi mamaakadagi ñoki xorai buidïrï bïïtïkagi ixtumaxi ïr buaboi.

Tito 2:15

Podukai maakada aapi aatagi tudu dai abïnakidada go buaboitudadami sai kïïga ïïgiada gï ñoki. Kïïga bia aapi gubukarhigai xi maakadagi ñoki go buaboitudadami xïxkadï mai kïïga ibuadagi ïgai tudu. Kaxkïdï maiti gï agai tudu xi gï dagito aapi xi odami gajiadïrï biagi gï ñoki.

Tito 2:6

Dai gï agai xi maakada aapi ñoki go kïkïïrhi ïpï ix makïdï mai xii ïr kabami imïdami sai kïïga gïn tïgitokagi dai ibuadagi ixtumaxi ïr kïïga.

Tito 2:9

Dai buaboitudadami ix makïdï ïr pipioñikagi gï agai xi kïïga ïïgiadagi amudï. Gï agai xi ibuadagi ixtumaxi bhai ïrhiadagi amudï dai gï agai xi mai bui ñokadagi ïpï.

Hebreos 10:25

Dai maiti gï agai xi ïpïan buadagi aatïmï jaa buaboitudadami ix makïdï ka maiti ipïrhidi ix gïn ïmapagiadagi. Gï agai bhaiyoma xi gïr abïnakiadagi aatïmï aipakoga dai gupukatudagi gïr buaboidaraga. Dai kïï maatï aatïmï sai ka otoma dibiagai Suxi Kristo dai kaxkïdï bamioma gï agai xi gïr gupurtudagi dai abïnakiadagi aatïmï aipakoga xibi.

Hebreos 13:22

Gin oigïdakai abïr kïïga ïïgiada idi ojai ix makïdï ïr ïmo maakaragai ñoki dukai gïn bïïtarï. Maiti xii tïbïdu gobai tudu.

Hebreos 3:13

Gï agai tudu sai bïïx tasai gïn mamaakadagi aapimï ñoki aipakoga asta xïïxkadï ukami oidakagi aapimï tami oidigi daama. Podukai abïr gupurtuda gïn iibhïdaga aipakoga. Maiti abïr gïn dagito ix gïn bupuirumadadagi go soimaaxkami tudu tadu kabakatu gïn ibhïdaga Diuxi buidïrï dai podukai ka maiti ipïrhiada aapimï xi ïïgiadagi.

1 Pedro 5:12

Gin aaduñi, go Silbano ïgai dai gin soi ibuadatai aanï idi ojai. Dai ipïrhidi aanï sai maatïkagi aapimï sai ïgai ïr ïmo gïr aduñi Diuxi amadïrï dai kïïga sïïrhi aatabuayi ïgai. Idui aanï idi arhi ojai gïn bïïtarï gïn soiña in ïrhiditai sai tomaxi soimaaxi taatamaimi aapimï bïïxkïrï apia buaboitudana aapimï maatïkatai sai kïï tuiga Diuxi gïn bïïtarï. Daiñi, tami idi ojiïrï gïn maa aanï ñoki dai gïn aagidi ixtumaxi ïr buaboi saidi maatïkana aapimï sai Diuxi kïï tuiga gïn bïïtarï dai gïn maa oigaragai ix taatagi aapimï bïïxi gobai ix makïdï taatamaimi aapimï xibi. Kïïga ïr buaboi tudu sai kïï tuiga Diuxi gïn bïïtarï. Dai kaxkïdï apia kïïga buaboitudai aatïmï maatïkatai sai kïï tuiga Diuxi gïr bïïtarï tudu.

Udaxi 1:20

Gïn ïjïkobalda ïrhidi ïgai tudu. Dïï gia maiti abïr gïn dagitoda. Daiñi, kïïga maatï aapimï sai gïn oigïdai aanï gin aaduñi dai aanï aagai sai gï agai bhaiyoma ix gïn gupurtudagi aapimï aipakoga dai gïn soikïdagi aipakoga saidi bamioma gubuakami dukai buaboitudadagi aapimï. Sai kïïgioma oijadagi aapimï go buaboidaragai ix makïdï gïr maa Diuxi tudu. Dai daanïdabïrai Diuxi ïpï. Dai xïxkadï daanïdagi aapimï abïr ïïgiada Diuxi Ibhïadï saidi podukai ïgai gïn tïïgidana ix dukatai daanïdagi aapimï.